លោក ចូ បៃដិនទៅដល់អ៊ុយក្រែនស្ងាត់ៗនិងសន្យាឈរជាមួយក្រុងកៀវគ្រប់កាលៈទេសៈ
03-April-2024 / ព័ត៌មានអន្តរជាតិ
ប្រទេសអ៊ុយក្រែន៖ ប្រធានាធិបតីអាមេរិក លោក ចូ បៃដិន បានប្រកាសផ្តល់ជំនួយយោធាថ្មីដល់អ៊ុយក្រែន ក្នុងអំឡុងពេលទស្សនកិច្ចដោយមិនប្រកាសទុកមុន ទៅកាន់រដ្ឋធានីអ៊ុយក្រែននៅថ្ងៃចន្ទ ទី២០ ខែកុម្ភៈនេះ ដោយបង្ហាញពីសាមគ្គីភាពជាមួយក្រុងកៀវ មុនថ្ងៃខួប១ឆ្នាំនៃការលុកលុយរបស់រុស្ស៊ីលើអ៊ុយក្រែន។ ទីភ្នាក់ងារសារព័ត៌មាន AFP នៅថ្ងៃចន្ទ ទី២០ ខែកុម្ភៈ ឆ្នាំ២០២៣បានឲ្យដឹងថាស៊ីរ៉ែនបានបន្លឺសំឡេងពេញរដ្ឋធានីអ៊ុយក្រែន ខណៈដែលលោក បៃដិន បានទៅបំពេញទស្សនកិច្ចនៅទីក្រុងកៀវ ដើម្បីពិភាក្សាជាមួយប្រធានាធិបតីអ៊ុយក្រែ លោក វ៉ូឡូឌីមៀ ហ្សេលេនស្គី ប៉ុន្តែមិនមានរបាយការណ៍អំពីការបាញ់មីស៊ីល ឬការវាយប្រហារតាមផ្លូវអាកាសរបស់រុស្ស៊ីឡើយ។
លោក ហ្សេលេនស្គី បានលើកឡើងថា ដំណើរទស្សនកិច្ចរបស់ លោក បៃដិន គឺជាសញ្ញាដ៏សំខាន់បំផុតនៃការគាំទ្រសម្រាប់ប្រជាជនអ៊ុយក្រែនទាំងអស់។លោក បៃដឹនប្រធានាធិបតីអាមេរិក បាននិយាយថា វ៉ាស៊ីនតោននឹងឈរជាមួយអ៊ុយក្រែនគ្រប់ស្ថានការណ៍ទាំងអស់។ រហូតមកដល់ពេលនេះ សហរដ្ឋអាមេរិក គឺជាអ្នកផ្តល់ជំនួយយោធាដ៏ធំបំផុតដល់អ៊ុយក្រែន ការពារខ្លួនប្រឆាំងនឹងការឈ្លានពានរបស់រុស្ស៊ី។
ក្នុងដំណើរទស្សនៈកិច្ចដោយមិនប្រាប់ជាមុននេះ លោក បៃដិន សន្យាថា ទីក្រុងវ៉ាស៊ីនតោននឹងផ្តល់កញ្ចប់ជំនួយយោធាថ្មីមួយដែលមានតម្លៃ ៥០០លានដុល្លារដល់ទីក្រុងកៀវ ដែលនឹងត្រូវប្រកាសនៅថ្ងៃអង្គារសប្តាហ៍នេះ ដោយនឹងរួមបញ្ចូលទាំងគ្រាប់រំសេវបន្ថែមទៀត សម្រាប់ប្រព័ន្ធមីស៊ីលកាំភ្លើងធំចល័ត។
គួរបញ្ជាក់ថា នៅថ្ងៃចន្ទនេះ ប្រធានាធិបតីអាមេរិក លោក ចូ បៃដិន បានធ្វើដំណើរទៅដល់ទីក្រុងកៀវ ដោយពុំមានការប្រកាសឱ្យដឹងជាមុននោះឡើយ មុនគម្រប់ខួប ១ឆ្នាំគត់នៃសង្គ្រាមឈ្លានពានរបស់រុស្ស៉ីនៅអ៊ុយក្រែនកាលពីថ្ងៃទី២៤កុម្ភៈឆ្នាំ២០២២២។ កាលពីខែធ្នូ ឆ្នាំ២០២២ លោក ហ្សេលេនស្គី បានបំពេញទស្សនកិច្ចចេញប្រទេសជាលើកដំបូង កំលុងពេលមានសង្គ្រាម ទៅកាន់រដ្ឋធានីវ៉ាស៉ីនតោនរបស់សហរដ្ឋអាមេរិក.។
កន្លងមកនេះ សេតវិមានបានប្រកាសថា លោក បៃដិន នឹងធ្វើទស្សនកិច្ចទៅកាន់ប្រទេសប៉ូឡូញ ដែលនៅជាប់អ៊ុយក្រែន ក្នុងថ្ងៃអង្គារសប្តាហ៍នេះ សម្រាប់ឱកាសខួប១ឆ្នាំ បន្ទាប់ពីរុស្ស៉ីបានលើកទ័ពចូលឈ្លានពានអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២។ ក្នុងការប្រកាសនោះ សេតវិមានបានអះអាងថា លោក បៃដិន ពុំមានផែនការជួបជាមួយលោក ហ្សេលេនស្គី ឬធ្វើដំណើរមកកាន់ទីក្រុងកៀវទេ។ បន្ទាប់ពីអ៊ុយក្រែនលោកចូបៃដិន ត្រូវមានជំនួបជាមួយសមភាគីប៉ូឡូញនៅថ្ងៃអង្គារទី២១កុម្ភៈ បន្តដោយជំនួបជាមួយប្រមុខដឹកនាំប្រទេសនៅអឺរ៉ុបខាងកើតចំនួន ៩ប្រទេសផ្សេងទៀត ដែលដូចប៉ូឡូញ ជាសមរភូមិជួរមុខរបស់អូតង់ នោះគឺ លេតូនី លីទុយអានី ប៊ុលហ្ការី ហុងគ្រី សាធារណរដ្ឋឆែក រូម៉ានី និងស្លូវ៉ាគី។
ដោយឡែកនៅប្រទេសរុស្ស៊ីវិញកាសែតក្នុងស្រុករបស់រុស្ស៉ីបានរាយការណ៍ថា មន្ត្រីការទូតកំពូលរបស់ប្រទេសចិន លោក វ៉ាង យី (Wang Yi) បានមកដល់ទីក្រុងមូស្គូ នៃប្រទេសរុស្ស៉ីហើយ ដើម្បីពិភាក្សាអំពីផែនការសន្តិភាព ដែលអាចកើតមានសម្រាប់អ៊ុយក្រែន។ទីភ្នាក់ងារសារព័ត៌មាន AFP នៅថ្ងៃចន្ទ ទី២០ ខែកុម្ភៈ ឆ្នាំ២០២៣បានផ្សាយឲ្យដឹងថា៖កាសែត Kommersant បានរាយការណ៍ថា គោលបំណងសំខាន់នៃដំណើរទស្សនកិច្ចរបស់ លោក វ៉ាង គឺដើម្បីបង្កើនតួនាទីរបស់ទីក្រុងប៉េកាំង នៅក្នុងកិច្ចព្រមព្រៀង សម្រាប់អ៊ុយក្រែន។
កំលុងសន្និសីទស្តីពីសន្តិសុខ ដែលរៀបចំឡើងក្នុងទីក្រុងមូនិច (Munich) នៃប្រទេសអាល្លឺម៉ង់ លោក វ៉ាង បានរំលឹកឡើងវិញនូវការអំពាវនាវឲ្យមានកិច្ចសន្ទនាគ្នា និងស្នើដល់បណ្តាប្រទេសអឺរ៉ុប ឲ្យ «គិតដោយអត់ធ្មត់» អំពីវិធីបញ្ចប់សង្គ្រាម។ លោក វ៉ាង ក៏បាននិយាយផងដែរថា មានកងកម្លាំងមួយចំនួនហាក់ដូចជា មិនចង់ឲ្យការចរចាទទួលបានជោគជ័យ ឬដើម្បីឲ្យសង្គ្រាមឆាប់បញ្ចប់នោះទេ តែមិនបានបញ្ជាក់ពីកងកម្លាំងណាមួយ ដែលលោកចង់សំដៅទៅដល់នោះឡើយ។គួរបញ្ជាក់ថា រដ្ឋមន្ត្រីការបរទេសអ៊ីតាលី នៅថ្ងៃសុក្រសប្តាហ៍មុនបាននិយាយថា ប្រធានាធិបតីចិន លោក ស៉ី ជិនពីង គ្រោងថ្លែង «សុន្ទរកថាសន្តិភាព» នៅក្នុងខួបនៃការឈ្លានពានអ៊ុយក្រែនគម្រប់១ឆ្នាំ ដែលបានចាប់ផ្តើមកាលថ្ងៃទី២៤ ខែកុម្ភៈ ឆ្នាំ២០២២៕
