ជម្លោះដីធ្លីមួយនៅបន្ទាយមានជ័យរវាងមន្ត្រីនគរបាលនិងអាជីវករកើត២០ឆ្នាំមិនទាន់ចប់!
27-March-2024 / ព័ត៌មានជាតិ
បន្ទាយមានជ័យះរឿងរាវជម្លោះដីធ្លី រវាងលោកជូ ផារិន អតីតនាយការិយាល័យកំរឹតស្រាលនៃស្នងការរដ្ឋាននគរបាលខេត្តបន្ទាយមានជ័យ ជាមួយលោក ម៉ៅសែ ម្ចាស់ភោគនីយដ្ឋានស្ទឹងសែន កើតឡើងអស់រយះកាលជិត២០ឆ្នាំមកហើយ។រហូតមកទាល់ពេលនេះ នៅតែជាចំណុចក្តៅ មិនទាន់បានបញ្ចប់ ឬភាគីខាងណា បានឈ្នះក្តីនៅឡើយទេ។
ដីដែលមានជម្លោះនេះគឺ ស្ថិតនៅភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យដោយប្រវត្តិដីនេះ លោកម៉ៅ សែ បានទិញពីឈ្មោះ រ៉ៃ ប៊ូនធឿនអតីតនគរបាលខេត្តបន្ទាយមានជ័យ មានទំហំ៧១ម៉ែត្រគុណនឹង១០០ម៉ែត្រ ឯដីលោកជូ ផារិន មានទំហំ២៣ម៉ែត្រគុណនឹង១០០ម៉ែត្រ ។ដូចនេះទាំងដីលោក ជូ ផារិន និងលៅក ម៉ៅ សែ មានព្រំប្រទល់មិនដល់បារ៉ែតដូចគ្នា ។ម្ចាស់ដីដែលនៅពីក្រោយនេះគឺឈ្មោះ ប៉ម ឡាំ ទើបគាត់មានព្រំប្រទល់ជាប់នឹងបារ៉ែត។
លោកប៉ម ឡាំង បានបំភ្លឺជុំវិញប្រវត្តិដីនេះថា ដីគាត់នៅពីក្រោយលោកម៉ៅ សែ មូនដំបូងគាត់បានទៅនិយាយលក់ឲ្យលោកម៉ៅ សែ ដែរ តែលោក ម៉ៅ សែ មិនទិញ ក្រោយមកទើបដីនេះគាត់បានលក់ឲ្យលោក ជូ ផារិនទំហំដី៧៦០០ម៉ែត្រការេ មានព្រំជាប់នឹងបារ៉ែត ហើយលោកបញ្ជាក់ថាគ្មានឯកសារណា
ដែលបានលក់ឲ្យម៉ៅ សែ នោះទេ។
លោក រ៉ៃ ប៊ុនធឿន បានសរសេរក្នុងលិខិតមួយ បញ្ជាក់អះអាងនៅតុលាការថា ដីដែលលោកលក់ឲ្យលោក ម៉ៅ សែ គឺមានតែទទឹង៧១ម៉ត្រនឹងបណ្តោយ១០០ម៉ែត្រ តែមិនដល់បារែតទេ។
សូមបញ្ជាក់ថា ប្រវត្តិនៃការប្តឹងផ្តល់គ្នា មានច្រើនដំណាក់កាល នៅសាលាដំបូងខែត្តបន្ទាយមានជ័យចៅក្រម លោកទឹត្យ រិទ្ធី បានកាត់ដីលោក ជូ ផារិន ទំហំ១២៩០ម៉ែត្រការេ ឲ្យទៅលោក ម៉ៅ សែ ដើម្បីបង្គ្រប់ប្រវែង១០០ម៉ែត្រដែលមានក្នងប្លង់ ឯលោក ជូ ផារិន មិនបានប្តឹងជំទាស់អ្វីដែរ ហើយសាលក្រមនេះក៍បានចូលជាស្ថាពរ ព្រមទាំងបានចុះអនុវត្ត វាស់វែង ជូនលោកម៉ៅ សែ ដោយបានកំណត់ធ្វើរបងត្រឹមត្រូវ ក្នុងឆ្នាំ២០០៤ ។
រហូតដល់ឆ្នាំ២០០៧ លោកម៉ៅ សែ បានដាក់ពាក្យបណ្តឹងម្តងទៀត ទៅអាជ្ញាធរជាតិទំនាស់ដីធ្លី សុំដី សេវភាព តែត្រូវបានច្រានចោល ។បន្ទាប់មកលោក ម៉ៅ សែ ប្តឹងនៅចៅក្រម លោក ពេជ្រ វិជ្ជាធរ សុំដីសេវភាពក្នុងឆ្នាំ២០១៣ តែត្រូវច្រានចោល។ លោកម៉ៅ សែ ក៍បានប្តឹងសុំដីសេវភាពម្តងទៀត
ទៅចៅក្រមលោក ថៃ គឹមនុន្នីក្នុងឆ្នាំ២០១៤ តែចៅក្រមសម្រេចច្រានចោល។ លោកម៉ៅ សែ បានប្តឹងលោក នៅ យ៉ារ័ត្ន តែត្រូវច្រានចោលដូចគ្នា។
បើនិយាយពីអាណត្តិចៅហ្វាយខេត្តវិញ លោកម៉ៅ សែ បានប្តឹងទាំងអស់។ចុងក្រោយមកទៀតលោក ម៉ៅ សែ បានប្តឹងនៅចៅក្រមលោក អ៉ិត សម្ភស្ស សុំដីសេវភាព ហើយចៅក្រមនេះ បានកាត់ឲ្យលោក ម៉ៅ សែ ឈ្នះទុកដីនេះជាដីសេវភាពដូចបំណង។
បន្ទាប់ពីចាញ់ក្តីលោក ម៉ៅ សែ នៅសាលាដំបូង លោក ជូ ផារិន បានប្តឹងជំទាស់ទៅសាលាឧទ្ធរណ៍ហើយខាងសាលាឧទ្ធរណ៍ ក៍បានកាត់ក្តីឲ្យលោក ជូ ផារិន ឈ្នះក្តីវិញ។ ចំណែកលោក ម៉ៅ សែ កើតទុក្ខមិនសុខចិត្ត បានប្តឹងជំទាស់នឹង សេចក្តីសម្រេចនេះ ទៅសាលាកំពូល ដោយដាក់ក្នុងពាក្យបណ្តឹង នៅក្នុងកម្មវត្ថុប្តឹងសុំទាមទារដីសេវភាព ។
នៅក្នុងសាលដិការបស់តុលាការកំពូល លេខ៣២ចុះថ្ងៃទី០៩ខែសីហាឆ្នាំ២០១៨ សាលាកំពូលបានសម្រេចប្រគលដីទំនាស់នេះប្រគល់ឲ្យទៅលោកម៉ៅ សែ គ្រប់គ្រងនិងអាស្រ័យផលដោយស្របច្បាប់។ តែក្នុងកម្មវត្ថុបណ្តឹងរបស់លោកម៉ៅ សែ ទាមទារដីសេវភាពពីឈ្មោះ ជូ ផារិន បានន័យថា ដីសេវភាព គឺអាចបើកផ្លូវ បើករបងឲ្យភាគីដែលទាមទារ អាចចេញចូលបានដោយសេរី។ចុះហេតុអ្វីបានជាតុលាការកំពូល កាត់ប្រាគល់ដីនេះឲ្យទៅលោក ម៉ៅ សែគ្រប់គ្រងទៅវិញ។
លោកជូ ផារិន ក្រោយពីសាលាកំពូល បានកាត់ក្តីដីនេះឲ្យលោក ម៉ៅ សែ លោកក៍បានដាក់ពាក្យបណ្តឹងជំទាស់ សុំឲ្យសាលាកំពូលជំនុំជំរះសាជាថ្មីម្តងទៀត ។តែដោយសារខាងសាលាកំពូល មានការយឺតយ៉ាវ មិនទាន់បានជំរះជាថ្មី ។ទើបនៅថ្ងៃទី២៨ខែមីនាឆ្នាំ២០១៩ មានដិកាចុះអនុវត្ត ប្រគល់ដីនេះឲ្យលោក ម៉ៅ សែ។ តែមិនបានចុះអនុវត្តទេ ដោយលោក ជូ ផារិន បានដាក់ពាក្យបណ្តឹង សុំផ្អាកនៅការអនុវត្តន៍នេះ ទាន់ពេលវេលា នៅចៅក្រមលោក ជួន វណ្ណះ កាលពីថ្ងៃទី២៧ខែមីនាឆ្នាំ២០១៩ ។
តទៅទៀតគេនៅមិនទាន់ដឹងថា ជម្លោះក្តីក្តាំដីធ្លី រវាងបុរស់ខ្លាំងទាំងពីរខាងលើ មិនដឹងអ្នកណាជាអ្នកចុះចាញ់ រត់ចោលសមរភូមិនោះទេ ។បើតាមអ្នកវិភាគ បានឲ្យដឹងថា ចុងក្រោយអស់ខោ អស់អាវដូចគ្នាមិនខាន។លោក ណយ ប៊ុនសួន ប្រធានភូមិបាលក្រុងសិរីសោភ័ណ បានបង្ហើបប្រាប់ថា ដីលោកម៉ៅ សែ
មានគ្រប់ចំនួនក្នុងប្លង់ មិនបាត់បង់អ្វីទេ។លោកម៉ៅ សែ មិនអាចទំនាក់ទំនងសុំបំភ្លឺបានទេ៕
