អគ្គមេបញ្ជាកងទព័កម្ពុជាថៃជួបគ្នាតាមវិដេអូនិយាយពីកិច្ចសហការទ្វេភាគីពិសេសបញ្ហារដោះម៊ីនតាមព្រុំដែន!
05-September-2026 / សន្តិសុខសង្គម
ភ្នំពេញ៖ នៅព្រឹកថ្ងៃទី២២ ខែធ្នូ ឆ្នាំ២០២០នេះ នាយឧត្ដមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានជួបប្រជុំទ្វេភាគីជាមួយ នាយឧត្ដមសេនីយ៍ ចាឡឺមពល ស្រ៊ីសាវ៉ាតឌី អគ្គមេបញ្ជាការកងទ័ពភូមិន្ទថៃ តាមរយៈប្រព័ន្ធវីដេអូ។ 
នាយឧត្ដមសេនីយ៍ វង្ស ពិសេន បានគូសបញ្ជាក់ថា ជំនួបទ្វេភាគីនេះបានបង្ហាញពីការតាំងចិត្ត និង អនុលោមទៅតាមស្មារតីនៃកិច្ចព្រមព្រៀងក្នុងកិច្ចប្រជុំគណៈកម្មាធិការកិច្ចការព្រំដែនទូទៅ កម្ពុជា-ថៃ (GBC) លើកទី១៤ ដែលបានឯកភាពគ្នាក្នុងការបង្កើតឲ្យមានជំនួបប្រចាំឆ្នាំ ដើម្បីពង្រឹងពង្រីកទំនាក់ទំនង និងកិច្ចសហប្រតិបត្តិការរវាងកងទ័ពប្រទេសទាំងពីរ។ ឆ្នាំ២០២០នេះ គឺជាខួបលើកទី៧០ នៃទំនាក់ទំនងការទូតកម្ពុជា-ថៃ ហើយផ្តើមចេញពីទំនាក់ទំនង និងកិច្ចសហប្រតិបត្តិការល្អរវាងប្រទេសទាំងពីរ ធ្វើឲ្យគ្រប់វិស័យមានការរីកចម្រើន ស្ថានភាពនៅតាមបន្ទាត់ព្រំដែនមានភាពល្អប្រសើរ ដែលជាគោលដៅចង់បានរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងការប្រែក្លាយព្រំដែនជាមួយប្រទេសជិតខាងជាព្រំដែនសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ។
នាយឧត្ដមសេនីយ៍ អគ្គមេបញ្ជាការ ក៏បានថ្លែងអំណរគុណដល់ភាភីថៃ ដែលក្នុងស្ថានភាពនៃជំងឺឆ្លងកូវីដ១៩ ថៃនៅបានជួយសម្រួលដល់ពលរដ្ឋកម្ពុជាឆ្លងដែនចូលទៅព្យាបាលជំងឺ និងការទទួលយកពលករស្របច្បាប់កម្ពុជាឲ្យទៅបំពេញការងារនៅប្រទេសថៃវិញ។ នាយឧត្ដមសេនីយ៍ សង្ឃឹមថា កងទ័ពប្រទេសទាំងពីរនឹងបន្តសហការគ្នាយ៉ាងជិតស្និទ្ធ ក្នុងការផ្លាស់ប្តូរពត៌មានចារកិច្ច និងពង្រីកនូវកិច្ចសហប្រតិបត្តិការ និងធ្វើលំហាត់សមយុទ្ធរួមគ្នាឲ្យកាន់តែទូលំទូលាយថែមទៀត ពិសេស លំហាត់ទាក់ទងទៅនឹងបញ្ហាសន្តិសុខ និង សង្គ្រោះគ្រោះមហន្តរាយ។
នាយឧត្ដមសេនីយ៍ ចាឡឺមពល ស្រ៊ីសាវ៉ាតឌី បានគូសបញ្ជាក់ថា ក្នុងស្ថានភាពបច្ចុប្បន្នដោយសារបញ្ហាជំងឺឆ្លងកូវីដ១៩ ប្រទេសថៃបានកត់សម្គាល់ដល់ការធ្វើដំណើរឆ្លងដែនរវាងប្រទេសទាំងពីរ ក្នុងនោះភាគីថៃបានជួយសម្រួលឲ្យពលរដ្ឋកម្ពុជាចូលមកព្យាបាលជំងឺ បើទោះជាមានការបិទព្រំដែនក៏ដោយ។
នាយឧត្ដមសេនីយ៍ អគ្គមេបញ្ជាការកងទ័ពភូមិន្ទថៃ បានបន្តថា មកដល់ពេលនេះប្រទេសថៃមានវិធានការតឹងរ៉ឹងទប់ស្កាត់មិនឲ្យមានឆ្លងទៅដល់ពលករកម្ពុជា និងសូមឲ្យកម្ពុជាមានការជឿជាក់លើចំណាត់ការនេះ ក្នុងករណីមានអ្នកឆ្លងជំងឺកូវីដ១៩ ភាគីថែនឹងដាក់ឲ្យនៅដាច់ដោយឡែក ដើម្បីការពារសុវត្ថិភាពក្នុងប្រទេសថៃ។
អគ្គមេបញ្ជាការកងទ័ពភូមិន្ទថៃ នាយឧត្ដមសេនីយ៍ ចាឡឺមពល ស្រ៊ីសាវ៉ាតឌី បានថ្លែងអំណរគុណដល់ក្រសួងការពារជាតិកម្ពុជា ដែលបានផ្តល់អាហារូបករណ៍ដល់សិក្ខាកាមថៃ ដើម្បីសិក្សាភាសាខ្មែរជារៀងរាល់ឆ្នាំ។
នាយឧត្ដមសេនីយ៍ ចាឡឺមពល ស្រ៊ីសាវ៉ាតឌី បានលើកឡើងពីបញ្ហាគ្រាប់មីន ដែលភាគីថៃមានគម្រោងកំចាត់មីនតាមព្រំដែនឲ្យអស់នៅឆ្នាំ២០២០ ប៉ុន្តែដោយមានការស្នើសុំពីភាគីកម្ពុជា លើមូលហេតុនៅតំបន់មួយចំនួនពុំទាន់បានដោះស្រាយបោះបង្គោលព្រំដែនរួចរាល់នោះ គម្រោងនេះក៍ត្រូវបានផ្អាកជាបណ្តោះអាសន្ន ដូច្នេះភាគីថៃបានស្នើសុំឲ្យមានកិច្ចសហការពីភាគីកម្ពុជាឡើងវិញ ដោយភាគីថៃចាត់ទុកបញ្ហានេះជាកិច្ចការមនុស្សធម៌ និងដើម្បីរក្សាសុខសុវត្ថិភាពដល់ពលរដ្ឋប្រទេសទាំងពីរផងដែរ.។
សូមបញ្ជាក់ថានៅថ្ងៃទី២២ ខែធ្នូ ឆ្នាំ២០២០ លោកវរសេនីយ៍ទោ ខៃ ខែត្រ ប្រធានក្រុមការងារទំនាក់ទំនងព្រំដែនកម្ពុជា-ថៃ ច្រកបឹងត្រកួន រួមជាមួយកម្លាំងចំរុះ បានចុះត្រួតពិនិត្យមើលភាគីថៃ ចុះរុះរើស្លាកសញ្ញាដោះមីន នៅចន្លោះបង្គោលសីមា២៧-២៨ ក្នុងភូមិសាស្ត្រ ភូមិថ្មរមៀលខាងលិច ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ទល់ជាមួយភូមិសាស្ត្រភូមិ២ ឃុំណងវែង ស្រុកឡាក់ហាន់សាយ ខេត្តបូរីរ៉ាំ។
ការចុះត្រួតពិនិត្យថៃរុះរើផ្លាកសញ្ញាមីនពេលនេះ ធ្វើទៅតាមសំណើរបស់លោកឧត្តមសេនីយ៍ទោ សេង ធារិន មេបញ្ជាការរង និងជានាយសេនាធិការយោធភូមិភាគទី៥ ដែលបានស្នើឲ្យភាគីថៃចុះរើស្លាកសញ្ញាមីន ដែលពួកគេបានដោះរួចចូលមកលើខ្សែបន្ទាត់ព្រំដែន ១៨៩ម៉ែត្រ។
សូមបញ្ជាក់ថា កាលពីថ្ងៃទី១២ ខែធ្នូ ឆ្នាំ២០២០កន្លងទៅ កម្ពុជាបានរុះរើផ្លាកសញ្ញាមីនដែលថៃបោះចូលលើខ្សែបន្ទាត់ព្រំដែនក្នុងចន្លោះបង្គោល ៣២-៣៣ រួចម្ដងមកហើយ ក្រោយពីភាគីកម្ពុជាស្នើសុំទៅភាគីថៃ ហើយភាគីថៃមិនបានឆ្លើយតបនឹងចូលមករុះរើ។
