ជំទាវទីមួយ Kim Keon Hee មានសុខភាពយ៉ាប់យ៉ឺន ក្រោយពីទុកចោលក្នុង វិមានប្រធានាធិបតីម្នាក់ឯង
18-January-2025 / ព័ត៌មានអន្តរជាតិ
ប្រទេសកូរ៉េ៖ជំទាវទីមួយរបស់ប្រទេសកូរ៉េអ្នកស្រីគីមគឺនហ៊ី( Kim Keon Hee) ត្រូវគេរាយការណ៍ថាត្រូវបានទុកចោលតែម្នាក់ឯងក្នុងគេហដ្ឋានប្រធានាធិបតីនៅ Hannam-dong ទីក្រុងសេអ៊ូល មានសុខភាពមិនសូវល្អ ឡើយ ។ ករណីយ៍នេះកើតឡើងបន្ទាប់ពីស្វាមីគឺប្រធានាធិបតីយូនសុខយ៉ឹល( Yoon Suk Yeol) ត្រូវបានចាប់ឃុំខ្លួនដោយអ្នកស៊ើបអង្កេតកាលពីថ្ងៃពុធទី១១៥មករា ពាក់ព័ន្ធនឹងការដាក់ច្បាប់អាជ្ញាសឹកកាលពីថ្ងៃទី ០៣ ខែធ្នូ ។នេះបើយោងតាមមន្ត្រីគណបក្សកាន់អំណាចប្រាប់កាលពីថ្ងៃសុក្រទី១៧មរា។
សមាជិកសភាគណបក្សអំណាចប្រជាជន (PPP) កំពុងកាន់អំណាចក្វុនយូងជីន( Kwon Young-jin )ដែលបានទៅលេងគេហដ្ឋានលោកយូនី( Yoon) មុនពេលឃុំខ្លួនបានប្រាប់អ្នកកាសែតថា «ខ្ញុំបានឃើញស្ត្រីទីមួយ មុខរបស់នាងមើលទៅគួរឲ្យភ័យខ្លាច។ ខ្ញុំមានអារម្មណ៍សោកស្ដាយបារម្ភចំពោះនាង» ។លោក Kwon Young-jin គឺជាសមាជិកសភាម្នាក់ក្នុងចំណោមសមាជិកសភាបក្សកាន់អំណាចប្រហែល៣០នាក់ ដែលបានប្រមូលផ្តុំគ្នានៅមុខគេហដ្ឋានរបស់ប្រធានាធិបតី ដើម្បីរារាំងការអនុវត្តដីកាឃុំខ្លួនគាត់ យកទៅសាកសួរលើការចោទប្រកាន់ពីបទបះបោរ។ គាត់បានជួបជាមួយលោក Yoon មុនពេលត្រូវចាប់ខ្លួនក្នុងមន្ទីរឃុំឃាំងបន្ទាប់ពីការប្រឈមមុខដាក់គ្នាអស់រយៈពេលមួយម៉ោង។
មន្ត្រីម្នាក់នៅការិយាល័យប្រធានាធិបតីបានប្រាប់ JoongAng Ilbo ថា ជំទាវទី១ មានរាងកាយស្គមខ្លាំង ដែលធ្វើឲ្យពួកគេព្រួយបារម្ភ។ គ្រប់គ្នាសុទ្ធតែគិតថា គាត់គួរតែទៅមន្ទីរពេទ្យដើម្បីពិនិត្យសុខភាពជាបន្ទាន់។ដីកាឃុំខ្លួនប្រធានាធិបតី ត្រូវបានគេសម្រេចកាលពីថ្ងៃពុធ ដោយទុកឲ្យលោកស្រី Kim នៅម្នាក់ឯងក្នុងឯគេហដ្ឋានផ្លូវការ។ នាងនឹងបន្តនៅទីនោះ រហូតដល់ការបញ្ចប់ការកាត់ក្តីចោទប្រកាន់របស់ Yoon នៅតុលាការធម្មនុញ្ញ។
មិនតែប៉ុណ្ណោះ ឥស្សរជនគណបក្សកាន់អំណាចជាច្រើនក៏បានរាយការណ៍ថា ម្នាក់ៗជួបលោកស្រី Kim នៅឯគេហដ្ឋានផ្លូវការ បន្ទាប់ពីជម្លោះច្បាប់អាជ្ញាសឹក គ្រប់គ្នាក៏សម្តែងការព្រួយបារម្ភចំពោះសុខភាពរបស់នាង។ ពួកគេបានពន្យល់ថា នាងស្ទើរតែមិនអាចញ៉ាំបាន ហើយបានគ្រប់គ្រងស្ថានភាពផ្ទាល់ខ្លួនដោយប្រើថ្នាំផ្សេងៗ។នាពេលកន្លងមកអ្នកស្រីគីមគឺនហ៊ី( Kim Keon Hee) កម្រត្រូវគេឃើញជាសាធារណៈណាស់ ចាប់តាំងពីគាត់ត្រូវគេស៊ើបអង្កេតដោយព្រះរាជអាជ្ញាកាលពីខែកក្កដាឆ្នាំមុន លើការចោទប្រកាន់ថា បានទទួលយកកាបូបប្រណីត និងជាប់ពាក់ព័ន្ធក្នុងគម្រោងរៀបចំភាគហ៊ុន។
សូមបញ្ជាក់ថាការឃុំខ្លួនលោក Yoon បានឈានចូលដល់ថ្ងៃទី៣នៅថ្ងៃសុក្រទី១៧មករាហើយក៏ជិតផុតកំណត់ដែរសម្រាប់ការនាំខ្លួនទៅសាកសួរ បន្ទាប់ពីសមត្ថកិច្ចចម្រុះប្រមាណ៣០០០នាក់បានទៅនាំខ្លួនដ៏ចម្រូងចម្រាស់កាលថ្ងៃពុធទី១៥មករា។លោក Seok Dong-hyeon មេធាវីនិងជាមិត្តចាស់របស់លោក Yoon ត្រូវបានទីភ្នាក់ងារព័ត៌មាន Yonhap ដកស្រង់សម្តីដោយនិយាយថា៖«លោកប្រធានាធិបតីបានបញ្ជាក់ជំហរមូលដ្ឋានរបស់គាត់អស់ហើយ អំឡុងពេលការសាកសួររបស់ CIO នៅថ្ងៃដំបូង និងមិនឃើញនូវហេតុផលផ្សេង ឬក៏សេចក្តីត្រូវការដើម្បីឆ្លើយតបទៅនឹងប្រភេទសំណួរនិងចម្លើយនៃការចោទសួរនោះទេ»។
កាលពីថ្ងៃពុធ ក្រោយការបញ្ជាក់ជំហររបស់ខ្លួន និងអះអាងថា ការសាកសួររបស់ការិយាល័យស៊ើបអង្កេតពុករលួយ គឺខុសច្បាប់ លោក Yoon បានប្រើប្រាស់សិទ្ធិរក្សាភាពស្ងប់ស្ងាត់មិនឆ្លើយតបសំណួររបស់អ្នកចោទសួរអស់រយៈពេល១០ម៉ោង។នៅថ្ងៃព្រហស្បតិ៍ លោគ Yoon បានដាក់ពាក្យបណ្តឹងស្នើទៅតុលាការមជ្ឈិមទីក្រុងសេអ៊ូល ដើម្បីពិនិត្យឡើងវិញនូវភាពស្របច្បាប់នៃការឃុំខ្លួនរបស់គាត់ ប៉ុន្តែតុលាការបានច្រានចោលនៅយប់ថ្ងៃព្រហស្បតិ៍ ដោយរក្សាគាត់នៅក្នុងកន្លែងឃុំឃាំង។
CIO ត្រូវបានរំពឹងថា នឹងដាក់ពាក្យបណ្តឹងថ្មីមួយស្នើសុំដីកាចាប់ខ្លួនលោក Yoon ជាផ្លូវការ មុនផុតកំណត់នីតិវិធីឃុំខ្លួន៤៨ម៉ោង ដែលនឹងផុតកំណត់នៅយប់ថ្ងៃសុក្រនេះ។ ក្នុងករណីដែលតុលាការចេញដីកាចាប់ខ្លួន នោះនីតិវិធីឃុំខ្លួននឹងបន្តរហូតដល់២០ថ្ងៃបន្ថែមទៀត។តាមអ្នកជំនាញផ្លូវច្បាប់នៅប្រទេសកូរ៉េខាងត្បូង ក្នុងករណីលោក Yoon ត្រូវបានចេញដីកាចាប់ខ្លួនជាផ្លូវការ នោះការស៊ើបអង្កេតលើនីតិវិធីព្រហ្មទណ្ឌនឹងត្រូវធ្វើឡើយ ហើយ បើរកឃើញពិរុទ្ធភាព ប្រធានាធិបតី Yoon Suk Yeol អាចមានទោសធ្ងន់រហូតដល់ប្រហារជីវិតឬក៏ត្រូវជាប់ពន្ធនាគារពេញ១ជីវិត៕
