វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5308 នាក់
ម្សិលមិញ 5378 នាក់
សរុប 14084601 នាក់
ភ្នំពេញ៖ បន្ទាប់ពីស្ងាត់ស្ងៀមព្រោះកូវីត តារាស្រីពូកែក្បាច់រាំ និងស្ទីលតែងខ្លួនប្លែកៗ កញ្ញា ទេព បូព្រឹក្សត្រូវ បានដឹងថាលក់ឡានផ្ទាល់ខ្លួន យកប្រាក់ មកផលិតវីដេអូចម្រៀងថ្មីបែបបុរាណអង្គរប្លែកភ្នែក ។
ឃ្លីបវិដេអូខ្លីដកស្រង់ពីវីដេអូចម្រៀងបទ វីរនារី (Top of The Lady) បង្ហោះកាលពីថ្ងៃទី ១៦ ខែវិច្ឆិកានេះ បានបង្ហាញតារាចម្រៀងស្រីក្នុងបែបច្នៃប្រឌិតលំនាំបុរាណ ដោយបង្ហាញភាពក្លៀវក្លារឹងមាំជានារីចម្បាំង នៅក្នុងប្រាង្គប្រាសាទដ៏អស្ចារ្យ។ កញ្ញា ទេព បូព្រឹក្ស បានបរិយាយសំណេរយ៉ាងវែងដូច្នេះថា៖ «មហិច្ឆតា និងភាពអស្ចារ្យនៃកេរដំណែលបុព្វបុរសបុព្វការីខ្មែរគឺបានបន្សល់ទុកនូវភាពអស្ចារ្យ និងមហាសាលក្រៃលែង។ នេះគឺជាកាតព្វកិច្ចរបស់ខ្ញុំក៏ដូចជាកូនខ្មែរគ្រប់រូបក្នុងការចូលរួមរក្សា និងបង្ហាញទៅកាន់អម្បូរមនុស្សទូទាំងប្រទេស ទូទាំងទ្វីប ទូទាំងពិភពលោកឱ្យបានឃើញអំពីការបន្សល់ទុកនូវកេរមរតកដ៏មហិមា ដែលសូម្បីតែមាសទំហំប៉ុនភ្នំក៏មិនអាចប្រៀបបាន…»។
តារាចម្រៀង ទេព បូព្រឹក្ស បានបន្តថា៖ «…ហើយរឹតតែមិនអាចនឹងយកមកកាត់ថ្លៃបានដោយសេចក្តីដឹងគុណចំពោះមាតាបិតាថែរក្សាដែនដីសុវណ្ណភូមិជាម្ចាស់ដ៏ប្រាកដ កូនសូមថ្វាយនូវស្នាដៃនេះទុកជាសារ ក៏ដូចជាការបំផុសបំផុលដល់កូនខ្មែរគ្រប់រូបមិនថានៅទីនេះ ឬកូនខ្មែរដែលនៅទីណាឱ្យតែមានឈាមជាខ្មែរឱ្យបានដឹងថា នេះជាសមិទ្ធផលដែលកើតចេញពីសេចក្តីប្រាថ្នារបស់កូនខ្មែរម្នាក់នេះ មុននឹងបិទភ្នែកត្រឡប់ទៅឋានវិញ កូនក៏បានធ្វើរឿងគប្បីដើម្បីមាតាបិតា និងដើម្បីដូនតាហើយ»។
តារាស្រីល្បីធើឬកញ៉េកញ៉ក់ បានបន្តទៀតថា៖ «សំណេរចុងក្រោយនេះសម្រាប់វីរនារីទូទាំងសកល ចូរចាំថា អ្នកគឺជាមាតា អ្នកគឺជាស្តេច អ្នកគឺជាមេទ័ព អ្នកគឺជាអ្នកប្រយុទ្ធដ៏អង់អាចចូរអ្នកមើលឱ្យឃើញនូវតម្លៃដ៏អស្ចារ្យរបស់អ្នក ដោយក្តីស្រឡាញ់ពីខ្ញុំ ទេព បូព្រឹក្ស បុត្រីនៃបុព្វបុរសខ្មែរ»។
រយៈពេលមិនដល់ ២៤ ម៉ោងផង វីដេអូខ្លីត្រឹមតែ ១៩ វិនាទីនេះ មានចំនួនទស្សនាជិត ៩ ម៉ឺនដង នៅលើយូធូប និងមានចំនួនចុច Like ៤៧ ពាន់ដងការបញ្ចេញមតិជិត ៣ ពាន់ និងការចែករំលែកបន្ត ៩,៥ ពាន់លើបណ្ដាញសង្គម។
បទចម្រៀង វីរនារី ដែល ទេព បូព្រឹក្សផលិតត្រូវបានបង្ហាញឲ្យដឹងថាគឺបាន លក់រថយន្តយកទុន ៦០០ លានរៀល។ម្ចាស់ស្នេហ៍របស់នាង ជី ដេវីត វិញ បានបង្ហាញថា៖ «ខ្ញុំដាក់ឈាមដាក់បេះដូងដើម្បីបទចម្រៀងនេះមិនមែនដើម្បីខ្ញុំ តែដើម្បីខ្មែរ ដើម្បីវប្បធម៌ដ៏អស្ចារ្យរបស់ខ្មែរ [ទង់ជាតិកម្ពុជា និងបេះដូង]»។