វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4546 នាក់
ម្សិលមិញ 5304 នាក់
សរុប 14144072 នាក់
កណ្ដាល៖ ទីតាំងរោងចក្រផលិតស្បែកជើងដែលត្រូវភ្លើងឆេះនេះ មានម្ចាស់ឈ្មោះ ប៉ុលរ៉ាមី ស៊ីសុផុន អាយុ៤៥ឆ្នាំ ស្នាក់នៅភូមិ១០ សង្កាត់បឹងកក់២ ខណ្ឌទួលគោក រាជធានីភ្នំពេញ។លោកឧត្តមសេនីយ៍ទោ ឈឿន សុចិត្ដ ស្នងការនគរបាលខេត្តកណ្ដាល នៅថ្ងៃទី១៩ ខែមីនា ឆ្នាំ២០២៤នេះ បានឲ្យដឹងថារោងចក្រផលិតស្បែកជើងមានយីហោ អ.ជី ហ្វូតវែរ ខេមបូឌា អ.ក ដែលមានកម្មករធ្វើការជាង២ពាន់នាក់ ស្ថិតនៅភូមិអណ្ដូង ឃុំបែកចាន ស្រុកអង្គស្នួល ខេត្តកណ្ដាល ត្រូវបានរងអគ្គិភ័យ នៅវេលាម៉ោង០៤៖៣០នាទីរសៀលថ្ងៃទី១៨ ខែមីនា ឆ្នាំ២០២៤រហូតដល់ម៉ោង៤៖៥០នាទីទាបភ្លឺ ថ្ងៃទី១៩ ខែមីនា ឆ្នាំ២០២៤ ទើបកម្លាំងសមត្ថកិច្ចបានគ្រប់គ្រងទាំងស្រុង។
កម្លាំងសមត្ថកិច្ចគ្រប់ជាន់ថ្នាក់ បានចេញជួយអន្ដរាគមន៍សង្គ្រោះ ដឹកនាំដោយ លោកទេសរដ្ឋមន្ដ្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ សហការជាមួយកម្លាំងគណៈបញ្ជាការឯកភាពខេត្ត។ប្រតិបត្តិការនេះកម្លាំងសមត្ថកិច្ចបានប្រើប្រាស់ទឹកអស់ ចំនួន៥២ឡាន ដោយក្នុងនោះរួមមាន៖ រថយន្ដស្នងការដ្ឋាននគរបាលខេត្តកណ្ដាល, អធិការដ្ឋាននគរបាលស្រុកកណ្តាលស្ទឹង, ស្រុកពញាឮ និងស្រុកអង្គស្នួល, ស្នងការដ្ឋាននគរបាលខេត្តកំពង់ស្ពឺ, អធិការដ្ឋាននគរបាលខណ្ឌកំបូល, ខណ្ឌជ្រោយចង្វារ, រថយន្តកោះពេជ្រ, បុរីពិភពថ្មី, តម្រួតបទបញ្ជា, ក្រសួងមហាផ្ទៃ, បញ្ជាការដ្ឋានអង្គរក្ស, អង្គភាព១១៧, អង្គភាពk86, អង្គភាព911, កងពលតូចលេខ៧០, ស្នងការដ្ឋាននគរបាលរាជធានីភ្នំពេញ និងក្រុមហ៊ុនខ្មែរបេវើរ៉េសដីស។ចំពោះករណីនេះមិនមានគ្រោះថ្នាក់ដល់អាយុជីវិតកម្មករឡើយ។
លោកឧត្តមសេនីយ៍ទោ ឈឿន សុចិត្ត បានបញ្ជាក់ថា បើទោះបីគ្រប់គ្រងបានទាំងស្រុងយ៉ាងណាក្ដី ប៉ុន្ដែកម្លាំងជំនាញមិនទាន់ដកចេញពីកន្លែងកើតហេតុនោះទេ ពោលនៅបន្ដកាយ និងបាញ់ពន្លត់ភ្លើងដែលនៅសេសសល់ខាងក្នុងបន្តទៀត។ សម្រាប់ទំហំនៃការខូចខាតវិញ អាគារទំហំ១០០ម៉ែត្រ គុណ២០០ម៉ែត្រ ចំនួន២ខ្នង និងអាគារទំហំ ១២០ម៉ែត្រ គុណ២០០ម៉ែត្រ ចំនួន១ខ្នង ឆេះខូចខាតទាំងស្រុងដែលបើគោតជាតម្លៃរាប់លានដុល្លារអាមេរិកនេះមិនគិតពីកម្មករជាង២ពាន់នាក់ត្រូវបាត់បង់ការងារនោះទេ។
ទាក់ទងករណីយ៍នេះលោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ បានសម្តែងនូវការចូលរួមរំលែកទុក្ខលំបាក ដោយក្តីសោកស្តាយជាពន់ពេកជាមួយម្ចាស់រោងចក្រ អ ជី ហ្វ៊តវែរ ស្ថិតក្នុងភូមិស្វាយជ្រុំ ឃុំបែកចាន ស្រុកអង្គស្នួល ខេត្តកណ្តាល និងថ្នាក់ដឹកនាំ ព្រមទាំងកម្មករ កម្មការិនីទាំងអស់ ដែលរងគ្រោះដោយឧប្បទ្ទវហេតុគ្រោះអគ្គិភ័យ កាលពីម៉ោង ៤:៣០រសៀល ថ្ងៃទី១៨ ខែមីនា ឆ្នាំ២០២៤ បណ្តាលឱ្យខូចខាតទ្រព្យសម្បត្តិជាច្រើនសន្ធឹកសន្ធាប់ និងបាត់បង់ការងារជាដើម។ឆ្លៀតក្នុងឱកាសនេះ លោកឧបនាយករដ្ឋមន្ត្រី ស សុខា ក៏បានអំពាវនាវដល់ជនរួមជាតិទូទាំងប្រទេស ត្រូវបង្កើននូវស្មារតីប្រុងប្រយត្នខ្ពស់ ចំពោះគ្រោះអគ្គិភ័យគ្រប់ទីកន្លែង ទាំងនៅក្នុងផ្ទះ ផ្សារ សាលារៀន រោងចក្រ សហគ្រាសអាជីវកម្ម ទីតាំងសាធារណៈផ្សេងៗ ស្រែ ចម្ការ និងព្រៃឈើ ជាដើម ជាពិសេសក្នុងស្ថានភាពដែលប្រទេសកម្ពុជាកំពុងតែស្ថិតក្នុងរដូវក្ដៅ។ក្រៅពីនេះ លោកក៏បានណែនាំដល់កម្លាំងពន្លត់អគ្គិភ័យទាំងថ្នាក់ជាតិ និងថ្នាក់ក្រោមជាតិ បន្តត្រៀមលក្ខណៈប្រតិបត្តិការផ្ដល់សេវាជួយសង្គ្រោះជូនប្រជាពលរដ្ឋឱ្យបានទាន់ពេលវេលា ដើម្បីរួមគ្នាសម្រេចគោលដៅរួម គឺ«ធ្វើអ្វីៗដើម្បីផ្ដល់ភាពកក់ក្ដៅជូនប្រជាពលរដ្ឋ»។