ដល់ពេលហ្នឹងបានដឹងថាទំនិញវាយនភណ្ឌ័នាំចេញទៅអឺរ៉ុបមកពីស្រុកចិនតើ!
03-April-2024 / សេដ្ឋកិច្ច
ភ្នំពេញ៖ ពេលមានវិបត្តិទើបបានដឹងថាវត្ថុធាតុដើមសម្រាប់ផលិតសម្លៀកបំពាក់ឬស្បែកជើងនាំចេញទៅអាមេរិកនិងអឺរ៉ុបភាគច្រើនគឺមកពីស្រុកចិនតើ!។ជាក់ស្តែងគ្រាន់តែស្រុកចិនជួបវិបត្តិដោយសាមេរោគកូវីដ១៩រោងចក្រនៅស្រុកខ្មែរតាមការប៉ាន់ស្មានថាមានប្រមាណ២០០រោងចក្រមានកម្មប្រមាណជាង១០ម៉ឹននាក់អាចត្រូវផ្អាកនៅក្នុងខែមិនាឆ្នាំ២០២០នេះដោយសារខ្វះវត្ថុធាតុដើមដែលនាំចូលមកពីស្រុកចិន។
តែអាឡូវរឿងបារម្ភនេះបានធូស្រាលវិញហើយ។ព្រោះនាវាដឹកវត្ថុធាតុដើមប្រមាណ ១៩១ទូបានចូលមកដល់ប្រទេសកម្ពុជាហើយនៅយប់ថ្ងៃទី០៩ ខែមីនា ឆ្នាំ២០២០ ដើម្បីផ្គត់ផ្គង់នៅតាមរោងចក្រនានា។ វត្ថុធាតុដើមទាំងនេះ បានធ្វើឱ្យរោងចក្រព្យួរការងារចាប់ផ្តើមដំណើរការឡើងវិញបណ្តើរៗហើយ។ លោក ហេង សួរ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងជាអ្នកនាំពាក្យ បានប្រាប់កាសែតថា កង្វះវត្ថុធាតុដើមនេះ បានធ្វើឱ្យរោងចក្រចំនួន ៥០ព្យួរការងារ នាំឱ្យប៉ះពាល់កម្មករ និយោជិត ២០,៩៤០នាក់ ស្ត្រី ១៦,១៨៣នាក់។
ដើម្បីដោះស្រាយបញ្ហាកង្វះវត្ថុធាតុដើមនេះ រាជរដ្ឋាភិបាលកម្ពុជា និងរដ្ឋាភិបាលចិន ដែលជាប្រទេសមានទំនាក់ទំនងស្អិតល្មួតចាក់ទឹកមិនលិចនោះ ក៏បានប្រឹងប្រែងរិះរកគ្រប់វិធី ដើម្បីពន្លឿនការនាំវត្ថុធាតុដើមមកកាន់កម្ពុជា។ នាវាចំនួន៧ចាប់ផ្តើមដឹកវត្ថុធាតុដើមទាំងនេះ ហើយនាវាមួយគ្រឿងបានចូលមកដល់កំពង់ផែក្រុងព្រះសីហនុហើយនៅយប់ថ្ងៃទី០៩ ខែមីនា ឆ្នាំ២០២០។
លោក លូ គឹមឈន់ ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយកកំពង់ផែស្វយ័តក្រុងព្រះសីហនុ បានឲ្យដឹង ថា នាវាមួយគ្រឿងនេះ បានដឹកទូកុងតឺន័រជាវត្ថុធាតុដើមចំនួន ១៩១ទូ ក្នុងនោះវត្ថុធាតុដើមជាក្រណាត់សុទ្ធចំនួន ៩១ទូ។
សម្តេចតេជោ ហ៊ុន សែន ក្នុងពិធីចែកសញ្ញាបត្រជូននិស្សិតវ៉ាន់ដានៅព្រឹកថ្ងៃទី១០ ខែមីនា ឆ្នាំ២០២០នេះ បានគូសបញ្ជាក់ថា នាវាចំនួន៧គ្រឿងនេះ នឹងដឹកវត្ថុធាតុដើមទៅមករហូតដល់បញ្ហាបណ្តាលមកពីជំងឺកូវីត១៩ត្រូវបានបញ្ចប់។ ក្នុងនោះនាវា ៥គ្រឿង នឹងដឹកទំនិញចូលកំពង់ផែក្រុងព្រះសីហនុ រីឯនាវាពីរទៀតដឹកវត្ថុធាតុដើមចូលទីក្រុងហូជីមិញ ប្រទេសវៀតណាម ហើយដឹកបន្តតាមរថយន្តទៅផ្គត់ផ្គង់រោងចក្រនានានៅក្រុងបាវិត ខេត្តស្វាយរៀង។
សម្តេចតេជោ ហ៊ុន សែន បានចាត់ទុកការរូតរះ និងពន្លឿនការដឹកវត្ថុធាតុដើមពីចិនមកកាន់ប្រទេសកម្ពុជានេះ គឺកើតចេញពីទំនាក់ទំនងល្អរវាងកម្ពុជា និងចិន។ «នេះជាភាពដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា និងចិន ដែលយើងទទួលបាននូវវត្ថុធាតុដើម ដើម្បីដោះស្រាយបញ្ហាអត់ការងារធ្វើរបស់កម្មករ និងស្ថិរភាពនៃច្រវ៉ាក់ផលិតកម្មបម្រើឱ្យការនាំចេញរបស់យើង»។
លោក ហេង សួរ បានឱ្យដឹងថា ការមកដល់នៃវត្ថុធាតុដើមពីប្រទេសចិននេះ ជួយឱ្យរោងចក្រដែលព្យួរការងារមួយចំនួនចាប់ផ្តើមដំណើរការឡើងវិញផងដែរ។ បើតាមលោក ហេង សួរ រោងចក្រដែលសុំព្យួរការងារចំនួន៧បានដំណើរការឡើងវិញ។ រោងចក្រទាំង៧នេះ មានកម្មករសរុបប្រមាណ ១០,១០៣នាក់ ស្ត្រី ៩,១៧៣នាក់។ «ការមកដល់នៃវត្ថុធាតុដើមទាំងនេះ វានឹងជួយឲ្យរោងចក្រដែលមិនទាន់ព្យួរកាន់តែអាចដំណើរការទៅមុខដោយមិនបាច់ព្យួរ។ ប្រសិនជាវាផ្គត់ផ្គង់ទៅរោងចក្រដែលព្យួរ គឺវានឹងធ្វើឲ្យរោងចក្រនោះបើកឡើងវិញ»។
