លោករដ្ឋមន្ត្រីឌិតទីណាបង្ហាញទស្សនៈវិស័យលើវិស័យកសិកម្មក្នុងរជ្ជកាលលោកកាន់កាប់
27-March-2024 / សេដ្ឋកិច្ច
ភ្នំពេញ៖លោកឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានលើកឡើងថា នៅពេលខាងមុខ ក្រសួងនឹងមិនជំរុញការផលិតលើផ្នែកកសិកម្មឱ្យបានច្រើននោះទេ ពោលគឺផលិតក្នុងបរិមាណល្មម ប៉ុន្តែត្រូវបង្កើនកម្រិតគុណភាពនៃការផលិតឱ្យបានល្អ និងមានផលចំណេញច្រើនវិញ ដោយយកផលចំណេញជាគោល។
ថ្លែងនៅក្នុងសន្និសីទកាសែតស្តីពី ទស្សនទាន ក្នុងវិស័យកសិកម្មនៅកម្ពុជានាព្រឹកថ្ងៃទី៥មករានៅទីស្តីការគណរដ្ឋមន្ត្រីរៀបចំដោយអង្គភាពអ្នកនាំពាក្យរាជរដ្ឋាភិបាលរដ្ឋមន្ត្រីក្រសួងកសិកម្ម ដែលទើបតែឡើងកាន់តំណែងជាង៣ខែមកនេះរូបនេះបន្តថា លោកនឹងរក្សាតម្លៃថេរចំពោះការផ្គត់ផ្គង់ក្នុងស្រុក។ ប៉ុន្តែចំពោះការនាំចេញទៅទីផ្សារក្រៅស្រុកវិញ លោកនឹងបង្កើនតម្លៃឱ្យស្របទៅនឹងគុណភាពនៃផលិតផលនាំចេញរបស់កម្ពុជា។ ក្នុងនោះ លោក ឌិត ទីណាបញ្ជាក់ថា ក្រសួងមិនចង់បានទំហំនាំចេញទំនិញកសិផលច្រើនដើម្បីប្រកួតប្រជែងជាមួយប្រទេសដទៃ តាមយន្តការលក់ក្នុងតម្លៃទាបនោះទេ ប៉ុន្តែលោកចង់បានការនាំចេញក្នុងបរិមាណមួយមធ្យម ប៉ុន្តែលក់បានក្នុងតម្លៃខ្ពស់។
លោក ឌិត ទីណា ចាត់ទុកថា ការបង្កើនតម្លៃនាំចេញទំនិញកសិកម្មរបស់កម្ពុជាទៅទីផ្សារក្រៅប្រទេសនេះ ក្រសួងនឹងផ្សព្វផ្សាយអំពីគុណភាពចំពោះផលិតរបស់កម្ពុជាទៅកាន់ប្រទេសជាដៃគូបន្ត ហើយក៏នឹងជំរុញឱ្យអ្នកផលិតក្នុងស្រុកយល់ដឹងពីការជ្រើសរើសប្រភេទផលិតផលកសិកម្មណាមួយដែលមានគុណភាព និងអាចលក់បានក្នុងតម្លៃខ្ពស់។លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា ក្រសួងកសិកម្ម បានកំណត់យកពូជស្រូវចំនួន២ប្រភេទ ដែលពេញនិយម និងមានទីផ្សារល្អ គឺពូជស្រូវសែនក្រអូប និងពូជស្រូវអូអឹម៥៤-៥១ ដើម្បីផលិតជាពូជ ទុកលក់ក្នុងតម្លៃសមរម្យ ជូនដល់ប្រជាកសិករ ក្នុងការដាំដុះ។
លោករដ្ឋមន្ត្រី បានបញ្ជាក់ថា ការងារផលិតពូជស្រូវនេះ បានធ្វើឡើងស្របតាមការណែនាំរបស់សម្តេចតេជោ ហ៊ុន សែន នាយករដ្ឋមន្ត្រី ខណៈការងារនេះ កំពុងមានវឌ្ឍនភាព ហើយរំពឹងថា នឹងអាចលក់ចែកជូនដល់ប្រជាកសិករ យកទៅដាំដុះ នៅពេលឆាប់ៗ។លោក ឌិត ទីណា មានប្រសាសន៍ដែរថា ការផលិតពូជស្រូវនេះ កំពុងតែមានវឌ្ឍនភាព ហើយថ្មីៗនេះថវិកាសម្រាប់ការផលិតពូជ ក៏ទទួលបានការឯកភាព ពីសំណាក់ឯកឧត្តមរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុផងដែរ ដើម្បីបន្តផលិតពូជស្រូវ ដែលមានវិញ្ញាបនបត្រ។
លោករដ្ឋមន្ត្រី បានមានប្រសាសន៍ថា ក្រោយពូជស្រូវនេះផលិតបាន ក្រសួងនឹងរៀបចំជាទស្សនៈទានមួយ ជាមួយសហព័ន្ធស្រូវអង្ករ ដែលជាអ្នកទិញស្រូវយកទៅកែឆ្នៃ ហើយប្រសិនបើកសិករ ចូលរួមជាមួយទស្សនៈទានថ្មីនេះ ពួកគាត់នឹងទទួលបានផលចំណេញ តាមរយៈការមានទីផ្សាររួចជាស្រេច មុនពេលដែលគាត់ដាំដុះទៅទៀត ដោយកសិករបានដឹងថា នៅពេលបានផល ពួកគាត់ត្រូវលក់ឲ្យខាងណា ក្នុងតម្លៃណា និងក្នុងកម្រិតបរិមាណប៉ុន្មានដែលមិនសល់ ជៀសវាងការសល់ស្រូវ។
សម្រាប់បំរើឲ្យទស្សនៈវិស័យនេះក្រសួងកសិកម្ម រុក្ខាប្រមាញ់ និងនេសាទ គ្រោងសាកល្បងរៀបចំឃុំចំនួន១០ នៅតាមបណ្ដាខេត្តមួយចំនួនឱ្យក្លាយទៅជាឃុំ កសិកម្មគំរូនៅក្នុងឆ្នាំនេះ ដើម្បីជួយដល់ប្រជាកសិករ និងលើកស្ទួយវិស័យកសិកម្មឱ្យមានការរីកចម្រើន។រដ្ឋលេខាធិការក្រសួងកសិកម្ម ដែលទើបតែងតាំងថ្មី លោក យ៉ង សាំងកុមារ បានឱ្យដឹងនៅថ្ងៃទី០៥ ខែធ្នូ ឆ្នាំ២០២៣នេះដែរបានប្រាប់កាសែតថា ដើមចមដែលនាំឱ្យក្រសួងគ្រោងសាកល្បងរៀបចំ «ឃុំកសិកម្មគំរូ» ចំនួន១០ នៅតាមបណ្តាខេត្តមួយចំនួននោះ ដោយសារតែវិស័យកសិកម្មជាវិស័យអាទិភាពមួយក្នុងការជួយដល់ប្រជាកសិករ និងធ្វើឱ្យសេដ្ឋកិច្ចកម្ពុជាកាន់តែរីកចម្រើន។
លោកមានប្រសាសន៍ថា៖ «នៅពេលដែលយើងមានមន្ត្រីកសិកម្មម្នាក់ប្រចាំការ ជួយកសិករនៅក្នុងឃុំនីមួយៗហ្នឹង វានឹងជួយឱ្យមានការផ្លាស់ប្តូរ ជួយឱ្យមានការរីកចម្រើន ហើយវាធ្វើឱ្យមានការរីកចម្រើនល្អ យើងអាចពង្រីកទៅភូមិឃុំទូទាំងប្រទេសទៅថ្ងៃខាងមុខ។ វាអាស្រ័យទៅលើការសម្រេចចិត្តរបស់រាជរដ្ឋាភិបាលទៅថ្ងៃខាងមុខ តែវិធានការដំបូង គឺសម្តេចនាយករដ្ឋមន្ត្រី សុំសាកល្បងចំនួន១០ឃុំសិន ដើម្បីជួយការងារហ្នឹង»។យ៉ាងណា លោកនៅពុំទាន់អាចបញ្ជាក់ថាតើឃុំទាំង១០ ដែលគ្រោងរៀបចំឡើងជាផ្លូវការនោះថាមានឃុំណាខ្លះនៅឡើយ ខណៈក្រុមការងារជំនាញកំពុងសិក្សាទីតាំង និងជ្រើសរើសមន្ត្រីជាប់កិច្ចសន្យាចំនួន១០នាក់ឱ្យជួយសម្របសម្រួលប្រជាកសិករនៅក្នុងឃុំគំរូទាំងនោះ ដើម្បីរួមគ្នាធ្វើការអភិវឌ្ឍវិស័យកសិកម្មនេះ។ បើតាមលោក យ៉ង សាំងកុមារ ឃុំកសិកម្មគំរូដែលនឹងត្រូវរៀបចំឡើងក្នុងរយៈពេល៣ខែខាងមុខនេះ នឹងផ្តោតលើការដាំស្រូវ ស្វាយចន្ទី និងដំឡូង ជាដើម។
សូមជម្រាបថា ការនាំចេញទំនិញស្រូវ-អង្ករ និងកសិផលផ្សេងទៀតរបស់កម្ពុជាក្នុងរយៈពេល១១ខែឆ្នាំ២០២២ មានទំហំទឹកប្រាក់ប្រមាណ៣,៣៦២លានដុល្លារ ពោលគឺមានការធ្លាក់ចុះខ្លាំង។ ក្នុងនោះ ចំណូលពីការនាំចេញអង្ករ-ស្រូវ មានចំនួនជិត៦០០លានដុល្លារ និងចំណូលបានមកពីការនាំចេញកសិផលក្រៅពីស្រូវអង្ករ មានចំនួន ២រយលានដុល្លារ។ បើតាមក្រសួងពាណិជ្ជកម្ម មុខទំនិញកសិផលដែលកម្ពុជាបាននាំចេញទៅទីផ្សារអន្តរជាតិមានជាង១០០ប្រភេទ៕
