រដ្ឋមន្ត្រីក្រសួងអធិការកិច្ចថ្មីចាត់ទុក ការងារអធិការកិច្ច មានភាពចាំបាច់ និងពិតជាឆ្លើយតបនឹងកម្មវិធីនយោបាយ របស់រាជរដ្ឋាភិបាល
23-September-2024 / ផ្សេងៗ
ភ្នំពេញ៖ លោក សុខ សូកេន រដ្ឋមន្ត្រីក្រសួងអធិការកិច្ចថ្មី នាព្រឹកថ្ងៃទី២៣ ខែកញ្ញា ឆ្នាំ២០២៤ បានមានប្រសាសន៍ចាត់ទុកការងារអធិការកិច្ច ពិតជាមានភាពចាំបាច់ និងពិតជាឆ្លើយតបនឹងកម្មវិធីនយោបាយ របស់រាជរដ្ឋាភិបាលអាណត្តិទី៧ និងយុទ្ធសាស្ត្របញ្ចកោណ ដំណាក់កាលទី១ ដោយបន្តកែទម្រង់ ស៊ី ជម្រៅ ទូលំទូលាយ មានសង្គតភាព ដែលនឹងផ្តោតលើការលើកកម្ពស់អភិបាលកិច្ច និងសមត្ថភាពស្ថាប័ន ការបង្កើតបរិយាកាសអំណោយផល សម្រាប់អភិវឌ្ឍសង្គម-សេដ្ឋកិច្ច ការអភិវឌ្ឍមូលធនមនុស្ស ការធ្វើពិពិធកម្មសេដ្ឋកិច្ច ការបង្កើនភាពប្រកួតប្រជែង ការអភិវឌ្ឍវិស័យឯកជន ដែលប្រកបដោយភាពធន់ ចីរភាព បរិយាប័ន្ន និង សង្គមឌីជីថល ដើម្បីសម្រេចឱ្យបាននូវ ចក្ខុវិស័យរួមគ្នាគឺ៖ «អធិការកិច្ចដើម្បីទាំងអស់គ្នាទាំងអស់គ្នា ឆ្ពោះទៅកាន់អភិបាលកិច្ចល្អ»។
ក្នុងពិធីជួបសំណេះសំណាលជាមួយថ្នាក់ដឹកនាំ និងមន្ត្រីរាជការ, នៅទីស្តីការក្រសួង, លោករដ្ឋមន្ត្រីក្រសួងអធិការកិច្ច បានមានប្រសាសន៍បញ្ជាក់ថា ដើម្បីសម្រេចឱ្យបានលទ្ធផលជាអតិបរមា ស្របទៅតាមចក្ខុវិស័យ និងបេសកកម្មជាយុទ្ធសាស្ត្រ ដែលបានលើកឡើងខាងលើ យើងទាំងអស់គ្នាដែលជាថ្នាក់ដឹកនាំ ក៏ដូចជា មន្ត្រីរាជ ការទាំងនៅថ្នាក់ជាតិនិងក្រោមជាតិ ត្រូវជំរុញសាមគ្គីភាពជាធ្លុងមួយ សំដៅសម្រេច ឱ្យបានដូចខាងក្រោម៖ ត្រូវចូលរួមរក្សាទុក នូវសមិទ្ធផលចាស់ដែលថ្នាក់ដឹកនាំជំនាន់មុន បានខិតខំប្រឹងប្រែងកសាងសមិទ្ធផលជាច្រើន អស់រយៈពេលជាង៤០ឆ្នាំ នៅក្នុងវិស័យអធិការកិច្ចនេះ និងកសាងសមិទ្ធផលថ្មីដើម្បីប្រែក្លាយស្ថាប័ន ជារដ្ឋបាលសាធារណៈ ទំនើបមានសមត្ថភាពខ្ពស់ ខ្លាំងនិងស្អាតស្អំ។
លោករដ្ឋមន្ត្រីក្រសួងអធិការកិច្ចបានបន្តថា ត្រូវមានសុខដុមនីយកម្មនៃមុខងារអធិការកិច្ច នៅក្នុងរដ្ឋបាលសាធារណៈ ដោយសហការរៀបចំយន្តការត្រួតពិនិត្យ ប្រកបដោយគុណភាព និងប្រសិទ្ធភាព ជា មួយក្រសួងស្ថាប័នពាក់ព័ន្ធ។ ដើម្បីសម្រេច ការងារនេះ ក្រសួងអធិការកិច្ចនឹងពង្រឹង និងពង្រីកទំនាក់ទំនងនិងកិច្ចសហការល្អ ជាមួយអង្គភាពអធិការកិច្ចចំណុះឱ្យក្រសួង ស្ថាប័នតាមរយៈការណែនាំឱ្បបាន ស៊ីជម្រៅលើការងារអធិការកិច្ច ការរៀបចំនីតិវិធី និងគំរូស្តង់ដារអធិការកិច្ចរួម ព្រមទាំងជួយបណ្តុះបណ្តាលជំនាញអធិការកិច្ច ឱ្យបានទូលំទូលាយ ដើម្បីលើកកម្ពស់ ប្រសិទ្ធភាព និងសង្គតិភាពនៃការអនុវត្តការងារ។
ដើម្បូបន្តលើកកម្ពស់ និងពង្រឹងស្ថាប័ន ដោយដាក់ចេញនូវអភិក្រមការងារ និង ប្រព័ន្ធការងារមួយដែលមានស្តង់ដារច្បាស់លាស់ក្រសួងអធិការកិច្ចនឹងផ្តោតទៅលើ៖ (១)ការកសាងមូលធនមនុស្សដោយពង្រឹងសមត្ថ ភាពមន្ត្រីឱ្យមានមនសិការនិងក្រមសីលធម៌ វិជ្ជាជីវៈ ព្រមទាំងសមត្ថភាព ស័ក្តិសមជាទីពឹងរបស់ប្រជាពលរដ្ឋ (២)ពង្រឹងការអនុវត្តតួ នាទីអធិការកិច្ចឱ្យបានទូលំ ទូលាយ ស្មើភាព និងមិនរើសអើង ប្រកប ដោយភាពទន់ភ្លន់ តែម៉ឺងម៉ាត់ដោយផ្អែក លើច្បាប់ជាធំ តាមអភិក្រមទាំង៥ របស់សម្តេចតេជោ គឺ”ឆ្លុះ កញ្ចក់ ងូតទឹក ដុស ក្អែល ព្យាបាល និងវះកាត់ » (៣) ពង្រឹងយន្តការតាមដានការអនុវត្ត ច្បាប់គោល នយោបាយនិងបទបញ្ជាដែល រាជរដ្ឋាភិ បាលបានដាក់ចេញ ដើម្បីវាយតម្លៃការ អនុវត្តគោលនយោបាយ វឌ្ឍនភាព និងសមិទ្ធកម្ម ធានាបានការបម្រើ សេវាជូនប្រជាពលរដ្ឋប្រកបដោយប្រសិទ្ធភាព និងវិជ្ជាជីវៈ (៤)បន្តពង្រឹងយន្តការដោះស្រាយបណ្តឹង របស់ប្រជាពលរដ្ឋពីគ្រប់មជ្ឈដ្ឋាន ដោយរៀបចំវិធីសាស្ត្រងាយស្រួលសម្រាប់ទទួលពាក្យបណ្តឹង។
ការបន្តការកសាងលិខិតបទដ្ឋានគតិយុត្តសំខាន់ៗ ដូចជា ច្បាប់ស្តីពីអធិការកិច្ចច្បាប់ស្តីពីបណ្ដឹងតវ៉ា និងបណ្តឹងបរិហារ គោលនយោបាយជាតិអធិការកិច្ចស្តង់ដារ អធិការកិច្ច គោលការណ៍ប្រតិបត្តិស្តង់ដារនៅក្នុងវិស័យអធិការកិច្ច និងបណ្តឹង ក្រម សីលធម៌៕
