ប្រទេសឧស្សាហកម្មជឿនលឿនទាំង៧ទាមទារឲ្យរុស្ស៊ីដកទព័ចេញពីអ៊ុយក្រែន
12-October-2022 / ព័ត៌មានអន្តរជាតិ
ប្រទេសអ៊ុយក្រែនៈរដ្ឋមន្ត្រីការបរទេសរុស្ស៉ី លោក សឺហ្គៃ ឡារ៉ូវ (Sergei Lavrov) បាននិយាយនៅថ្ងៃអង្គារសប្តាហ៍នេះថា ទីក្រុងមូស្គូបើកចំហរកិច្ចចរចាពីសង្គ្រាមនៅអ៊ុយក្រែនជាមួយលោកខាងលិច ជាការអះអាងដែលទីក្រុងវ៉ាស៉ីនតោនហៅថាជា «ឥរិយាបថក្លែងក្លាយ» ខណៈរុស្ស៉ីនៅតែបន្តបើកការវាយប្រហារលើទីក្រុងនានារបស់អ៊ុយក្រែន។ នេះបើយោងតាមការចុះផ្សាយដោយទីភ្នាក់ងារសារព័ត៌មាន AFP នៅថ្ងៃពុធ ទី១២ ខែតុលា ឆ្នាំ២០២២។
ក្នុងបទសម្ភាសន៍ជាមួយទូរទស្សន៍រដ្ឋរុស្ស៉ី លោក ឡារ៉ូវ បាននិយាយថា រុស្ស៊ីមានឆន្ទៈក្នុងការចូលរួមជាមួយសហរដ្ឋអាមេរិក ឬតួកគី ដើម្បីរកមធ្យោបាយបញ្ចប់សង្គ្រាម ប៉ុន្តែមិនទាន់ទទួលបានសំណើជាក់លាក់ណាមួយឡើយ។ ចំណែក អ្នកនាំពាក្យក្រសួងការបរទេសអាមេរិក លោក នេត ប្រាយស៍ (Ned Price) វិញបាននិយាយថា ទីក្រុងវ៉ាស៊ីនតោនមាន «ទំនុកចិត្តតិចតួចណាស់» ដែលថារុស្ស៊ីកំពុងផ្តល់សំណើស្របច្បាប់សម្រាប់កិច្ចពិភាក្សា ពីព្រោះការអត្ថាធិប្បាយរបស់លោក ឡារ៉ូវ បានកើតឡើងតែប៉ុន្មានម៉ោងនៃការវាយប្រហារមីស៊ីលរបស់រុស្ស៊ី សម្លាប់ជនស៊ីវិលនៅអ៊ុយក្រែន។
ការប្រកាសរបស់រុស្ស៊ីរឿងចរចារគឺបន្ទាប់ពីប្រទេស G7 (Group of 7) បានចេញសេចក្តីថ្លែងការណ៍របស់ខ្លួន ទាមទារឱ្យរុស្ស៊ីត្រូវដកទ័ព, ដកសម្ភារៈយោធារបស់ខ្លួនទាំងអស់ចេញពី ទឹកដីអ៊ុយក្រែន ដោយបន្ទាន់និងដោយគ្មានលក្ខខណ្ឌអ្វីទាំងអស់។ សេចក្តីថ្លែងការណ៍របស់ក្រុមប្រទេសទាំង ៧គឺកាណាដា, បារាំង, អាល្លឺម៉ង់, អ៊ីតាលី, ជប៉ុន, អង់គ្លេស និងសហរដ្ឋអាមេរិក ដែលទាមទារឱ្យកម្លាំងទាហានរុស្ស៊ីធ្វើការដកថយចេញពីអ៊ុយក្រែននេះ គឺនៅបន្ទាប់ពីមានកិច្ចប្រជុំបន្ទាន់មួយនៅថ្ងៃទី១១ ខែតុលា ឆ្នាំ២០២២ ក្រោយពីមានការវាយប្រហារបាញ់ស្រោចគ្រាប់មីស៊ីលដាក់ទៅលើប្រទេសអ៊ុយក្រែន។ មេដឹកនាំអ៊ុយក្រែន លោក ហ្សេលេនស្គី បានចូលរួមក្នុងកិច្ចប្រជុំប្រទេស G7 (Group of 7) តាមអនឡាញ នោះផងដែរ។
លោក ហ្សេលេនស្គី បានអំពាវនាវរកជំនួយយោធានូវអាវុធធុនធ្ងន់ និងការបញ្ជួនអាវុធដែលត្រូវការទាំងនោះទាន់ពេលវេលាថែមទៀត។ លោកបានថ្លែងថា ចំណុចសំខាន់ទី១ គឺអ៊ុយក្រែនត្រូវការជំនួយយោធាដើម្បីរារាំងការបាញ់មីស៊ីលតាមអាកាសដាក់មកលើអ៊ុយក្រែន។ លោកថាជំនួយនេះគឺសំខាន់ណាស់ដើម្បីការធានា សន្តិសុខ។ លោកបញ្ជាក់ថានៅពេលដែលអ៊ុយក្រែនបានទទួលជំនួយនៃអាវុធទាំងនេះហើយ ការបាញ់មីស៊ីលរបស់រុស្ស៊ីនឹងត្រូវគាំងដំណើរការជាមិនខាន។ ក្នុងសប្តាហ៍នេះ ការវាយប្រហារតាមផ្លូវអាកាសរបស់រុស្ស៊ី មិនមែនមានត្រឹមតែថ្ងៃចន្ទ ទី១០ ខែតុលា ដែលរុស្ស៊ីបានបាញ់ស្រោចមីស៊ីលជាង៨០គ្រាប់ដាក់លើបណ្តា ក្រុងនានានោះឡើយប៉ុន្តែត្រូវបានប្រពន្ធ័ការពារដែនអាកាសអ៊ុក្រែនបាញ់ទម្លាក់បានប្រមាណជាង៤០គ្រាប់ផងដែរ។ នៅថ្ងៃទី១១ ខែតុលា រុស្ស៊ីក៏បានធ្វើសកម្មភាពតាមផ្លូវអាកាសមកបន្ថែមទៀត ប៉ុន្តែមិនមានសកម្មភាពខ្លាំងក្លាដូចថ្ងៃដំបូងឡើយ។
ប្រទេសអ៊ុយក្រែនកាលពីថ្ងៃទី១១ ខែតុលា ឆ្នាំ២០២២ បានទទួលការសន្យាភ្លាមជាលើកដំបូងពីប្រទេសអាល្លឺម៉ង់នូវប្រព័ន្ធអាវុធការពារផ្លូវអាកាស Iris Tair defense systems ចំនួន៤គ្រឿង, ខណៈ ដែលសហរដ្ឋអាមេរិកបានសន្យាថានឹងជំរុញឱ្យលឿននូវប្រព័ន្ធការពារផ្លូវអាកាសរបស់ខ្លួន Nasam មកឱ្យអ៊ុយក្រែន។ យោងតាមសេចក្តីថ្លែងការណ៍របស់ក្រុមប្រទេស G7 ចំនួន១៣ចំណុចបានបញ្ជាក់ការប្តេជ្ញាថា ប្រទេសនៃមហាសេដ្ឋកិច្ចដ៏ធំទាំង៧ នឹងផ្តល់ជំនួយយោធានិងហិរញ្ញវត្ថុដល់អ៊ុយក្រែន និងការប្តេជ្ញាឈរជាមួយនឹងអ៊ុយក្រែន រហូតដើម្បីប្រឆាំងនឹងរុស្ស៊ី។
ប្រទេស G7 បានចោទថារុស្ស៊ីបានបំពានយ៉ាងធ្ងន់ធ្ងរលើគោលការណ៍ធម្មនុញ្ញអង្គការសហប្រជាជាតិ។ ប្រទេស G7 ថ្លែងទៀតថារុស្ស៊ីគ្មានមូលដ្ឋានស្របច្បាប់ណាមួយ ដែលចង់ធ្វើការផ្លាស់ប្តូរព្រំដែនប្រទេសអ៊ុយក្រែននោះឡើយ។ ក្នុងចំណុចទី៩នៃសេចក្តីថ្លែងការណ៍ ប្រទេស G7 បានប្តេជ្ញាបន្តការជួយអ៊ុយក្រែនដើម្បីរក្សា ដែនអធិបតេយ្យ និងបូរណភាពទឹកដីរបស់គេ តាមរយៈការផ្តល់ជំនួយហិរញ្ញវត្ថុ, ជំនួយយោធា, មនុស្សធម៌, ការទូត និងផ្លូវច្បាប់ និងការប្តេជ្ញាឈរជាមួយអ៊ុយក្រែន ជារៀងដរាបនិងជួយបំពេញអ៊ុយក្រែនក្នុងការបំពេញតម្រូវការទាំងអស់រួមទាំងការត្រៀមសម្រាប់រដូវរងាឈាន ចូលមកដល់នេះថែមទៀត។
ប្រទេសG7 បានព្រមានរុស្ស៊ីទៀតថា រាល់ការប្រើប្រាស់អាវុធគីមី ជីវសាស្ត្រ ឬនុយក្លេអ៊ែរដោយរុស្ស៊ីខ្លួនឯងនោះ នឹងត្រូវប្រឈមមុខនឹងផលវិបាកធ្ងន់ធ្ងរ។សេចក្តីថ្លែងការណ៍របស់ប្រទេស G7 នៅបានប្រាប់ប្រទេសបេឡារុសដែលប្តេជ្ញាចូលរួមក្នុងក្រុមយោធាជាមួយរុស្ស៊ី ត្រូវបញ្ឈប់សកម្មភាពរបស់ខ្លួន និងត្រូវបញ្ឈប់ មិនឱ្យរុស្ស៊ីប្រើប្រាស់ទឹកដីរបស់ខ្លួនថែមទៀត៕
