ខឹងខ្ចីលុយហើយធើឬកថោកមិនចង់សងម្ចាស់បំណុលប្រើកាំបិតប៉័ងតោទា
21-September-2026 / សន្តិសុខសង្គម
ខេត្តកណ្តាល៖បុរសម្ចាស់លុយចងការម្នាក់ឈ្មោះ ប៊ិនធីតាអាយុ២៧ឆ្នាំ គ្រាន់តែរឿងជំពាក់លុយរាប់ សងមិនទាន់ថ្ងៃកំណត់ ក៏ទាញកាំបិតបុ័ងតោកាប់ប្រហារកញ្ជ្រាំគ្មានត្រាប្រណីដៃទៅលើកូនបំណុល២នាក់ប្តីប្រពន្ធបណ្តាលអោយរងរបួសក្បាលយ៉ាងធ្ងន់ធ្ងរហូរឈាមស្រោចខ្លួន រួចក៏ជិះម៉ូតូរត់គេចខ្លួនបាន១យប់១ថ្ងៃ។
បន្ទាប់មក ត្រូវកម្លាំងសមត្ថកិច្ចប៉ុស្តិ៍នគរបាលរដ្ឋបាលគគីរធំសហការជាមួយនគរបាលជំនាញស្រុកដឹកស្រាវជ្រាវឃាត់ខ្លួនបានកាលពីវេលាម៉ោងប្រហែលជាង៣រសៀល ថ្ងៃទី១៤ ខែមិថុនា ឆ្នាំ២០២១ ខណៈដែលជនសង្ស័យរូបនេះត្រឡប់មកវិញសំងំលាក់ខ្លួននៅក្នុងផ្ទះប្រពន្ធស្ថិតក្នុងភូមិគគីរធំ១ ឃុំគគីរធំ ស្រុកកៀនស្វាយ ខេត្តកណ្តាល។ ជនល្មើសមានប្រពន្ធជាអ្នកដើរចងការរាប់លុយឈ្មោះ នូ ចាន់ថន ។ ចំណែកជនរងគ្រោះទាំង២នាក់ ប្តីឈ្មោះ ចយ ឆៃលីម (ហៅឆៃ) អាយុ៣៨ឆ្នាំ, និងប្រពន្ធឈ្មោះ សំរិទ្ធ ចាន់ អាយុ៣៦ឆ្នាំ មានទីលំនៅភូមិគគីរធំ2 ឃុំគគីរធំ ស្រុកកៀនស្វាយ។
អ្នកឃើញហេតុការណ៍ផ្ទាល់មានទាំងលោក អុឹម ធី ដែលជាមេភូមិគគីរធំ២ បូករួមជាមួយជនរងគ្រោះផងនោះ បានរៀបរាប់ប្រាប់អ្នកសារព៌តមានកាលពីព្រឹកថ្ងៃទី១៤ ខែមិថុនា ឆ្នាំ២០២១ថា ករណីនេះវាផ្តើមចេញពីរឿងជំពាក់លុយ ដោយប្រពន្ធជនសង្ស័យឈ្មោះ ប៊ិន ធីតា និងប្រពន្ធឈ្មោះ នូ ចាន់ថន ជាអ្នកមានដើរដាក់លុយរាប់អោយប្រជាពលរដ្ធគ្រប់ទីកន្លែង។ដោយឡែកសម្រាប់ជនរងគ្រោះទាំង2នាក់ប្តីប្រពន្ធក៍បានយកលុយរាប់ពីគ្រួសារជនសង្ស័យចំនួន៨លានរៀល តាំងពីឆ្នាំ២០១៦ផងដែរ។ជនរងគ្រោះបន្តថា ពួកគាត់យកលុយរាប់នេះបង់ប្រចាំថ្ងៃ គឺក្នុង1ថ្ងៃបង់10000រៀល។ប៉ុន្តែបង់បានតែរយៈពេលប្រហែល៣ឆ្នាំដំបូង គ្រួសារគាត់(ជនរងគ្រោះ)គ្មានលទ្ធភាពបង់ ក៍សូមអង្វរម្ចាស់បំណុល(ប្រពន្ធជនសង្ស័យ)បង់1ខែ10ម៉ឺននរៀលវិញ។ក៍ព្រមព្រៀងគ្នាកំណត់បង់នូវថ្ងៃទី10ជាប្រចាំរៀងរាល់ខែ គឺពួកគាត់ទទួលខុសត្រូវរហូត មិនហ៊ានគេចវេសឡើយ ព្រោះម្ចាស់បំណុលនេះកាចណាស់ តែកូនបំណុលណាបង់មិនទៀងទាត់ គាត់នឹងស្រែកជេរប្រមាថ រីឯប្តីវិញអាងអីគំរាមវ៉ៃកាប់ចាក់សម្លាប់កូនបំណុល។
ជនរងគ្រោះបន្តទៀតថា ក្នុងដំណាក់ការជំងឺកូវីដ-19កំពុងផ្ទុះរីករាលដាលជាសកលនោះ ធ្វើអោយមុខរបរដំកាំបិតរបស់គាត់ស្ងៀមស្ងាត់គ្មានអតិថិជនមកកម្មង់ធ្វើអោយសេដ្ធកិច្ចគ្រួសារជួបការលំបាកខ្លាំង។រកប្រាក់បង់អោយម្ចាស់បំណុលមិនទាន់លើសថ្ងៃកំណត់។លុះនៅថ្ងៃទី១២ ខែមិថុនា ឆ្នាំ២០២១ កូនស្រីម្ចាស់បំណុលបានមកឡូឡាទារលុយទាំងយប់វេលាម៉ោងប្រហែល៧។តែជនរងគ្រោះសូមអង្វរថា គាត់មិនទាន់មានលុយទេ ចាំដល់ថ្ងៃទី25 ខែមិថុនា ប៉ុន្មានថ្ងៃខាងមុខនេះទើបគាត់មានលុយបង់។ស្រាប់តែនៅល្ងាចថ្ងៃទី១៣ ខែមិថុនា ឆ្នាំ២០២១ ជនសង្ស័យឈ្មោះ ប៊ិន ធីតា ជិះម៉ូតូឌុបប្រពន្ធឈ្មោះ នូ ចាន់ថន ម្ចាស់បំណុល មកឈប់ចម្ងាយពីផ្ទះជនរងគ្រោះប្រហែលជា30ម៉ែត្រ រួចជនសង្ស័យស្រែកហៅកូនបំណុលជាប្តីអោយទៅជួប។ដោយមើលឃើញទឹកមុខម្ចាស់បំណុលមិនស្រួលខ្លាចមានរឿង ជនរងគ្រោះជាប្រពន្ធមិនអោយប្តីចេញទៅទេ សុខចិត្តដើរទៅនិយាយអង្វរប្រាប់ជនសង្ស័យម្ចាស់បំណុលដដែលៗថា ថ្ងៃទី២៥ ខែមិថុនា បានមានលុយបង់។
ក្រោយពីប្រាប់រួចជនរងគ្រោះក៍ដើរត្រឡប់មកផ្ទះវិញបានមួយភ្លេត ស្រាប់តែជនសង្ស័យឈ្មោះ ប៊ិន ធីតា ដើរសំដៅចូលទៅតម្រង់រកជនរងគ្រោះជាប្តីកំពុងអង្គុយផឹកកាហ្វេនៅផ្ទះឪពុកបង្កើតទល់មុខគ្នាជាមួយលោកមេភូមិ ហើយរូតការបូបដែលជនសង្ស័យស្ពាយជាប់នឹងខ្លួនទាញយកកាំបិតបុ័ងតោបំរុងកាប់ប្រហារទៅលើជនរងគ្រោះជាប្តី តែត្រូវប្រពន្ធជនរងគ្រោះឃើញក៍រត់មកទៅឃាត់ជ្រោងដៃជនសង្ស័យឡើងលើ ហើយស្រែកអោយប្តីរត់គេចខ្លួន។ភ្លាមនោះជនសង្ស័យក៍កាប់ស្ត្រីជនរងគ្រោះចំក្បាលដេកដួលសន្លប់ក្នុងថ្លុកឈាម រីជនរងគ្រោះជាប្តីរត់បានប្រហែលជាង10ម៉ែត្រពីហាងកាហ្វេក៍ជំពប់ជើងដួលត្រូវជនសង្ស័យរត់ទៅតាមកាប់កញ្ជ្រាំងចំក្បាលបណ្តាលអោយសន្លប់ស្តូកស្តឹងក្នុងថ្លុកឈាមដូចគ្នា។
អ្នកឃើញហេតុការណ៍និយាយថា ពេលជនសង្ស័យធ្វើសកម្មភាពនោះ វាចន្លោះចំពេលគ្មានមនុស្សទេ គឺមានតែលោកមេភូមិ និងចាស់ៗប៉ុន្មាននាក់អង្គុយផឹកកាហ្វេមិនហ៊ានចូលជួយឃាត់ទេ ព្រោះមើលមុខជនសង្ស័យសាហាវណាស់ដូចអ្នកញៀនថ្នាំអញ្ចឹង។បន្ទាប់ពីកាប់ជនរងគ្រោះហើយដើរកាន់កាំបិតក្រវីសំដៅទៅឡើងជិះម៉ូតូគេចខ្លួនភ្លាមៗតែម្តង។លោក វ៉េង កុសល អធិការរងនគរបាលស្រុកកៀនស្វាយ បានអោយដឹងថា ជនសង្ស័យនឹងតហរូវកសាងសំណុំរឿងតាមនីតិវិធី។
