នៅស្រីលង្កា គណបក្សកាន់អំណាចទទួលបានជ័យជម្នះដែលនឹងធ្វើឲ្យរដ្ឋបាលមួយនេះគ្រប់គ្រងដោយត្រកូលរ៉ាចាប៉ាសេ!?
02-November-2023 / ព័ត៌មានអន្តរជាតិ
ស្រីលង្កការ៖ គណៈកម្មាធិការរៀបចំការបោះឆ្នោតប្រទេសស្រីលង្កា បានប្រកាសនៅថ្ងៃទី៧ខែសីហា ថា៖ គណបក្សកាន់អំណាច (SLPP) របស់នាយករដ្ឋមន្ត្រីម៉ាហ៊ិនដារ៉ាចាប៉ាសេ( Mahinda Rajapaksa) ទទួលបានជ័យជម្នះក្នុងការបោះឆ្នោតសភា កាលពីថ្ងៃទី៥ ខែសីហា។
គណបក្សរបស់លោក Mahinda Rajapaksa ទទួលបានការគាំទ្រ ដល់ទៅ២ភាគ៣ ស្មើ១៤៥កៅអីក្នុងសភាដែលមាន២២៥កៅអី។ ឈរលំដាប់ទីពីរគឺគណបក្សប្រជាជនរួបរួមគ្នា (UNP) ដែលជាគណបក្សមានអាយុកាលយូរឆ្នាំហើយនៅក្នុងប្រទេសនេះទទួលបាន៥៤អាសនៈ ។ លំដាប់ទី៣គឺគណបក្សសម្ព័ន្ធប្រជាជនតាមិល (ITAK) ទទួលបាន១០កៅអីក្នុងសភា។
តាមគម្រោង លោកម៉ាហ៊ិនដារ៉ាចាប៉ាសេ(Mahinda Rajapaksa) នឹងចូលកាន់តំណែងអាណត្តិទី២នៅចុងសប្តាហ៍នេះតែម្តង។ នៅសប្តាហ៍ក្រោយ លោកនឹងប្រកាសសមាសភាពគណៈរដ្ឋមន្ត្រីថ្មីស្រីលង្កា។តាមរដ្ឋធម្មនុញ្ញស្រីលង្កា គណៈរដ្ឋមន្ត្រីថ្មីមានរដ្ឋមន្ត្រីច្រើនបំផុតត្រឹម៣០រូប ។ តាមគម្រោងគណៈរដ្ឋមន្ត្រីថ្មី មិនមានការផ្លាស់ប្តូរអ្វីច្រើននោះឡើយដោយសារតែគណៈរដ្ឋមន្ត្រីចាស់កំពុងដំណើរការទៅមុខយ៉ាងល្អបំផុត។
សូមបញ្ជាក់ថាប្រទេសស្រីលង្កាត្រូវបានកាន់កាប់ដោយត្រកូលរ៉ាចាប៉ាក់សេ ។ប្រធានាធិបតី ស្រីលង្កា លោកហ្គូតាបាយ៉ា រ៉ាចាប៉ាក់សេ គឺជាប្អូនប្រុស លោកម៉ាហិនដា រ៉ាចាប៉ាក់សេ ដែលមានតំណែងជានាយករដ្ឋមន្ត្រី ។តាមលទ្ធផលឈ្នះឆ្នោត២ភាគ៣នេះគណបក្សរបស់ បងប្អូនត្រកូលរ៉ាចាប៉ាក់សេត្រូវបានគេនិទ្សាន៍ថានឹងធ្វើកំណែទម្រង់ រដ្ឋធម្មនុញ្ញ ដែលរដ្ឋាភិបាលមុនបានតាក់តែងឡើង ដើម្បី កំណត់អំណាច និងអាណត្តិប្រធានាធិបតី ត្រឹមតែ២អាណត្តិ។
ប៉ុន្តែ បងប្អូនត្រកូល រ៉ាចាប៉ាក់សេ ដែលបានត្រលប់ទៅកាន់អំណាច សាជាថ្មី នៅស្រីលង្កា ខែវិច្ឆិកាឆ្នាំមុន ចង់កែប្រែរដ្ឋធម្មនុញ្ញឡើងវិញ ដើម្បីប្រមូលអំណាច តុលាការ ប៉ូលិស ឲ្យមកស្ថិតក្នុងដៃគ្រប់គ្រងរបស់ប្រធានាធិបតី។ ធ្វើកំណែទម្រង់ រដ្ឋធម្មនុញ្ញ ត្រកូលរ៉ាចាប៉ាក់សេលែងចង់ឲ្យមានការកំណត់អាណត្តិប្រធានាធិបតី តទៅទៀត។ ជាក់ស្តែង បងប្រុស របស់ប្រធានាធិបតី គឺលោកម៉ាហិនដា រ៉ាចាប៉ាក់សេ ដែលដឹកនាំ ស្រីលង្កា អស់១០ឆ្នាំ ជាមួយកណ្តាប់ដៃដែក រហូតដល់ឆ្នាំ ២០១៥ មិនអាចឈរឈ្មោះសម្រាប់ការបោះឆ្នោតប្រធានាធិបតីដោយសារតែការកំណត់អាណត្តិ នៅក្នុងច្បាប់រដ្ឋធម្មនុញ្ញនេះឯង។
តាមអង្គការការពារសិទ្ធិមនុស្ស មេធាវី អ្នកកាសែត និង សកម្មជនសិទ្ធិមនុស្ស បានរងការគំរាមកំហែងកាន់តែច្រើន ចាប់តាំងពីបងប្អូនត្រកូល រ៉ាចាប៉ាក់សេ ត្រលប់ចូលកាន់អំណាចសាជាថ្មី នៅស្រីលង្កា។ បងប្អូនរ៉ាចាប៉ាក់សេ មានស្នាដៃ បិទបញ្ចប់សង្គ្រាមស៊ីវិល ជាមួយពួកឧទ្ទាម តាមូលដែលបានសម្លាប់មនុស្សជាង ១សែននាក់ នៅស្រីលង្កា ប៉ុន្តែ គ្រួសាររ៉ាចាប៉ាក់សេ ក៏រងរិះគន់ណាស់ដែរថា បានប្រព្រឹត្តអំពើពុករលួយ ផ្តាច់ការ បែងចែកអំណាចតែក្នុងរង្វង់ បងប្អូនគ្រួសាររាចាប៉ាក់សេ។
អ្នកវិភាគមួយចំនួនវាយតម្លៃថា ដោយអាចត្រលប់ទៅឈរឈ្មោះ សាជាថ្មី សម្រាប់តំណែងប្រធានាធិបតី នៅស្រីលង្កា លោកនាយករដ្ឋមន្ត្រី ម៉ាហិនដា រ៉ាចាប៉ាក់សេ បានរៀបចំត្រួសត្រាយផ្លូវរួចហើយ ដើម្បីឲ្យ Namal កូនប្រុស របស់លោកដែលមានអាយុ ៣៤ឆ្នាំ អាចក្លាយជាប្រធានាធិបតីដឹកនាំស្រីលង្កា ទៅថ្ងៃអនាគត។ បច្ចុប្បន្ននេះ ក្រៅតែពីលោកម៉ាហិនដា បងប្អូនប្រុស២នាក់ ផ្សេងទៀត របស់លោកប្រធានាធិបតីហ្គូតាបាយ៉ា រ៉ាចាប៉ាក់សេ ក៏មានតំណែងសំខាន់ផងដែរ នៅក្នុងរដ្ឋាភិបាលស្រីលង្កា៕
