ទំនិញកម្ពុជាដែលដឹកជញ្ជូនឆ្លងកាត់ប្រទេសវៀតណាមត្រូវបង់កម្រៃនិងបើដឹកចូលយឺតយ៉ាវបណ្តាលឲ្យចំណាយច្រើន
06-April-2025 / សេដ្ឋកិច្ច
ភ្នំពេញ៖ សមាគមភ័ស្តុភារកម្មកម្ពុជា (CLA) បានស្នើឲ្យភាគីវៀតណាមលុបចោលការយកកម្រៃពីការដឹកជញ្ជូនទំនិញរបស់កម្ពុជា ទៅកាន់ប្រទេសគោលដៅ ដែលឆ្លងកាត់ប្រទេសវៀតណាម តាមកិច្ចព្រមព្រៀងអាស៊ាន GMS ព្រមទាំងសម្រួលការដឹកជញ្ជូនទំនិញឲ្យបានលឿន ដើម្បីចៀសវាងការបញ្ជូនទំនិញយឺតពេល និងថ្លៃចំណាយកើនឡើង។
សំណើនេះធ្វើឡើងពេលលោកឧកញ៉ា ស៊ិន ចន្ធី ប្រធានសមាគមភ័ស្តុភារកម្មកម្ពុជា (CLA) បានដឹកនាំគណៈប្រតិភូប្រតិបត្តិករក្នុងវិស័យដឹកជញ្ជូន និងឡូជីស្ទិកកម្ពុជា ប្រមាណជិត ៥០ក្រុមហ៊ុនទៅបំពេញទស្សនកិច្ចនៅប្រទេសវៀតណាម ដើម្បីពង្រឹងកិច្ចសហប្រតិបត្តិការលើវិស័យដឹកជញ្ជូន និងឡូជីស្ទិករវាងវិស័យឯកជនប្រទេសទាំងពីរ និងស្វែងរកដំណោះស្រាយដែលប្រតិបត្តិករទាំងសងខាងកំពុងប្រឈមបញ្ហា។
លោកឧកញ៉ា ស៊ិន ចន្ធី បានមានប្រសាសន៍ប្រាប់កាសែតថា នៅក្នុងជំនួបជាមួយភាគីប្រតិបត្តិករក្នុងវិស័យដឹកជញ្ជូន និងឡូជីស្ទិកវៀតណាម យើងបានពិភាក្សាទៅលើបញ្ហាជាច្រើន ជាពិសេសបញ្ហាសំខាន់ចំនួនពីរដែលប្រតិបត្តិករកម្ពុជា បានជួបប្រទះ និងស្នើឲ្យភាគីវៀតណាមជួយសម្របសម្រួល និងធ្វើការដោះស្រាយ។លោកឧកញ៉ាស៊ីនជន្ធី បានបញ្ជាក់ថា បញ្ហាទាំងពីរនេះគឺកើតឡើងជាច្រើនឆ្នាំមកហើយ ដែលប្រតិបត្តិករកម្ពុជាតែងតែចង់ឲ្យមានការដោះស្រាយបំផុត។
ក្នុងនោះបញ្ហាទីមួយ គឺទំនិញរបស់កម្ពុជា ដែលត្រូវបញ្ជូនទៅកាន់ប្រទេសទី ៣ ដឹកជញ្ជូនឆ្លងកាត់ប្រទេសវៀតណាម ត្រូវបានប្រទេសនេះទាមទារឲ្យបង់ថ្លៃសេវា ដែលខុសទៅនឹងកិច្ចព្រមព្រៀងអាស៊ាន GMS មិនតម្រូវឲ្យមានបង់ប្រាក់បែបនេះនោះទេ ដោយក្នុង ២០ហ្វីត ទូរកុងតឺន័រ ថ្លៃរហូតដល់ ១០០ដុល្លារ។ បញ្ហាទីពីរ គឺទំនិញដែលដឹកញ្ជូនពីប្រទេសផ្សេងៗមកកាន់កម្ពុជា ឆ្លងកាត់ប្រទេសវៀតណាម ត្រូវបានអាជ្ញាធរវៀតណាមធ្វើការត្រួតពិនិត្យ ដែលធ្វើឲ្យការដឹកជញ្ជូនត្រូវពន្យាពេលរយៈពេលយូរ និងត្រូវការបង់ថ្លៃស្តុកទំនិញ រួមជាមួយសេវាផ្សេងៗទៀត ដែលធ្វើឲ្យការចំណាយថ្លៃដើមកាន់តែកើនឡើងខ្ពស់។
លោកឧកញ៉ា បានបន្តថា ជាទូទៅការដឹកជញ្ជូនទំនិញឆ្លងកាត់បែបអន្តរជាតិ (Transit) គឺគេមិនតម្រូវឲ្យបង់កម្រៃនោះទេ ហើយក៏មិនចាំបាច់មានការត្រួតពិនិត្យរូបវ័ន្តអ្វីនោះដែរ ប៉ុន្តែភាគីវៀតណាមបានអះអាងថា ការយកកម្រៃលើទំនិញរបស់កម្ពុជានេះ គឺទៅលើថ្លៃប្រើប្រាស់ហេដ្ឋារចនាសម្ព័ន្ធរបស់ខ្លួន។ ដូច្នេះកត្តាទាំងពីរនេះ បានធ្វើឲ្យការចំណាយថ្លៃដើមកើនឡើងខ្ពស់ និងការបញ្ជូនទំនិញទៅគោលដៅមានភាពយឺតយ៉ាវផងដែរ។
ទោះជាបានដាក់សំណើរក៏ដៅយក៏លោកឧកញ៉ា បានលើកឡើងថា បញ្ហាទាំងនេះ គឺត្រូវការដោះស្រាយក្នុងកម្រិតរវាងរដ្ឋាភិបាល និងរដ្ឋាភិបាល ប៉ុន្តែការស្នើរបស់សមាគមភ័ស្តុភារកម្មកម្ពុជា ទៅកាន់វិស័យឯកជនដឹកជញ្ជូន និងឡូជីស្ទិកវៀតណាមនេះ ក្នុងគោលបំណងឲ្យពួកគេនាំយកបញ្ហាទាំងនេះទៅប្រាប់រដ្ឋាភិបាលវៀតណាម ដើម្បីជួយសម្របសម្រួល និងធ្វើការដោះស្រាយ។ កន្លងមកក្រសួងពាណិជ្ជកម្មកម្ពុជា ក៏ធ្លាប់បានស្នើឲ្យភាគីវៀតណាមធ្វើការសម្រសម្រួលក្នុងការបញ្ជូនទំនិញរបស់កម្ពុជា ទៅកាន់ប្រទសគោលដៅ ឬប្រទេសទី៣ ដោយមិនចាំបាច់បង់ប្រាក់ និងការបញ្ជូនទំនិញមកកម្ពុជា ឆ្លងកាត់វៀតណាម ឲ្យកាន់តែមានភាពងាយស្រួល ក៏ដូចជាលឿនជាងមុនផងដែរ ប៉ុន្តែរហូតមកដល់នឹងពេលនេះមិនទាន់ឃើញចេញលទ្ធផលនៅឡើយ។ដោយសារបញ្ហាបែននេះហើយបានជាកន្លងមកថ្មីៗនេះរដ្ឋមន្ត្រីក្រសួងសាធារធណៈការកម្ពុជាលោកស៊ុនចន្ទ័ថុលបានបង្ហើបឲ្យដឹងពីផែនការជីកព្រែកចេញពីទន្លេរបាសាកកម្ពុជាទៅសមុទ្ទកែបកំពតក្នុងគោលបំណងដើម្បីដោះស្រាយបញ្ហាខាងលើនេះ៕
