អភិបាលខេត្តកណ្ដាលជម្រុញឲ្យនគរបាលកសាងសុំណុំរឿងម្ចាស់ទូក-ដ ទៅតុលាការ ក្រោយស្លាប់កុមារីម្នាក់ នៅស្រុកស្អាង
28-December-2022 / សន្តិសុខសង្គម
ខេត្តកណ្តាល៖ អភិបាលខេត្តកណ្ដាល បានបញ្ជាដល់នគរបាលខេត្តកណ្ដាល ត្រូវកសាងសុំណុំរឿងបញ្ជូនម្ចាស់ទូក-ដ ទៅតុលាការ ក្រោយករណីធ្លាក់ម៉ូតូកង់៣ឥណ្ឌាមួយគ្រឿង ចូលទន្លេបណ្ដាលឲ្យកុមារីម្នាក់ ស្លាប់យ៉ាងខ្លោចផ្សារ។
ក្នុងឱកាសចុះជួបសំណេះសំណាល និងចែកវិញ្ញាប័ណ្ណបត្រម្ចាស់ម្ចាស់អចលនវត្ថុ នៅស្រុកលើកដែក នាថ្ងៃទី២៨ ខែធ្នូ ឆ្នាំ២០២២លោកអភិបាលខេត្តបានថ្លែងថា «លោកឈឺចាប់ម្ដងរួចមកហើយអំពីការលិចទូក-ដបណ្ដាលឲ្យសិស្សសាលាស្លាប់១១នាក់នៅកំពង់ភ្នំ ហើយបានដាក់បទបញ្ជា ឲ្យរឹតបន្តឹងចំពោះម្ចាស់អាជីវកម្មទូក-ដ ឲ្យមានបច្ចេកទេសត្រឹមត្រូវ ចុះហេតុអីបានជាមានករណីធ្លាក់កង់៣ឥណ្ឌាស្លាប់ក្មេងស្រីម្នាក់ទៀតនៅស្រុកស្អាងអីចឹង? ខ្ញុំឈឺចាប់ណាស់! កាលទូក-ដ នៅកំពង់ភ្នំលិចស្លាប់១១នាក់ ខ្ញុំហៅថាទូក-ដ នោះឈ្មោះថា ទូក-ដ សម្លាប់មនុស្សម្ដងរួចមកហើយ ចុះទូក-ដ នេះទៀត តើទូក-ដ អ្វី? គឺទូក-ដ ពិឃាតមនុស្ស។ ខ្ញុំក៏ស្នើរទៅមន្ទីរសេដ្ចកិច្ច និងហិរញ្ញវត្ថុខេត្តឲ្យលុបចោលអារឿងទូក-ដ បែបបុរាណដែលដាក់ទូក២ទន្ទឹមគ្នា ហើយបើកកាត់ទន្លេនេះ ខ្ញុំបញ្ជាឲ្យឈប់ភ្លាម ត្រូវមើលឡើងវិញអារឿងទូក-ដនេះ មើលហើយត្រូវធ្វើផងច្បាស់លាស់មក»។
ហេតុការណ៍នេះ បានកើតឡើង ល្ងាចថ្ងៃទី២៦ ធ្នូ ២០២២ ត្រង់ចំណុចកំពង់ចម្លងក្បាលកោះគរ-ស្វាយប្រទាល ស្ថិតក្នុងភូមិឫស្សីជ្រោយ ឃុំស្វាយប្រទាល ស្រុកស្អាង ខេត្តកណ្តាល ។កុមារីអាយុ៦ឆ្នាំម្នាក់បានបាត់បង់ជីវិតដោយសារជិះកង់៣ម៉ូតូឥណ្ឌាមួយគ្រឿងរបស់ឪពុក មាហើយបានរអិលធ្លាក់ចូលទន្លេអំឡុងឆ្លងទូក ដ ទៅផ្ទះកាលពី ល្ងាចថ្ងៃទី២៦ ធ្នូ ២០២២ ត្រង់ចំណុចកំពង់ចម្លងក្បាលកោះគរ-ស្វាយប្រទាល ស្ថិតក្នុងភូមិឫស្សីជ្រោយ ឃុំស្វាយប្រទាល ស្រុកស្អាង ខេត្តកណ្តាល ។
លោក ម៉ន ដារ៉ា អាយុ២៨ឆ្នាំ ជាពូកុមារីរងគ្រោះ បានប្រាប់ឱ្យដឹងថា គាត់បានបើកម៉ូតូកង់៣ឥណ្ឌា ដឹកប្រពន្ធនិងកូនអាយុ២ខួបកន្លះ ព្រមទាំងក្មេងស្រីអាយុ៦ឆ្នាំ ចេញពីផ្ទះម្តាយនៅភូមិព្រែកដូង ឃុំកំពង់ស្វាយ ស្រុកកៀនស្វាយ ក្នុងគោលបំណងនាំក្មួយត្រឡប់ទៅផ្ទះនៅឯភ្នំពេញ វិញ ដោយឆ្លង ដ ស្វាយប្រទាល ទៅត្រើយខាងលិច ។ពេលចុះទូករួចរាល់ ទូក ដ ចេញដំណើរបានជាង១០ម៉ែត្រពីមាត់ច្រាំងតែ ដោយសារអ្នកបើកទូកមិនបានយកកំណល់កល់កង់ ធ្វើឱ្យម៉ូតូកង់៣របស់ខ្លួនរអិលធ្លាក់ចូលទន្លេ ធ្លាក់ទាំងរូបលោក និងប្រពន្ធ-កូន ព្រមទាំងក្មួយ ដែលនៅលើកង់៣នោះចូលទន្លេទាំងអស់គ្នា។
ភ្លាមនោះ ប្រពន្ធបានស្ទុះចាប់បានកូនស្រី ហើយស្រែកឱ្យលោកជួយក្មួយ ប៉ុន្តែជួយមិនទាន់ក្មួយក៏បានខ្ទៀតចេញពីកង់៣លិចចូលទន្លេ ទោះជាខ្លួនព្យាយាមមុជរាវរកយ៉ាងណាក៏មិនឃើញដែរ។ប្រពន្ធនិងកូនរបស់លោកបើសិនជាគ្មានក្មេងៗជំទង់ដែលមុជទឹកនៅក្បែរនោះ ចេញទូកមកជួយនោះទេ ក៏លង់ដែរ ហើយទាល់តែប្រមាណជាង៤០នាទីក្រោយមក ទើបប្រជាពលរដ្ឋជួយរាវរកឃើញ ប៉ុន្តែក្មួយបានផុតដង្ហើមទៅហើយ។
អ្នកស្រី ម៉ន កញ្ញា អាយុ៣០ឆ្នាំ ម្តាយកុមារីរងគ្រោះ បានរៀបរាប់ទាំងខ្សឹកខ្សួលថា កូនស្រីរបស់នាង ពិតជាអភព្វ័ណាស់ ត្រូវឪពុកបោះបង់ចោលតាំងពីនៅក្នុងផ្ទៃមកម្លេះ ហើយកាលពីព្រឹកថ្ងៃ ប្អូនប្រុសបានមកយកកូនស្រី ទៅលេងម្តាយ ស្រាប់តែល្ងាចឡើងបងប្អូនទូរសព្ទ័ប្រាប់ថា កូនស្រីធ្លាក់ពីលើទូក ដ ផុតបាត់ទៅហើយ។
លោកតា កុង សុង វ័យ៨៥ឆ្នាំ ជាម្ចាស់ទូក ដ បានមានប្រសាសន៍ថា លោកនឹងទទួលរ៉ាប់រងចេញប្រាក់ធ្វើបុណ្យសព ក្មេងស្រីរងគ្រោះ ទាំងស្រុង ហើយក្រោយរៀបចំបុណ្យឱ្យក្មេង រួចរាល់ ក្នុងនាមជាម្ចាស់លោកនឹងទទួលខុសត្រូវចំពោះមុខច្បាប់ ។លោកថាប្រសិនបើ អ្នកម៉ូតូកង់៣នោះគោរពតាមការណែនាំ ពេលឡើងទូក ដ ឱ្យអ្នកដំណើរចុះពីម៉ូតូកង់៣ខ្លួនហើយដាក់ហ្វ្រាំងដៃ និងកល់កំណល់ឱ្យបានត្រឹមត្រូវនោះ ក៏មិនកើតគ្រោះថ្នាក់អញ្ចឹងដែរ។ បន្ទាប់ពីកើតហេតុ អ្នកបើកទូក ដ ដែលអាយុប្រមាណ១៥-១៦ឆ្នាំ បានរត់គេចខ្លួន ។
សូមរម្លឹកថា ករណីសោកនាដកម្មមុនេះគឺករណីយ៍លិចទូក-ដបណ្ដាលឲ្យសិស្សសាលាស្លាប់ចំនួន១១នាក់បានបាត់បង់ជីវិត និងរួចខ្លួនបាន៤នាក់ បានកើតឡើងនៅយប់ថ្ងៃព្រហស្បតិ៍ថ្ងៃទី១៣ ខែតុលា ឆ្នាំ២០២២ កាលពីវេលាម៉ោង៧យប់ ស្ថិតនៅចំណុច ទូកដទទឹងស្ថិតនៅ ភូមិកោះចំរើន ឃុំកំពង់ភ្នំ ស្រុកលើកដែក ។ ម្ចាស់ទូក-ដ នៅកំពង់ភ្នំត្រូវបានកសាងសុំណុំរឿងឡើងតុលាការ ហើយត្រូវលោក លាវ ស្រេង ព្រះរាជអាជ្ញាអមសាលាដំបូងខេត្តកណ្ដាល បានសម្រេចចោទប្រកាន់ទោស ប៉ុន្តែអនុញ្ញាតឲ្យត្រឡប់ទៅផ្ទះបណ្ដោះអាសន្នសិន ។
