លោក ត្រាំ អបអរសាទរគណបក្សប្រជាធិបតេយ្យឈ្នះឆ្នោតតែប្រកាសថាលោកនឹងវ៉េតូនូវសំណើរប្លែកពីអង្គការនីតិបញ្ញត្តិដែលប្រជាធិបតេយ្យកាន់កាប់

អាមេរិក៖លោក ដូណាល ត្រាំ ប្រធានាធិបតីសហរដ្ឋអាមេរិក បានប្រកាសថា លោក «ពិតជាមានឆន្ទៈ» ក្នុងការទទួលយកលទ្ធផល នៃការបោះឆ្នោតពាក់កណ្តាលអាណត្តិ ហើយត្រៀមខ្លួនរួចជាស្រេចក្នុងការបើកទ្វារធ្វើការជាមួយគណបក្សប្រជាធិបតេយ្យ ដែលកំពុងឈានឆ្ពោះទៅកាន់ការគ្រប់គ្រងទាំងសភាតំណាងរាស្ត្រ និងព្រឹទ្ធសភា ។ 

នៅក្នុងបទសម្ភាសន៍ជាមួយ CBS News កាលពីយប់ថ្ងៃអង្គារ លោក ត្រាំ បានអះអាងថា លោកមិនមានការសោកស្តាយអ្វីឡើយ ចំពោះរយៈពេលពីរឆ្នាំដំបូងនៃអាណត្តិទីពីររបស់លោក ដោយចាត់ទុកថាវាជាសម័យកាលដ៏ជោគជ័យបំផុត និងមិនស្តាយក្រោយ ចំពោះការសម្រេចចិត្តធ្វើសង្គ្រាមជាមួយអ៊ីរ៉ង់នោះឡើយ ទោះបីជាលោកបានទទួលស្គាល់ថាការឡើងថ្លៃនៃតម្លៃប្រេងឥន្ធនៈបណ្តាលឱ្យអ្នកបោះឆ្នោតមិនសប្បាយចិត្តក៏ដោយ។ លោក ត្រាំ បានបន្តបន្ទោសថា មូលហេតុចម្បងនៃការបរាជ័យរបស់បក្ស គឺបណ្តាលមកពីរូបលោកផ្ទាល់មិនមានឈ្មោះនៅលើសន្លឹកឆ្នោត ដើម្បីជួយជំរុញទឹកចិត្តអ្នកបោះឆ្នោតឱ្យចេញមកគាំទ្រឱ្យបានគ្រប់គ្រាន់ ។

ទាក់ទង​នឹងការធ្វើការជាមួយ​សភាគ្រប់គ្រង​ដោយ​គណបក្ស​ប្រជាធិបតេយ្យ ក្នុង​រយៈពេល ២ ឆ្នាំ ដែល​​នៅសល់ក្រោម​អាណត្តិ​ខ្លួន​ លោក ត្រាំ និយាយថា៖ «ពួកគេ​នឹងបញ្ជូន​សំណើចម្លែកៗ ឬមិនសមហេតុ​ផលមកឱ្យខ្ញុំ ហើយ​ខ្ញុំនឹងប្រើសិទ្ធិវេតូ​ (បដិសេធ) លើសំណើទាំងនោះ​»។

ដោយឡែកសម្រាប់អ្នកគាំទ្រលោកត្រាំវិញកំពូលមហាសេដ្ឋីបច្ចេកវិទ្យារបស់សហរដ្ឋអាមេរិក លោក Elon Musk នៅថ្ងៃពុធ ទី៤ ខែវិច្ឆិកា ឆ្នាំ២០២៦ បាននិយាយលេងសើច ជុំវិញភាពបរាជ័យរបស់គណបក្សសាធារណរដ្ឋ នៅក្នុងការបោះឆ្នោតសភាពាក់កណ្តាលអាណត្តិ បន្ទាប់ពីរូបលោកបានចំណាយប្រាក់រាប់រយលានដុល្លារ ដើម្បីជួយគាំទ្រគណបក្សនេះដែលជាបក្សរបស់លោកប្រធានាធិបតី ដូណាល់ ត្រាំ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក Musk ដែលបានផ្តល់ថវិកាជិតកន្លះពាន់លានដុល្លារ ដើម្បីជួយជ្រោមជ្រែងយុទ្ធនាការនយោបាយរបស់គណបក្សសាធារណរដ្ឋ បានបង្ហោះសារលើបណ្ដាញសង្គម X នាថ្ងៃពុធនេះថា «វាហាក់មើលទៅ ឡាស៊ែរអវកាសដែលខ្ញុំប្រើដើម្បីជ្រៀតជ្រែកក្នុងការបោះឆ្នោត ហាក់មិនមានប្រសិទ្ធភាពទេ នៅលើកនេះ»។ លទ្ធផលនៃការបោះឆ្នោតដែលប្រព្រឹត្តទៅកាលពីថ្ងៃអង្គារ បានបង្ហាញថា គណបក្សប្រជាធិបតេយ្យ បានដណ្តើមការគ្រប់គ្រងសភាទាំងពីររបស់អាមេរិក ដោយឈ្នះបានអាសនៈភាគច្រើន ទាំងនៅក្នុងព្រឹទ្ធសភា និងសភាតំណាងរាស្ត្រ (រដ្ឋសភា)។

បើតាមការប៉ាន់ស្មាន លោក ​Musk បានចំណាយប្រាក់ប្រហែល ៤៤៥លានដុល្លារ ក្នុងរដូវកាលបោះឆ្នោតលើកនេះ ដែលធ្វើឱ្យលោកក្លាយជាម្ចាស់ជំនួយម្នាក់ឯង ដែលបានផ្តល់ថវិកាច្រើនបំផុត ក្នុងប្រវត្តិសាស្ត្រនយោបាយសម័យទំនើប។ មិនធ្លាប់មាននរណាម្នាក់ ចំណាយប្រាក់ច្រើនដូចលោក ប៉ុន្តែទទួលបានលទ្ធផលតិចតួចបែបនេះទេ ជាពិសេសនៅរដ្ឋតិចសាស់ ដែលគណបក្សប្រជាធិបតេយ្យ ទទួលបានជ័យជម្នះភ្លូកទឹកភ្លូកដី។ លោក Musk ក៏បានលើក អំពីការបោះឆ្នោតរើសអភិបាលរដ្ឋតិចសាស់ ផងដែរ ដោយបេក្ខជនគណបក្សប្រជាធិបតេយ្យ លោកស្រី Gina Hinojosa ដែលប្រកាន់និន្នាការប្រឆាំងនឹងការបង្កើតមជ្ឈមណ្ឌលទិន្នន័យ (Data Center) បានទទួលជ័យជម្នះដ៏ភ្ញាក់ផ្អើល។