វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2836 នាក់
ម្សិលមិញ 10264 នាក់
សរុប 14142018 នាក់
តៃវ៉ាន់៖ នៅថ្ងៃទី២០ ខែធ្នូ ឆ្នាំ២០២០ រដ្ឋាភិបាលតៃវ៉ាន់ បានបញ្ជូនកងទ័ពជើងទឹក និងកម្លាំងទ័ពអាកាសរបស់ខ្លួនទៅតាមឃ្លាំមើលសកម្មភាពរបស់នាវាចិន ក្រោយនាវាចម្បាំងអាមេរិក បានបើកកាត់ច្រកសមុទ្រនេះបាន១ថ្ងៃ។
នៅថ្ងៃទី២១ ខែធ្នូនេះ ទាក់ទងការឆ្លងកាត់ច្រកសមុទ្រខណ្ឌចែកដីគោក និងកោះតៃវ៉ាន់ កងទ័ពជើងទឹកចិន បាននិយាយថា៖ ការឆ្លងកាត់របស់នាវាចម្បាំង និងនាវាដឹកយន្តហោះចម្បាំងរបស់ខ្លួន គ្រាន់តែជាការធ្វើដំណើរឆ្ពោះទៅធ្វើសមយុទ្ធនៅក្នុងសមុទ្រចិនខាងត្បូងប៉ុណ្ណោះ។ កងទ័ពជើងទឹកចិន អះអាងបន្ថែមថា សមយុទ្ធនេះ គឺផ្អែកលើគម្រោងសមយុទ្ធប្រចាំឆ្នាំ ហើយនៅពេលអនាគត ចិននឹងរៀបចំ សមយុទ្ធស្រដៀងនេះឡើងទៀត ដោយផ្អែកលើតម្រូវការហ្វឹកហាត់។
កាលពី ថ្ងៃទី១៩ ខែធ្នូថ្មីៗនេះ នាវាពិឃាដបំពាក់មីស៊ីលប្រដេញអាមេរិកធុន USS Mustin បានបើកកាត់ច្រកសមុទ្រតៃវ៉ាន់ ដែលអាមេរិកសំអាងថាផ្អែកទៅតាមច្បាប់អន្តរជាតិ និងយុទ្ធសាស្ត្រសេរី និងបើកចំហនៅក្នុងតំបន់ឥណ្ឌូ-ប៉ាស៊ីហ្វិក។ ចំណែកការបើកកាត់ច្រកសមុទ្រតៃវ៉ាក់ជាលើកទី១២ក្នុងឆ្នាំ២០២០ ពីភាគីអាមេរិកនេះ ត្រូវបានចិនដីគោក ឃ្លាំមើលយ៉ាងខ្លាំង ព្រោះវាធ្វើឲ្យប៉ះពាល់ដល់អធិបតេយ្យ និងសន្តិសុខរបស់ខ្លួន។
ថ្ងៃបន្ទាប់ កងទ័ពចិន ក៏បានបញ្ជូននាវាដឹកយន្តហោះចម្បាំងផលិតក្នុងស្រុក សានតុង ដែលដាក់ឲ្យប្រតិបត្តិជាង១ឆ្នាំមុន រួមទាំងនាវាចម្បាំងចំនួន ៤គ្រឿងបន្ថែមទៀត បើកពីកំពង់ផែក្រុងតាលៀន ដែលស្ថិតនៅភាគខាងជើងនៃប្រទេស ឆ្ពោះមកច្រកសមុទ្រតៃវ៉ាន់និងបន្តទៅភាគខាងត្បូង។ រីឯតៃវ៉ាន់វិញ ដោយសំអាងលើសន្តិសុខ និងការពារដែនដីរបស់ខ្លួន បានបញ្ជាឲ្យនាវាចម្បាំងចំនួន ៦គ្រឿង និងយន្តហោះចម្បាំងចំនួន ៨គ្រឿង ឃ្លាំមើល និងតាមដានសកម្មភាព ចល័តរបស់នាវាចិន ដែលបានប្រតិបត្តិនៅក្នុងច្រកសមុទ្រតៃវ៉ាន់។
ក្រសួងការពារជាតិតៃវ៉ាន់ បានបញ្ជាក់នៅក្នុងសេចក្ដីថ្លែងការណ៍ថ្ងៃទី២០ ខែធ្នូ ដែលត្រូវបានចុះផ្សាយដោយទីភ្នាក់ងារព័ត៌មាន Reutersថា៖«ដោយមានការគាំទ្រពីប្រជាជន កងទ័ពតៃវ៉ាន់ មានទំនុកចិត្ត និងសមត្ថភាពធ្វើជាឆ្មាំការពារ, ធានាសន្តិសុខជាតិ និងការពារស្ថិរភាព និងសន្តិសុខក្នុងតំបន់»។
គួរបញ្ជាក់ថា ភាពតានតឹងរវាងរដ្ឋាភិបាលប៉េកាំង និងទីក្រុងតៃប៉ិ មួយរយៈចុងក្រោយនេះ បានកើនឡើងយ៉ាងខ្លាំង ដោយសារការបង្កើនទំនាក់ទំនងដ៏ជិតស្និទ្ធរវាងទីក្រុងវ៉ាស៊ីនតោន និងទីក្រុងតៃប៉ិ។ ព្រោះកន្លងទៅអាមេរិក បានផ្តល់ភ្លើងបៃតងក្នុងលក់អាវុធឲ្យតៃវ៉ាន់ និងដំណើរទស្សនកិច្ចរបស់មន្ត្រីជាន់ខ្ពស់ទៅតៃវ៉ាន់ជាបន្តបន្ទាប់។