ការចរចាពន្ធកម្ពុជា-អាមេរិកជុំទី១អត់ទាន់បានអីទេការចរចាជុំទី២ ធ្វើឡើងនៅសប្តាហ៍ទី១ ខែមិថុនា
ភ្នំពេញ៖ កិច្ចប្រជុំបញ្ហាពន្ធគយសម្រាប់ការធ្វើពាណិជ្ជកម្មរវាងកម្ពុជា-អាមេរិក ទល់មុខគ្នានៅអាមេរិកមិនទាន់ចេញសាច់ការអីទេ។តែភាគីទាំងពីរបានឯកភាពគ្នារៀបចំកិច្ចប្រជុំចរចាពន្ធជុំទី២ ម្តងទៀតដែលនឹងប្រព្រឹត្តិទៅនៅសប្តាហ៍ទី១ ខែមិថុនា ឆ្នាំ២០២៥ នៅរដ្ឋធានីវ៉ាស៊ីនតោន ។ នេះបើយោងតាមអង្គភាពអ្នកនាំពាក្យរាជរដ្ឋាភិបាលកម្ពុជា ដែលបានចេញសេចក្តីប្រកាសព័ត៌មាន ស្តីពី លទ្ធផលនៃកិច្ចប្រជុំចរចាជុំទី១ លើកិច្ចព្រមព្រៀងពាណិជ្ជកម្មបដិការរវាងកម្ពុជា និងសហរដ្ឋអាម៉េរិក ពីថ្ងៃទី១៣ ដល់ថ្ងៃទី១៥ ខែឧសភា ឆ្នាំ២០២៥។
សូមបញ្ជាក់ថាចាប់ពីថ្ងៃទី១៣ ដល់ ថ្ងៃទី១៥ ខែឧសភា ឆ្នាំ២០២៥ នៅរដ្ឋធានីវ៉ាស៊ីនតោន សហរដ្ឋអាម៉េរិកប្រតិភូក្រុមការងារចំពោះកិច្ចសម្របសម្រួលទំនាក់ទំនងពាណិជ្ជកម្ម និងវិនិយោគទ្វេភាគីកម្ពុជា-សហរដ្ឋអាម៉េរិកដឹកនាំដោយ លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងលោកស្រី ចម និម្មល រដ្ឋមន្ត្រីក្រសួងពាណិជ្ជកម្ម បាន ចូលរួមកិច្ចប្រជុំចរចាជុំទី១ លើកិច្ចព្រមព្រៀងពាណិជ្ជកម្មបដិការរវាង កម្ពុជា និងសហរដ្ឋអាម៉េរិក ជាមួយភាគីសហរដ្ឋអាម៉េរិក ដឹកនាំដោយ លោកស្រី Sarah Ellerman បានតំណាងពាណិជ្ជកម្មសហរដ្ឋអាម៉េរិកទទួលបន្ទុកតំបន់អាស៊ីអាគ្នេយ៍ និងប៉ាស៊ីហ្វិក។
ក្នុងកិច្ចប្រជុំចរចាជុំទី១ នេះ ភាគីទាំងពីរបានផ្លាស់ប្តូរយោបល់ដោយត្រង់ទៅត្រង់មក ក្នុងបរិយាកាស យោគយល់គ្នា លើការពង្រឹងបន្ថែមនូវទំនាក់ទំនងពាណិជ្ជកម្មនិងវិនិយោគទ្វេភាគី និងបានពិភាក្សាស៊ីជម្រៅលើ អត្ថបទសេចក្តីព្រាងកិច្ចព្រមព្រៀងពាណិជ្ជកម្មបដិការ។ភាគីទាំងពីរ បានឯកភាពគ្នារៀបចំកិច្ចប្រជុំចរចាជុំទី២ នៅសប្តាហ៍ទី១ ខែមិថុនា ឆ្នាំ២០២៥ នៅរដ្ឋធានីវ៉ាស៊ីនតោន។សូមបញ្ជាក់ថាសម្រាប់ការចរចានេះខាងភាគីអាមេរិកមិនបាននិយាយឬចេញសេចក្តិថ្លែងការណ៍ជាសាធាណៈណាមួយឡើយ។
កាលពីថ្ងៃទី២ មេសា ប្រធានាធិបតីអាមេរិកលោកដូណាល់ ត្រាំបានប្រកាសដំឡើងពន្ធលើទំនិញកម្ពុជានាំចូលអាមេរិកក្នុងអត្រា ៤៩%។ នៅ ២ថ្ងៃក្រោយមក ពោលក្នុងថ្ងៃទី៤ មេសា នាយករដ្ឋមន្ត្រីកម្ពុជាលោកហ៊ុន ម៉ាណែតបានលិខិតមួយទៅឲ្យលោកប្រធានាធិបតីអាមេរិកដូណាល់ ត្រាំ។ តែក្នុងពេលជាមួយគ្នា ក្រសួងពាណិជ្ជកម្មកម្ពុជាក៏បានប្រកាសទម្លាក់អត្រាពន្ធលើទំនិញអាមេរិកនាំចូលកម្ពុជាចំនួន ១៩មុខពីអត្រាអតិបរមា ៣៥% មកនៅត្រឹម ៥%។
សូមជម្រាបថា នៅក្នុងសំណុំរឿងពន្ធនេះ ប្រធានសភាពាណិជ្ជកម្មអាមេរិកប្រចាំកម្ពុជា លោក Casey Barnett បានសម្តែងក្តីកង្វល់ថា កម្ពុជានឹងបាត់បង់លទ្ធភាពក្នុងការនាំទំនិញចូលទីផ្សារសហរដ្ឋអាមេរិក និងបាត់បង់ការងាររោងចក្រជាង១០ម៉ឺនការងារ ប្រសិនបើកម្ពុជាមិនអាចគេចផុតពីការជាប់ពន្ធរបស់រដ្ឋបាលអាមេរិកក្នុងអត្រាដល់ទៅ ៤៩%។
តាមលោក Casey ការជាប់ពន្ធរបស់អាមេរិកក្នុងអត្រាដ៏ខ្ពស់នេះក៏អាចទាញទម្លាក់ការវិនិយោគបរទេសដោយផ្ទាល់នៅកម្ពុជា ពិសេសក្រុមហ៊ុនចិនដែលចូលបោះទុនរកស៊ីនៅកម្ពុជា។សម្រាប់កម្ពុជាសហរដ្ឋអាមេរិកជាទីផ្សារធំបំផុតមួយសម្រាប់ការនាំចេញទំនិញ។ តាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា ការដោះដូរពាណិជ្ជកម្មរវាងកម្ពុជា និងអាមេរិកក្នុងឆ្នាំ២០២៤ មានទឹកប្រាក់ចំនួន ១០.១៨ពាន់លានដុល្លារ ពោលកើនឡើងចំនួន ១១.២% បើធៀបនឹងឆ្នាំ ២០២៣។ កម្ពុជាបាននាំចេញទៅអាមេរិកក្នុងទំហំទឹកប្រាក់ ៩.៩ពាន់លានដុល្លារ ហើយអាមេរិកនាំចូលកម្ពុជាមានទឹកប្រាក់ ២៦៤.១៤លានដុល្លារ៕
