សម្ដេច ហ៊ុន ម៉ាណែត ៖ កម្ពុជា មិនត្រូវការថៃមកបង្ក្រាបបទល្មើសអនឡាញជំនួសខ្លួនឡើយ

ភ្នំពេញ៖តាមរយៈអនុរដ្ឋមន្ត្រីទី២ នៃក្រសួងការបរទេសកូរ៉េខាងត្បូង សម្ដេច ហ៊ុន ម៉ាណែត នាយករដ្ឋមន្ត្រីកម្ពុជា ប្រាប់ទៅប្រធានាធិបតីកូរ៉េខាងត្បូងថា កម្ពុជា មិនត្រូវការថៃមកបង្ក្រាបបទល្មើសឆបោកអនឡាញជំនួសខ្លួនឡើយ។

នៅក្នុងជំនួបជាមួយ អនុរដ្ឋមន្ត្រីទី២នៃក្រសួងការបរទេសកូរ៉េខាងត្បូង លោកស្រី គីម ជីណា  នាព្រឹកថ្ងៃទី១៦ ខែតុលា  សម្ដេចធិបតី ហ៊ុន ម៉ាណែត ឱ្យដឹងអំពីខ្លឹមតាមគណនីហ្វេសប៊ុក ពីការជជែកជាមួយអនុរដ្ឋមន្ត្រីទី២ ក្រសួងការបរទេសកូរ៉េទាក់ទងនិងការផ្សាយរបស់កាសែតថៃថានាយករដ្ឋមន្ត្រីថៃនឹងសហការជាមួយកូរ៉េដើម្បីបង្ក្រាបបទល្មើសអនឡាញខាងដូច្នេះ ៖« ប៉ុន្មានថ្ងៃនេះ, បណ្តាញសារព័ត៌មានរបស់ប្រទេសជិតខាងមួយ បានផ្សាយថា មេដឹកនាំរបស់គេមានគម្រោងពិភាក្សាជាមួយឯកឧត្តមប្រធានាធិបតីកូរ៉េ ដើម្បីរកវិធីដោះស្រាយបញ្ហាការឆបោកតាមប្រព័ន្ធបច្ចេកវិទ្យានៅកម្ពុជា ដែលពាក់ព័ន្ធនឹងជនជាតិកូរ៉េ។

ខ្ញុំបានជម្រាបជូនលោកជំទាវ គីម ជីណា ថា ប្រសិនករណីនេះជាការពិត ខ្ញុំសូមឱ្យលោកជំទាវជម្រាបជូនឯកឧត្តមប្រធានាធិបតីកូរ៉េថា កម្ពុជាមិនត្រូវការពឹងពាក់ប្រទេសជិតខាងណាមួយ មកធ្វើការងារនេះជំនួសកម្ពុជាឡើយ ហើយមេដឹកនាំប្រទេសនោះគួរផ្តោតលើការដោះស្រាយបញ្ហាផ្ទៃក្នុងប្រទេសរបស់ខ្លួនឱ្យបានល្អទៅ។ ចំពោះកិច្ចសហប្រតិបត្តិការរវាងកម្ពុជានិងកូរ៉េ លើបញ្ហាប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា ប្រទេសយើងទាំងពីរមានសមត្ថភាព និងលទ្ធភាពគ្រប់គ្រាន់ ក្នុងកិច្ចសហការទ្វេភាគី ដើម្បីដោះស្រាយបញ្ហា និង មិនចាំបាច់មានអ្នកទីបីមកជួយជំរុញនោះទេ។»។

សម្ដេច ហ៊ុន ម៉ាណែត ក៏បានឱ្យដឹងថា  នៅក្នុងជំនួប សម្ដេច បានពិភាក្សាគ្នាជាមួយលោកស្រី គីម ជីណា ពាក់ព័ន្ធនឹងការប្រយុទ្ធប្រឆាំងនឹងឧក្រិដ្ឋកម្មឆ្លងដែន ជាពិសេសការឆបោកតាមប្រព័ន្ធបច្ចេកវិទ្យា ដោយបានគូសបញ្ជាក់អំពីកិច្ចសហប្រតិបត្តិការជាច្រើនឆ្នាំកន្លងមក រវាងអាជ្ញាធរកម្ពុជា និងអាជ្ញាធរកូរ៉េ ហើយដែលបានសម្រេចនូវលទ្ធផលល្អជាផ្លែផ្កាជាច្រើនរួចមកហើយ។ ក្នុងពេលជាមួយគ្នា, កម្ពុជា និងកូរ៉េ នឹងបន្តពង្រឹងកិច្ចសហប្រតិបត្តិការរួមគ្នាដើម្បីបង្ការ, ទប់ស្កាត់ និងប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា ឱ្យមានប្រសិទ្ធភាពខ្ពស់ សំដៅចូលរួមចំណែកថែរក្សា, ការពារសន្តិសុខ, សណ្តាប់ធ្នាប់សាធារណៈ និងសុវត្ថិភាពសង្គម ។

សម្ដេច ហ៊ុន ម៉ាណែត រម្លឹកថា  ទំនាក់ទំនងការទូតរវាងកម្ពុជា- កូរ៉េខាងត្បូង  ត្រូវបានភ្ជាប់ឡើងវិញ នៅឆ្នាំ១៩៩៧។ ទំនាក់ទំនងនេះ ត្រូវបានដំឡើងកម្រិតដល់ភាពជាដៃគូយុទ្ធសាស្ត្រ នៅឆ្នាំ២០២៤ ដែលកាន់តែមានភាពរឹងមាំ និងស៊ីជម្រៅ ជាមួយនឹងកិច្ចសហប្រតិបត្តិការកាន់តែរីកចម្រើនគួរឱ្យកត់សម្គាល់ ស្ទើរគ្រប់វិស័យ៕