វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5796 នាក់
ម្សិលមិញ 5304 នាក់
សរុប 14145322 នាក់
ភ្នំពេញ៖លោក ស្រ៊ុនស្រ៊នដែលជាស្គាល់ថាសកម្មជនកិច្ចព្រមព្រៀងសន្តិភាពទីក្រុងបារីសបានឲ្យកាសែតដឹថា លោកកំពុងរៀបចំពាក្យបណ្តឹងប្តឹងមន្ទីរបរិស្ថានខេត្តសៀមរាបទៅតុលាការពីបទបរិហារកេរ្តិ៍ជាសាធារណៈ។ ការប្តឹងរបស់លោកស្រ៊ុន ស្រ៊នធ្វើឡើង បន្ទាប់ពីមន្ទីរបរិស្ថានខេត្តសៀមរាបបានចេញសេចក្តីប្រកាសព័ត៌មានកាលពីថ្ងៃទី១០ មីនាដោយចោទប្រកាន់លោក និងបុគ្គល២នាក់ផ្សេងទៀតពីបទបានបំផុសចលនាឱ្យពលរដ្ឋប្រព្រឹត្តិបទល្មើសរំលោភយកដីរដ្ឋខុសច្បាប់ក្នុងតំបន់ការពារធម្មជាតិព្រៃធំពពេលក្នុងខេត្តសៀមរាប។
សេចក្តីប្រកាសព័ត៌មានមួយរបស់មន្ទីរបរិស្ថានខេត្តសៀមរាបបានភ្ជាប់ការចោទប្រកាន់លើលោកស្រ៊ុន ស្រ៊ន និងកញ្ញាភឹង សោភាពីបទបានបំផុសឱ្យមានចលនារុករានដីព្រៃខុសច្បាប់នៅក្នុងសហគមន៍តំបន់ការពារធម្មជាតិព្រៃធំពពេល ភូមិពពេល ឃុំខ្នងភ្នំ ស្រុកស្វាយលើ ខេត្តសៀមរាប។ការចោទប្រកាន់របស់អាជ្ញាធរធ្វើឡើងបន្ទាប់ពីលោកស្រ៊ុន ស្រ៊នអះអាងថា លោកទទួលបានដីពីបុគ្គលឈ្មោះ ពុំ សែនក្នុងទំហំ 0៤ហិកតាសម្រាប់អភិវឌ្ឍន៍ជាភូមិឃុំពាណិជ្ជកម្ម និងសាងសង់ហេដ្ឋារចនាសម្ព័ន្ធ ក៏ដូចជាសម្រាប់រៀបចំជាទីតាំងសិក្សាសង្គមច្បាប់ និងកន្លែងដាំដំណាំ។ ប៉ុន្តែអាជ្ញាធរបញ្ជាក់ថា បុគ្គលឈ្មោះពុំ សែនពុំមានដីកម្មសិទ្ធក្នុងតំបន់ខាងលើទេ។ អ្វីដែលខុសបន្ថែមនោះ គឺបុគ្គលឈ្មោះពុំ សែនធ្លាប់ធ្វើកិច្ចសន្យាឈប់កាប់រុករានដីសហគមន៍ខុសច្បាប់ និងព្រមប្រគល់ជូនរដ្ឋវិញកាលពីអំឡុងខែមេសា ឆ្នាំ២០២១។
តាមលោកស្រ៊ុន ស្រ៊ន ដីរបស់លោកពុំ សែនមិនខុសច្បាប់ឡើយ ព្រោះដីនោះមានលិខិតបញ្ជាក់ពីភូមិឃុំច្បាស់លាស់ ខណៈលោកសង្កេតឃើញទីតាំងជុំវិញដីរបស់លោកពុំ សែនជារបស់ឯកជនដែលមានការដាំស្វាយចន្ទីស្ទើរទាំងស្រុង។សូមជម្រាបថា ទីតាំងដីខាងលើស្ថិតក្នុងទីតាំងដីរដ្ឋគ្រប់គ្រងដោយសហគមន៍តំបន់ការពារធម្មជាតិព្រៃធំពពេល។ តំបន់ការពារធម្មជាតិដែលមានទំហំសរុប៧៩៨ហិកតានៃឧទ្យានជាតិព្រះជ័យវរ្ម័ន-នរោត្តម «ភ្នំគូលែន» មួយនេះត្រូវបានក្រសួងបរិស្ថានបង្កើតឡើងក្នុងឆ្នាំ ២០០៨។
មន្ទីរបរិស្ថានខេត្តសៀមរាប បានឱ្យដឹងថា ការបំផុសឱ្យមានការប្រព្រឹត្តបទល្មើសរំលោភដីរដ្ឋពីសំណាក់លោក ស្រ៊ុន ស្រ៊ន និងកញ្ញា ភឹង សោភា ដែលកាន់កាប់ដោយសហគមន៍តំបន់ការពារធ្មជាតិ នៅចំណុចវាលតាឡោ ស្ថិតនៅក្នុងសហគមន៍តំបន់ការពារធម្មជាតិព្រៃធំពពេល ភូមិពពេល ឃុំខ្នងភ្នំ ស្រុកស្វាយលើ ខេត្តសៀមរាប គឺជាចលនាមករុករានដីព្រៃសហគមន៍ដោយខុសច្បាប់ សម្រាប់ធ្វើជាប្រយោជន៍បក្សពួករបស់ខ្លួន។ ទង្វើបែបនេះ គឺជាការប្រព្រឹត្តខុសច្បាប់យ៉ាងធ្ងន់ធ្ងរ ផ្ទុយទៅនឹងមាត្រា២៦ នៃច្បាប់ស្តីពីតំបន់ការពារធម្មជាតិ ដែលចែងថា សហគមន៍មូលដ្ឋាន និងជនជាតិដើមភាគតិចពុំមានសិទ្ធិកាប់គាស់ ឬ ឈូសឆាយដីព្រៃ ក្នុងសហគមន៍តំបន់ការពារធម្មជាតិ ដែលបានចុះកិច្ចព្រមព្រៀងជាមួយរដ្ឋបាលការពារ និងអភិរក្សធម្មជាតិ នៃក្រសួងបរិស្ថាននោះទេ។ នេះបើយោងទៅតាមសេចក្តីប្រកាសព័ត៌មានរបស់មន្ទីរបរិស្ថានខេត្តសៀមរាប នៅថ្ងៃទី១០ ខែមីនា ឆ្នាំ២០២៤។
ជាមួយគ្នាចំពោះការបង្វែរដីរដ្ឋមកធ្វើជាដីកសិកម្ម ឬ ធ្វើជាកម្មសិទ្ធិបុគ្គល ឬ លក់ ប្តូរ ជួល បញ្ចាំ ប្រវាស់ បែងចែក ដោះ ដូរ ឬ ផ្ទេរតំបន់គ្រប់គ្រងរបស់សហគមន៍តំបន់ការពារធម្មជាតិឱ្យទៅជារូបវន្តបុគ្គល ឬ នីតិបុគ្គលណាមួយ ក៏មិនត្រូវបានអនុញ្ញាតនោះឡើយ។ មន្ទីរបរិស្ថានខេត្តសៀមរាប បានឱ្យដឹងទៀតថា ទីតាំងដីខាងលើនេះ គឺស្ថិតនៅក្នុងទីតាំងដីរដ្ឋគ្រប់គ្រងដោយសហគមន៍តំបន់ការពារធម្មជាតិព្រៃធំពពេល ដែលបានបង្កើតឡើងក្នុងឆ្នាំ២០០៨ តាមលិខិត លេខ១៩៥ ប្រ.ក ប.ស្ថ ចុះថ្ងៃទី១៩ ខែតុលា ឆ្នាំ២០២០ របស់ក្រសួងបរិស្ថាន ដែលមានទំហំ៧៩៨ហិកតា នៃឧទ្យានជាតិព្រះជ័យវរ្ម័ន-នរោត្តម ភ្នំគូលែន។
មន្ទីរបរិស្ថានខេត្តសៀមរាប បានសង្កត់ធ្ងន់ថា ចំពោះបុគ្គលឈ្មោះ ពុំ សែន ពុំមានដីកម្មសិទ្ធិដូចបានប្រកាស ផ្តល់ឱ្យនោះដែរ ព្រោះបុគ្គលនេះធ្លាប់បានធ្វើកិច្ចសន្យាឈប់កាប់រុករានដីសហគមន៍ មកធ្វើជាកម្មសិទ្ធិខុសច្បាប់ និងប្រគល់ជូនមករដ្ឋវិញនៅថ្ងៃទី២១ ខែមេសា ឆ្នាំ២០២១។កន្លងមកមន្ត្រីឧទ្យានុរក្ស បានសហការជាមួយប្រជាសហគមន៍ អាជ្ញាធរភូមិឃុំ បានដាំស្តារព្រៃឈើឡើងវិញ បានចំនួន៣,០០០ដើម ស្មើនឹងផ្ទៃដីទំហំ២,៥ហិកតារួចហើយផងដែរ។
មន្ទីរបិរស្ថានថា សកម្មភាពរបស់ឈ្មោះ ស្រ៊ុន ស្រ៊ន និងភឹង សោភា រួមជាមួយ ឈ្មោះ ពុំ សែន គឺជាទង្វើខុសច្បាប់យ៉ាងធ្ងន់ធ្ងរ ផ្ទុយទៅនឹងមាត្រា២៦ នៃច្បាប់តំបន់ការពារធម្មជាតិ។លោកស្រ៊ុន ស្រ៊នបានអះអាងប្រាប់វិទ្យុបារាំងអន្តរជាតិ នៅព្រឹកថ្ងៃទី១១ ខែមីនានេះថា លោកមិនអាចទទួលយកបានឡើយនូវការចោទប្រកាន់របស់មន្ទីរបរិស្ថានខេត្តសៀមរាបដែលបានបរិហារលោកជាសាធារណៈដោយមិនបានសួរនាំរូបលោកជាមុន។ តាមលោកស្រ៊ុន ស្រ៊ន បណ្តឹងរបស់លោកពេលនេះគឺដើម្បីរក្សាភាពស្អាតស្អំរបស់ខ្លួន ច្រានចោលលើការចោទប្រកាន់របស់អាជ្ញាធរពីបទញុះញង់ និងបង្កើតចលនារំលោភយកដីព្រៃរបស់រដ្ឋធ្វើជាកម្មសិទ្ធិដោយខុសច្បាប់។សកម្មជនកិច្ចព្រមព្រៀងសន្តិភាពទីក្រុងបារីសរូបនេះបញ្ជាក់ថា លោកដាក់ពាក្យបណ្តឹងទៅកាន់តុលាការខេត្តសៀមរាបផ្ទាល់ និងបានចោទជាសំណួរថា ហេតុអ្វីបានជាអាជ្ញាធរមិនព្រមចាប់ខ្លួនលោកតាំងពីដំបូង ព្រោះបើសម្អាងលើការចោទប្រកាន់របស់អាជ្ញាធរ គឺមានសភាពធ្ងន់ធ្ងររួចទៅហើយ។