អ្នកនាំពាក្យក្រសួងការពារជាតិ ថាករណីជនជាតិចិនបានជាន់នៅតំបន់ព្រំដែនកម្ពុជា-ថៃ គឺជាមីនចាស់នៅក្នុងដីខ្មែរ!

យោងតាមសេចក្តីរាយការណ៍ពីយោធភូមិភាគទី៥ នៃកងយោធពលខេមរភូមិន្ទ បានឱ្យដឹងថា កាលពីវេលាម៉ោង ៣:២០នាទីទៀបភ្លឺ ថ្ងៃទី២៩ ខែវិច្ឆិកា ឆ្នាំ២០២៥ កងការពារព្រំដែនលេខ៥០៣របស់កម្ពុជា ដែលឈរជើងនៅក្នុងភូមិសាស្រ្តភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បានឮសូរសំឡេងផ្ទុះគ្រាប់មីនចំនួន ០១គ្រាប់ ហើយបើតាមការពិនិត្យទីតាំងឧបទ្ទវហេតុនេះបានកើតឡើងនៅក្នុងតំបន់ចម្ការមីនរបស់កម្ពុជា ដែលមានគ្រាប់មីនចាស់មិនទាន់ផ្ទុះដែលជាសំណល់ពីសម័យសង្គ្រាមជាយូរឆ្នាំមកហើយ។ 

ជនជាតិចិនឈ្មោះ SHI JINGUI កាន់លិខិតឆ្លងដែនលេខ 2356975263 ដែលអាជ្ញាធរថៃបានផ្សាយថាជាជនរងគ្រោះក្នុងឧបទ្ទវហេតុជាន់មីននោះត្រូវបានក្រសួងមហាផ្ទៃ នៃព្រះរាជាណាចក្រកម្ពុជា បញ្ជាក់ថាពុំមានឈ្មោះនៅក្នុងប្រព័ន្ធទិន្នន័យកត់ត្រាអ្នកដំណើរចេញ-ចូលប្រទេសកម្ពុជារបស់អគ្គនាយកដ្ឋានអន្តោប្រវេសន៍នោះឡើយ។ក្រសួងការពារជាតិ នៃព្រះរាជាណាចក្រកម្ពុជា សូមបដិសេធនូវការចោទប្រកាន់ទាំងឡាយរបស់ភាគីថៃ។ ក្រសួងការពារជាតិសូមគូសបញ្ជាក់ថា ប្រទេសកម្ពុជាគោរពអនុវត្តច្បាប់អន្តរជាតិ និងមិនដែលដាក់មីនថ្មីនោះទេ។

ពាក់ព័ន្ធនឹងការងារដោះមីនមនុស្សធម៌តាមព្រំដែនកម្ពុជា-ថៃ ក្រុមការងាររបស់អង្គភាព CMAC និង TMAC, ក្នុងនាមជាសេនាធិការឱ្យក្រុមការងារ JCTF, បានចុះទៅសិក្សាវាយតម្លៃ និងបន្តប្រជុំពិភាក្សាលើទីតាំងសាកល្បងនៅក្នុងតំបន់អាទិភាពនៅព្រំដែន ដោយទទួលបានលទ្ធផលវិជ្ជមានជាបន្តបន្ទាប់។ ក្នុងន័យនេះ ភាគីកម្ពុជាជំរុញឱ្យភាគីថៃអនុវត្តឱ្យបានម៉ឺងម៉ាត់នូវកិច្ចព្រមព្រៀងដែលភាគីទាំងពីរបានឯកភាពគ្នារួចមកហើយ ដោយការងារដោះមីនមនុស្សធម៌នៅតាមព្រំដែន ត្រូវធ្វើឡើងតាមរយៈក្រុមការងារ JCTF និងស្របតាម SOP ដែលបានឯកភាពគ្នា។

ក្រសួងការពារជាតិ នៃព្រះរាជាណាចក្រកម្ពុជា បន្តប្តេជ្ញាចិត្តក្នុងការលើកកម្ពស់សន្តិភាព ស្ថិរភាព និងភាពជាអ្នកជិតខាងល្អជាមួយថៃ និងដោះស្រាយជម្លោះដោយសន្តិវិធី ស្របតាមច្បាប់អន្តរជាតិ ព្រមទាំងគោរពយ៉ាងខ្ជាប់ខ្ជួននូវសេចក្តីថ្លែងការណ៍រួមស្តីពីសន្តិភាពរវាងកម្ពុជានិងថៃ ដែលត្រូវបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥។

សូមបញ្ជាក់ថាបើតាមកាសែតថៃនៅថ្ងៃទី ២៩ ខែវិច្ឆិកា ឆ្នាំ ២០២៥ កងទ័ពភូមិភាគទី១ តាមរយៈមជ្ឈមណ្ឌលប្រតិបត្តិការកងទ័ពភូមិភាគទី១ បានទទួលរបាយការណ៍ពីក្រុមការងារប៊ូរ៉ាផាថា មនុស្សម្នាក់បានឆ្លងដែនខុសច្បាប់ចូលទៅក្នុងទឹកដីថៃ ហើយបានជាន់មីន បណ្តាលឲ្យរងរបួស។

ការត្រួតពិនិត្យ បានរកឃើញថា នៅថ្ងៃទី ២៩ ខែវិច្ឆិកា ឆ្នាំ ២០២៥ វេលាម៉ោង ០៥:៥០ ព្រឹក មន្ត្រីនគរបាលព្រំដែន (BPP) មកពីកងអនុសេនាធំប្រតិបត្តិការពិសេស BPP ទី៤ បានឮសំឡេងផ្ទុះនៅក្នុងតំបន់ព្រៃក្រាស់មួយ ចម្ងាយប្រហែល ៨០-៩០ ម៉ែត្រពីផ្លូវស៊ីផេន។ ដូច្នេះ ក្រុមការងារទី១២ បានដាក់ពង្រាយយន្តហោះគ្មានមនុស្សបើកដើម្បីត្រួតពិនិត្យ និងវាយតម្លៃស្ថានភាព។

បុរសជនជាតិចិនម្នាក់ដែលរងរបួសត្រូវបានគេរកឃើញ ដែលសង្ស័យថាបានជាន់មីន ហើយកំពុងហៅសុំជំនួយជាភាសាអង់គ្លេស។ ក្រុម​ដោះមីន​មួយក្រុម ដែលដឹកនាំដោយអង្គភាពដោះមីនមនុស្សធម៌លេខ 1 (HDU 1) ត្រូវបានដាក់ពង្រាយភ្លាមៗសម្រាប់ប្រតិបត្តិការជួយសង្គ្រោះជាបន្ទាន់។

មន្ត្រីយោធា និង BPP បានធានាសុវត្ថិភាពតំបន់នោះសម្រាប់ការការពារ និងសុវត្ថិភាព ហើយអ្នករងរបួសត្រូវបានបញ្ជូនទៅមន្ទីរពេទ្យខុកស៊ុង ស្រុកខុកស៊ុង ខេត្តស្រះកែវ។ការត្រួតពិនិត្យលិខិតឆ្លងដែនបន្ថែមទៀតបានរកឃើញថា ជនរងគ្រោះជាជនជាតិចិនអាយុ ២៦ ឆ្នាំមកពីខេត្តយូណាន រងរបួសយ៉ាងធ្ងន់ធ្ងរដោយជើងស្តាំដាច់។ គេសង្ស័យថាគាត់បានឆ្លងដែនខុសច្បាប់ចូលទៅក្នុងទឹកដីថៃ។ តំបន់កើតហេតុគឺជាតំបន់ដែលមានមីននៅ Ban Nong Chan ជាកន្លែងដែលប្រតិបត្តិការដោះមីនរបស់ភាគីថៃនៅតែបន្ត។