រដ្ឋមន្ត្រីការពារជាតិចិននិងអាមេរិកមកជួបគ្នានៅសៀមរាបក្នុងអំឡុងកិច្ចប្រជុំរដ្ឋមន្ត្រីការពារជាតិអាស៊ាន
21-November-2022 / ផ្សេងៗ
សៀមរាប៖ លោក វី ហ្វេងហេ រដ្ឋមន្ត្រីការពារជាតិចិន និងលោក ឡយដ៍ អូស្ទីន (Lloyd Austin) នឹងមានជំនួបមួយនៅខេត្តសៀមរាបប្រទេសកម្ពុជា អំឡុងពេលកិច្ចប្រជុំរដ្ឋមន្ត្រីការពារជាតិអាស៊ាន និងកិច្ចប្រជុំពាក់ព័ន្ធ។
ក្នុងឱកាសដែលសម្តេចតេជោ អញ្ជើញបើកការប្រកួតកីឡាជាតិលើកទី៣ និងកីឡាជនពិការជាតិលើកទី១ នៅពហុកីឡដ្ឋានជាតិមរតកតេជោ នាល្ងាចថ្ងៃទី២១ ខែវិច្ឆិកា ឆ្នាំ២០២២នេះសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បញ្ជាក់ថា៖ «នៅប៉ុន្មានថ្ងៃខាងមុខនេះ ប្រសិនបើគ្មានអ្វីប្រែប្រួលទេនោះ ជំនួបកំពូលរវាងរដ្ឋមន្ត្រីក្រសួងការពារជាតិរបស់ចិន និងរដ្ឋមន្ត្រីការពារជាតិរបស់សហរដ្ឋអាមេរិក នឹងមានជំនួបនៅក្នុងខេត្តសៀមរាប»។
លោក វី ហ្វេងហេ បានមកដល់ប្រទេសកម្ពុជា កាលពីថ្ងៃទី២០ ខែវិច្ឆិកា ឆ្នាំ២០២២ ដើម្បីចូលរួមកិច្ចប្រជុំរដ្ឋមន្ត្រីការពារជាតិអាស៊ាន និងកិច្ចប្រជុំរដ្ឋមន្ត្រីការពារជាតិបូក ដែលនឹងរៀបចំធ្វើឡើងនៅខេត្តសៀមរាប នៅថ្ងៃទី២៣ ខែវិច្ឆិកា។ រដ្ឋមន្ត្រីការពារជាតិអាមេរិក រួមទាំងរដ្ឋមន្ត្រីប្រទេសជាដៃគូអាស៊ាន មួយចំនួនទៀត នឹងមានវត្តមានខេត្តសៀមរាបផងដែរ។«អាចចាត់ទុកថា កម្ពុជាជាទីកន្លែងសម្រាប់ការសម្រុះសម្រួលមួយរវាងមហាអំណាច ដែលនឹងនាំទៅដល់ស្ថិរភាពនៅក្នុងតំបន់ និងពិភពលោក»។ នេះជាការបញ្ជាក់បន្ថែមរបស់សម្តេចតេជោ។
កិច្ចប្រជុំរដ្ឋមន្ដ្រីការពារជាតិអាស៊ាន-បូក លើកទី៩ (9th ADMM-Plus) និងកិច្ចប្រជុំពាក់ព័ន្ធ ដែលកម្ពុជាធ្វើជាម្ចាស់ផ្ទះ ត្រូវបានធ្វើឡើងចាប់ថ្ងៃទី២១ ដល់ថ្ងៃទី២៣ ខែវិច្ឆិកា ឆ្នាំ២០២២ នៅក្រុងសៀមរាប ខេត្តសៀមរាប។បើតាមសេចក្តីជូនដំណឹងរបស់ក្រសួងការពារជាតិ កិច្ចប្រជុំចង្អៀតរដ្ឋមន្ត្រីការពារជាតិអាស៊ាន នឹងផ្តោតជាសំខាន់លើការផ្លាស់ប្តូរទស្សនៈ ស្តីពី «ការលើកកម្ពស់កិច្ចសហប្រតិបត្តិការការពារជាតិ ដើម្បី ពង្រឹងសាមគ្គីភាពសម្រាប់សន្តិសុខប្រកប ដោយភាពសុខដុម»។ បន្ទាប់ពីកិច្ចប្រជុំចង្អៀត ក៏មានកិច្ចប្រជុំ ក្រៅផ្លូវការចំនួនពីរ ដែលសម្តេចពិជ័យសេនា នឹងធ្វើជាសហប្រធាន រួមមាន៖ កិច្ចប្រជុំក្រៅផ្លូវការរដ្ឋមន្ត្រី ការពារជាតិអាស៊ាន-សហរដ្ឋអាម៉េរិក និងកិច្ចប្រជុំក្រៅផ្លូវការរដ្ឋមន្ត្រីការពារជាតិអាស៊ាន-ឥណ្ឌា។
សម្រាប់កិច្ចប្រជុំរដ្ឋមន្ត្រីការពារជាតិអាស៊ាន-បូក សម្តេចតេជោ ហ៊ុន សែន នាយករដ្ឋមន្ដ្រី នៃព្រះ រាជាណាចក្រកម្ពុជា នឹងអញ្ជើញជាអធិបតី ដើម្បីថ្លែងសុន្ទរកថាគន្លឹះក្នុងពិធីបើកជាផ្លូវការ នៃកិច្ចប្រជុំរដ្ឋមន្ត្រីការពារជាតិអាស៊ានបូក លើកទី៩ ហើយនឹងទទួលការចូលជួបសម្ដែងការគួរសមរួមគ្នា ដោយរដ្ឋមន្ត្រីការពារជាតិអាស៊ានបូក និងអគ្គលេខាធិការអាស៊ាន។នៅក្នុងកិច្ចប្រជុំរដ្ឋមន្ត្រីការពារជាតិអាស៊ានបូក ក៏នឹងស្តាប់របាយការណ៍ នៃការអភិវឌ្ឍថ្មីៗ នៅក្នុងអាស៊ាន ការផ្លាស់ប្តូរទស្សនៈ ស្តីពី «បរិយាកាសសន្តិសុខតំបន់ និងអន្តរជាតិ និងកិច្ចសន្ទនាជាយុទ្ធសាស្ត្រ ដើម្បីលើកកម្ពស់កិច្ចសហប្រតិបត្តិការការពារជាតិក្នុងតំបន់ ។
បន្ទាប់ពីបញ្ចប់កិច្ចប្រជុំ សម្ដេចពិជ័យសេនា ទៀ បាញ់ នឹងធ្វើពិធីផ្ទេរតំណែងជាប្រធានកិច្ចប្រជុំ រដ្ឋមន្ត្រីការពារជាតិអាស៊ាន និងកិច្ចប្រជុំពាក់ព័ន្ធ ជូនលោក ប្រាបូវូ ស៊ូប៊ីយ៉ានតូ រដ្ឋមន្ត្រីការពារជាតិ នៃសាធារណរដ្ឋឥណ្ឌូណេស៊ី ដែលជាប្រធានប្តូរវេនសម្រាប់ឆ្នាំ២០២៣។អភិបាលខេត្តសៀមរាប លោក ទៀ សីហា ក៏បានឲ្យដឹងផងដែរថា អាជ្ញាធរបានរៀបចំរួចរាល់ហើយ ក្នុងការទទួលគណៈប្រតិភូដែលអញ្ជើញចូលរួមកិច្ចប្រជុំ។ជាមួយគ្នានោះ កិច្ចប្រជុំនេះក៏មានទាំងការរៀបចំកម្លាំងសមត្ថកិច្ចការពារសន្ដិសុខ សុវត្ថិភាពជូនគណៈប្រតិភូផងដែរ។
