វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 352 នាក់
ម្សិលមិញ 5304 នាក់
សរុប 14139878 នាក់
ចិន៖ សកម្មជនចិនជាង ២០នាក់ ដែលភាគច្រើនក្មេងៗដែលអាចជាកូនចៅអ្នកដែលចូលរួមចលនាគាំទ្រលទ្ធិប្រជាធិបតេយ្យនៅទីលាន ធានអាម៉េន នៅថ្ងៃចន្ទទី១៧មិថុនានេះ បានអំពាវនាវអង្គភាព សិទ្ធិមនុស្សកំពូលរបស់ អង្គការសហប្រជាជាតិឲ្យ ធ្វើការស៊ើបអង្កេត ចំពោះការបង្ក្រាបលើអ្នកតវ៉ាដោយអាជ្ញាធរចិន កាលពី៣០ឆ្នាំមុន។
លោក Wang Dan និងមនុស្ស២១នាក់ផ្សេងទៀត ដែលគាំទ្រដោយក្រុមការពារសិទ្ធិមនុស្សចិន បាននិយាយថា ខ្លួនទើបបានបញ្ជូនពាក្យបណ្ដឹង ទៅឲ្យកិច្ចប្រឹក្សាសិទ្ធិមនុស្សអង្គការសហប្រជាជាតិ ដែលជាវេទិកានៅទីក្រុងហ្សឺណែវមួយ ដែលបើកអង្គប្រជុំ រយៈពេល៣សប្ដាហ៍ នៅថ្ងៃទី២៤ ខែមិថុនាខាងមុខនេះ។ នៅក្នុងសេចក្តីថ្លែងការណ៍ បាននិយាយ ថា “យើងស្នើឲ្យក្រុមប្រឹក្សា សិទ្ធិមនុស្សអង្គការសហប្រជាជាតិ ស៊ើបអង្កេតការរំលោភ បំពានសិទ្ធិមនុស្សនិងសិទ្ធិសេរីភាពធ្ងន់ធ្ងរ ដែលធ្វើឡើងដោយរដ្ឋាភិបាលចិន នៅក្នុងអំឡុងធ្វើប្រតិបត្តិការ វាយប្រហារដោយយោធា ទៅលើការតវ៉ាដោយសន្តិវិធី”។
សូមបញ្ជាក់ថា៖នៅថ្ងៃទី៣មិថុនា កាលពី ៣០ឆ្នាំមុន រដ្ឋាភិបាលចិនបានធ្វើការសម្រេចចិត្តបង្ក្រាបទៅលើក្រុមនិស្សិតដែលដឹកនាំការតវ៉ា ដើម្បីឲ្យមានប្រជាធិបតេយ្យនៅក្នុងប្រទេសចិន។ រហូតមកដល់ពេលនេះ រដ្ឋាភិបាលចិនមិនដែលបានបញ្ចេញតួលេខពីចំនួនអ្នកស្លាប់ និងរបួស នៃការបង្ក្រាបរបស់ខ្លួនឡើយបើទោះជាមានការប៉ាន់ប្រមាណថា មាននិស្សិត រហូតដល់ម៉ឺននាក់ បានស្លាប់នៅក្នុងការបង្ក្រាបដោយយោធានោះ។
រដ្ឋមន្ត្រីការបរទេសអាមេរិច លោកម៉ៃប៉ុមពីអូ( Mike Pompeo)កាលពីថ្ងៃទី៣មិថុនា បានស្នើឲ្យរដ្ឋភិបាលក្រុងប៉េកាំងធ្វើការប្រារព្ធខួបនៃការបង្ក្រាបនោះ ដោយធ្វើការដោះលែងអ្នកទោសទាំងអស់ ដែលបានតស៊ូប្រឆាំងនឹងការរំលោភសិទ្ធិមនុស្សនៅក្នុងប្រទេសចិន។
ស្ថានទូតចិននៅអាមេរិកបានចេញសេចក្តីប្រកាស ដោយបានបញ្ជាក់ថា ការថ្លែងរបស់រដ្ឋមន្ត្រីការបរទេសអាមេរិច Mike Pompeo ធ្វើឡើងដោយការលំអៀង និងក្រអឺតក្រទម និងបានជ្រៀតជ្រែងចូលក្នុងកិច្ចការផ្ទៃក្នុងរបស់ចិន។ចិនអួតថា៖ “សិទ្ធិមនុស្សចិនគឺស្ថិតក្នុងពេលវេលាល្អបំផុតដែលមិនធ្លាប់មានពីមុនមក”។
ទាក់ទងនិងករណីយ៍បង្ក្រាបប្រជាជនខ្លួនឯងនេះរដ្ឋមន្ដ្រីការពារជាតិនៃប្រទេសចិន លោកវ៉េហ្វេងហេ(Wei Fenghe) បានថ្លែងការពារវិធានការ បង្ក្រាបអំពើបះបោរទៅលើក្រុមនិស្សិតនៅទៀនអានមិនកាលពីឆ្នាំ១៩៨៩ ថា ជាការអនុវត្តវិធានការទាន់ពេលវេលានិងត្រឹមត្រូវ។ ការបង្ក្រាបនៅថ្ងៃទី៣និង ទី៤មិថុនា ឆ្នាំ១៩៨៩ គឺនៅពេលមុននោះរយៈពេលបង្ក្រាបចំនួន៦សប្ដាហ៍និស្សិតចិនរាប់ ម៉ឺននាក់បានទៅប្រមូលផ្ដុំគ្នានៅទៀនអានមិននៃទីក្រុងប៉េកាំងដើម្បីទាមទារឱ្យរដ្ឋាភិបាលកុម្មុយនីស្ដចិនកែទម្រង់ការដឹកនាំប្រទេស។ប៉ុន្ដែរដ្ឋាភិបាលចិននៅពេលនោះចាត់ទុកក្រុមនិស្សិតថាកំពុងធ្វើបដិវត្តន៍ផ្ដួលរំលំរដ្ឋាភីបាលទៅវិញហើយក៏ត្រូវបង្ក្រាបយ៉ាងឃោរឃៅ។
ការបង្ក្រាបនៅពេលនោះគឺប្រើប្រាស់រថក្រោះ បរកិនបាតុករទៀតផង បណ្ដាលឱ្យបាតុករជាងមួយម៉ឺននាក់បានស្លាប់ក្នុងរយៈពេលតែ២ថ្ងៃប៉ុណ្ណោះ គឺនៅថ្ងៃទី៣ ទី៤មិថុនា ដែលគិតមកដល់ឆ្នាំនេះគឺមានរយៈពេល៣០ឆ្នាំ។ សូមបញ្ជាក់ថា ជារៀងរាល់ឆ្នាំ មុនពេលខួបនៃការបង្ក្រាបរបស់រដ្ឋាភិបាលចិនលើហ្វូងនិស្សិតចិនចូលមក ទីក្រុងប៉េកាំងតែតែធ្វើការដាក់កំហិតទៅលើប្រជាជនខ្លួន ដោយមិនឲ្យមានការជួបជុំ ឬធ្វើខួបរំលឹកជាសាធារណៈនៅក្នុងប្រទេសចិនឡើយ។