បន្ទាប់ពីដំណើរទស្សនកិច្ចនាយករដ្ឋមន្ត្រីឥណ្ឌា Narendra Modi ប្រធានាធិបតីអ៊ុយក្រែនបង្ហើបពីបំណងគាំទ្រឲ្យឥណ្ឌាធ្វើម្ចាស់ផ្ទះប្រជុំសន្តិភាពអ៊ុយក្រែនលើកទី២
26-August-2024 / ព័ត៌មានអន្តរជាតិ
អ៊ុយក្រែន៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយថាកិច្ចចរចាកំពុងធ្វើឡើងជាមួយអារ៉ាប៊ីសាអូឌីត កាតា តួកគី និងស្វីស ពាក់ព័ន្ធនឹងការរៀបចំ កិច្ចប្រជុំកំពូលស្ដីពីសន្តិភាពអ៊ុយក្រែនលើកទី២ ហើយថារូបលោកនឹងគាំទ្រឱ្យឥណ្ឌា ធ្វើជាម្ចាស់ផ្ទះរៀបចំកិច្ចប្រជុំនេះ។ ទីភ្នាក់ងារសារព័ត៌មាន Reutersឲ្យដឹងថាលោក ហ្សេលេនស្គី ធ្វើការកត់សម្គាល់បែបនេះ នៅក្នុងកិច្ចសន្ទនាមួយជាមួយក្រុមអ្នកកាសែតឥណ្ឌា ដែលត្រូវបានចែករំលែកបន្តនៅលើបណ្ដាញទំនាក់ទំនងសង្គមរបស់លោក កាលពីថ្ងៃអាទិត្យ ទី២៥ ខែសីហា។ លោក ហ្សេលេនស្គី ក៏បានអះអាងផងដែរថាលោកផ្ទាល់បានប្រាប់លោកនាយករដ្ឋមន្ត្រីឥណ្ឌា ណារិនដ្រា ម៉ូឌីថាលោកនឹងគាំទ្រឱ្យឥណ្ឌាធ្វើជា ម្ចាស់ផ្ទះរៀបចំកិច្ចប្រជុំកំពូលស្ដីពីសន្តិភាពអ៊ុយក្រែនលើកទី២ ខណៈទីក្រុងកៀវចង់ឱ្យប្រទេសមួយក្នុងចំណោមក្រុមប្រទេស Global South ទទួលរៀបចំកិច្ចប្រជុំនេះ។
នៅក្នុងកិច្ចសន្ទនាជាមួយក្រុមអ្នកកាសែតឥណ្ឌា លោក ហ្សេលេនស្គី បានគូសបញ្ជាក់ដូច្នេះថា «ក៏ប៉ុន្តែ ខ្ញុំសូមនិយាយដោយស្មោះ ពោលគឺមិនមែនមានតែឥណ្ឌាទេ តែគឺគ្រប់ប្រទេស ដែលបង្ហាញភាពវិជ្ជមានអំពីការរៀបចំកិច្ចប្រជុំកំពូលលើកទី២។ យើងនឹងមិនអាចរៀបចំកិច្ចប្រជុំកំពូលសន្តិភាពក្នុងប្រទេសមួយ ដែលមិនទាន់បានចូលរួមក្នុងសេចក្ដីថ្លែងការណ៍ នៃកិច្ចប្រជុំសន្តិភាពបាននោះឡើយ»។
គួរបញ្ជាក់ថា បើតាមលោក ហ្សេលេនស្គី លោកផ្ទាល់ក៏បានពិភាក្សាផងដែរ អំពីគ្រប់ចំណុចទាំងអស់នៅក្នុងសេចក្ដីថ្លែងការណ៍នៃកិច្ចប្រជុំកំពូលសន្តិភាព នៅប្រទេសស្វីស កាលពី ខែមិថុនា នៅក្នុងជំនួបជាមួយលោក ម៉ូឌី ក្នុងទីក្រុងកៀវ កាលពីថ្ងៃសុក្រសប្ដាហ៍មុន។
កាលពីថ្ងៃព្រហស្បតិ៍សប្តាហ៍នាយករដ្ឋមន្ត្រីឥណ្ឌា ណារិន្ទ្រ ម៉ូឌី (Narendra Modi) បានជួបជាមួយប្រធានាធិបតីប៉ូឡូញ អាន់ហ្សេច ឌូដា (Andrzej Duda) នាថ្ងៃចុងក្រោយ អំឡុងដំណើរទស្សនកិច្ចរបស់ប្រមុខដឹកនាំឥណ្ឌា នៅឯទីក្រុងវ៉ាស៊ីវី (Warsaw) ។ នៅព្រឹកថ្ងៃដដែល លោកម៉ូឌី បានជួបជាមួយសមភាគីប៉ូឡូញ លោក ដូណាល់ ថាស់ (Donald Tusk) ថែមទៀតផង ។បន្ទាប់ពីដំណើរទស្សនកិច្ចនៅឯរដ្ឋធានីរបស់ប្រទេសប៉ូឡូញ លោក ម៉ូឌី នឹងបន្តដំណើរឆ្ពោះទៅកាន់រដ្ឋធានីគីវ (Kyiv) ហើយលោកបានបញ្ជាក់ថា លោកនឹងចែករំលែកទស្សនៈជុំវិញដំណោះស្រាយសន្តិភាពពាក់ព័ន្ធនឹងបញ្ហាជម្លោះរវាងអ៊ុយក្រែន និងរុស្ស៊ី ។
នៅប៉ូឡូញក្រុមមន្ត្រី បាននិយាយថា កិច្ចសហប្រតិបត្តិការយោធារវាងប្រទេសទាំងពីរ (ប៉ូឡូញ-ឥណ្ឌា) ស្ថិតនៅក្នុងរបៀបវារៈកម្រិតខ្ពស់ អំឡុងដំណើរទស្សនកិច្ចលើកដំបូងដោយនាយករដ្ឋមន្ត្រីឥណ្ឌា ទៅកាន់ទីក្រុងវ៉ាស៊ីវី (Warsaw) មិនធ្លាប់មានក្នុងរយៈពេល ៤៥ ឆ្នាំ។ប្រទេសប៉ូឡូញ គឺជាអ្នកគាំទ្រដ៏រឹងមាំបំផុតមួយរបស់អ៊ុយក្រែន ចាប់តាំងពីរុស្ស៊ី ចាប់ផ្តើមឈ្លានពានអ៊ុយក្រែនក្នុងឆ្នាំ ២០២២ ខណៈឥណ្ឌានៅតែព្យាយាមរក្សាភាពអព្យាក្រឹត ។ ដោយឡែក រដ្ឋធានីញូវដែល្លី បានពឹងផ្អែកយ៉ាងខ្លាំងជាប្រវត្តិសាស្ត្រ លើទីក្រុងមូស្គូ សម្រាប់ការផ្គត់ផ្គង់គ្រឿងយុទ្ធោបករណ៍ការពារជាតិ ប៉ុន្តែក្នុងរយៈពេលប៉ុន្មានឆ្នាំថ្មីៗនេះ ឥណ្ឌា ក៏ហាក់ផ្លាស់ប្តូរទៅរកប្រទេសផ្សេងទៀត ចាប់តាំងពីរុស្ស៊ីឈ្លានពានអ៊ុយក្រែន ។
លោកម៉ូឌី មានប្រសាសន៍ថា ឥណ្ឌាមានឆន្ទៈក្នុងការផ្តល់ជំនួយរបស់ខ្លួន ដើម្បីបញ្ចប់ជម្លោះនៅអ៊ុយក្រែន និងអាស៊ីខាងលិច ស្របពេលលោកថាស់ (Tusk) បានធ្វើការកោតសរសើរ ចំពោះការចូលរួមរបស់លោកម៉ូឌី ដោយនិយាយថា លោកជឿជាក់ថា ឥណ្ឌាអាចដើរតួជាវិជ្ជមានជុំវិញបញ្ហាទាំងអស់នេះ ។គួររំឮកថា ដំណើរទស្សនកិច្ចរបស់លោកម៉ូឌី នាពេលនេះ ធ្វើឡើងបន្ទាប់ពីដំណើរទស្សនកិច្ចរបស់លោកទៅកាន់ទីក្រុងមូស្គូ កាលពីថ្ងៃទី៨ និងទី៩ ខែកក្កដា ទទួលរងនូវការរិះគន់ពីសហរដ្ឋអាម៉េរិក និងប្រធានាធិបតីអ៊ុយក្រែន វ្លូឌីមៀរ ហ្សេលែនស្គី (Volodymyr Zelenskiy) ស្របពេលរុស្ស៊ី វាយប្រហារយ៉ាងសាហាវលើមន្ទីរពេទ្យថែទាំកុមារក្នុងទីក្រុងគីវ ។
ការណ៍នេះបានធ្វើឱ្យមានការខឹងសម្បារនៅក្នុងប្រទេសអ៊ុយក្រែន និងបង្កើនការយកចិត្ត ទុកដាក់របស់លោកខាងលិច ក្នុងការឃ្លាំមើលការបន្តធ្វើកិច្ចសហប្រតិបត្តិការរបស់ទីក្រុងញូវដេលីជាមួយទីក្រុងមូស្គូ ចំពោះមុខសង្គ្រាមនៅអ៊ុយក្រែន និងការបដិសេធថ្កោលទោសរុស្ស៉ីជុំវិញការឈ្លានពាន អ៊ុយក្រែន។ទោះជាមានសម្ពាធពីលោកខាងលិចក៏ដោយ ក៏ឥណ្ឌានៅតែបដិសេធថ្កោលទោសរុស្ស៊ី។ តែបានបង្ហាញការគាំទ្រដល់ដំណោះស្រាយការទូតដើម្បីបញ្ចប់សង្គ្រាម។ ឥណ្ឌាក៏បានបំផ្លាញកិច្ចប្រឹងប្រែងដាក់ទណ្ឌកម្ម របស់លោកខាងលិចប្រឆាំងនឹងរុស្ស៊ីផងដែរ តាមរយៈការបន្តបង្កើនការទិញប្រេង និងឧស្ម័នពីរុស្ស៉ី។ ក្រុមអ្នកជំនាញជឿថាកិច្ចពិភាក្សាអំឡុងដំណើរទស្សនកិច្ចរបស់ លោក ម៉ូឌី នឹងផ្ដោតជាសំខាន់លើការពង្រឹងទំនាក់ទំនងទ្វេភាគី ហើយអាចឈានដល់ការស្ដារឡើងវិញនូវការធ្វើពាណិជ្ជកម្មរវាងឥណ្ឌា និងអ៊ុយក្រែន ដែលបានធ្លាក់ចុះពី ៣.៣៨ពាន់លានដុល្លារ កាលពីឆ្នាំ២០២១ មកនៅ ២.៥៨ពាន់លានដុល្លារក្នុងឆ្នាំ២០២២ ជាឆ្នាំដែលសង្គ្រាមអ៊ុយក្រែនផ្ទុះឡើង។
ក្រុមមន្ត្រីរដ្ឋាភិបាលឥណ្ឌា បានបង្ហើបឱ្យដឹងរួចហើយដែរថាកិច្ចពិភាក្សារវាងលោក ម៉ូឌី និងលោក ហ្សេលេនស្គី នឹងគ្របដណ្ដប់លើវិស័យកសិកម្ម សេដ្ឋកិច្ច ការពារជាតិ វេជ្ជសាស្ត្រ ក៏ដូចជាទំនាក់ទំនងរវាង ប្រជាជន និងប្រជាជន ដោយទីក្រុងកៀវ និងទីក្រុងញូវដេលីត្រូវបានរំពឹងថានឹងចុះហត្ថលេខាងលើកិច្ចព្រមព្រៀងជាច្រើន។ ឥណ្ឌា ត្រូវបានគេចាត់ទុកថាជាប្រទេសមួយដែលស័ក្តសមធ្វើជាអ្នកសម្របសម្រួល ស្វែងរកកិច្ចព្រមព្រៀងបិទបញ្ចប់សង្គ្រាមរុស្ស៉ី និងអ៊ុយក្រែន។
ការយល់ឃើញបែបនេះគឺផ្អែកលើទំនាក់ទំនងល្អរបស់ឥណ្ឌាជាមួយរុស្ស៊ីផង និងជាមួយបណ្ដាប្រទេស Global South សំខាន់ៗផង។ មិនតែប៉ុណ្ណោះ ការរក្សាតុល្យភាពទំនាក់ទំនងរបស់លោក ម៉ូឌី ទាំងជាមួយលោក ពូទីន និងលោក ហ្សេលេនស្គី កាន់តែធ្វើឱ្យនាយករដ្ឋមន្ត្រីឥណ្ឌារូបនេះមានសក្តានុពលធ្វើជា អ្នកសម្របសម្រួល ខណៈអ៊ុយក្រែនសង្ឃឹមថាការពង្រឹងទំនាក់ទំនងស៊ីជម្រៅរបស់រុស្ស៉ីជាមួយចិន អាចនឹងរុញឱ្យឥណ្ឌាកាន់តែស្និទ្ធជាមួយទីក្រុងកៀវ និងលោកខាងលិច។ប្រភព៖ Reuters Connect
