ឧត្តមសេនីយ៍ឯកនន្ទសុខារងការចោទពីប្រពន្ធថាមានសហាយទើបប្តឹងលែងគ្នា
27-March-2024 / សិល្បះនិងបែ្លកៗ
ភ្នំពេញ ៖លោកឧត្តមសេនីយ៍ឯកអាវុធហត្ថលើផ្ទៃប្រទេសឈ្មោះនន្ទសុខាអាយុ៥៤ឆ្នាំត្រូវបានភរិយាបើកកាយរៀងអាស្រូវមានសាហាយតាមបណ្តាញសង្គមហ្វេសប៊ុកកាលពីវេលាម៉ោង៨និង៣៦នាទីយប់ ថ្ងៃទី២៩ ខែមករា ឆ្នាំ២០១៩ ។
ស្ត្រីវ័យចំណាស់ម្នាក់ដែលអះអាងថាជា ភាគីប្រពន្ធ ដែលចេញមុខទម្លាយរឿងរ៉ាវប្តីប្តឹងលែងលះព្រោះមានសាហាយនោះ មានឈ្មោះហុក បុរី អាយុ ៥៤ឆ្នាំ មានលំនៅផ្ទះលេខ៦ ផ្លូវលេខ១ ភូមិទ្រុងមាន់ សង្កាត់ទឹកថ្លា ខណ្ឌសែនសុខ។
ស្ត្រីជាប្រពន្ធឈ្មោះ ហុក បុរី បានបង្ហោះសាររៀបរាប់ពីទុក្ខសោករបស់ខ្លួនថា “ពុទ្ធោអើយ មើលចុះ! ប្តីប្រពន្ធនឹង គ្នាជិត៤០ឆ្នាំ នៅជាមួយគ្នាតាំងពីបាតដៃទទេ តាំងពីអត់មានផ្កាយពាក់នៅលើស្មា។ ដល់ពេលនេះ វ័យចាស់ហើយ បែរជាលោកប្តីផ្កាយបី ហ៊ានលើកដៃប្តឹងលែងលះប្រពន្ធទៅរួច។ បើថា អស់និស្ស័យហើយ ក៏អស់ចុះ ហេតុអីក៏ចោទខ្ញុំ ថាខ្ញុំបង្កជម្លោះ? ទេវតាអើយទេវតា ជាង២០ឆ្នាំមកនេះ លោកប្តីធ្វើអ្វីដាក់ប្រពន្ធកូនខ្លះ? ។
លោកប្តីលួចមានសហាយស្មន់ បូឡែន កូនស្រីយើងតាមទាន់ លោកប្តីស្អប់កូនស្រីយើងរហូតមក លួចចងគំនុំនៅក្នុងចិត្ត មកផ្ទះម្តងៗ ជេរកូន ជេរប្រពន្ធគំរាមសម្លាប់ផ្សេងៗ៘ ខ្ញុំទ្រាំបានរឿងលោកប្តីលួចមានសហាយស្មន់ តែប៉ុន្មានឆ្នាំមកនេះ លោកប្តីធ្វើអ្វីខ្លះ តើលោកប្តីដឹងទេ? លោកប្តីយកទ្រព្យដែលរកបានមក យកទៅឱ្យសហាយស្មន់ លក់ដីធ្លី លក់ផ្ទះ លួចលុយយកទៅឱ្យសហាយស្មន់ ហើយលួងលោមខ្ញុំ ខ្ញុំស្មានថា លោកប្តីចង់រកស៊ីមែន ខំយកឈ្មោះខ្ញុំ ទៅខ្ចីលុយធនាគារ ទៅខ្ចីលុយអ្នកក្រៅ យកឱ្យលោកប្តី ឱ្យប្តីរកស៊ី បែរជាលោកប្តីថា រកស៊ីខាតអស់ដើម អស់ចុង។
ទីបំផុត សហាយស្មន់របស់លោកប្តី ស្គាល់បងពីដំបូង ជាស្រីម៉ាស្សា បានព្រឹកខ្វះល្ងាច តែវេលានេះ គេមានអ្វីៗសព្វយ៉ាងទាំងអស់។ លោកប្តីបំផ្លាញខ្ញុំ សម្លាប់ខ្ញុំទាំងរស់។ ខ្ញុំមានកូនបីនាក់ កូនទី១-ឈ្មោះនន្ទ កុសល ជាកូនអភ័ព្វ កើតមកពិការ។ កូនទី២-ឈ្មោះនន្ទ បូឡែន ជាស្រីម៉េម៉ាយ រស់ទទួលរងបញ្ហាសព្វយ៉ាង សុខភាពម្តងឈឺម្តងជា។ កូនទី៣-ឈ្មោះនន្ទ សំណាង មានគ្រួសាររស់ជាមួយនឹងគ្រួសារ មិនចេះខ្វល់ពីខ្ញុំទេ ឮថាប្តីខ្ញុំប្តឹងលែងលះខ្ញុំ កូនម្នាក់នេះ គេសើចសប្បាយទៅវិញ។ ពេលនេះ ខ្ញុំរស់ឈឺចាប់ជាមួយកូនស្រីទាំងពីរនាក់របស់ខ្ញុំ។
លោកប្តីខ្ញុំបំផ្លាញខ្ញុំឆ្អែតហើយ នៅប្តឹងទាមទារចែកទ្រព្យពីខ្ញុំទៀត ចុះកូនស្រីទាំងពីររបស់ខ្ញុំ ម្នាក់ពិការ ម្នាក់ឈឺមិនឈប់ ចំណែកខ្ញុំវិញ ជំងឺពេញខ្លួន ឱ្យខ្ញុំរស់យ៉ាងម៉េច? ហើយលោកប្តីចេញទៅ បានប្រមូលប្លង់ដី១៨ហិកតារ ភូមិព្រៃហ្លួង និងព្រៃឈើទាល ឃុំសំរោងលើ ស្រុកអង្គស្នួល ដី១៦ហិកតារ ស្ថិតនៅឃុំប្រាសាទ ស្រុកស្អាង ក្រោមឈ្មោះកូនស្រី នន្ទ បូឡែន យកទៅអស់ហើយ នៅសល់តែដីកៀនស្វាយក្នុង បែរជាទាមទារចែកទៀត។
ឋានៈផ្កាយបី គាត់មានអំណាចណាស់ ប្រព័ន្ធតុលាការ គាត់ស្គាល់ទាំងអស់ តើឱ្យម្តាយកូនខ្ញុំពឹងនរណាទៅ? សូមម៉ែ ប៊ុន រ៉ានី អើយ ជួយខ្ញុំនិងកូនស្រី ខ្ញុំផង។ ខ្ញុំសូមថ្វាយបង្គំអ្នកម៉ែ ប៊ុន រ៉ានី ពីចម្ងាយផង”។
អ្នកស្រីហុក បុរី បានសរសេរក្នុងគណនីហ្វេសប៊ុកខាងលើបន្តថា “ជួយ share ខ្ញុំផង ខ្ញុំគ្មានអំណាចអីទេ ដីនៅសល់ប៉ុន្មានកន្លែងច្រើនឆ្នាំមកនេះ គាត់លួចរត់ការសម្ងាត់យកទៅអស់ហើយ នៅសល់តែដីកៀនស្វាយក្នុង បណ្តោយ៨៥ម៉ែត្រ ទទឹង៣៨ម៉ែត្រប៉ុណ្ណោះ ឥឡូវលោកប្តីខ្ញុំ គាត់ប្តឹងទាមទារទៀត។ សូមទោសផង រូបថតទាំងនេះ ខ្ញុំបានមកប៉ុនណា ខ្ញុំបង្ហោះប៉ុណ្ណោះ ខ្ញុំអត់ចេះកាត់ចេញទេ ដូច្នេះ រូបថតខ្លះ ថតដោយរូបអ្នកដទៃ ដូច្នេះសូមកុំប្រកាន់អី។ ខ្ញុំមានតែម្រាមដៃទាំង១០ សូមអង្វរដល់បងប្អូន ក្នុងហ្វេសប៊ុកជួយរកយុត្តិធម៌ឱ្យខ្ញុំផង…”។
ស្ត្រីដដែលបានសរសេរបន្ថែមថា “មុននេះ ខ្ញុំបានលុបសារបង្ហោះចំនួនបួនចោល ដោយសារសារបង្ហោះនោះ ថតដោយរូបក្មួយប្រុស ខាងសហាយស្មន់នោះ ក្មួយប្រុសរបស់គេនោះ គេឆាតមកសុំលុបចោល ទើបខ្ញុំលុបចោល។ ការពិត ខ្ញុំបង្ហោះរូបថតទាំងនោះ គឺចង់ឱ្យពិភពលោកបានដឹងថា លោកប្តីខ្ញុំ គាត់នៅជុំនឹងញាតិ ខាងសហាយស្មន់ គឺគាត់សប្បាយខ្លាំងណាស់ ដើរលេងច្រើនប្រទេស ដើរលេងច្រើនខេត្ត ទុកឱ្យខ្ញុំជាប្រពន្ធដើម និងកូនស្រីឡែន ខ្ញុំរស់នឹងទឹកភ្នែក រស់នឹងរែកបំណុលគេ…”។
សូមបញ្ជាក់ថា៖យោងតាមពាក្យបណ្តឹងលែងលះ ដែលមានស្នាមមេដៃរបស់លោកនន្ទ សុខា ចុះថ្ងៃទី០៨ ខែមករា ឆ្នាំ២០១៩ បានដាក់ចូលទៅសាលាដំបូងរាជធានីភ្នំពេញ នៅថ្ងៃដដែលនោះ ឲ្យដឹងថា ៖
ដើមបណ្តឹង ឈ្មោះនន្ទ សុខា ភេទប្រុស អាយុ៥៤ឆ្នាំ ដែលមានអាស័យដ្ឋាន បច្ចុប្បន្នផ្ទះលេខ៦ ស្ថិតនៅផ្លូវលេខ១ ភូមិទ្រុងមាន់ សង្កាត់ទឹកថ្លា ខណ្ឌសែនសុខ រាជធានីភ្នំពេញ។
ចុងចម្លើយ ឈ្មោះហុក បុរី ភេទស្រី អាយុ៥៤ឆ្នាំ ដែលមានអាស័យដ្ឋានបច្ចុប្បន្ន ផ្ទះលេខ៦ ស្ថិតនៅផ្លូវលេខ១ ភូមិទ្រុងមាន់ សង្កាត់ទឹកថ្លា ខណ្ឌសែនសុខ រាជធានីភ្នំពេញ។
សូមគោរពចូលមក ឯកឧត្តមប្រធានសាលា ដំបូងរាជធានីភ្នំពេញ
ទី I ទាមទារឱ្យសាលាដំបូងរាជធានីភ្នំពេញ ចេញសាលក្រមដែលមានខ្លឹមសារដូចខាងក្រោមនេះ ៖
១-សូមផ្តាច់ចំណងអាពាហ៍ពិពាហ៍ពីប្រពន្ធឈ្មោះហុក បុរី ដែលបានរួមរស់ជាមួយគ្នា តាំងពីឆ្នាំ១៩៨១ កន្លងមក។
២-ទាមទារបែងចែកទ្រព្យសម្បត្តិរួមជាពីរចំណែកស្មើគ្នា នៅពេលលក់ ចំពោះដី និង ផ្ទះដែលមានប័ណ្ណសម្គាល់សិទ្ធិកាន់កាប់អចលនវត្ថុ លេខ ៖ ក.ណ ០១៦២០៥ ចុះថ្ងៃទី១៥ ខែ តុលា ឆ្នាំ២០០៨ ដែលមានទីតាំងស្ថិតនៅភូមិព្រែកធំ ឃុំក្បាលកោះ ស្រុកកៀនស្វាយ ខេត្តកណ្តាល (បច្ចុប្បន្ននេះ ទីតាំងដីនេះ បានកាត់ចូលមកក្នុងដែនរដ្ឋបាលរាជធានីភ្នំពេញ រួចហើយ)។
៣-ទ្រព្យសម្បត្តិផ្សេងៗទៀត ចែកគ្នាជាពីរចំណែកស្មើគ្នា។៤-បំណុលជំពាក់ធនាគារ ខ្ញុំបាទឈ្មោះ នន្ទ សុខា ជាអ្នកទទួលបន្ទុកទាំងស្រុង។ ចំណែកបំណុលផ្សេងៗ ក្រៅពីធនាគារ គឺឈ្មោះហុក បុរី ជាអ្នកទទួលបន្ទុក។
ទី II ការបញ្ជាក់ការទាមទារ
ខ្ញុំបាទឈ្មោះនន្ទ សុខា បានរៀបអាពាហ៍ពិពាហ៍ជាមួយឈ្មោះហុក បុរី កាលពីឆ្នាំ១៩៨១ ក្រោយពីរៀបការរួចមក យើងខ្ញុំទាំង២នាក់ ប្តីប្រពន្ធ មានកូន និងមានទ្រព្យសម្បត្តិរួម ដូចខាងក្រោមនេះ ៖
១-អំពីកូនមានចំនួន៣នាក់ គឺ
(ក)-កូនទី១ ឈ្មោះនន្ទ កុសល ភេទស្រី ថ្ងៃខែឆ្នាំកំណើត ០៦-០៧-១៩៨២ ជានីតិភាព
(ខ)-កូនទី២ ឈ្មោះនន្ទ បូឡែន ភេទស្រី ថ្ងៃខែឆ្នាំកំណើត ១០-០៩-១៩៨៤ ជានីតិភាព
(គ)-កូនទី៣ ឈ្មោះនន្ទ សំណាង ភេទប្រុស ថ្ងៃខែឆ្នាំកំណើត ១៧-១២-១៩៨៨ ជានីតិភាព
២-អំពីទ្រព្យសម្បត្តិមានដូចខាងក្រោមនេះ គឺ ៖
-ដីដែលមានប័ណ្ណសម្គាល់សិទ្ធិកាន់កាប់អចលនវត្ថុលេខ ក.ណ ០១៦២០៥ ចុះថ្ងៃទី១៥ ខែតុលា ឆ្នាំ២០០៨ ដែលមានទីតាំងស្ថិតនៅភូមិព្រែកធំ ឃុំក្បាលកោះ ស្រុកកៀនស្វាយ។
៣-អំពីបំណុលជំពាក់តតិយជន
(ក)-អំពីបំណុលធនាការ ខាងខ្ញុំបាទឈ្មោះ នន្ទ សុខា សូមទទួលស្គាល់ ដោយសារការខ្ចីពីធនាគារនេះ ខ្ញុំបាទបានដឹងឮ ហេតុនេះខ្ញុំបាទសូមទទួលបន្ទុកទាំងស្រុងក្នុងការសងទៅធនាគារវិញ ដោយមិនឱ្យឈ្មោះហុក បូរី ជាអ្នកសងធនាគារទេ។
(ខ)-ដោយឡែកសម្រាប់បំណុលផ្សេងៗ ក្រៅពីធនាគារ ខ្ញុំបាទឈ្មោះនន្ទ សុខា មិនទទួលខុសត្រូវទេ ពីព្រោះខ្ញុំបាទពុំបានខ្ចីទេ។ ដូច្នេះ ស្នើសុំឱ្យឈ្មោះហុក បុរី ជាអ្នកទទួលបន្ទុកសងតែម្នាក់ឯង។
ទី III អង្គហេតុសំខាន់ៗពាក់ព័ន្ធនឹងអង្គ ហេតុដែលជាមូលហេតុនៃការទាមទារ យើងខ្ញុំទាំងពីរនាក់ប្តីប្រពន្ធ បច្ចុប្បន្នមានការរស់នៅមិនចុះសម្រុងនឹងគ្នា ហើយភាគីខាងប្រពន្ធឈ្មោះ ហុក បុរី ចេះតែបង្កទំនាស់ ធ្វើឱ្យអស់មនោសញ្ចោតនា ក្នុងការរួមរស់ជាប្តីប្រពន្ធជាមួយគ្នាតទៅទៀត…។
គេហទំពរ័មាតុភូមិ មិនអាចទាក់ទងសុំការបំភ្លឺពីលោកឧត្តមសេនីយឯក នន្ទ សុខា ក៏ដូចជាស្ត្រីដែលអះអាងថា ជាប្រពន្ធដើមតាម ហ្វេសប៊ុក បាននៅឡើយ។ យើងរង់ចាំទទួលការបកស្រាយបំភ្លឺ ពីគ្រប់ភាគីពាក់ព័ន្ធទាំងអស់៕
