វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 3674 នាក់
ម្សិលមិញ 6677 នាក់
សរុប 14151250 នាក់
ភ្នំពេញក្រុមអង្គការសង្គមស៊ីវិលទាំង១៣១ បានសម្ដែងការខកចិត្តជាខ្លាំង ចំពោះការចាប់ខ្លួនដោយមិនត្រឹមត្រូវ និងការធ្វើទុកបុកម្នេញ ទៅលើអ្នកសារព័ត៌មាននៅក្នុងប្រទេសកម្ពុជា ជុំវិញការផ្សាយព័ត៌មានរបស់ពួកគាត់។ ក្រុមសង្គមស៊ីវិលក៏បានស្នើសុំដោយទទូចឱ្យរាជរដ្ឋាភិបាល ទម្លាក់ចោលការចោទប្រកាន់ទាំងអស់ចំពោះអ្នកសារព័ត៌មានទាំងនេះ និងសូមឱ្យបញ្ឈប់ការបង្ក្រាបចុងក្រោយនេះទៅលើសេរីភាពសារព័ត៌មាននៅក្នុងប្រទេសកម្ពុជា។
ចៅក្រមសាលាដំបូងខេត្តកំពង់ឆ្នាំង បានសម្រេចឃុំខ្លួនអតីតនាយកស្ថានីយវិទ្យុ FM 99.75MHz និងគេហទំព័រ រិទ្ធិសែន នៅពន្ធនាគារបណ្ដោះអាសន្ន ក្រោមបទចោទប្រកាន់«ញុះញង់ឱ្យប្រព្រឹត្តបទឧក្រិដ្ឋជាអាទិ៍»។ លោក ឈួន ស៊ីវិន អ្នកនាំពាក្យសាលាដំបូងខេត្តកំពង់ឆ្នាំងឲ្យដឹងថា ចៅក្រមស៊ើបសួរ លោក ផាន់ ឡេង បានសម្រេចឃុំខ្លួនលោក សុខ ឧត្ដម នៅពន្ធនាគារបណ្ដោះអាសន្ន បន្ទាប់ពីធ្វើការសាកសួររួច។ លោកថា៖ «លោក សុខ ឧត្តម បានញុះញង់ និងបំផុសបំផុលប្រជាពលរដ្ឋឱ្យធ្វើការតវ៉ា ដោយចោទប្រកាន់ថា អាជ្ញាធរយកដីបន្ទាយទាហាន និងដីរបស់រដ្ឋធ្វើជាកម្មសិទ្ធិផ្ទាល់ខ្លួន ដែលធ្វើឱ្យភាន់ច្រឡំ ធ្វើបាត់បង់ជំនឿលើអាជ្ញាធរ និងធ្វើឱ្យប៉ះពាល់សន្តិសុខសង្គម»។
លោក ឈួន ស៊ីវិន ឲ្យដឹងថា ដើមបណ្ដឹងដែលប្ដឹងអតីតនាយកស្ថានីយវិទ្យុ FM 99.75MHz និងគេហទំព័រ រិទ្ធិសែន លោក សុខ ឧត្ដម នោះ គឺមេបញ្ជាការតំបន់ប្រតិបត្តិការសឹករងកំពង់ឆ្នាំង លោក នូរ សំរិទ្ធ។ម្ចាស់ស្ថានីយវិទ្យុ 99.75MHz និងគេហទំព័រ «រិទ្ធិសែន» នៅខេត្តកំពង់ឆ្នាំង លោក សុខ ឧត្ដម ត្រូវបានសមត្ថកិច្ចចាប់ខ្លួនកាលពីថ្ងៃទី១៣ ខែឧសភា ឆ្នាំ២០២០។ សមត្ថកិច្ចចាប់ខ្លួនលោក សុខ ឧត្ដម ធ្វើឡើងបន្ទាប់ពីលោកចុះទៅឡាយផ្ទាល់រឿងប្រជាពលរដ្ឋតវ៉ា នៅមុខសាលាឃុំជៀប កាលពីថ្ងៃទី១២ ខែឧសភា ឆ្នាំ២០២០ ស្ថិតក្នុងស្រុកទឹកផុស ដែលប្រជាពលរដ្ឋចោទថា អាជ្ញាធរបានដកហូតដីធ្លីរបស់ពួកគេ។
ដោយឡែកលោក សុវណ្ណ រិទ្ធី និពន្ធនាយក TVFB ត្រូវបានចាប់ខ្លួនកាលពីដើមខែមេសាកន្លងទៅ ដោយចោទប្រកាន់ពី“បទញុះញង់ឱ្យប្រព្រឹត្តបទឧក្រិដ្ឋ ជាអាទិ៍” ក្រោយពីអ្នកកាសែតវ័យក្មេងរូបនេះ បានស្រង់សម្ដីផ្ទាល់របស់លោកនាយករដ្ឋមន្ត្រី ហ៊ុន សែន ដែលបានថ្លែងជាសាធារណៈ ក្នុងពេលដែលរដ្ឋាភិបាលឆ្លើយតបចំពោះបញ្ហារីករាលដាលជាសកលនៃវីរុសកូវីដ១៩។ អាជ្ញាបណ្ណផ្សាយព័ត៌មានរបស់អ្នកទាំងពីរ ត្រូវបានក្រសួងព័ត៌មាន លុបចោល ភ្លាមៗដោយមិនទុកឱកាសឲ្យបកស្រាយឬកែតម្រូវ។
ក្រសួងព័ត៌មានបានបញ្ជាក់នៅក្នុងលិខិតរបស់ខ្លួនកាលពីថ្ងៃទី១២ឧសភាថា លោក សុខ ឧត្តម បានធ្វើការផ្សព្វផ្សាយព័ត៌មានបំផ្លើសពីការពិត ញុះញង់ឱ្យកើតមានអំពើហិង្សា បង្កការរើសអើងពូជសាសន៍ បង្កអសន្តិសុខ និង ចលាចលសង្គម ដែលរំលោភបំពានលើវិជ្ជាជីវៈ និង កិច្ចសន្យា ដែលសាមីខ្លួនបានតម្កល់នៅក្រសួងព័ត៌មាន។
សូមបញ្ជាក់ដែរថា នៅដើមឆ្នាំ២០២០នេះ យ៉ាងតិចណាស់មានអ្នកសារព័ត៌មានជាង១០នាក់ ត្រូវបានកោះហៅ និងសាកសួរដោយសមត្ថកិច្ច ដោយសារការរាយការណ៍ព័ត៌មានរបស់ពួកគាត់។ ការបន្តចាប់ខ្លួន ឃុំខ្លួន និងការធ្វើទុក្ខបុកម្នេញផ្លូវច្បាប់ ចំពោះអ្នកសារព័ត៌មាន ដែលហ៊ានផ្សាយព័ត៌មានរិះគន់ គឺជាការរំលោភយ៉ាងធ្ងន់ធ្ងរចំពោះសិទ្ធិទទួលបានព័ត៌មានរបស់ប្រជាពលរដ្ឋកម្ពុជា។ នេះបើតាមក្រុមអង្គការសង្គមស៊ីវិល៕