វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 123 នាក់
ម្សិលមិញ 10264 នាក់
សរុប 14139305 នាក់
ថៃ៖ ក្នុងសេចក្តីប្រកាសព័ត៌មានមួយរបស់ក្រសួងការបរទេសអាមេរិកចេញនៅថ្ងៃទី១៦ ខែកក្កដា បានបញ្ជាក់ថា រដ្ឋាភិបាលក្រុងវ៉ាស៊ីនតោនរង់ចាំធ្វើការជាមួយរដ្ឋាភិបាលក្រុងបាងកកថ្មី ដើម្បីពង្រឹងឲ្យកាន់តែស៊ីជម្រៅថែមទៀតនូវសម្ព័ន្ធភាព និងភាពជាដៃគូរវាងប្រទេសទាំងពីរដែលបានកសាងជាមួយគ្នាជាងពីរសតវត្សមកហើយ។
ក្រសួងការបរទេសអាមេរិក ថាសម្ព័ន្ធភាពប្រទេសទាំងពីរនៅតែរឹងមាំ ហើយសន្យាថា នឹងនៅតែជួយថៃក្នុងការដើរតួនាទីជាអ្នកដឹកនាំក្នុងតំបន់ ក៏ដូចជាជួយគាំទ្រថៃដែលធ្វើជាប្រធានកិច្ចប្រជុំអាស៊ាននៅឆ្នាំនេះផងដែរ។ អាមេរិក ជឿជាក់ថា ចំណងមិត្តភាពរវាងប្រទេសទាំងពីរនឹងកាន់តែរឹងមាំថែមទៀត ដោយសារតែទាំងអាមេរិក និងថៃ គឺមានគោលបំណងរួមក្នុងការរក្សាសន្តិសុខ សន្តិភាព និងការរីកចម្រើនក្នុងតំបន់ឥណ្ឌូ-ប៉ាស៊ីហ្វិក ក៏ដូចជាពិភពលោកទាំងមូលផងដែរ។
ការប្រកាសគាំទ្ររបស់សហរដ្ឋអាមេរិក ធ្វើឡើងពេលដែលសមាជិកគណៈរដ្ឋមន្ត្រីថ្មីរបស់ថៃចំនួន៣៦នាក់ក្រោមការដឹកនាំរបស់លោកឧត្តមសេនីយ៍ប្រាយុទ្ធចានអូចា បានស្បថចូលកាន់តំណែងនៅថ្ងៃទី១៧កក្កដា។ រដ្ឋាភិបាលថ្មីនេះ ជារដ្ឋាភិបាលស៊ីវិលដែលកើតឡើងពីការបោះឆ្នោតជាលើកដំបូង ក្រោយក្រុមយោធាធ្វើរដ្ឋប្រហារទម្លាក់លោកស្រី យីងឡាក់ កាលពី៥ឆ្នាំមុន។ ទោះយ៉ាងណាក៏ដោយ ក្រុមអ្នកវិភាគនយោបាយថៃ យល់ថា វប្បធម៌នៃការដឹកនាំរបស់រដ្ឋាភិបាលថ្មីនឹងមិនខុសពីមុននោះទេ ព្រោះថា ថ្នាក់ដឹកនាំភាគច្រើនមិនមែនជាមនុស្សថ្មីនោះឡើយ។
ទោះបីយ៉ាងទីភ្នាក់ងារសារព័ត៌មាន Reuters នៅថ្ងៃចន្ទ ទី១៥ ខែកក្កដា ឆ្នាំ២០១៩បានផ្សាយថា៖នាយករដ្ឋមន្ត្រីថៃ លោក ប្រាយុទ្ធ ចាន់អូចា នៅថ្ងៃចន្ទនេះ បានលាលែងចេញពី តំណែងជាប្រមុខរដ្ឋាភិបាលយោធា ជាផ្លូវការហើយ ជាមួយការបញ្ជាក់ថាប្រទេសថៃនឹងត្រូវ ដឹកនាំដោយរដ្ឋាភិបាលស៊ីវិលមួយតាមបែបប្រជាធិបតេយ្យ បន្ទាប់ពីការដឹកនាំដោយរបប យោធាអស់រយៈពេលជាង៥ឆ្នាំ។ ថ្លែងក្នុងសុន្ទរកថាតាមបញ្ចក់ទូរទស្សន៍ លោក ប្រាយុទ្ធ បានលើកឡើងដូច្នេះថា៖ «បច្ចុប្បន្ន ប្រទេសថៃ គឺជាប្រទេសកាន់របបប្រជាធិបតេយ្យយ៉ាងពេញលេញ អាស្រ័យលើរដ្ឋធម្មនុញ្ញ រាជានិយមដោយមានសមាជិកសភាដែលត្រូវបានប្រជាជនថៃបោះឆ្នោតជូន… ដូច្នេះចាប់ពី ពេលនេះតទៅ បញ្ហាទាំងឡាយនឹងត្រូវបានដោះស្រាយឈរលើប្រព័ន្ធប្រជាធិបតេយ្យ ដោយមិនមានការប្រើប្រាស់កម្លាំងពិសេសអ្វីនោះទេ»។
រអ្នកជំនាញវិទ្យាសាស្ត្រនយោបាយនៃសាកលវិទ្យាល័យ Ubon Ratchathani លោក Titipol Phakdeewanich មានប្រសាសន៍ប្រាប់សារព័ត៌មាន South China Morning Post ថាគណៈរដ្ឋមន្ត្រីថ្មីនេះ ឆ្លុះបញ្ចាំងពីផលប្រយោជន៍របស់ក្រុមដែលបង្កើតរដ្ឋាភិបាលចម្រុះ ច្រើនជាងប្រយោជន៍ជាតិ ហើយការតែងតាំងទៀតសោតគឺមិនបានផ្តោតលើសមត្ថភាពនោះទេ តែវាយោងទៅតាមកិច្ចព្រមព្រៀង និងផលប្រយោជន៍របស់បក្ស។ រដ្ឋាភិបាលចម្រុះថ្មីនេះ នឹងមិនខុសអ្វីពីរដ្ឋាភិបាលយោធានោះទេ ព្រោះថា ថ្នាក់ដឹកនាំនៅតែជាអ្នកចាស់ ហើយវប្បធម៌នយោបាយក៏គ្មានអ្វីថ្មីដែរ។
ទាក់ទងនិងការគាំទ្រពីអាមេរិកចំពោះថៃនេះដែសាស្ត្រាចារ្យផ្នែកសិក្សាពីសហគមន៍អាស៊ាននៅសាកលវិទ្យាល័យនរេសួន ប្រទេសថៃ លោក ផូល ឆាំប៊ឺ (Paul Chambers) បានប្រាប់គេហទំពរ័ VODថា បើទោះបីក្រោយពេលបោះឆ្នោតនៅថៃ សហរដ្ឋអាមេរិក បានរិះគន់ពីដំណើរ និងស្នើឲ្យស៊ើបអង្កេតពីភាពមិនប្រក្រតីយ៉ាងណាក្តី តែការរិះគន់នេះមានភាពទន់ភ្លន់ជាងករណីនៅកម្ពុជា។
លោក ផូល ឆាំប៊ឺ បន្ថែមថា ការប្រកាសគាំទ្រយ៉ាងពេញទំហឹងលើរដ្ឋាភិបាលថ្មីរបស់ថៃដែលដឹកនាំដោយលោក ប្រាយុទ្ធ នាពេលនេះ វាក៏ពាក់ព័ន្ធនឹងបញ្ហាភូមិសាស្ត្រនយោបាយ និងកំណើនឥទ្ធិពលចិននៅក្នុងតំបន់ផងដែរ។ លោក ថាអាមេរិករិះគន់ធ្ងន់លើកម្ពុជា ដោយសារតែរដ្ឋាភិបាលក្រុងវ៉ាស៊ីនតោនមើលឃើញថា កម្ពុជាបានពឹងផ្អែក និងចូលទាំងស្រុងលើគន្លងរបស់ចិន។ លោក បន្តថា សហរដ្ឋអាមេរិកនៅតែចាត់ទុកថៃប្រៀបដូចជាគ្រឿងការពារដ៏សំខាន់មួយដើម្បីទប់ទល់នឹងកំណើនឥទ្ធិពលរបស់ចិននៅក្នុងតំបន់អាស៊ីអាគ្នេយ៍។
ថៃ ជាប្រទេសមួយក្នុងតំបន់អាស៊ានដែលមានទំនាក់ទំនងយ៉ាងស្អិតរមួតជាមួយសហរដ្ឋអាមេរិកអស់រយៈពេលជាច្រើនឆ្នាំមកហើយ។ ប្រទេសទាំងពីរបានភ្ជាប់ទំនាក់ទំនងជាមួយគ្នានៅឆ្នាំ១៨១៨ ហើយបង្កើតទំនាក់ការទូតជាផ្លូវការវាងគ្នានឹងគ្នានៅឆ្នាំ១៨៣៣៕