ទិវាជាតិអាហារូបត្ថម្ភ លើកទី១៣នាយករដ្ឋមន្ត្រីឲ្យប្រុងយត្ន័រឿងហូបព្រោះ«ការវិនិយោគលើអាហារូបត្ថម្ភ គឺជាការវិនិយោគលើមនុស្ស»!

ភ្នំពេញ៖សម្តេចនាយករដ្ឋមន្ត្រី បានណែនាំដល់បងប្អូនប្រជាពលរដ្ឋគ្រប់រូប ម្ចាស់សិប្បកម្ម សហគ្រាសខ្នាតមីក្រូ តូច មធ្យម និងធំ អ្នកប្រកបមុខរបរអាជីវកម្មម្ហូបអាហារ ផ្សារទំនើប ភោជនីយដ្ឋាននានា គ្រឹះស្ថានសិក្សា រមណីយដ្ឋានទេសចរណ៍ និងអ្នកលក់ដូរម្ហូបអាហារតាមដងផ្លូវ សូមយកចិត្តទុកដាក់ខ្ពស់ដល់សុវត្ថិភាពម្ហូបអាហារ និងខ្សែច្រវាក់ផ្គត់ផ្គង់ ដើម្បីរួមចំណែកលើកកម្ពស់ អាហារូបត្ថម្ភ ស្របតាមពាក្យស្លោក «ហូបស្អាត ផឹកស្អាត និងរស់នៅស្អាត»។

នេះបើតាមសារលិខិតសម្តេចមហាបវរធិបតី ហ៊ុន ម៉ាណែត ប្រកាសក្នុងឱកាសអបអរសាទរទិវាជាតិអាហារូបត្ថម្ភ លើកទី១៣ (៦ វិច្ឆិកា ២០១៤ - ៦ វិច្ឆិកា ២០២៦) ក្រោមប្រធានបទ «ការវិនិយោគលើអាហារូបត្ថម្ភ គឺជាការវិនិយោគលើមនុស្ស» ។

សម្តេចធិបតី ហ៊ុន ម៉ាណែត ណែនាំដល់ក្រសួងពាណិជ្ជកម្ម ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រសួង ស្ថាប័ន ពាក់ព័ន្ធនឹងសុវត្ថិភាពម្ហូបអាហារ ត្រូវជំរុញការផ្សព្វផ្សាយ និងការអនុវត្តច្បាប់ស្តីពីសុវត្ថិភាពម្ហូបអាហារ ច្បាប់ ស្តីពីស្តង់ដាកម្ពុជា ប្រកាសស្តីពីការគ្រប់គ្រងអនាម័យ និងសុវត្ថិភាពចំណីអាហារតាមដងផ្លូវ ព្រមទាំងគោល ការណ៍ណែនាំនានា ដូចជា ការបញ្ចូលមីក្រូសារជាតិទៅក្នុងផលិតផលម្ហូបអាហារ ការចេញវិធានការដាក់ ស្លាកសញ្ញាព័ត៌មានអាហារូបត្ថម្ភលើផលិតផលម្ហូបអាហារ ការការពារអ្នកប្រើប្រាស់ពីការក្លែងបន្លំទំនិញ ការផ្តល់ព័ត៌មានដល់សាធារណជន ដើម្បីពង្រឹងប្រសិទ្ធភាពនៃការគ្រប់គ្រងហានិភ័យជាយថាហេតុ។

សូមបញ្ជាក់ថាទាក់ទងនិងបញ្ហាអាហាររូបត្ថម្ភនេះដែររាជរដ្ឋាភិបាលកម្ពុជា ត្រៀមរ៉ាប់រងចំណាយថវិកាលើកម្មវិធីផ្តល់អាហាររូបត្ថម្ភនៅតាមសាត្ថម្ភសាលារៀនជាង ២៨០ ក្នុងចំណោមសាលារៀនជាង ១ ០០០  ដើម្បីធានានិរន្តរភាពកម្មវិធីអាហារូបត្ថម្ភ និងជួយឱ្យសិស្សានុសិស្សមានសុខភាពល្អ បង្កលក្ខណៈងាយស្រួលដល់ការសិក្សារៀនសូត្រ។ ការត្រៀមរ៉ាប់រងចំណាយនេះ ធ្វើឡើងក្នុងពេលដែលកម្មវិធីស្បៀងអាហារពិភពលោក (WFP) ដែលជាដៃគូគាំទ្រកម្មវិធីនេះ គ្រោងបញ្ចប់ការផ្តល់ជំនួយក្នុងរយៈពេល ២ ឆ្នាំខាងមុខ។

ថ្លែងក្នុងពិធីសម្ពោធដាក់ឱ្យប្រើប្រាស់អគារសិក្សាថ្មីនៅវិទ្យាល័យទ្រៀល ខេត្តកំពង់ធំ កាលពីថ្ងៃទី៣ ខែវិច្ឆិកា ឆ្នាំ២០២៦ សម្តេចធិបតី ហ៊ុន ម៉ាណែត បានលើកឡើងថា កម្មវិធីផ្តល់អាហារូបត្ថម្ភតាមសាលារៀនបានចាប់ផ្តើមតាំងពីឆ្នាំ១៩៩៩ ដោយមានការសហការរវាងរាជរដ្ឋាភិបាល និងកម្មវិធីស្បៀងអាហារពិភពលោក (WFP) ដែលកាលនោះមានសាលារៀនចូលរួមត្រឹមតែ ៦៤ សាលាប៉ុណ្ណោះ។

សម្តេចធិបតីបន្តថា គិតត្រឹមឆ្នាំ២០២៦ កម្មវិធីនេះបានពង្រីកវិសាលភាពដល់សាលារៀនចំនួន ១ ១១៤ សាលា និងមានសិស្សប្រមាណ ៣០ ម៉ឺននាក់ ទទួលបានអត្ថប្រយោជន៍ពីការផ្តល់អាហារូបត្ថម្ភ។ ក្នុងនោះ សាលារៀនជាង ២៨០ ទទួលបានការឧបត្ថម្ភថវិកាពី WFP ខណៈសាលារៀនជាង ៨០០ ផ្សេងទៀត ជាបន្ទុកថវិការបស់រាជរដ្ឋាភិបាល។

សម្តេចធិបតីបានបញ្ជាក់ថា ក្នុងរយៈពេល ២ ឆ្នាំខាងមុខ WFP នឹងបញ្ឈប់ការផ្តល់ថវិកាគាំទ្រដល់សាលារៀនជាង ២៨០ ខាងលើ ដោយសារតែអង្គការត្រូវបង្វែរធនធានទៅអនុវត្តសកម្មភាពផ្សេងទៀត។ ទោះជាយ៉ាងណា រាជរដ្ឋា ភិបាលនឹងមិនបោះបង់កម្មវិធីនេះឡើយ ប៉ុន្តែត្រៀមទទួលបន្ទុកចំណាយជំនួស ដើម្បីរក្សានិរន្តរភាពនៃការផ្តល់អាហារដល់សិស្ស។

ជាមួយគ្នានេះ រាជរដ្ឋាភិបាលក៏កំពុងសិក្សាលទ្ធភាពពង្រីកកម្មវិធីនេះបន្ថែមទៀត ដោយផ្តោតលើការវិនិយោគលើសុខភាព និងឱកាសសិក្សារបស់កុមារ ជាពិសេសសិស្សនៅកម្រិតបឋមសិក្សា ដែលជាដំណាក់កាលគ្រឹះសម្រាប់ការអភិវឌ្ឍសមត្ថភាពរៀនសូត្រ។

សម្តេចធិបតីបានគូសបញ្ជាក់ថា ការវិនិយោគលើវិស័យអប់រំ មិនមែនផ្តោតតែលើការសាងសង់អគារសិក្សា ការបណ្តុះបណ្តាលគ្រូបង្រៀន ឬការបំពាក់សម្ភារសិក្សាប៉ុណ្ណោះទេ ប៉ុន្តែត្រូវយកចិត្តទុកដាក់លើអាហារូបត្ថម្ភ និងសុខភាពសិស្សផងដែរ ព្រោះការទទួលបានអាហារគ្រប់គ្រាន់ និងមានគុណភាព គឺជាកត្តាសំខាន់ជួយដល់ការលូតលាស់រាងកាយ ខួរក្បាល និងសមត្ថភាពសិក្សារបស់កុមារ៕