អ្នកត្រូវធ្វើដំណើរតាមផ្លូវជាតិលេខ៤ភ្នំពេញសីហនុសុំវាងតាមផ្លូវជាតិលេខ៣សិន
30-May-2025 / សន្តិសុខសង្គម
ព្រះសីហនុ៖ កំណាត់ផ្លូវជាតិលេខ៤ពីភ្នំពេញទៅខេត្តព្រះសីហនុ ប្រឈមនឹងការផ្អាកធ្វើចរាចរណ៍ ដោយសារកម្ពស់ទឹកស្ទឹងសំរោងបានហក់ឡើងខ្លាំង ខណៈដែលខេត្តព្រះសីហនុ និងខេត្តកោះកុងនៅបន្តរងនូវទឹកភ្លៀងជាប់ៗគ្នារយៈពេលប៉ុន្មានថ្ងៃមកនេះ។ ទាក់ទងទឹកជំនន់នេះរដ្ឋបាលខេត្តព្រះសីហនុ បានប្រកាសផ្អាកចរាចរណ៍ ជាបណ្ដោះអាសន្ន ផ្លូវជាតិលេខ៤ ត្រង់ចំណុចស្ពានសំរោង ស្ថិតក្នុងភូមិស្ទឹងសំរោង ឃុំអូរបាក់រទេះ ស្រុកកំពង់សីលា ចាប់ពីម៉ោង ៥ ល្ងាចថ្ងៃទី១២ ខែកក្កដា ឆ្នាំ២០២២ នេះ ដោយសារជំនន់ទឹកភ្លៀង ជន់ខ្លាំង រហូតលិចផ្លូវជាតិ ។
សេចក្ដីជូនដំណឹង របស់រដ្ឋបាលខេត្ដព្រះសីហនុបញ្ជាក់ថាៈ ” សូមធ្វើការផ្អាក ចរាចរណ៍ បណ្តោះអាសន្ន ចំពោះយានយន្តគ្រប់ប្រភេទ ត្រង់ចំណុចគីឡូម៉ែត្រលេខ ១១៥-១១៦ ស្ថិតក្នុងភូមិស្ទឹងសំរោង ឃុំអូរបាក់រទេះ ស្រុកកំពង់សីលា ខេត្តព្រះសីហនុ ចាប់ពីម៉ោង ១៧ៈ០០នាទី ល្ងាច ថ្ងៃទី១២ ខែកក្កដា ឆ្នាំ២០២២ នេះតទៅ រហូតដល់មានការជូនដំណឹង ជាថ្មី ” ។ប្រជាពលរដ្ឋ ដែលត្រូវធ្វើដំណើរ តាមផ្លូវជាតិលេខ ៤ ពិសេសត្រង់ចំណុចខាងលើ សូមរកផ្លូវវាងជាបណ្ដោះអាសន្នសិន ដើម្បីជៀសវាងនូវគ្រោះថ្នាក់ ដែលអាចកើតឡើង ដោយប្រការណាមួយ។ជាមួយគ្នានេះ កម្លាំងសមត្ថកិច្ច ក៏បានត្រៀមជួយសង្គ្រោះប្រជាពលរដ្ឋ ដែលកំពុងទទួលរងគ្រោះ ដោយសារស្ថានភាពគ្រោះទឹកជំនន់ បង្កឲ្យមានផលប៉ះពាល់ ដល់ការរស់នៅ និងដំណាំរបស់ប្រជាពលរដ្ឋ នៅក្នុងភូមិក្រាំងអាត់ (ចំណុចក្រាំងអាត់ចាស់) ឃុំកំពង់សីលា ស្រុកកំពង់សីលា នេះផងដែរ។
សូមបញ្ជាក់ដែរថាសម្រាប់តំបន់ខាងលើផ្ទះរបស់ប្រជាពលរដ្ឋយ៉ាងហោចណាស់ ៣៧ខ្នង ក្នុងចំណោម ៤២ខ្នងផ្ទះ រងការជន់លិចដោយសារជំនន់ទឹកភ្លៀងនៅ ស្រុកកំពង់សីលា ខេត្តព្រះសីហនុ គិតត្រឹមព្រឹកថ្ងៃទី១២ ខែកក្កដា ឆ្នាំ២០២២។ ប៉ុន្ដែពុំមានករណីរងគ្រោះដល់អាយុជីវិតមនុស្ស ឬសត្វពាហនៈឡើយ។ គិតមកទល់ វេលាម៉ោង ១១:៣០នាទី ថ្ងៃទី១២ ខែកក្កដា ឆ្នាំ២០២២ ស្ថានភាពកម្ពស់ទឹក នៅស្ពានស្ទឹងសំរោង ចំណុចចន្លោះគីឡូម៉ែត្រលេខ ១១៥-១១៦ ក្នុងភូមិស្ទឹងសំរោង ឃុំអូរបាក់រទេះ ស្រុកកំពង់សីលា ខេត្តព្រះសីហនុ ទឹកឡើងមានកម្ពស់ ៥,២០ម៉ែត្រ ពីបាតស្ទឹង រីឯអាកាសធាតុកំពុងភ្លៀង។
តាមការសន្និដ្ឋាន សភាព ទឹកឡើងដល់កម្ពស់ ៥,៦០ម៉ែត្រ ទៅ ៥,៧០ម៉ែត្រ នឹងត្រូវប្រកាសអាសន្ន។
លោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧត្តុនិយម បានប្រាប់កាសែតថា ក្រៅពីនេះ នៅតាមបណ្តាខេត្តមួយចំនួនទៀត ក៏រងនូវជំនន់ទឹកភ្លៀងដែរ តែទាន់បង្កជាមហន្តរាយធំដុំអ្វីនៅឡើយ ខណៈដែលមានការរអិលធ្លាក់ថ្មនៅខេត្តព្រះវិហារ។ ក្រសួងធនធានទឹក និងឧតុនិយម នៅព្រឹកថ្ងៃទី១២ ខែកក្កដានេះ បានចេញសេចក្តីជូនដំណឹងមួយ ស្តីពីស្ថានភាពធាតុអាកាសមិនល្អនៅកម្ពុជាចាប់ពីថ្ងៃទី១៣ ដល់ ១៩ ខែកក្កដា ឆ្នាំ២០២២។
ក្រសួងធនធានទឹកបញ្ជាក់ថា ក្នុងអំឡុងមួយសប្ដាហ៍ខាងមុខនេះ ព្រះរាជាណាចក្រកម្ពុជា នឹងទទួលឥទ្ធិពលជាបន្តបន្ទាប់ ចាប់ពីថ្ងៃទី១៣-១៤ ខែកក្កដា ឥទ្ធិពលពីប្រព័ន្ធសម្ពាធទាប ITCZ ភ្ជាប់ទៅនឹងសម្ពាធទាបសកម្ម នៅលើសមុទ្រចិនខាងត្បូង និងខ្យល់មូសុងនិរតី ក្នុងកម្រិតពីមធ្យមទៅខ្លាំង។ ចាប់ពីថ្ងៃទី១៥-១៩ ខែកក្កដា ឥទ្ធិពលពីជ្រលងសម្ពាធទាបឥណ្ឌា និងខ្យល់មូសុង ក្នុងកម្រិតពីខ្សោយទៅមធ្យម។ ស្ថានភាពបែបនេះនឹងធ្វើឲ្យតំបន់នានានៅកម្ពុជាកើតមានភ្លៀងធ្លាក់ក្នុងកម្រិតពីតិចទៅបង្គួរ លាយឡំទៅដោយផ្គរ រន្ទះ និងខ្យល់កន្ត្រាក់ ហើយតំបន់មាត់សមុទ្រ នឹងអាចមានភ្លៀងធ្លាក់ក្នុងកម្រិតពីមធ្យមទៅច្រើន ដែលអាចបង្កជាជំនន់ទឹកភ្លៀងផងដែ។
