រឿងក្រុមហ៊ុនឯកជនឈូសឆាយដីព្រៃភ្នំតាម៉ៅមេព្រៃថាអត់លក់ទេដូរគ្នាមូលហេតុមកពីជ្រូកព្រៃចេញមកស៊ីដំណាំអ្នកស្រុកពេកនិងនៅជិតព្រលានយន្តហោះពេក?!
27-March-2024 / ព័ត៌មានជាតិ
ភ្នំពេញ៖ រដ្ឋបាលព្រៃឈើនៃក្រសួងកសិកម្ម នៅរសៀលថ្ងៃទី៤ ខែសីហានេះ បានចេញសេចក្តីប្រកាសព័ត៌មានបញ្ជាក់ពីពីស្ថានភាពព្រៃឈើនៅតំបន់ឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ ថាអត់មានលក់ទេគឺដូរដីគ្នាតើ។មូលហេតុមកពីមានជ្រូកព្រៃចេញមកបំផ្លាញដំណាំប្រជាពលរដ្ឋ។
រដ្ឋបាលព្រៃឈើ បានលើកឡើងថា តំបន់ភ្នំតាម៉ៅនេះ ជាតំបន់ស្ថានីយស្តារព្រៃឈើមួយ ដែលមានដំណុះឈើដាំប្រភេទអាកាស្យា ប្រេងខ្យល់ និងឈើធម្មជាតិ។ តំបន់នេះពោរ ពេញទៅដោយដីខ្សាច់ ដំណុះឈើមិនមានការលូតលាស់ល្អទេ។ ដូច្នេះ រាជរដ្ឋាភិបាលសម្រេចយកតំបន់នេះសម្រាប់ធ្វើការអភិវឌ្ឍ ដោយសារជាតំបន់មួយដែលនៅក្បែរទីក្រុង ក្បែរព្រលានយន្តហោះថ្មី និងកៀកតំបន់ទេសចរណ៍ទន្លេបាទី។
រដ្ឋបាលព្រៃឈើ បញ្ជាក់ថា ការអភិវឌ្ឍតំបន់នេះមិនមែនជាការលក់ដូរ ដូចការលើកឡើងនោះទេ តែជាការដោះដូរតំបន់នេះជាថ្នូរនឹងការអភិវឌ្ឍបន្ថែមដល់ឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ ដោយកែលម្អឧទ្យានសួនសត្វភ្នំតាម៉ៅអោយមានភាពប្រសើរ ឡើង មានប្រព័ន្ធផ្លូវ អគារ សួនច្បារ អាងស្តុកទឹក ក៏ដូចជាការបង្កើតសារមនី្ទរជាតិនៅរាជធានីភ្នំពេញ ការបង្កើតសួនសត្វសាហ្វារីនៅខេត្តសៀមរាប ការបង្កើតសួនភូតគាមនៅខេត្តមណ្ឌលគិរី និងការសាងសង់អគារធ្វើការរបស់មន្ត្រីរាជការ និង សម្ភារៈនានា។
រដ្ឋបាលព្រៃឈើ ក៏បានបញ្ជាក់ផងដែរថា តំបន់នេះ ពុំមានសត្វព្រៃសំខាន់ៗ ជិតផុតពូជ និងកម្រ ដូចការលើកឡើងនោះទេ ហើយ តំបន់នេះ មានជ្រូកព្រៃដែលតែងតែមករំខានដល់ដំណាំប្រជាពលរដ្ឋ។ សត្វព្រៃដែលលើកឡើងកន្លងមក គឺជាសត្វព្រៃបានថែរក្សានៅក្នុងឧទ្យានសួនសត្វភ្នំតាម៉ៅដែលមានសុវត្ថិភាព១០០% ហើយការអភិវឌ្ឍនេះ មិនមានការប៉ះពាល់ទាល់តែសោះ។ សត្វព្រៃដែលតែងតែលើកឡើងដោយអង្គការ សកម្មជនបរិស្ថាន និងសាធារណជននានា គឺជាសត្វព្រៃដែលកំពុងរស់នៅ ក្នុងទ្រុងនៃឧទ្យានសួនសត្វភ្នំតាម៉ៅ និងសត្វព្រៃមួយចំនួនទៀតដូចជា ប្រើស រម៉ាំង ក្រៀល រនាល ទុង ត្រូវបានដោះលែង ឲ្យរស់ក្នុងបរិវេណរបស់ឧទ្យានសួនសត្វភ្នំតាម៉ៅដែលមានរបងព័ទ្ធជុំវិញលើផ្ទៃដីជាង៥០០ហិកតា និងមិនមានសត្វអាចចេញមកខាងក្រៅនោះទេ និងបានមើលថែរក្សា ផ្តល់ចំណីដោយរដ្ឋបាលព្រៃឈើ និងអង្គការនានា។ ការលើកឡើង កន្លងមកបានធ្វើឲ្យមានការភ័នច្រលំថាការអភិវឌ្ឍតំបន់នេះប៉ះពាល់ដល់សត្វព្រៃ។រដ្ឋបាលព្រៃឈើ បានទទួលស្គាល់ថា ការអភិវឌ្ឍតែងតែប្រើប្រាស់ដីសម្រាប់អភិវឌ្ឍមិនមែនមានតែនៅតំបន់ភ្នំតាម៉ៅនោះទេ ឲ្យតែតំបន់អភិវឌ្ឍមានផលប៉ះពាល់តិចតួច ហើយត្រឡប់មកវិញបានផ្ដល់ការងារជូនប្រជាពលរដ្ឋច្រើននៅតំបន់នោះ និងការផ្តល់កំណើន សេដ្ឋកិច្ចជាតិ។
សូមបញ្ជាក់ថាការចេញសេចក្តីប្រកាសពត៍មានបកស្រាយនេះកើតឡើងបន្ទាប់ពីមានសកម្មជនបរិស្ថាន និងប្រជាពលរដ្ឋមួយចំនួន បាននាំគ្នាធ្វើយុទ្ធនាការនៅលើបណ្ដាញសង្គម ដោយប្រកាសពីការធ្វើពហិការមិនគាំទ្រសេវាកម្មរបស់ក្រុមហ៊ុន «ឡេង ណាវ៉ាត្រា គ្រុប» និងក្រុមហ៊ុន «TP Moral Group» របស់ឧកញ៉ា ឃុន សៀ បន្ទាប់ពីក្រុមហ៊ុនទាំងនេះចាប់ផ្ដើមសកម្មភាពឈូសឆាយព្រៃនៅតំបន់ភ្នំតាម៉ៅ ដើម្បីធ្វើការអភិវឌ្ឍ។
ឯកសារផ្លូវការមួយបង្ហាញថា ផ្ទៃដីទំហំ៥០០ហិកតា នៅតំបន់ភ្នំតាម៉ៅ ដែលគ្រប់គ្រងដោយរដ្ឋបាលព្រៃឈើ នឹងត្រូវផ្ទេរទៅជាកម្មសិទ្ធិឯកជន ដោយមិនបានបញ្ជាក់ពីទីតាំងឬម្ចាស់កម្មសិទ្ធិឡើយ។ ឯកសារមួយទៀតបានឱ្យដឹងថា ផ្ទៃដី៧០០ហិកតាផ្សេងទៀត បច្ចុប្បន្នត្រូវបានស្នើសុំដោយក្រុមហ៊ុន TP Moral Group របស់ឧកញ៉ា ឃុន សៀ ។លោករដ្ឋមន្ត្រីក្រសួងកសិកម្ម បានប្រាប់កាសែតវីអូឌីថា ទីតាំងដីដ៏ធំនេះត្រូវបានលក់ទៅឱ្យក្រុមហ៊ុនអភិវឌ្ឍន៍ និងម្ចាស់ផលិកម្មចម្រៀងកាឡាក់ស៊ី របស់យុវជនមកពីកូរ៉េដែលឡើងឧកញ៉ាឈ្មោះ ឡេង ណាវ៉ាត្រា។
ចំណែកមន្ត្រីរដ្ឋបាលព្រៃឈើម្នាក់ដែលមានទំនាក់ទំនងជាមួយនឹងក្រុមហ៊ុនកំពុងឈូសឆាយនៅតំបន់ភ្នំតាម៉ៅនេះ បានប្រាប់កាសែត វីអូឌី ក្នុងលក្ខខណ្ឌមិនបញ្ចេញឈ្មោះ កាលពីថ្ងៃទី០២ ខែសីហា ថា ក្រុមហ៊ុនចំនួន៤ ក្នុងនោះរួមមាន ក្រុមហ៊ុន ឡេង ណាវ៉ាត្រា ដែលទទួលបានដីធំជាងគេ គ្រោងឈូសព្រៃភ្នំតាម៉ៅ ក្នុងទំហំប្រមាណ១ ៥០០ហិកតា ខណៈផ្ទៃដីព្រៃសួនសត្វភ្នំតាម៉ៅទាំងមូលមានទំហំជាង២ ៥០០ហិកតាប៉ុណ្ណោះ។លោក ហេង គឹមហុង ជាមន្ត្រីអង្គការសង្គមស៊ីវិលមួយរូប និងជាសកម្មជនការពារបរិស្ថាន បានលើកឡើងនៅថ្ងៃទី០៣ ខែសីហានេះថា តំបន់ភ្នំតាម៉ៅ ជាគម្របព្រៃឈើ និងជាជម្រកសត្វព្រៃ ជាពិសេសជាតំបន់ដែលសង្គ្រោះជីវិតសត្វព្រៃមកពីគ្រប់ទិសទីក្នុងប្រទេសកម្ពុជា អស់រយៈកាល២ទសវត្សរ៍មកហើយ។
ប្រភពបានបញ្ជាក់ថា ភ្នំតាម៉ៅមានផ្ទៃដីទំហំ២ ៥០០ហិកតា ក្នុងនោះ ផ្ទៃដី១ ២០០ហិកតាជាតំបន់ការពារព្រៃឈើ ដែលត្រូវបានក្រសួងកសិកម្ម រៀបចំដាំដើមឈើ និងរៀបចំជាសួនសត្វ ហើយក្នុងនោះ ផ្ទៃដី៧០ហិកតា មានភ្នំចំនួន៥ រួមមាន ភ្នំតាម៉ៅ ភ្នំថ្មដុះ ភ្នំផ្ដៅពន្ធ ភ្នំឆយ និងភ្នំបាំង។ ក្នុងចំណោមភ្នំទាំង៥នេះ មានប្រាសាទបុរាណចំនួន២ គឺប្រាសាទតាម៉ៅ (ភ្នំតាម៉ៅ) និងប្រាសាទថ្មដុះ (ភ្នំថ្មដុះ) ហើយសួនសត្វភ្នំតាម៉ៅ គឺជាសួនសត្វដែលធំជាងគេនៅក្នុងប្រទេសកម្ពុជា។ ក្រៅពីជាសួនសត្វ វាក៏ជាមជ្ឈមណ្ឌលសង្គ្រោះសត្វព្រៃតែមួយគត់នៅកម្ពុជាផងដែរ។
