គង់គាំដូរជំហរនយោបាយលោកសុខឥសានថាជាចារកម្មតែតេជោសែនបដិសេធ!
ភ្នំពេញ៖ នៅព្រលប់ថ្ងៃទី០៤ ខែវិច្ឆិកា ឆ្នាំ២០១៨នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រតិម្មថាការលើកឡើងរបស់លោក សុខ ឥសាន ដែលថា លោក គង់ គាំ ជា CIAរបស់គណបក្សប្រជាជនកម្ពុជាមិនត្រឹមត្រូវទេ។ សម្តេចតេជោ ហ៊ុន សែន បានបញ្ជាក់ថា ការថ្លែងរបស់លោក គង់ គាំ គឺចេញពីឆន្ទះរបស់លោកពិត មិនពាក់ព័ន្ធគណបក្សប្រជាជនកម្ពុជា។
សម្តេចតេជោ ហ៊ុន សែន បានបញ្ជាក់បន្ថែមថា លោក គង់ គាំ ជាមនុស្សចេះដឹងម្នាក់ ការលើកឡើងរបស់លោកគឺចេញពីឆន្ទះពិតរបស់លោក។ លោក គង់ គាំ បានចាកចេញពីគណបក្សប្រជាជនកម្ពុជាជាផ្លូវការដោយមានលិខិតត្រឹមត្រូវ។
ការថ្លែងរបស់សម្តេចតេជោ ហ៊ុន សែន ធ្វើឡើងបន្ទាប់ពីអ្នកនាំពាក្យគណបក្សប្រជាជនកម្ពុជា លោក សុខ ឥសាន នៅថ្ងៃទី០៤ ខែវិច្ឆិកា ឆ្នាំ២០១៨នេះដែរ ហាក់ចង់បង្ហាញថា លោក គង់ គាំ អតីតប្រធានគណបក្សសម រង្ស៉ី ដែលជាមនុស្សជំនិតរបស់លោក សម រង្ស៉ីនោះ គឺជារនុកក្នុងរបស់គណបក្សប្រជាជនកម្ពុជា។
តាមយៈបណ្តាញសង្គមតេឡេក្រាមលោក សុខ ឥសាន បានលើកឡើងជាប្រយោគសំណួរថា តើលោក គង់ គាំ ដែលជាអតីត អ្នកនយោបាយជើងចាស់ មកពីអតីតគណបក្សសង្គ្រោះជាតិជា CIA របស់គណបក្សប្រជាជនកម្ពុជា? លោកថា ចម្លើយពិតជាភ្នាក់ងារ របស់បក្សកាន់អំណាច ប្រាកដមែន។
កាលលើករបស់លោក សុខ ឥសាននេះ បន្ទាប់ពី លោក គង់ គាំ បានថ្លែងតាមវិទ្យុវាយោដោយផ្លាស់ប្តូរជំហរមកគាំទ្ររាជរដ្ឋាភិបាលហើយវាយលើអតីតគនបក្សប្រឆាំងដេលលោកធ្លាប់គាំទ្រពីមុន។លោកថា “សេដ្ឋកិច្ចជាតិកំពុងមានសន្ទុះ ហើយក្រុមធុរជនបរទេសរាប់រយក្រុមហ៊ុននឹងបន្តរកស៊ីនៅកម្ពុជា ។ ប្រទេសក្នុងសហគមន៍បានបង្ហាញជំហរខុសគ្នាចំពោះកម្ពុជា ដូច្នេះកុំឲ្យបារម្ភពេក ពីករណីដកប្រព័ន្ធអនុគ្រោះទំនិញកម្ពុជា(EBA) ព្រោះមិនមានអ្វីជាការបារម្ភ ដូចមជ្ឈដ្ឋានមួយចំនួន ពិសេសក្រុមប្រឆាំងលើកឡើងឡើយ។
លោកថា ការបារម្ភរបស់អ្នកទាំងនោះ ជាការបំពុលសង្គម និងបំភ័យកម្មករទេ។ លោក គង់ គាំអះអាងទៀតថាការគំរាមកាត់ពន្ធនៅកម្ពុជាមិនទាន់ប្រាកដ១០០%ទេគឺនៅ៥០និង៥០នៅឡើយ”។មានន័យថាគេមិនប្រាកដនិងដកភាពអនុគ្រោះព្រោះប្រទេសខ្លះក្នុងសហគមន៍អឺរ៉ុបមានជំហរខុសគ្នានៅឡើយ។
លោកគង់គាំដែលមានឈ្មោះក្នុងចំណោមអ្នកនយោបាយ១១៨នាក់ដែលជាប់បំរាមធ្វើនយោបាយបានវាតម្លៃថាគណបក្សប្រឆាំងដែលក្លាយជាអតីតមិនអាចរស់ឡើងវិញបានទេ។លោកក៏សន្និដ្ឋានទៀតថាក្រុមនេះនឹងបែកជាបីមួយនៅបរទេស។ឯលោកគឺគាំទ្រគណបក្សឆន្ទៈខ្មែររបស់កូនប្រុសលោកហើយក្រោយពីអាចលើកលែងឲ្យចូលធ្វើនយោបាយវិញ។
លោក សុខ ឥសាន បានថ្លែងតាមរយៈបណ្តាញទំនាក់ទំនងតេឡេក្រាមនៅថ្ងៃទី៤ វិច្ឆិកាថា មហាជនទូទៅមានការងឿងឆ្ងល់យ៉ាងខ្លាំងនពេលដែលឃើញលោក គង់ គាំ ដែលជាអតីតមន្ត្រីជាន់ខ្ពស់របស់គណបក្សប្រជាជនកម្ពុជាបានផ្តាច់ខ្លួនមករួមរស់ជាមួយអតីតគណបក្សប្រឆាំង កាលពីពេលកន្លងទៅអស់រយៈពេលរាប់សិបឆ្នាំ ការមន្ទិលសង្ស័យនេះនៅតែមានក្នុងអារម្មណ៍របស់មហាជនទូទៅដដែល ប៉ុន្តែទើបតែពេលនេះ ភាពមន្ទិលសង្ស័យហាក់កាន់តែច្បាស់ឡើងៗបន្តិចម្តងៗដោយសារកូនប្រុសពៅរបស់លោក គង់ គាំគឺលោក គង់ ម៉ូនីកា បានបង្កើតគណបក្សឆន្ទៈខ្មែរ ដើម្បីចូលរួមប្រកួតប្រជែងក្នុងការបោះឆ្នោតនីតិកាលទី៦ ។
បន្ថែមពីលើនេះ លោកថា បង្កើតគណបក្សនេះមិនមែនជារឿងចៃដន្យឡើយដោយសារគ្មានជំនឿលើអតីតបក្សប្រឆាំងអាចរស់ឡើងវិញ មិនអាចរង់ចាំខ្មោចងាប់បានជាដាច់ខាត ។ បើគ្មានការផ្តួចផ្តើមគំនិតលោក គង់ គាំ ទេ នោះការបង្កើតគណបក្សថ្មីមួយនេះក៏មិនអាទៅរួចដែរ ហើយបាត់ជំនឿលើការដឹកនាំរបស់ទណ្ឌិត សម រង្ស៊ី ដែលដឹកនាំជាង២០ឆ្នាំហើយកាន់តែយ៉ាប់ទៅៗ។
លោក សុខ ឥសាន បញ្ជាក់ថា “ចំណុចទាងអស់ខាងលើនេះគឺជាចំណុចដែលមហាជនទូទៅមានការសង្ស័យ លោក គង់ គាំអាចជារនុកក្នុង ឬអាចជា CIA របស់គណបក្សប្រជាជនកម្ពុជា ដែលចូលទៅនៅក្នុងជំរុំរបស់អតីតបក្សប្រឆាំងយូរមកហើយ ។ បើយ៉ាងដូច្នេះមែនបានសេចក្តីថាទណ្ឌិតម រង្ស៊ី នៅខ្ចីណាស់ ស្គាល់គណបក្សជនកម្ពុជាមិនច្បាស់ ហើយចង់មកប្រឡងជាមួយផង?”។
កម្ពុជាទទួលបានប្រព័ន្ធអនុគ្រោះពន្ធនេះ កាលពីឆ្នាំ២០១២ ហើយក្រោមប្រព័ន្ធអនុគ្រោះពន្ធនេះ កម្ពុជាបានរួចផុតពីកាតព្វកិច្ចពន្ធជិត ៧រយលានដុល្លារក្នុងមួយឆ្នាំៗ ចំពោះទំនិញនាំចេញទៅទីផ្សារអឺរ៉ុប។ តួលេខពាណិជ្ជកម្មរបស់សហភាពអឺរ៉ុប និងរាជរដ្ឋាភិបាលកម្ពុជាបង្ហាញថា ក្រោមប្រព័ន្ធអនុគ្រោះពន្ធនេះ ទំនិញកម្ពុជានាំចូលទៅទីផ្សារអឺរ៉ុប មានទឹកប្រាក់ដល់ទៅជាង ៦ពាន់លានដុល្លារក្នុងឆ្នាំ២០១៧ ដែលភាគច្រើននៃទំនិញទាំងនោះ គឺជាផលិតផលវាយនភណ្ឌ សម្លៀកបំពាក់ និងស្បែកជើង ព្រមទាំងផលិតផលកសិកម្មជាដើម៕
