វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 427 នាក់
ម្សិលមិញ 10264 នាក់
សរុប 14139609 នាក់
ភ្នំពេញ៖ព្រះភិក្ខុ បណ្ឌិតរដ្ឋ យ៉ន សេងយៀត ដែលបានបញ្ចប់ការសិក្សាPostdoctoral Degree ពីសាកលវិទ្យាល័យ Harvard ដោយបានសរសេរក្នុងហ្វេសប៊ុកឲ្យដឹងថា «ព្រះភិក្ខុ លន់ ឡាយ ជាព្រះសង្ឃខ្មែរទីមួយ នៅក្នុងប្រវត្តិសាស្ត្រកម្ពុជា ក្រោយឆ្នាំ ១៩៧៩ ដែលបានទទួលសញ្ញាបត្រដ៏មានតម្លៃមហាសាល បន្ទាប់ពីព្រះតេជគុណបណ្ឌិត តោ អាន (ដែលត្រូវខ្មែរក្រហមធ្វើគត់)”។
ព្រះអង្គបន្តទៀតថា «ក្នុងចំណោមព្រះសង្ឃខ្មែរជាងប្រាំមឺនអង្គនាពេលបច្ចុប្បន្ន គឺមានតែ ព្រះភិក្ខបណ្ឌិត លន់ ឡាយ តែមួយអង្គគត់ ដែលបានទទួលសញ្ញាបត្របណ្ឌិត ផ្នែកភាសាសំស្ក្រឹតនេះ»។
សូមបញ្ជាក់ថា៖សមណៈសង្ឃខ្មែរមួយអង្គព្រះនាម លន់ ឡាយ (ធម្មសរោ) ប្រសូត្រក្នុងឆ្នាំ ១៩៧៩ (៣៩ព្រះវស្សា) និងមានស្រុកកំណើត នៅភូមិថ្នល់ ឃុំស្រង៉ែ ស្រុកសៀមរាម ខេត្តសៀមរាប បានសម្រេចចិត្តទៅបន្តការសិក្សារបស់ព្រះអង្គនៅប្រទេសស្រីលង្កា ចាប់តាំងពីឆ្នាំ ១៩៩៦ គឺមានរយៈពេល ២២ឆ្នាំគត់នៅទីនោះ ដើម្បីសិក្សារហូតបានទទួលសញ្ញាបត្របណ្ឌិតផ្នែកភាសាសំស្ក្រឹតពីសាកលវិទ្យាល័យ Sri Jayewardenepura ។
ព្រះអង្គបណ្ឌិត លន់ ឡាយ បានបញ្ជាក់ប្រាប់កាសែតថា នៅក្នុងជំនាន់ព្រះអង្គដែលជាជំនាន់ទី ៣ គឺមានព្រះសង្ឃចំនួន ១០អង្គ ដែលបានទៅបន្តការសិក្សាជាមួយគ្នានៅប្រទេសស្រីលង្កា ក៏ប៉ុន្តែមាន ៩អង្គ បានត្រឡប់មកកម្ពុជាវិញ ដោយមិនបានបន្តការសិក្សារហូតចប់បណ្ឌិតឡើយ។
ព្រះអង្គក៏បានបញ្ជាក់ទៀតថា «ដោយមិនសូវមានបច្ចេកវិទ្យាទំនើបដូចគេ ទើបធ្វើឲ្យអាត្មាភាពខិតខំយ៉ាងលំបាកលំបិន គឺខំសិក្សា៦០ភាគរយដោយខ្លួនឯង ២០ភាគរយពីមិត្តរួមថ្នាក់ជាមួយគ្នា ដែលមកពីប្រទេសផ្សេងៗ និង២០ភាគរយពីគ្រូ គឺធ្វើយ៉ាងណាខំរត់តាមគេ ព្រោះយើងសិក្សាជាភាសាគេ គឺភាសាសីហឡៈ (ភាសានៅក្នុងប្រទេសស្រីលង្កា)»។
គួររំឭកផងដែរ ព្រះភិក្ខុ លន់ ឡាយ ធ្លាប់បានទទួលសញ្ញាបត្របរិញ្ញាពីរជំនាញ (ភាសាសំស្ក្រឹត និងទំនាក់ទំនងអន្តរជាតិ) សញ្ញាបត្រអនុបណ្ឌិតពីរជំនាញ (ភាសាសំស្ក្រឹត និងទស្សនវិជ្ជាពុទ្ធសាសនា) និងរហូតបន្តបញ្ចប់ជំនាញផ្នែកភាសាសំស្ក្រឹតថ្នាក់បណ្ឌិត។ ជាមួយគ្នានេះ ព្រះអង្គក៏ធ្លាប់បង្រៀនភាសាសំស្ក្រឹតជិតពីរឆ្នាំនៅសាកលវិទ្យាល័យមួយក្នុងប្រទេសស្រីលង្កាផងដែរ៕ប្រភព៖ thenextcambodia