ផ្ទាំងប៉ាណូអក្សរចិននៅកណ្តាលក្រុងបាងកកឃោសនាពីការចូលសញ្ជាតិនិងថ្វើលិខិតឆ្លងដែនត្រូវអាជ្ញាធរថៃទម្លាក់ហើយ!
27-October-2025 / ព័ត៌មានអន្តរជាតិ
ថៃ៖លិខិតឆ្លងដែនកម្ពុជា ឥណ្ឌូនេស៊ី តួកគី និងវ៉ានូអាទូត្រូវបានដាក់តាំងលើផ្ទាំងប៉ាណូមួយដ៏ធំសរសេរអក្សរចិននៅតំបន់ Huai Khwang ក្នុងទីក្រុងបាងកកប្រទេសថៃ។ ផ្ទាំងប៉ាណូនោះបានបង្ហាញរូបបុរសវ័យចំណាស់ម្នាក់ និងដាក់តម្លៃសេវាជាប្រាក់យ័ននៅលើរូបភាពនៃលិខិតឆ្លងដែនទាំងនោះ។ ទន្ទឹមនឹងផ្តល់សេវាធ្វើលិខិតឆ្លងដែន ផ្ទាំងប៉ាណូនោះក៏បានប្រាប់ព័ត៌មានពីសេវាផ្តល់សញ្ជាតិរហ័សដែលចំណាយពេលរត់ការឯកសារត្រឹមតែ ៣០ថ្ងៃប៉ុណ្ណោះ។ តាមការចុះផ្សាយរបស់បណ្តាកាសែតថៃ អាជ្ញាធរថៃបានទម្លាក់ផ្ទាំងប៉ាណូនោះចុះកាលពីថ្ងៃទី២២ កក្កដា និងនៅថ្ងៃទី២៣ កក្កដា ប៉ូលិសអន្តោប្រវេសន៍ថៃបានចាប់ឃាត់ខ្លួនស្ត្រីជនជាតិចិនម្នាក់ដែលជាអ្នករត់ការតម្លើងផ្ទាំងប៉ាណូផ្សាយពាណិជ្ជកម្មដ៏ចម្រូងចម្រាសនោះ។
កាសែតបាងកកប៉ុស្តិ៍បានចុះផ្សាយថា ស្ត្រីជនជាតិចិនរូបនោះបានប្រាប់ប៉ូលិសថា នាងត្រូវគេជួលពីហុងកុងឱ្យមកសម្របសម្រួលបោះពុម្ព និងផ្សព្វផ្សាយពាណិជ្ជកម្មផ្តល់សេវាធ្វើលិខិតឆ្លងដែន និងសេវាចូលសញ្ជាតិនៅក្នុងប្រទេសថៃ។ តែស្ត្រីចិនម្នាក់នេះមិនបានទទួលស្គាល់កំហុស និងមិនបានប្រាប់អត្តសញ្ញាណមេខ្លោងទេ។ តាមបាងកកប៉ុស្តិ៍ដដែល អាជ្ញាធរថៃបានសម្រេចចោទប្រកាន់ស្ត្រីចិនរូបនោះពីបទធ្វើការងារនៅក្នុងប្រទេសថៃដោយគ្មានការអនុញ្ញាត។ គួរបញ្ជាក់ថានៅប្រទេសណាមិនដឹងទេ តែបើនៅថៃ ការលក់លិខិតឆ្លងដែនរបស់ប្រទេសណាមួយជាអំពើខុសច្បាប់។
នាយករដ្ឋមន្ត្រីថៃលោកសេដ្ឋា ថៈវីស៊ីនបានបញ្ជាឱ្យប៉ូលិសស៊ើបអង្កេតជាបន្ទាន់លើការផ្សព្វផ្សាយផ្ទាំងប៉ាណូ និងសកម្មភាពអាជីវកម្មខុសច្បាប់ផ្សេងទៀតដែលកើតមាននៅ Huai Khwang ដែលជាតំបន់សម្បូរការវិនិយោគរបស់ចិន។ ចំណែករដ្ឋមន្ត្រីក្រសួងមហាផ្ទៃថៃ លោក Anutin Charnvirakul បានបញ្ជាក់នៅក្នុងការចុះផ្សាយរបស់កាសែតក្នុងស្រុកថៃ Khaosod នៅថ្ងៃទី២៣ កក្កដាថា អាជ្ញាធរថៃពិតជាមានការបារម្ភចំពោះការដាក់លក់លិខិតឆ្លងដែន និងទទួលសេវាចូលសញ្ជាតិយ៉ាងគឃ្លើនយ៉ាងដូច្នេះ។ លោក Anutin Charnvirakul អះអាងថា រដ្ឋាភិបាលថៃចាំបាច់ត្រូវបើកការស៊ើបអង្កេតទៅលើអាជីវកម្មទុច្ចរិត ឬបុគ្គលមានឥទ្ធិពលណាដែលហ៊ានប្រើប្រាស់ទឹកដីថៃជាមូលដ្ឋានសម្រាប់សកម្មភាពខុសច្បាប់មួយនេះ។
ការផ្សាយពាណិជ្ជកម្មលក់លិខិតឆ្លងដែននិងសញ្ជាតិជាសាធារណៈនៅលើដងផ្លូវនេះបានបង្កឱ្យមានការភ្ញាក់ផ្អើលយ៉ាងខ្លាំងពីសំណាក់ប្រជាជនថៃ និងភ្ញៀវទេសចរ។ តាមការចុះផ្សាយរបស់កាសែតថៃជាច្រើន ការដាក់លក់លិខិតឆ្លងដែន និងសញ្ជាតិយ៉ាងអាណាធិបតេយ្យនេះអាចជាប់ពាក់ព័ន្ធនឹងការក្លែងបន្លំឯកសារ ឬការក្លែងបន្លំផ្សេងទៀតដែលក្រុមជនទុច្ចរិតមានបំណងបោកប្រាស់ភ្ញៀវដែលស្វែងរកសញ្ជាតិថ្មី។ ទន្ទឹមគ្នានេះ ថៃក៏បារម្ភផងដែរពីលំហូរភ្ញៀវទេសចរខុសច្បាប់ ពិសេសភ្ញៀវទេសចរដែលពាក់ព័ន្ធនឹងសកម្មភាពឧក្រិដ្ឋ ដូចជាការក្លែងបន្លំឯកសារ និងការបោកប្រាស់ផ្សេងៗទៀត។
កម្ពុជាតាមរយៈអ្នកនាំពាក្យរងក្រសួងមហាផ្ទៃលោកទូច សុឃៈបានបញ្ចេញប្រតិកម្មនៅថ្ងៃទី២៤ កក្កដានេះថា សេវាធ្វើលិខិតឆ្លងដែន និងសេវាផ្តល់សញ្ជាតិរបៀបនេះនៅប្រទេសថៃជាទង្វើខុសច្បាប់ធ្ងន់ធ្ងរ និងថា កម្ពុជានឹងសហការជាមួយអាជ្ញាធរថៃដើម្បីតាមចាប់មេខ្លោងឱ្យបាន។ តាមលោកទូច សុឃៈ លិខិតឆ្លងដែន និងសញ្ជាតិរបស់កម្ពុជាមានតម្លៃដែលមិនអាចដាក់លក់ដោយសេរីស្រេចតែចិត្តនោះទេ៕អត្ថបទវិទ្យុងបារាំង
