៣ថ្ងៃ នៃពិធីបុណ្យចូលឆ្នាំថ្មីប្រពៃណីខ្មែរមានពលរដ្ឋជាង១៣លាននាក់ចេញដើរលេងកម្សាន្តមានអ្នកស្លាប់១៨នាក់និងខូចខាតផ្ទះសម្បែងជាច្រើនខ្នងផងដែរ!
27-March-2024 / ទេសចរណ៏និងវប្បធម៌
ភ្នំពេញ៖ រយៈពេល៣ថ្ងៃនៃពិធីបុណ្យចូលឆ្នាំថ្មីប្រពៃណីជាតិខ្មែរ ចាប់ពីថ្ងៃទី១៤-១៦ ខែមេសា ឆ្នាំ២០២៣ នៅទូទាំងប្រទេសកម្ពុជាទទួលបានភ្ញៀវទេសចរសរុប១៣,១៨៧,៧៧១នាក់ ជាចំនួនច្រើនជាងកាលពីមិនទាន់មានវិបត្តិជំងឺកូវីដ១៩។
ចំនួនបងប្អូនប្រជាពលរដ្ឋដែលបានចូលរួមលេងកម្សាន្តនៅតាមទីតាំងដែលមានការរៀបចំកម្មវិធីសង្ក្រាន្ត ព្រមជាមួយបងប្អូនប្រជាពលរដ្ឋដែលលេងកម្សាន្តនៅតាមភូមិស្រុក និងកន្លែងជួបជុំនានា។ ព្រឹត្តិការណ៍អង្គរសង្ក្រាន្ត ដែលជាខួប១០ឆ្នាំនៃព្រឹត្តិការណ៍នេះ ក្រោមអធិបតីភាពដ៏ខ្ពង់ខ្ពស់ សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធិបណ្ឌិត និងការរៀបចំកម្មវិធីសង្ក្រាន្តនៅគ្រប់រាជធានីខេត្ត ពិសេសនៅតាមទីប្រជុំជនទីរួមខេត្ត ទីរួមស្រុក តំបន់គោលដៅទេសចរណ៍សំខាន់ៗ វត្តអារាម និងនៅតាមភូមិស្រុកនានា គឺជាកត្តាដែលបានទាក់ទាញឲ្យភ្ញៀវទេសចរ និងបងប្អូនប្រជាពលរដ្ឋដើរកម្សាន្តយ៉ាងច្រើនកុះករ ស្របពេលដែលពីមួយថ្ងៃទៅមួយថ្ងៃនៃពិធីបុណ្យ៣ថ្ងៃនេះ បណ្តារាជធានីខេត្តបានបង្កើនទំហំនៃការជួបជុំកម្សាន្តកម្មវិធីសង្ក្រាន្តនៅតាមទីប្រជុំជនសំខាន់ៗ ដូចជាការបន្ថែមឡានទឹកសម្រាប់បាញ់ទឹកកម្សាន្ត និងការប្រគុំតន្ត្រីបន្ថែមជាដើម។
ឯកឧត្តម ថោង ខុន រដ្ឋមន្ត្រីទេសចរណ៍បានបញ្ជាក់ថា «រយៈពេល៣ថ្ងៃ នៃពិធីបុណ្យចូលឆ្នាំថ្មីប្រពៃណីជាតិខ្មែរ ចាប់ពីថ្ងៃទី១៤-១៦ ខែមេសា ឆ្នាំ២០២៣ នៅទូទាំងប្រទេសកម្ពុជាទទួលបានភ្ញៀវទេសចរសរុប១៣,១៨៧,៧៧១នាក់ ក្នុងនោះភ្ញៀវជាតិមានចំនួន១៣,១៣២,០៨០នាក់ និងភ្ញៀវអន្តរជាតិមានចំនួន៥៥,៦៩១នាក់»គឺជាចំនួនដ៏ច្រើនលើសលុបហួសពីការរំពឹងទុក និងច្រើនជាងពេលមុនវិបត្តិជំងឺកូវីដ-១៩ទៅទៀត។
បើតាមឯកឧត្តម ថោង ខុន បានឲ្យដឹងថា ចំនួនភ្ញៀវទាំងជាង១៣លាននាក់នេះ គឺរដ្ឋបាលរាជធានី-ខេត្តបានរាប់បញ្ចូលទាំងភ្ញៀវទេសចរដែលទៅលេងកម្សាន្តនៅតាមរមណីយដ្ឋានទេសចរណ៍ គោលដៅទេសចរណ៍ ទីតាំងដែលមានការរៀបចំកម្មវិធីសង្ក្រាន្ត ព្រមជាមួយប្រជាពលរដ្ឋដែលលេងកម្សាន្តនៅតាមភូមិ/ស្រុក និងកន្លែងជួបជុំនានាទូទាំងប្រទេស។គោលដៅទេសចរណ៍សំខាន់ៗរយៈពេល៣ថ្ងៃនេះ រួមមាន៖ ខេត្តសៀមរាប ២,១២០,៣៧៣នាក់, ខេត្តបាត់ដំបង ១,៥០០,១៦៨នាក់, ខេត្តកំពង់ចាម ១,៤០៨,៨១១នាក់, រាធានីភ្នំពេញ ១,០៨០,៥០៩នាក់, ខេត្តព្រះសីហនុ ៨៨៧,៨៩៣នាក់, ខេត្តកំពត ៨៧០,៣៩៩នាក់, ខេត្តស្វាយរៀង ៧៦០,៣៩៩នាក់, ខេត្តកំពង់ឆ្នាំង ៧៣៩,១៥៩នាក់, ខេត្តបន្ទាយមានជ័យ ៦៥០,០១៣នាក់ និងខេត្តកំពង់ស្ពឺ ៥១២,៨៩៨នាក់។
រដ្ឋមន្ត្រីក្រសួងទេសចរណ៍បានវាយតម្លៃបានថា «ចរន្តភ្ញៀវទេសចរដ៏ច្រើនកុះករមិនធ្លាប់មានក្នុងឱកាសចូលឆ្នាំនេះ គឺបានមកពីការជឿជាក់លើភាពស៊ាំសហគមន៍ក្នុងការគ្រប់គ្រងជំងឺកូវីដ-១៩ ការរៀបចំព្រឹត្តិការណ៍កម្សាន្តដ៏សម្បូរបែប ពិសេសព្រឹត្តិការណ៍អង្គរសង្ក្រាន្ត និងការធានាបាននូវសុខសន្តិភាពពេញលេញ ដែលអនុញ្ញាតឱ្យប្រជាពលរដ្ឋដើរកម្សាន្តបានទូទាំងប្រទេសដោយឥតភ័យព្រួយ»។ សភាពការណ៍សន្តិសុខ សណ្តាប់ធា្នប់ សុវត្ថិភាព ការគ្រប់គ្រងចរន្តភ្ញៀវ និងការគ្រប់គ្រងគុណភាពនិងតម្លៃសេវាកម្មទេសចរណ៍នានា គឺមានភាពល្អប្រសើរច្រើន ។
ទោះបីយ៉ាងណាយើងមានការសោកស្តាយដោយសាររយៈពេល ៣ថ្ងៃ នៃពិធីបុណ្យចូលឆ្នាំខ្មែរ ៖មានមនុស្ស ស្លាប់ចំនួន ១៨នាក់ និងរបួសធ្ងន់ស្រាល ៧៧នាក់ ដោយសារគ្រោះថ្នាក់ចរាចរណ៍ កើតឡើងចំនួន៤៣លើកផងដែរ។តែបើប្រៀបជាមួយឆ្នាំមុនមានការថយចុះ។មានគ្រោះអគ្គិភ័យកើតឡើងចំនួន១៥ករណី នៅទូទាំងប្រទេស។ ក្នុងនោះ ខេត្តបន្ទាយមានជ័យ ១ករណី, កំពង់ចាម ១ករណី, បាត់ដំបង ១ករណី, កណ្ដាល ១ករណី, ព្រះវិហារ ១ករណី, កំពង់ធំ ១ករណី, ស្វាយរៀង ១ករណី, ភ្នំពេញ ២ករណី, កំពត ។នេះបើតាមសេចក្តីរាយការណ៍របស់នាយកដ្ឋាននគរបាលបង្ការ ពន្លត់អគ្គីភ័យ និងសង្គ្រោះ នៃអគ្គស្នងការដ្ឋាននគរបាលជាតិ ។ចំនួននេះការកើនឡើងចំនួន៨ករណី បើប្រៀបធៀបនឹងរយៈពេលដូចគ្នា កាលពីឆ្នាំកន្លងទៅ។
សមត្ថកិច្ចបានគូសបញ្ជាក់ទៀតថា ក្នុងចំណោមហេតុការណ៍ដែលកើតឡើងនេះ មិនបណ្ដាលឲ្យមានពលរដ្ឋណាម្នាក់បាត់បង់អាយុជីវិតនោះទេ ពោលគ្រាន់តែរបួសមនុស្សម្នាក់ និងបំផ្លាញផ្ទះ១៣ខ្នង, បន្ទប់៦, ឃ្លាំង១ខ្នង និងរថយន្ដចំនួន៤គ្រឿង។ដោយឡែកខ្យល់កន្ត្រាក់ក៏បានបង្កឲ្យមានការខូចខាតផ្ទះសម្បែងប្រជាពលរដ្ឋជាង២០០ខ្នងផងដែរ.
ដោយឡែកការប្រើប្រាស់អ៊ីនធឺណិត របស់ភ្ញៀវទេសចរជាតិ និងអន្តរជាតិនៅខេត្តសៀមរាប និងការសាទរពីសាធារណជនចំពោះ WiFi សាធារណៈ ក្រសួងប្រៃសណីយ៍និងទូរគមនាគមន៍ សហការជាមួយសហភាពសហព័ន្ធយុវជនកម្ពុជា បន្តផ្តល់ជូនការប្រើប្រាស់សេវាអ៊ីនធឺណិត ល្បឿនលឿនដោយឥតគិតថ្លៃ ក្រោយព្រឹត្តការណ៍អង្គរសង្ក្រាន្ត បានបញ្ចប់ដោយជោគជ័យ ។ភ្ញៀវទេសចរណ៍ជាតិ និងអន្តរជាតិ ស្វែងរកទីតាំង WiFi សាធារណៈ ទាំង ១៦ តាមតំណភ្ជាប់ ឬ ស្កេន QR Code ក្នុងរូបខាងក្រោម ឬផ្ទាំងបង្ហាញនៅតាមទីតាំងជាក់ស្តែង ដែលបានកំណត់ ដើម្បីភ្ជាប់ WiFi ។តំណភ្ជាប់ទីតាំង WiFi សាធារណ: https://mptc.gov.kh/public-wifi
