ខួប១ឆ្នាំក្រសួងព័ត៌មាន បោះពុម្ពធម្មនុញ្ញវិជ្ជាជីវៈសារព័ត៌មាន ២០,០០០ច្បាប់ សម្រាប់ចែកជូនអ្នកសារព័ត៌មានដោយឥតគិតថ្លៃក្នុងពេលបណ្តាញសង្គមមានជាង១០លាននាក់ប្រើ
23-August-2024 / ព័ត៌មានជាតិ
ភ្នំពេញ៖ ក្រោយពីប្រកាសដាក់ឱ្យប្រើប្រាស់ជាផ្លូវការ កាលពីថ្ងៃទី០៦ ខែសីហា ឆ្នាំ២០២៤ ក្រសួងព័ត៌មានបានបោះពុម្ពធម្មនុញ្ញវិជ្ជាជីវៈ សារព័ត៌មានចំនួន ២០,០០០ច្បាប់ សម្រាប់ចែកជូនអ្នកសារព័ត៌មាន យកទៅអាននិងអនុវត្ត ក្នុងគោលបំណងតម្រង់ទិសអ្នកសារព័ត៌មានកុំឱ្យដើរហួសដែនកំណត់នៃច្បាប់ និងសិទ្ធិដែលខ្លួនមាន និងដើម្បីលើកកម្ពស់តម្លៃវិជ្ជាជីវៈសារព័ត៌មាន។ ក្រសួងព័ត៌មាននឹងចែកជូនកូនសៀវភៅធម្មនុញ្ញវិជ្ជាជីវៈសារព័ត៌មាននេះដល់អ្នកសារព័ត៌មាន និងអ្នកពាក់ព័ន្ធទាំងអស់ដោយឥតគិតថ្លៃ។
ជួបសំណេះសំណាលជាមួយថ្នាក់ដឹកនាំ មន្ត្រីរាជការក្រោមឱវាទបូកសរុបការងារដឹកនាំក្រសួងព័ត៌មានរយៈពេល ១ឆ្នាំនៃរាជរដ្ឋាភិបាលនីតិកាលទី៧ នៃរដ្ឋសភា, លោករដ្ឋមន្ត្រី នេត្រ ភក្ត្រា បានលើកឡើងថា ធម្មនុញ្ញវិជ្ជាជីវៈសារព័ត៌មានកម្ពុជាដែលជាសមិទ្ធផលមួយក្នុងចំណោមសមិទ្ធផលជាច្រើនសម្រេចបានដោយក្រសួងព័ត៌មានក្នុងរយៈពេលមួយឆ្នាំមកនេះ នឹងជួយលើកកម្ពស់ក្រមសីលធម៌វិជ្ជាជីវៈរបស់អ្នកសារព័ត៌មាន អ្នកធ្វើសកម្មភាពក្នុងវិស័យព័ត៌មាននិងសោតទស្សន៍។ នេះជាលើកទី១ ដែលកម្ពុជាមានធម្មនុញ្ញក្រមសីលធម៌វិជ្ជាជីវៈសារព័ត៌មានដែលជាមូលដ្ឋានគ្រឹះនៃក្រមសីលធម៌វិជ្ជាជីវៈដែលត្រូវបានបង្កើតឡើងដោយអ្នកសារព័ត៌មាន ដើម្បីអ្នកសារព័ត៌មាន និងសម្រាប់អ្នកសារព័ត៌មាន។
លោក នេត្រ ភក្ត្រា បានបន្តថា «ធម្មនុញ្ញវិជ្ជាជីវៈសារព័ត៌មានកម្ពុជា» នេះ មិនមែនជាក្រមសីលធម៌ធម្មតានោះទេ ប៉ុន្តែ វាជាមូលដ្ឋានគ្រឹះនៃក្រមសីលធម៌វិជ្ជាជីវៈសារព័ត៌មាន ដែលសមាគម និងអង្គភាពសារព័ត៌មានអាចយកជាមូលដ្ឋានក្នុងការពង្រីកនិងបង្កើតជាក្រមសីលធម៌សម្រាប់ការអនុវត្តសម្រាប់សមាគម អង្គភាពសារព័ត៌មានរបស់ខ្លួន។ ចំណុចនេះជាមូលដ្ឋានរួមដែលមិនអាចនរណាម្នាក់បកស្រាយផ្សេងពីគ្នាបាននោះទេ ប៉ុន្តែ ត្រូវឈរនៅលើមូលដ្ឋានគោលការណ៍រួមតែមួយ។
ធម្មនុញ្ញវិជ្ជាជីវៈសារព័ត៌ដែលប្រកាសឲ្យប្រើដោយក្រសួងមានវិសាលភាពអនុវត្តចំពោះអ្នកអនុវត្តសកម្មភាពក្នុងវិស័យព័ត៌មាន និងសោតទស្សន៍ ទាំងអស់នៅក្នុងព្រះរាជាណាចក្រកម្ពុជា ធម្មនុញ្ញវិជ្ជាជីវៈសារព័ត៌មាននេះ ជាមូលដ្ឋានគ្រឹះនៃក្រមសីលធម៌វិជ្ជាជីវៈសារព័ត៌មានកម្ពុជា សម្រាប់អង្គភាពសារព័ត៌មាន សមាគមសារព័ត៌មាន អ្នកធ្វើសកម្មភាពក្នុងវិស័យព័ត៌មាននិងសោតទស្សន៍ និងអង្គភាពផ្សេងៗទៀត។
កាលពីខែមករាឆ្នាំ២០២៤លោកនេត្រភក្ត្រារដ្ឋមន្ត្រិបានឲ្យដឹងថា៖ «នៅកម្ពុជា មានអ្នកសារព័ត៌មានប្រមាណ ១ម៉ឺននាក់ ដែលក្នុងនោះ ក្នុងនោះមានអ្នកស្នើសុំបណ្ណសម្គាល់អត្តសញ្ញាណអ្នកសារព័ត៌មាន មានចំនួនជិត ៤ពាន់នាក់»។តាមលោក នេត្រ ភក្ត្រា, បច្ចុប្បន្ននេះ ស្ថាប័នព័ត៌មានទាំងបុរាណ និងទំនើប ដែលបានចុះបញ្ជីនៅក្រសួងព័ត៌មានមានជាង ២ពាន់អង្គភាព រួមមាន គេហទំព័រ និងទូរទស្សន៍អនឡាញ ៩៣៨អង្គភាព កាសែតចំនួន ៤៤៧អង្គភាព សមាគមសារព័ត៌មាន ៥២អង្គភាព ទស្សនាវដ្តី ១៩៤អង្គភាព ព្រឹត្តិបត្រ ២១អង្គភាព រោងពុម្ភ ១១៣អង្គភាព សៀវភៅចំនួន ២២អង្គភាព ទីភ្នាក់ងារព័ត៌មានបរទេស និងការិយាល័យតំណាង ២៧អង្គភាព ភ្នាក់ងារផ្សព្វផ្សាយពាណិជ្ជកម្ម ២អង្គភាព ស្ថានីយវិទ្យុ FM រាជធានីភ្នំពេញ និងខេត្ត ២៨៣អង្គភាព និងវិទ្យុ AM ភ្នំពេញ ចំនួន១ ទូរទស្សន៍ផ្សាយផ្ទាល់ ១៩ស្ថានីយ៍ និងផ្សាយបន្ត ១៦៥ស្ថានីយ៍។ ស្ថានីយ៍ទូរទស្សន៍ឌីជីថល ១២ស្ថានីយ៍ និងទូរទស្សន៍អនឡាញ ១០ស្ថានីយ៍ ទូរទស្សន៍ខ្សែកាប រាជធានីភ្នំពេញ និងតាមខេត្ត ចំនួន ៤៤ស្ថានីយ៍ និងទូរទស្សន៍អាណាឡូក ១៤៤ស្ថានីយ៍ ប្រព័ន្ធ OOT ៨ស្ថានីយ៍ និងប្រព័ន្ធផ្កាយរណប ចំនួន២។សូមជម្រាបថា កន្លងមក លោក នេត្រ ភក្ត្រា បានប្រកាសថា ក្រសួងព័ត៌មាន ជាស្ថាប័នតែមួយគត់ក្នុងការចេញកាតសម្គាល់អ្នកសារព័ត៌មាន។
ក្រៅពីបណ្តាញសារពត៍មាននៅប្រទេសកម្ពុជា មានបណ្តាញទំនាក់ទំនងសង្គម TikTok ប្រមាណ ១០លានគណនី និងបណ្តាញទំនាក់ទំនងសង្គម Facebook មានប្រមាណ ១៣លានគណនី ដោយការកើនឡើងយ៉ាងកំហុគនៃបណ្តាញប្រព័ន្ធផ្សព្វផ្សាយនេះ កំពុងធ្វើឱ្យប៉ះពាល់ដល់សិទ្ធិទទួលបានព័ត៌មាន របស់ប្រជាពលរដ្ឋ។ នេះតាម លោក នេត្រ ភក្ត្រា រដ្ឋមន្ត្រីក្រសួងព័ត៌មានលើកឡើងកាលពីព្រឹកថ្ងៃទី២៤ ខែកក្កដា ឆ្នាំ២០២៤។លោករដ្ឋមន្ត្រី បានបកស្រាយថា និន្នាការនៃការកើនឡើងតាមរយៈការផ្លាស់ប្តូរពីរូបភាពពីប្រព័ន្ធផ្សព្វផ្សាយបុរាណមកប្រព័ន្ធផ្សព្វផ្សាយទំនើបនេះ កើតចេញពីប្រព័ន្ធផ្សព្វផ្សាយបុរាណអ្នកកំណត់ខ្លឹមសារឱ្យសាធារណជនស្តាប់ វិទ្យុ ទូរទស្សន៍ កាសែត ទស្សនាវដ្តី គឺប្រជាពលរដ្ឋមិនមានជម្រើសអ្វីក្រៅពីទទួលយកព័ត៌មាន ប៉ុន្តែ នៅពេលបច្ចុប្បន្ននេះ ប្រជាពលរដ្ឋ មានជម្រើសពីរ ឬជម្រើសច្រើន។
ចំណុចនេះ លោករដ្ឋមន្ត្រី សូមលើកយកពីរចំណុចគឺ ប្រសិនបើជាវិទ្យុ ទូរទស្សន៍ កាសែត អត់មានខ្លឹមសារមើលទេ នោះប្រជាពលរដ្ឋ ត្រូវតម្រង់ទិសទៅរកបណ្តាញទំនាក់ទំនងសង្គមមាន Facebook ,TikTok។ «ខណៈបច្ចុប្បន្ននេះ បណ្តាញសង្គម Tiktok មានប្រមាណជាង ១០លាន គណនី នៅកម្ពុជា។ ចំណែក Facebook មានប្រមាណ ១៣លានគណនី»។លោករដ្ឋមន្ត្រី បានបញ្ជាក់ថា នៅក្នុងស្ថានភាពបច្ចុប្បន្ននេះ គណនី TikTok និង Facebook ១គណនី ស្មើនឹងអង្គភាពសារព័ត៌មាន មួយអង្គភាពដែរ ហើយជួនកាលអង្គភាពព័ត៌មានមួយ មិនស្មើនឹងគណនី Facebook ១គណនី ដែលមានប្រជាប្រិយភាព ជាដើម។បើចឹងការបោះពុម្ពធម្មនុញ្ញវិជ្ជាជីវៈ សារព័ត៌មានចំនួន ២០,០០០ច្បាប់មិនទាន់គ្រប់គ្រាន់ទេ។
បើតាមក្រសួងពត៍មានឲ្យដឹងថា៖ «ធម្មនុញ្ញវិជ្ជាជីវៈសារព័ត៌មានកម្ពុជា» បានផ្តើមរៀបចំចងក្រងកាលពីខែមេសា ឆ្នាំ២០២៤ ដោយមានការចូលរួមផ្តល់មតិយោបល់ពីអ្នកសារព័ត៌មាន អង្គភាពសារព័ត៌មាន សមាគមអ្នកសារព័ត៌មាន អង្គការ UNESCO និងអ្នកពាក់ព័ន្ធផ្សេងទៀត។ «ធម្មនុញ្ញវិជ្ជាជីវៈសារព័ត៌មានកម្ពុជា» នេះ មានកម្រាស់ ១៤ទំព័រ ធម្មនុញ្ញវិជ្ជាជីវៈសារព័ត៌មានកម្ពុជាបែងចែកជា ៤ជំពូកធំៗ និងមាន៧ផ្នែកក្នុងជំពូកទី២ ដែលនិយាយពីគោលការណ៍គ្រឹះជាមូលដ្ឋាននៃវិជ្ជាជីវៈសារព័ត៌មាន និងការផ្សព្វផ្សាយព័ត៌មាន៕
.jpg&h=97&w=146)
