សម្តេចតេជោ ហ៊ុន សែន ព្រមានបិទឈប់ឲ្យនាំទំនិញកសិកម្មពីថៃចូលកម្ពុជាបើមិនបើកច្រកព្រុំដែនវិញទេ!
16-June-2025 / សេដ្ឋកិច្ច
ភ្នំពេញ ៖ សម្ដេច អគ្គមហាសេនាបតី តេជោ ហ៊ុន សែនប្រធានព្រិទ្ធសភា នៅថ្ងៃទី១៦ ខែមិថុនានេះ បានថ្លែងថាកម្ពុជាទុកពេលឲ្យថៃ ២៤ម៉ោងបើស្អែកមិនបើកច្រកធម្មតាវិញទេ យើងនឹងបិទច្រកព្រំដែនទូទាំងប្រទេស មិនឲ្យនាំចូលបន្លែ និងផ្លែឈើពីថៃនោះទេ ។
សម្ដេចតេជោ ហ៊ុន សែនបាមដាក់បន្ទុកថា “ ជុំវិញការបិទច្រកព្រំដែនភាគីថៃជាអ្នកបិទដូច្នេះភាគីថៃជាអ្នកទទួលខុសត្រូវលើការរំលោភលើកិច្ចព្រមព្រៀងរវាងប្រទេសទាំងពីរ ។ កម្ពុជាមិនអាចទទួលយកការចចារណាមួយឡើយព្រោះការបិទច្រកព្រំដែននេះភាគីថៃជាអ្នកបិទមុនដោយឯកតោភាគី ។កម្ពុជាទុកពេលឱ្យថៃ ២៤ម៉ោងបើស្អែកអត់បើកច្រកធម្មតាវិញទេ យើងនឹងបិទទូទាំងព្រំដែន អត់ឱ្យនាំចូលបន្លែ និងផ្លែឈើពីថៃ"។
សម្ដេចតេជោ បា នផ្ដាំទៅកាន់ប្រជាជនថៃថាករណីកកស្ទះទំនិញនេះបើចង់បន្ទោសត្រូវបន្ទោសទាហានថៃដែលបិទច្រកព្រំដែនដោយខ្លួនឯង សូមបងប្អូនប្រជាជនថៃកុំបន្ទោស ឬខឹងសម្បារមកលើរាជរដ្ឋាភិបាលកម្ពុជាលេីការបិទច្រកអន្ដរជាតិដូងនេះព្រោះនេះជាលទ្ធផលនៃការបំពានច្បាបើរបស់ទាហានថៃ ។
សម្ដេចតេជោបានបញ្ជាក់បន្ថែមថា " ករណីបិទច្រកព្រំដែននេះវារឿងងាយណាស់ព្រោះទាហានថៃជាអ្នកចេញបញ្ជាបិទច្រកព្រំដែន ដូចនេះទាហានថៃគ្រាន់តែចេញបញ្ជាបើកច្រកវិញជាការស្រេចទៅហេីយ ដោយមិនបាច់ចចារនាំអន្ទង់វែងឆ្នាំងវែងទេ អ្នកជាងអ្នកចង ដូចនេះអ្នកត្រូវតែស្រាយ កុំយកកម្ពុជាទៅឡូកឡំជាមួយកំហុសរបស់អ្នកដទៃ" ។
ទាក់ទងនិងអំណាចរដ្ឋបាលសម្តេចតេជោ ហ៊ុន សែន ប្រធានព្រឹទ្ធសភា បានលើកឡើងផងដែរថា នៅកម្ពុជា មានតែរដ្ឋាភិបាលមួយគត់ តែមានសិទ្ធិសម្រេចគ្រប់យ៉ាង រាប់ទាំងការបញ្ជាទ័ព ពោលគឺសំឡេងតែមួយ ប៉ុន្តែ នៅប្រទេសថៃវិញ រាជរដ្ឋាភិបាលនិងនាយករដ្ឋមន្ត្រីគ្មានសិទ្ធិបញ្ជាការងារនោះឡើយ។
បញ្ហាព្រុំដែននេះសម្តេចបញ្ជាក់ថាសម្រាប់កម្ពុជា បើថៃបើកនៅម៉ោង ១យប់ យូរបំផុតត្រឹម៥ម៉ោងកម្ពុជាបើក។ បើពេលថ្ងៃវិញ ក្រោយថៃបើក ត្រឹមតែ១ម៉ោង ឬ២ម៉ោង គឺកម្ពុជាបើកវិញជាធម្មតាហើយ។សម្តេចតេជោ ហ៊ុន សែន បានបញ្ជាក់ថាធ្ងន់ៗថា កម្ពុជា មិនយកកិត្តិយសរបស់ខ្លួនទៅឡូកឡំជាមួយនឹងកំហុសរបស់អ្នកដទៃ បានប្រព្រឹត្តនោះទេ ថៃជាអ្នកចង ថៃត្រូវតែជាអ្នកស្រាយ កម្ពុជាគ្មានចំណែកទៅជួយដោះស្រាយរឿងបិទព្រំដែនជាមួយថៃឡើយ។ កម្ពុជា សង្ឃឹមថា ភាគីថៃនឹងត្រូវចេះទទួលខុសត្រូវ ក្នុងករណីខ្លួនបានប្រព្រឹត្ត ហើយខ្លួនមកដាក់លក្ខខណ្ឌចរចា កម្ពុជាអត់ទទួលយកបានទេ។
សម្តេចតេជោ ហ៊ុន សែន បានថ្លែងឲ្យដឹងថា ចំពោះបញ្ហាព្រំដែនរវាងកម្ពុជា-ថៃ ថៃយល់ខុសហើយ ដែលពង្រីកជម្លោះព្រំដែនពីមុំ៣ ដល់វិស័យដទៃទៀតរួមទាំងវិស័យពាណិជ្ជកម្ម។ សម្ដេចតេជោ ហ៊ុន សែន បានរំលឹកផងដែរថា តើអ្នកដឹងទេថា កាលពីជម្លោះព្រំដែននៅឆ្នាំ២០០៨ ក្នុងកិច្ចប្រជុំមេគង្គ-ជប៉ុន នៅតូក្យូ អតីតនាយករដ្ឋមន្ត្រីថៃ អាប់ភីស៊ីត វេចាជីវ៉ា បានប្រកាសបិទព្រំដែន ជាការឆ្លើយតបសម្តេចបានប្រកាស ឈប់ប្រើប្រាស់ទំនិញថៃ បន្ទាប់ពីការប្រកាសរបស់សម្តេចតេជោ ភាគីថៃមិនហ៊ានបិទព្រំដែននោះទេ ចុះហេតុអ្វីពេលនេះហ៊ានបិទព្រំដែន?។
សម្តេចតេជោ ហ៊ុន សែន បានបញ្ជាក់ថា «ខ្ញុំបាននិយាយពីដើមទីហើយ កុំឲ្យជម្លោះរីករាលដាលពីកន្លែងមួយទៅកន្លែងមួយ, ពីវិស័យមួយទៅកាន់វិស័យមួយផ្សេងទៀត ប៉ុន្ដែបែរជាខាងណោះ (ថៃ) គិតថា នេះជាចំណុចខ្សោយរបស់កម្ពុជា ខុសហើយ អ្នកគិតខុសហើយ ដែលធ្វើឲ្យបញ្ហាមួយរីករាលដាលដល់វិស័យដទៃ ក្នុងនោះមាន វិស័យពាណិជ្ជកម្ម និងការដឹកជញ្ជូនឆ្លងកាត់របស់ប្រជាពលរដ្ឋ អ្នកពិតជាយល់ខុស»។សម្ដេចតេជោបានបញ្ជាក់យ៉ាងដូច្នេះថា ជាការឆ្លើយតបកម្ពុជាត្រូវតែអនុវត្តន៍វិធីសាស្ដ្រដ៏រឹងមាំរបស់ខ្លួន យើងត្រូវជំនួសដោយផលិតផល ក្នុងស្រុករបស់យើង ដែលផលិតបាន និងប្រើប្រាស់ទំនិញពី បណ្ដាប្រទេសផ្សេងក្រៅអំពីប្រទេសថៃ ចំពោះសារនេះកម្ពុជាក៏បានបញ្ជូនចេញពីមុនរួចរាល់ហើយ ប៉ុន្ដែយើងសូមបញ្ជាក់ឡើងវិញទាំងអស់ រាជរដ្ឋាភិបាលបានត្រៀមខ្លួនហើយ ក្នុងការធ្វើកិច្ចការទាំងឡាយ ព្រមទាំងកាត់បន្ថយទាំងអស់ លើការពឹងពាក់ពីសំណាក់ថៃ។
សម្តេចតេជោ ហ៊ុន សែន បានបញ្ជាក់មួយចំណុចទៀតថា «ជាក់ស្ដែងមាននិស្សិតដែលកំពុងសិក្សានៅក្នុងប្រទេសថៃ បានបង្ហាញក្ដីព្រួយបារម្ភ ចំពោះការសិក្សារៀនសូត្រនៅក្នុងប្រទេសថៃ ដូច្នេះខ្ញុំផ្ដាំទៅដល់និស្សិតទាំងអស់ថា ប្រសិនបើគេ (ថៃ) បន្ដឲ្យរៀនបាន គឺរៀនចុះ ប៉ុន្ដែក្នុងករណីទ្រាំមិនបានទេ សូមវិលត្រឡប់មកកម្ពុជាវិញ ហើយបន្ដសិក្សារៀនសូត្រនៅប្រទេសកម្ពុជា ពេលមកដល់នឹងមានអាហារូបករណ៍រៀននៅស្រុកខ្មែរ ប្រសិនបើក្រសួងអប់រំ យុវជន និងកីឡា ឬរាជរដ្ឋាភិបាលមិនអាចទទួលខុសត្រូវបានទេ ខ្ញុំជាអ្នកទទួលខុសត្រូវ រ៉ាបរងថវិកាជូនដល់និស្សិតទាំងអស់ក្នុងការសិក្សា»៕
