មេទ័ពប្រចាំខេត្តកម្ពុជា និងថៃ ជួបគ្នានៅថ្មដាដើម្បីពង្រឹងកិច្ចសហប្រតិបត្តិការគ្នាតាមព្រុំដែនពិសេសបញ្ហាភ្លើងឆេះព្រៃ
18-February-2025 / សន្តិសុខសង្គម
ពោធិ៍សាត់៖ មេបញ្ជាការកងកម្លាំងការពារព្រំដែនកម្ពុជាប្រចាំភូមិសាស្ត្រខេត្តពោធិ៍សាត់នៃប្រទេសកម្ពុជា បានទទួលជួបមេទ័ពថៃ ប្រចាំខេត្តត្រាត ប្រទេសថៃ នៅច្រកព្រំដែនថ្មដា ក្នុងភូមិសាស្ត្រឃុំថ្មដា ស្រុកវាលវែង ខេត្តពោធិ៍សាត់ ជាប់ព្រំដែនកម្ពុជា-ថៃ។របាយការណ៍ដែលកាសែតទទួលបាននៅថ្ងៃទី១៨ ខែកុម្ភៈ ឆ្នាំ២០២៥បានឲ្យដឹងថា៖ ជំនួបភាគីទាំងពីរនេះបានធ្វើឡើងនៅថ្ងៃទី១៦ ខែកុម្ភៈ ឆ្នាំ២០២៥ ដើម្បីពិភាក្សាលើកិច្ចសហប្រតិបត្តិការ និងការទំនាក់ទំនងរវាងប្រទេសទាំង២ កម្ពុជា-ថៃ ជាពិសេសការពិនិត្យលើគម្រោងបើកច្រកព្រំដែនក្នុងតំបន់ក្នុងពេលខាងមុខនេះផងដែរ។ ភាគីទាំង២ ក៏បានពិភាក្សាផងដែរ អំពីការត្រៀមបង្ការទប់ស្កាត់អំពីភ្លើងឆេះព្រៃ ដែលបច្ចុប្បន្នក្នុងភូមិសាស្ត្រខេត្តរបស់ថៃមួយនេះ បាននិងកំពុងមានករណីភ្លើងឆេះព្រៃ និងបានបង្កឱ្យមានការកើនឡើងកំហាប់ភាគល្អិតនិចលក្នុងខ្យល់ (PM 2.5) នៅក្នុងប្រទេសផងដែរ។
ទាក់ទងបញ្ហានេះលោក ខ្វៃ អាទិត្យា អ្នកនាំពាក្យក្រសួងបរិស្ថានក៏ បានបញ្ជាក់ថា មេទ័ពឈរជើងនៅខេត្តពោធិ៍សាត់ប្រទេសកម្ពុជា និងមេទ័ពយោធាខេត្តត្រាតនៃប្រទេសថៃពិតជា បានជួបគ្នាពិតប្រាកដមែន នៅក្នុងភូមិសាស្ត្រ នៃតំបន់ច្រកព្រំដែននៃប្រទេសទាំង២កម្ពុជា-ថៃ ក្នុងឃុំថ្មដា ស្រុកវាលវែងខេត្តពោធិ៍សាត់ នាពេលកន្លងទៅដើម្បីពិភាក្សាបញ្ហាខាងលើ។សូមបញ្ជាក់ថា កន្លងមកកម្ពុជាមិទាន់មានករណីឆេះព្រៃដូចបណ្តាប្រទេសមួយចំនួននាពេលកន្លងទៅនោះទេ។ ក្រសួងបរិស្ថានបានធ្វើការជាមួយក្រសួងស្ថាប័នពាក់ព័ន្ធ និងជាពិសេសជាមួយអាជ្ញាធររាជធានី ខេត្ត ហើយបានពិនិត្យឃើញថា ករណីមានការឆេះកន្លែងខ្លះ គឺការឆេះស្មៅ ស្បូវ ស្លឹកឈើ សំរាម និងជញ្ជ្រាំងស្រូវ នៅតាមមូលដ្ឋានមួយចំនួនតែប៉ុណ្ណោះ។
ក្រសួងបរិស្ថានកម្ពុជា បានធ្វើការសហការជាមួយអ្នកពាក់ព័ន្ធទាំងនៅថ្នាក់ជាតិ និងថ្នាក់ក្រោមជាតិ ធ្វើការផ្សព្វផ្សាយ និងអប់រំប្រជាពលរដ្ឋ កុំឱ្យដុត គល់ជញ្ជ្រាំង សំរាម ជាពិសេសដុតសំណល់កសិកម្ម ប្លាស្ទិក ជាដើម ចូលរួមទប់ស្កាត់ការឆេះ ជាពិសេសអនុវត្តវិធានការច្បាប់ចំពោះបទល្មើសកាប់ រុករាន ដីព្រៃធ្វើជាកម្មសិទ្ធិខុសច្បាប់ជាដើម.។នៅថ្ងៃទី១៦ ខែកុម្ភៈដែរករណីយ៍ភ្លើងឆេះព្រៃនេះលោកអនុសេនីយ៍ឯក Pharison Wongphensri មេបញ្ជាការនៃអង្គភាពប្រតិបត្តិការពិសេសនៃកងទ័ពជើងទឹកខេត្តត្រាត បានអះអាង ថា ភ្លើងឆេះព្រៃនៅតាមព្រំដែនជាប់កម្ពុជា បានបង្កផលប៉ះពាល់ខ្លាំងណាស់ដល់ការរស់នៅរបស់ប្រជាពលរដ្ឋក្នុងខេត្តត្រាត ជាក់ស្តែង គឺបញ្ហាខ្យល់ពុលPM2.5។ ក្នុងអំឡុងទស្សនកិច្ចមកខេត្តខ្មែរជាប់ព្រំដែនខេត្តត្រាត មេបញ្ជាការទ័ពជើងទឹកថៃបានស្នើសុំកិច្ចសហការពីមេយោធាខ្មែរទទួលបន្ទុកការងារព្រំដែន ដើម្បីជួយផ្សព្វផ្សាយដល់ពលរដ្ឋរស់នៅជាប់ព្រំដែនឱ្យបញ្ឈប់ការដុតព្រៃ និងហាមដាច់ខាតរាល់សកម្មភាពដុតព្រៃណាមួយជាបន្តទៀត។
នៅក្នុងទំព័រហ្វេសប៊ុករបស់កងទ័ពជើងទឹកថៃ លោកអនុសេនីយ៍ឯក Pharison Wongphensri បានបញ្ជាក់ថា ដំណើរទស្សនកិច្ចមកពិនិត្យមើលភ្លើងឆេះព្រៃលើទឹកដីកម្ពុជា ធ្វើឡើងនៅក្នុងក្របខ័ណ្ឌនៃការកសាងទំនាក់ទំនង ការរក្សាសន្តិភាព និងសណ្តាប់ធ្នាប់នៅតាមព្រំដែនក្នុងនាមជាប្រទេសជិតខាងល្អ។គួរបញ្ជាក់ថា កាលពីថ្ងៃទី២៧ ខែមករាកន្លងទៅ ទីភ្នាក់ងារព័ត៌មានវិទ្យា និងអវកាសថៃឈ្មោះថា GISTDA បានបង្ហោះផ្សាយរូបភាពផ្កាយរណបដែលបង្ហាញថា ប្រទេសកម្ពុជាមានចំណុចឆេះច្រើនជាងគេបង្អស់ក្នុងតំបន់អាស៊ីអាគ្នេយ៍ ពោល គឺមានជាង២០០០ទីតាំង។ ទីតាំងទាំងជាង២០០០កន្លែងនោះ ភាគច្រើនបង្កឡើងដោយការដុតព្រៃ ដុតសម្រាម និងដុតគល់ជញ្ច្រាំង។
