កូនប្រុសតារាចម្រៀងអ្នកមេម៉ាយ ម៉េង កែវពេជ្ជតា សាងផ្នួសសងគុណម្តាយ

ភ្នំពេញ៖ទោះបីស្ថិតក្នុងស្ថានភាពជាស្ត្រីមេម៉ាយតែ អ្នកនាង ម៉េង កែវពេជ្ជតា តែបច្ចុប្បន្នតារាចម្រៀងជើងខ្លាំងរូបនេះ នៅតែមានសុភង្គលក្នុងជីវីតជាមួយកូនប្រុសស្រី២ដួងដែលជាអ្នកសិល្បៈដែរហើយរក្សាបាននូវភាពល្បីល្បាញ និង នៅតែក្ដោបបានទីផ្សារសិល្បៈខ្លាំងមិនចាញ់អ្នកជំនាន់ក្រោយឡើយ។ 

កូនប្រុសស្រីទាំង ២ រូប របស់អ្នកនាងម៉េង កែវពេជ្ជតាជាមួយលោកឧត្តមសេនីយ៍មួងឃីម(ដែលបច្ចុប្បន្នកំពុងមានទោសទាក់ទងរឿងពុករលួយ) គឺកូនប្រុសច្បង ម៉េងពេជ្រ រតនៈ និង កូនស្រីពៅ ពេជ្ជតា សង្វាពេជ្រ(មិនប្រើតាមត្រកូលឪពុកទេហើយឈ្មោះសង្វារពេជ្រគឺជាឈ្មោះជីដូនដែលជាអ្នកច្រៀងអាយ៉ៃល្បីពីជំនាន់ទសវត្ស៦០) កំពុងតែដើរតាមគន្លងធម៌ និង បំពេញតួនាទីជាកូនដ៏កតញ្ញូ។

កូនប្រុសស្រីទាំង ២ របស់អ្នកស្រី មិនត្រឹមតែប្រឹងប្រែងបន្តការសិក្សា ដោយមានទាំងក្នុង និង ក្រៅប្រទេសនោះទេ ប៉ុន្តែកូនប្រុសស្រីទាំង ២ រូបនេះ ក៏បានបន្តការសិក្សាលើជំនាញតន្ត្រី និង ផ្នែកសិល្បៈបន្តវេនពីអ្នកម្តាយផងដែរ។

និយាយពីកូនប្រុសច្បងរបស់អ្នកនាង ម៉េង កែវពេជ្ជតា គឺលោក ម៉េងពេជ្រ រតនៈ ក៏បានសិក្សាជំនាញផ្នែកតន្ត្រីតាំងពីកុមារ និង ធ្លាប់បានប្រកួតទទួលបានពានរង្វាន់នៅឯក្រៅប្រទេសទៀតផង។ យុវជនរូបនេះក៏បានទៅសិក្សានៅឯប្រទេសបារាំងផងដែរ។

ថ្មីៗនេះលោក ម៉េងពេជ្រ រតនៈ កូនប្រុសច្បងរាជិនីសំឡេង ម៉េង កែវពេជ្ជតា ក៏បានវិលត្រឡប់មកលេងស្រុកកំណើតជួបជុំក្រុមគ្រួសារ និង បានបង្ហាញវត្តមានក្នុងកម្មវិធីនានាជាមួយនឹងអ្នកម្តាយផងដែរ ក្រោយពីបញ្ចប់ការសិក្សានៅឯប្រទេសបារាំងប្រមាណ ៥ ឆ្នាំ ។

កាលពីថ្ងៃទី ១៨ ខែកក្កដា ឆ្នាំ ២០២៦ កន្លងទៅ លោក ម៉េងពេជ្រ រតនៈ បានធ្វើឱ្យមហាជនសរសើរពីទឹកចិត្តកតញ្ញូរបស់លោកយ៉ាងខ្លាំង ខណៈវិលត្រឡប់មកពីប្រទេសបារាំងលើកនេះ កូនប្រុសច្បងអ្នកនាង ម៉េង កែវពេជ្ជតា រូបនេះ បានបួសសងគុណអ្នកម្តាយដោយគន្លងធម៌និងតាមប្រពៃណីយ៍ព្រះពុទ្ធសាសនា៕