វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 3685 នាក់
ម្សិលមិញ 6677 នាក់
សរុប 14151261 នាក់
ភ្នំពេញ៖លោកជំទាវ អ៊ឹង កន្ថាផាវី រដ្ឋមន្ត្រីក្រសួងកិច្ចការនារី គួរបើកការស៊ើបអង្កេតពីករណីនៃការប្រព្រឹត្តអំពើបៀតបៀនកេរ្តិ៍ខ្មាស់ និងប្រើហិង្សាលើនារីភេទបំរើការងារនៅក្នុង KTV វីឡា ពីសំណាក់ឧកញ៉ាម្នាក់ជាឈ្មួញឈើដ៏ល្បីនៅភូមិភាគឦសាន្ត ឈ្មោះ វ័ន្ត ប៊ុនថៃ ដើម្បីរកយុត្តិធម៌ អោយនារីរងគ្រោះផង។
ជាក់ស្តែងយោងតាមប្រភពព័ត៌មាន ក៏ដូចជាឃ្លីប វីដេអូ ១ដែលត្រូវ បានអ្នកកាសែតថតបានបង្ហោះក្នុងបណ្តាញសង្គម Facebook គឺមានឧកញ៉ាម្នាក់ឈ្មោះ វ័ន្ត ប៊ុនថៃ ដែលអ្នកខេត្តកំពង់ចាមភាគច្រើនស្គាល់ថាជាឈ្មួញរកស៊ីជួញដូរ ឈើប្រណីតដ៏ល្បីល្បាញប្រចាំភូមិភាគឦសាន្ត ត្រូវបានកម្លាំងសមត្ថកិច្ច នគរបាលព្រហ្មទណ្ឌនៃស្នងការដ្ឋាន នគរ បាលខេត្តកំពង់ចាមតាមបញ្ជាពីចៅហ្វាយខេត្តលោកគួចចំរើនបាន ចុះចាប់ឃាត់ខ្លួនភ្លាមៗនៅក្នុងក្លិបកំសាន្ត KTV វីឡា ស្ថិតនៅក្នុងក្រុងកំពង់ចាម ខេត្តកំពង់ចាម កាលពីវេលាម៉ោង៩យប់ ថ្ងៃទី ៥មករា ឆ្នាំ២០១៩ តាមការប្តឹងសុំអន្តរាគមន៍ពីស្ត្រីបំរើការងារក្នុង KTV ថាឧកញ៉ា ប៊ុនថៃ បានប្រព្រឹត្តអំពើអសីលធម៌ បៀតបៀនលើកេរ្ត៍ខ្មាស់ នារីបំរើភ្ញៀវក្នុងKTV និងប្រើហឹង្សាវាយបោចសក់នារីបំរើការងារនៅទី នោះផងដែរ ។
សូមរម្លឹកថា ការភ្ញាក់ផ្អើលមួយបានកើតឡើងនៅវេលាម៉ោងជាង៨យប់ថ្ងៃទី៥ មករា នៅហាងខារ៉ាអូខេយីហោ «វីឡា» ស្ថិតនៅក្នុងសង្កាត់វាលវង់ ក្រុងកំពង់ចាម ដោយសារតែឧកញ៉ាម្នាក់ឈ្មោះ វ៉ន ប៊ុនថៃ អតីតឈ្មួញរកស៊ីឈើដ៏ល្បីល្បាញ នៅក្នុងស្រុកអូររាំងឪ ខេត្តត្បូងឃ្មុំ បានប្រើអំពើហិង្សាលើស្ត្រីបម្រើខារ៉ាអូខេ ក្នុងបន្ទប់លេខ៦៦៦៦ ត្រូវបានកម្លាំងអាវុធហត្ថ និងនគរបាល បានចុះមកអន្តរាគមន៍នាំខ្លួនមកសួរនាំ នៅស្នងការដ្ឋាននគរបាលខេត្តទាំងយប់ ក្នុងអាការៈស្រវឹង ។
បើតាមនារីរងគ្រោះឈ្មោះ ចាន់ ហួយ បានបំភ្លឺថា យប់ថ្ងៃកើតហេតុ ថ្ងៃទី៥ មករា ២០១៩ ឧកញ៉ាម្នាក់នេះ បានចូលមកផឹកស៊ីក្លែមខារ៉ាអូខេ យ៉ាងសប្បាយជាមួយអ្នកហែហមជាច្រើននាក់ ។ បន្ទាប់មកដោយសារឧកញ៉ារូបនេះ លូកលាន់ស្ទាបអង្អែលមកលើនារីបម្រើ ដោយប្រើដៃស្ទាបដូចដៃម៉ឹក ពេលនោះនាងៗ ចេះតែរើបម្រះ ដៃម៉ឹករបស់គាត់ ទើបបានគាត់ចាប់ទាញផ្តាច់ឡេវអាវ ធ្វើឱ្យនាងខ្មាសគេបានរត់ចុះទៅជាន់ក្រោមបាត់ ។ ចំណែកនារីម្នាក់ទៀត ដែលនៅទីនោះដែរ ដោយសារឧកញ៉ារូបនេះខឹង ក៏បានចាប់ខោកក្បាល និងបោចសក់នាង អូសបញ្ច្រាស បណ្តាលឲ្យមានការឈឺចាប់រហូតដល់នាងស្រែកយំ ផងដែរ ។
ប៉ុន្តែ ប្រការគួរអោយហួសចិត្តនោះ គឺបន្ទាប់ពីនគរបាលបាននាំ ខ្លួន ឧកញ៉ា វ័ន្ត ប៊ុនថៃ ទៅកាន់ការិយាល័យព្រហ្មទណ្ឌកំរិតស្រាល នៃស្នងការដ្ឋាននគរបាលខេត្តកំពង់ចាមបាន១យប់ ស្រាប់តែ នៅរសៀលថ្ងៃទី៦មករា២០១៩ ឧកញ៉ាចរិកមិនថ្លៃថ្នូរប៊ុនថៃ ត្រូវបានគេដោះលែងយ៉ាងស្ងាត់ៗ ដោយមិនមានផ្សព្វ ផ្សាយព័ត៌មានជាផ្លូវការអោយមហាជនអស់មន្ទិលនោះទេ។ តាមការសាកសួរតាមទូរស័ព្ទទៅលោក ស្ចារ ដែលជាអ្នកដឹង រឿងរ៉ាវករណីនេះ លោកប្រាប់ថា សុំមិនរៀបរាប់អីវែងឆ្ងាយទៀតទេ គឺភាគីទាំង២ គឹឧកញ៉ា បានសុំទោសនារីរងគ្រោះព្រមព្រៀងគ្នា បញ្ចប់រឿងហើយ ។
ដោយឡែក លោក ហេង វុទ្ធី ស្នងការរងនគរបាលខេត្តកំពង់ចាម នៅព្រឹកថ្ងៃទី ៧ មករា ២០១៩ នេះនៅពេលភ្នាក់ងារសារព័ត៌មាន មាតុភូមិ សាកសួរ តាមទូរស័ព្ទជុំវិញ ករណី និង និតិវិធី នៃដោះលែងឧកញ៉ា វ័ន្ត ប៊ុនថៃ នេះ លោកថាជាប់រវល់រួចក៏ចុចបិតទូរស័ព្ទ ។ ឯលោក ឧកញ៉ា វ័ន្ត ប៊ុនថៃ ការិយាល័យនិពន្ធយើងពុំអាចស្វែងរកការ បំភ្លឺបានទេ ព្រោះពុំមានលេខទូរស័ព្ទ ។ មហាជន ក៏ដូចជា មន្ត្រីរាជការក្នុងខេត្ត និងអ្នកតាមដានករណីនេះមានការមន្ទឹល សង្ស័យទៅលើសមត្ថកិច្ចជំនាញ ចំពោះនិតិវិធី នៃការដោះ លែងឧកញ៉ាប៊ុនថៃថាជារឿងមិនប្រក្រតី អាចមានការជះទឹក លុយក្រាស់ក្រែលទៅលើសមត្ថកិច្ចជំនាញ ក្នុងការចាប់បង្ខំឲ្យមានការសម្រប សម្រួលពីគូរភាគី ដោយបិទបាំងព័ត៌មានមិនផ្សព្វផ្សាយអោយ មហាជនបានដឹងជាផ្លូវការឡើយ ។
ករណីនេះវាជារឿងព្រហ្មទណ្ឌ័តែមិនដឹងថាខាង ស្ថាប័ន អយ្យការអមសាលាដំបូងខេត្តកំពង់ចាមបានចូលរួមចំណែក ដែរ ឬ អត់នោះទេ ? ។ ដោយឡែកមហាជន និងមន្ត្រីរាជការមួយ ចំនួននៅរាជធានីភ្នំពេញ បានលើកឡើងថា ករណី នៃការប្រព្រឹត្តទង្វើអសីលធម៌បៀតបៀនកេរ្ត៍ខ្មាស់ស្ត្រីភេទ និងប្រើ អំពើហិង្សាលើនារីទន់ខ្សោយពីសំណាក់ឧកញ៉ាចរិកអន់ឈ្មោះ ប៊ុនថៃ នេះគួរតែក្រសួងកិច្ចការនារី ដែលមានលោកជំទាវ អ៊ឹង កន្ថាផាវី ជារដ្ឋមន្ត្រីដែលទើបបង្កើតក្រុមការងារមួយសម្រាប់ជួយនារីរងគ្រោះបន្ទាប់ពីកើតមានការមាក់ងាយតារាចម្រៀងស្រីទេពបូព្រឹក្សនោះគួចុះធ្វើការស៊ើបអង្កេតអោយដិតដល់ ស្វែង រកយុត្តិធម៌ អោយនារីរងគ្រោះព្រោះពួកគាត់ជានារីទន់ខ្សោយ ក្រីក្រ គឺមិនហ៊ានប្រឈមមុខតទល់ផ្លូវច្បាប់ជាមួយឧកញ៉ា អ្នកមានលុយនោះទេ គឺសុខចិត្តទ្រាំទទួលយកសំណងតិចតួច ឬអាចមានការសុំទោសពីឧកញ៉ាយ៉ាងឈឺចាប់ផ្លូវចិត្តបំផុតនេះផង ។
ប្រសិនបើគ្មានការស៊ើបអង្កេតចាប់ជនប្រព្រឹត្តអំពើអសិលធម៌របៀបដូចឧកញ៉ាធូថ្លៃនេះយកមកផ្តន្ទាទោសតាមច្បាប់ធ្វើជា គំរូទេនោះ តម្លៃរបស់ស្ត្រីខ្មែរពិតជាត្រូវបានគេមើលឃើញថា ធ្លាក់ចុះយ៉ាងខ្លាំង ក្រោមការប្រមាថមាក់ងាយពីសំណាក់ពួក អ្នកមានលុយ និងអំណាចមួយចំនួនដែលមានចរិក មិនថ្លៃថ្នូរជាមិនខាន ៕ ដោយ : សុផល Tel : 012 953 824