ក្នុងពេលរោងចក្រផលិតកង់ឡានកើនឡើងតម្លៃជ័រកៅស៊ូននាំចេញក៏កើនឡើងជាង ២៦០ ដុល្លារ ក្នុងមួយតោនផងដែរ
25-November-2024 / សេដ្ឋកិច្ច
ភ្នំពេញ៖អគ្គនាយកដ្ឋានកៅស៊ូបានឲ្យដឹង៖គិតត្រឹមខែតុលា ឆ្នាំ ២០២៤ កម្ពុជាសម្រេចបានការនាំចេញជ័រកៅស៊ូចំនួនជិត ៣០ ម៉ឺនតោន (២៩១ ២៦៩) កើនឡើងជាង ១ ម៉ឺនតោន ស្មើនឹង ៣,៧៥ ភាគរយ ធៀបនឹងរយៈពេលដូចគ្នាកាលពីឆ្នាំមុន។
លោក ម៉ែន សុភក្តិ ប្រធានសមាគមអភិវឌ្ឍន៍កៅស៊ូកម្ពុជា ប្រាប់កាសែត ថា ការនាំចេញជ័រកៅស៊ូ និងតម្លៃកៅស៊ូមានភាពល្អប្រសើរនៅឆ្នាំនេះ ខណៈតម្លៃបានកើនឡើងដោយសារតែស្ថានភាពអាកាសធាតុ។
លោក ម៉ែន សុភក្តិបញ្ជាក់ថា៖ «កាលពីខែវស្សា អាកាសធាតុមានការប្រែប្រួលខ្លាំង ដោយមានការធ្លាក់ភ្លៀងរំខានទៅលើចម្ការ ទៅដល់ការចៀរជ័រ ដែលធ្វើឱ្យយកជ័រមិនបានពីចម្ការមក អញ្ចឹងហើយ ការផលិត និងការផ្គត់ផ្គង់ទៅលើទីផ្សារហាក់ដូចជាមានការថយចុះ ដែលជាកត្តាមួយជំរុញឱ្យតម្រូវការកើនឡើង ដែលធ្វើឱ្យតម្លៃកើនឡើងផងដែរ»។លោក ម៉ែន សុភក្តិ បន្ថែមថា ស្ថានភាពសេដ្ឋកិច្ចពិភពលោក ក៏ជាចលករជំរុញតម្លៃកើនឡើងផងដែរ។
លោក ឃុន កក្កដា អគ្គនាយករង នៃអគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា តម្លៃជ័រកៅស៊ូជាមធ្យម ១ ៦២១ ដុល្លារក្នុងមួយតោន កើនឡើង ២៦៤ ដុល្លារ ក្នុងមួយតោន ស្មើនឹង ១៩,៤៣ ភាគរយ ធៀបនឹងរយៈពេលដូចគ្នានៅឆ្នាំ ២០២៣។
យោងតាមក្រសួងកសិកម្ម រុក្ខាប្រមាញ់ និងនេសាទ នៅក្នុងរយៈពេល ១០ ខែ ឆ្នាំ ២០២៤ (មករា-តុលា) កម្ពុជាសម្រេចបានការនាំចេញកៅស៊ូចំនួនជិត ៣០ ម៉ឺនតោន (២៩១ ២៦៩) កើនឡើងជាង ១ ម៉ឺនតោន ស្មើនឹង ៣,៧៥ ភាគរយ ធៀបនឹងរយៈពេលដូចគ្នាក្នុងឆ្នាំ ២០២៣។ប្រាក់ចំណូលជាង ៤៧៦ លានដុល្លារ បានពីការនាំចេញជ័រកៅស៊ូក្នុងរយៈពេល ១០ ខែឆ្នាំ ២០២៤ កើនឡើង ២៥,៩៣ ភាគរយ។
តម្លៃលក់ជ័រកៅស៊ូជាមធ្យមនៅក្នុងរយៈពេល ១០ខែ ឆ្នាំ២០២៤នេះ ថ្លៃ ១ ៦២១ ដុល្លារក្នុងមួយតោន កើនឡើង ២៦៤ ដុល្លារ ក្នុងមួយតោន ស្មើនឹង ១៩,៤៣ ភាគរយ ធៀបនឹងរយៈពេលដូចគ្នានៅឆ្នាំ ២០២៣។
សូមបញ្ជាក់ថាក្នុងឆ្នាំ២០២៤នេះ គម្រោងវិនិយោគបង្កើត «រោងចក្រផលិតសំបកកង់រថយន្ត» ទាំងពីរនេះ ត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័តឱ្យដំណើរការសាងសង់ ក្នុងខែសីហាឆ្នាំ២០២៤។ គម្រោងវិនិយោគទាំងពីរនេះរួមមាន៖ ទី១៖ គម្រោងវិនិយោគបង្កើត រោងចក្រផលិតសំបកកង់រថយន្ត ដែលមានទីតាំងស្ថិតនៅក្នុងតំបន់សេដ្ឋ-កិច្ចពិសេស យូ ប៊ី អី ស្នួល ក្នុងខេត្ដក្រចេះ ក្នុងទុនវិនិយោគ ៤៣០លានដុល្លារ និងអាចបង្កើតការងារបានចំនួន ១,៩៥៩កន្លែង។
ទី២៖ គម្រោងវិនិយោគ បង្កើតរោងចក្រផលិតសំបកកង់រថយន្ត ដែលមានទីតាំងស្ថិត នៅក្នុងតំបន់សេដ្ឋកិច្ចពិសេស ស៊ីន បាវិត ក្នុងខេត្ដស្វាយរៀង ក្នុងទុនវិនិយោគប្រមាណជាង ២៥៦លានដុល្លារ និងអាចបង្កើតការងារបានចំនួន ១,៥០០កន្លែង។អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានឲ្យដឹងថា «នេះគឺជាដំណឹងល្អ សម្រាប់អ្នកធ្វើមុខរបរវិស័យកៅស៊ូ ជាពិសេសអ្នកដាំកៅស៊ូ នៅក្នុងប្រទេសកម្ពុជា ដែលមានប្រមាណជាង ៤០ម៉ឺនហិកតា ដែលជាការរំពឹងទុក របស់អ្នកដាំកៅស៊ូ មានទីផ្សារនៅក្នុងស្រុក ដែលកន្លងមកមានតែទីផ្សារនាំចេញ»។
អ្នកឧកញ៉ា លឹម ហេង បានគូសបញ្ជាក់ថា បើសិនជាមានរោងចក្រ ទទួលទិញប្រកបដោយនិរន្ដភាព ពីអ្នកផលិតកៅស៊ូនោះ នឹងធ្វើឲ្យអ្នកដាំកៅស៊ូ មានការកើនឡើង មិនត្រឹមតែប៉ុណ្ណឹងនោះទេ គឺអាចទាក់ទាញអ្នកវិនិយោគពីបរទេស មកដាំកៅស៊ូនៅក្នុងប្រទេសកម្ពុជាបន្ថែមទៀត ដែលអាចពង្រីកទំហំផ្ទៃដី ការដាំកៅស៊ូមានការកើនឡើងផងដែរ។
សូមជម្រាបថា បច្ចុប្បន្នកម្ពុជា មានរោងចក្រផលិតសំបកកង់រថយន្ដចំនួន៣ ដែលកំពុងតែដំណើរការរួមមាន៖ទី១៖ ក្រុមហ៊ុន CART TIRE CO.,LTD នៅតំបន់សេដ្ឋកិច្ចពិសេស ឈីលូ ជាន ពុចាយ (ខេត្ដស្វាយរៀង) បានដំណើរការនៅឆ្នាំ២០២១ លើទំហំផ្ទៃដី ៥០ហិកតា ក្រោមទុនវិនិយោគ ៧៨៧លានដុល្លារ ដោយមានទីផ្សារនាំចេញ ទៅអាមេរិក, កាណាដា, សមគមន៍អីរ៉ុប និងអាស៊ី ដែលម៉ាក «Sailun»។
ទី២៖ ក្រុមហ៊ុន GENERAL TIRES TECHNOLOGY (CAMBODIA) CO.,LTD នៅតំបន់សេដ្ឋកិច្ចពិសេស ក្រុងព្រះសីហនុ (ខេត្ដព្រះសីហនុ) បានដំណើរការ នៅឆ្នាំ២០២២ លើទំហំផ្ទៃដី២០ហិកតា ក្រោមទុនវិនិយោគ ២៩៧លានដុល្លារ ដោយមានទីផ្សារនាំចេញ ទៅអាមេរិក និងមានគម្រោងនាំចេញទៅទីផ្សារប្រទេសប្រេស៊ីល ដែលម៉ាក «Sailun»។
ទី៣៖ រោងចក្រផលិតសំបកកង់រថយន្ដ ក្រុមហ៊ុន NEWBUSTAR (Cambodia) នៅតំបន់រដ្ឋបាលសេដ្ឋកិច្ចពិសេស យូ ប៊ី អ៊ី ស្នួល ស្ថិតនៅស្រុកស្នួល ខេត្តក្រចេះ តម្លៃជាង១៣៨លានដុល្លារ បានបើកឲ្យ ដំណើរការជាផ្លូវការ នៅថ្ងៃទី០៦ ខែកញ្ញា ឆ្នាំ២០២៤ ដោយមានទីផ្សារនាំចេញ ទៅអាមេរិក, សហគមន៍អីរ៉ុប និងប្រទេសប្រេស៊ីល ដែលមានម៉ាក «DoubleStar»។
បច្ចុប្បន្នប្រទេសកម្ពុជា មានផ្ទៃដីកៅស៊ូសរុបចំនួន ៤០៧ ១៧២ហិកតា ក្នុងនោះផ្ទៃដីចៀរជ័រមានចំនួន ៣២០ ១៨៤ហិកតា ស្មើនឹង៧៨.៦៤% និងផ្ទៃដីថែទាំមានចំនួន ៨៦,៩៨៨ហិកតា ស្មើនឹង២១.៣៦%៕
