ឧបនាយករដ្ឋមន្ត្រី ស សុខា មិនគាំទ្រការសម្របសំរួលករណីយ៍គ្រោះថ្នាក់ចរាចរបង្កឲ្យមានមនុស្សស្លាប់
ខេត្តព្រះសីហនុ៖ លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ បានមានប្រសាសន៍ លោកមិនគាំទ្រចំពោះករណីបង្កគ្រោះថ្នាក់ចរាចរណ៍ បណ្ដាលឲ្យស្លាប់ដល់អាយុជីវិតមានការចរចាក្រៅផ្លូវការ ក្នុងការសម្របសម្រួល ដើម្បីរួចគេចពីសំណាញ់ច្បាប់ឡើយ។
ថ្លែងនៅក្នុងទិវាជាតិរំលឹកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោក លើកទី ១៨ ដែលធ្វើនៅខេត្តព្រះសីហនុលោកឧបនាយករដ្ឋមន្ត្រីថាសសុខាឲ្យដឹងថា ករណីគ្រោះថ្នាក់ចរាចរណ៍ច្រើនជាងគេទូទាំងប្រទេស ទី១នៅរាជធានីភ្នំពេញ ទី ២ នៅខេត្តព្រះសីហនុ ទី៣ ខេត្តពោធិ៍សាត់ និងទី ៤ ខេត្តកណ្ដាល។លោករដ្ឋមន្ត្រីក្រសួងមហាផ្ទៃបញ្ជាក់ថា ដើម្បីចូលរួមរំលែកទុក្ខជាមួយក្រុមគ្រួសារជនរងគ្រោះដោយគ្រោះថ្នាក់ចរាចរណ៍នៅរសៀលថ្ងៃទី២៥ ខែធ្នូ ឆ្នាំ២០២៣ មានការប្រារព្ធទិវារំលឹកដល់ជនរងគ្រោះ ដោយគ្រោះថ្នាក់ចរាចរណ៍ផ្លូវគោកលើកទី ១៨ នៅខេត្តព្រះសីហនុ គឺជាការចូលរួមពញ្ញាក់ស្មារតីដល់អ្នកប្រើប្រាស់ផ្លូវ ឲ្យបន្តការយកចិត្តទុកដាក់ប្រុងប្រយ័ត្ន ក្នុងការធ្វើចរាចរណ៍ជាប្រចាំ ដើម្បីជៀសឲ្យផុតពីហានិភ័យនៃគ្រោះថ្នាក់ដែលបណ្ដាលមកពីអ្នកបើកបរ មានការធ្វេសប្រហែសមិនគោរពច្បាប់ចរាចរណ៍ ក៏ដូចជាការបើកបរលើសល្បឿនកំណត់ មិនគោរពសិទ្ធិអាទិភាពបើកបរ ក្រោមឥទ្ធិពលជាតិស្រវឹង សារធាតុញៀន ជាពិសេសមិនពាក់មួកសុវត្ថិភាពនិងការមិនប្រើប្រាស់ខ្សែក្រវ៉ាត់។
លោកអភិសន្តិបណ្ឌិត ក៏បានដាក់ចេញក្រើនរំលឹកទៅដល់កងកម្លាំងប្រដាប់អាវុធទាំងអស់ ត្រូវធ្វើជាគំរូល្អទៅដល់ប្រជាពលរដ្ឋ ក្នុងការគោរពអនុវត្តច្បាប់ចរាចរណ៍ផ្លូវគោក ព្រោះកងកម្លាំងជាតួអង្គក្នុងការអនុវត្តច្បាប់ ជាអ្នកចាប់ផាកពិន័យតែខ្លួនឯងបើកបរក្រោមជាតិស្រវឹង បញ្ហានេះកងកម្លាំងត្រូវគោរពនិងជៀសឱ្យបានជាដាច់ខាត.។ លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ បានដាក់ចេញវិធានការមួយចំនួនរួមមានទី១ បង្កើនវិធានការរិតបន្តឹងច្បាប់ស្ដីពីច្បាប់ចរាចរណ៍ផ្លូវគោក ទី ២ បង្កើនការផ្សព្វផ្សាយអប់រំនិងបទដ្ឋានសុវត្ថិភាពចរាចរណ៍ផ្លូវគោកតាមគ្រប់រូបភាពឲ្យបានទូលំទូលាយ។
ទី ៣ បន្តយកចិត្តទុកដាក់បង្កើនសមត្ថភាពទៅដល់មន្ត្រីអនុវត្តច្បាប់ឲ្យមានវិន័យល្អសីលធម៌ល្អ និងត្រូវលើកសរសើរអង្គភាពនិងមន្ត្រីដែលមានស្នាដៃល្អជាពិសេសត្រូវដាក់ទណ្ឌកម្មពិន័យឲ្យបានម៉ឺងម៉ាត់ចំពោះមន្ត្រីអសកម្មខិលខូចឬមន្ត្រីដែលប្រព្រឹត្តអំពើផ្ទុយពីក្រមសីលធម៌វិជ្ជាជីវៈទី ៤ ស្នើឱ្យក្រសួងស្ថាប័នពាក់ព័ន្ធនិងអង្គការជាតិអន្តរជាតិបន្តចូលរួមផ្សព្វផ្សាយក៏ដូចជាសិល្បករសិល្បការិនីគ្រឹះស្ថានសិក្សាគ្រប់កម្រិតនិងវិស័យរដ្ឋឯកជនបន្តផ្សព្វផ្សាយឲ្យបានជាប្រចាំ ទី ៥បន្តអនុវត្តគោលនយោបាយសុវត្ថិភាពធ្វើឲ្យអ្នកប្រើប្រាស់ផ្លូវមានសុវត្ថិភាព ផ្លូវមានសុវត្ថិភាពនិងយានជំនះមានសុវត្ថិភាព ទី៦ សូមអំពាវនាវដល់ប្រជាពលរដ្ឋដែលជាអ្នកប្រើប្រាស់ផ្លូវត្រូវចូលរួមបន្ថែមក្នុងការគោរពអនុវត្តច្បាប់ចរាចរណ៍ផ្លូវគោកឲ្យបានភ្ជាប់ខ្ជួនដើម្បីការពារអាយុជីវិតខ្លួនឯងក៏ដូចជាអ្នកដទៃភាពសុខដុមរមនាក្នុងគ្រួសារការពារទ្រព្យសម្បត្តិដែលអាចបាត់បង់យ៉ាងឆាប់រហ័ស។
