កម្ពុជារួមជាមួយប្រទេសជិត ៤០ ថ្កោលទោសការវាយប្រហារលើកងទ័ពមួកខៀវ UN នៅលីបង់
13-October-2024 / ព័ត៌មានអន្តរជាតិ
លីបង់៖ ប្រទេសជិត ៤០ រួមមានទាំងកម្ពុជា ដែលបានបញ្ជូនកងទ័ពមួកខៀវទៅចូលរួមក្នុងបេសកកម្មរក្សាសន្តិភាពរបស់អង្គការសហប្រជាជាតិ (UN) នៅក្នុងប្រទេសលីបង់ កាលពីថ្ងៃសៅរ៍ ទី១២ ខែតុលាពួកគេថ្កោលទោស ចំពោះការវាយប្រហារថ្មីៗនេះលើកងកម្លាំងរក្សាសន្តិភាព។ នេះបើតាមការចេញផ្សាយដោយ ទីភ្នាក់ងារសារព័ត៌មាន AFP។
សេចក្ដីថ្លែងការណ៍រួមមួយត្រូវបានបង្ហោះលើបណ្ដាញទំនាក់ទំនងសង្គម X ដោយបេសកកម្មប៉ូឡូញប្រចាំ UN និងត្រូវបានចុះហត្ថលេខាដោយប្រទេសជាច្រើនក្នុងនោះរួមមាន ទាំងប្រទេសបញ្ជូនទ័ពមួកខៀវច្រើនជាងគេ ដូចជាឥណ្ឌូណេស៊ី អ៉ីតាលី និងឥណ្ឌា បានគូសបញ្ជាក់ដូច្នេះថា «សកម្មភាពបែបនេះ (ការវាយប្រហារ) ត្រូវតែបញ្ឈប់ជាបន្ទាន់ ហើយគួរតែមានការស៊ើបអង្កេតមួយយ៉ាងពេញលេញ»។
សេចក្ដីថ្លែងការណ៍នេះដដែលបន្ថែមថា ប្រទេសជិត ៤០ ដែលបានចូលរួមចំណែកក្នុងបេសកកម្មរក្សាសន្តិភាពនៅលីបង់ ឬហៅកាត់ថា UNIFIL នៅតែបន្តគាំទ្រពេញទំហឹងដល់កិច្ចការគាំទ្រសម្រាប់បេសកកម្មរបស់ UNIFIL និងសកម្មភាពទាំងឡាយដែលមានគោលដៅចម្បងក្នុងនាំមកនូវស្ថិរភាព និងសន្តិភាពយូរអង្វែងនៅភាគខាងត្បូងលីបង់ រួមទាំងនៅក្នុងតំបន់មជ្ឈិមបូព៌ាទាំងមូល។
កាលពីពេលថ្មីៗនេះ មានកងកម្លាំងរក្សាសន្តិភាពយ៉ាងហោច ៥នាក់ បានរងរបួស ខណៈអ៉ីស្រាអែលកំពុងពង្រីកប្រតិបត្តិការវាយប្រហារប្រឆាំងនឹងក្រុមហេសបូឡា នៅភាគខាងត្បូងលីបង់។ UNIFIL បានចោទប្រកាន់យោធាអ៉ីស្រាអែលថាមានចេតនាវាយប្រហារលើទីតាំងឈរជើងរបស់ UNIFIL។ UNIFI មានកងទ័ព ៩៥០០នាក់មកពី ប្រទេសចំនួន៥០ ដែលមានភារកិច្ចតាមដានការអនុវត្តបទឈប់បាញ់ដែលបិទបញ្ចប់សង្គ្រាមរវាងអ៉ីស្រាអែល និងហេសបូឡា កាលពីឆ្នាំ២០០៦។
ក្រៅពីការរងរបួសខាងលើកងកម្លាំងបណ្តោះអាសន្នអង្គការសហប្រជាជាតិប្រចាំប្រទេសលីបង់ «Unifil» បញ្ជាក់ថា មានកងរក្សាសន្តិភាព UN ម្នាក់ទៀតហើយដែលត្រូវរបួសនៅភាគខាងត្បូងប្រទេសលីបង់ ដោយនេះក្លាយជាកងរក្សាសន្តិភាព UN ទី៥ ដែលត្រូវរបួស ក្នុងរយៈពេលប៉ុន្មានថ្ងៃថ្មីៗនេះ ស្របពេលជម្លោះអ៊ីស្រាអែល-ហេសបូឡា កំពុងឡើងកម្តៅ។ក្នុងសេចក្តីថ្លែងការណ៍កាលពីថ្ងៃសៅរ៍ទី១២ខែតុលាឆ្នាំ២០២៤, Unifil និយាយថា កងរក្សាសន្តិភាព បានរងរបួសគ្រាប់កាំភ្លើងនៅឯទីស្នាក់ការកណ្តាលរបស់ខ្លួនក្នុងទីក្រុង Naquora ភាគខាងត្បូងកាលពីយប់ថ្ងៃសុក្រ ចំពេលមានសកម្មភាពយោធាក្បែរនោះ។ ទោះបីជាយ៉ាងណាក៏ដោយ Unifil មិនដឹងច្បាស់ឡើយថាតើ គ្រាប់កាំភ្លើងនោះត្រូវបាញ់ដោយភាគីណា។
ពាក់ព័ន្ធបញ្ហានេះដែរ ប្រធានាធិបតីសហរដ្ឋអាមេរិក ចូ បៃដិន បានជំរុញឲ្យអ៊ីស្រាអែលបញ្ឈប់ការបាញ់ប្រហារទៅលើកងរក្សាសន្តិភាព នៅក្នុងប្រទេសលីបង់ បន្ទាប់ពីឧប្បត្តិហេតុជាបន្តបន្ទាប់។
អគ្គលេខាធិការអង្គការសហប្រជាជាតិ Antonio Guterres និងបណ្តាប្រទេសលោកខាងលិចបានថ្កោលទោសការវាយប្រហារនោះ ដោយ Unifil ហៅវាថាជា «ការបង្កហេតុយ៉ាងធ្ងន់ធ្ងរ» ហើយនិយាយថា សន្តិសុខរបស់បុគ្គលិក និងទ្រព្យសម្បត្តិរបស់ UN ត្រូវតែធានាឲ្យបាន។ចាប់តាំងពីឆ្នាំ១៩៧៨មក ពួកគេបានល្បាតតំបន់រវាងទន្លេ Litani និងព្រំដែនទទួលស្គាល់ដោយអង្គការសហប្រជាជាតិរវាងប្រទេសលីបង់និងអ៊ីស្រាអែល ដែលគេស្គាល់ថា «បន្ទាត់ខៀវ»។
សម្រាប់ប្រទេសកម្ពុជាលោក Jean-Pierre Lacroix អគ្គលេខាធិការរងអង្គការសហប្រជាជាតិ ទទួលបន្ទុកប្រតិបត្តិការរក្សាសន្តិភាពនាថ្ងៃទី១០ ខែតុលា ឆ្នាំ២០២៤ ក្នុងឱកាសជួបជាមួយទេសរដ្ឋមន្ត្រី លី ធុជ អនុប្រធានទី១ អាជ្ញាធរមីនបានថ្លែងអំណរគុណចំពោះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលបានបន្តរក្សាទុកកងកម្លាំងមួកខៀវដ៏ក្លាហាននៅប្រទេសលីបង់។លោកអគ្គលេខាធិការរង បានបញ្ជាក់ថាសុវត្ថិភាពរបស់កងកម្លាំង គឺជាសុវត្ថិភាពរបស់អង្គការសហប្រជាជាតិ លោក ក៏បានចូលរួមរំលែកមរណទុក្ខជាមួយសម្តេចធិបតី ចំពោះការបាត់បង់ នាយឧត្តមសេនីយ៍ សែម សុវណ្ណនី ដែលជាមិត្តភ័ក្ដិជិតស្និទ្ធ និងបានរួមចំណែកក្នុងសកម្មភាពរក្សាសន្តិភាព និងសន្តិសុខ ក្រោមឆ័ត្ររបស់អង្គការសហប្រជាជាតិ។
ខាងក្រោមនេះជាឈ្មោះប្រទេសដែលបានថ្កោលទោសការវាយប្រហារលើកងទ័ពមួកខៀវ នៅលីបង់៖1. Armenia2. Austria(អូទ្រិស)3. Bangladesh(បង់ក្លាដេស)4. Brazil(ប្រស៊ីល)
5. Cambodia(កម្ពុជា)6. China(ចិន)7. Cyprus(កោះស៊ីប)8. El Salvador(អែលសាល់វ៉ាឌ័រ)9. Estonia(អេស្តូនី)10. Fiji(ហ្វីជី)11. Finland(ហ្វាំងឡង់)12. France(បារាំង)
13. Ghana(ហ្គាណា)14. Guatemala(ហ្គាតេម៉ាឡា)15. Hungary(ហុងគ្រី)16. Indonesia(ឥណ្ឌូណេស៊ី)17. Ireland(អៀកឡង់)18. Italy(អ៊ីតាលី)19. Kazakhstan(កាហ្សាក់់ស្តង់)
20. Republic of Korea(កូរ៉ខាងត្បូង)21. Latvia(ឡាត់វៀ)22. Malaysia(ម៉ាឡេស៊ី)23. Malta(ម៉ាល់់តា)24. Mongolia(ម៉ុងហ្គោលី)25. Nepal(ណេប៉ាល់)26. Netherlands(នីឌឹឡែន)27. Poland(ប៉ូឡូញ)28. Qatar(កាតា)29. Sierra Leone(សេរ៉ាឡេអូន)30. Spain(អេស្បាញ)31. Sri Lanka(ស្រីលង្កា)32. Tanzania(តង់ហ្សានី)33. Turkey(តួគី)34. United Kingdom(អង់គ្លេស)35. Germany(អាល្លឺម៉ង់)36. Peru(ប៉េរូ)37. Uruguay(អ៊ុយរ៉ូហ្កាយ)៕
