វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5342 នាក់
ម្សិលមិញ 6001 នាក់
សរុប 13878172 នាក់
ភ្នំពេញៈ គិតមកទល់ពេលនេះរំលងជិតពីរឆ្នាំហើយ ដែលតារាចម្រៀងប្រជ្រុយធំ មានសំនៀងក្រអួនក្រអៅលោក សួស សងវាចាធ្លាក់ខ្លួនឈឺធ្ងន់មានជំងឺលើសឈាម សង្គ្រោះបន្ទាន់បញ្ជូនទៅព្យាបាលនៅប្រទេសវៀតណាម កាលពីចុងឆ្នាំ ២០១៥ នោះនៅពុំទាន់អាចវិលបម្រើសិល្បៈជាអាជីពឆ្នាំងបាយចាស់បាននៅឡើយ។
នាពេលថ្មីៗនេះ ស្រាប់តែគេបានឃើញមានសាររបស់តារាចម្រៀងស្រីម៉ៅដាច់វិស័យទេសចរណ៍កញ្ញា សុន ស្រីពេជ្រ អមនឹងរូបលោក សួស សងវាចា ដេកសម្រាកព្យាបាលនៅមន្ទីរពេទ្យរបស់ បង្ហោះតាមហ្វេសប៊ុកនាងថា៖ «អាណិតណាស់បងអើយ!សូមបងប្អូនសប្បុរសជនបន្តជួយគាត់ផង!កូនៗសុទ្ធតែនៅតូចៗ មិនទាន់អាចជួយការងារអ្វីបាន!» ជាអ្នករួមអាជីពសម្តែងការអាណិតអាសូរ។
តាមអាការៈបច្ច្បន្នរបស់តារាចម្រៀងវ័យ ៥២ ឆ្នាំ សួស សងវាចាបានឲ្យកាសែតដឹងថា៖ «ស្ថានភាពសុខភាពខ្ញុំពេលនេះ គ្រាន់បើបន្តិចហើយ តែដៃខាងឆ្វេងខ្ញុំពិបាកធ្វើចលនាដូចប្រក្រតី ដែលខាងពេទ្យតម្រូវឲ្យទៅធ្វើចលនាតាមក្បួននៃវេជ្ជសាស្ត្ររាល់ថ្ងៃទើបប្រសើរបាន។ ខ្ញុំក៏បានធ្វើមួយរយៈហើយដែរនៅឯមន្ទីរពេទ្យព្រះកេតុមាលាថ្លៃធ្វើចលនា ១ ម៉ោង ១៥ ដុល្លារ»តែលោកបានផ្អាកសិនដោយសារអត់លុយ។
លោក សួស សងវាចា ក៏ត្អូញដែរថា៖ «តម្លៃធ្វើចលនានោះថ្លៃដែរ ហើយតម្រូវឲ្យធ្វើរាល់ថ្ងៃទៀត។ ស្ថានភាពសព្វថ្ងៃខ្ញុំមានកូន ៣ នាក់ ក្នុងបន្ទុក សុទ្ធតែពេញរៀន ឯប្រពន្ធគ្នាមានតែរបរកំប៉ិកកំប៉ុកលក់ចាប់ហួយ មិនអាចផ្គត់ផ្គង់នឹងការចំណាយប្រចាំថ្ងៃបានឡើយ។ ដូច្នេះមានតែខ្ញុំ ត្រូវសម្រាករឿងធ្វើចលនានៅឯពេទ្យនោះសិន»។
តារានិយមច្រៀងបទមនោសញ្ចេតនា តាមបណ្តាផលិតកម្មជាច្រើន ទាំងក្នុង និងក្រៅប្រទេស មានដូចជាផលិតកម្ម ហង្សមាស រៃមាស តោមាស និងបុប្ផាជាដើម ជាពិសេសបទចម្រៀងរបស់កាកបាទក្រហមកម្ពុជា និងបទចម្រៀងក្រសួងទេសចរណ៍ផងនោះ ក៏ស្នើសុំដល់បណ្តាសប្បុរសជនឲ្យជួយសម្រួលស្ថានភាពលោកតាមការគួរផងដែរថា៖ «សំណូមពរទៅដល់បងប្អូនមហាជនធ្លាប់គាំទ្រ សុំមេត្តាជួយសម្រួលនូវស្ថានភាពជួបទុក្ខលំបាកមួយនេះផង!»។