បន្ទាប់ពីចិនបានស្រួលតិចអឺរ៉ុបប្រឈមពន្ធ ៥០ភាគរយ លើទំនិញនាំចូលទៅសហរដ្ឋអាម៉េរិក
25-May-2025 / ព័ត៌មានអន្តរជាតិ
អាមេរិក៖សហរដ្ឋអាម៉េរិក៖ នៅក្នុងសារបង្ហោះតាមរយៈបណ្ដាញសង្គមទ្រូសសូសល (Truth Social) កាលពីថ្ងៃសុក្រ ប្រធានាធិបតីអាម៉េរិក លោក ដូណាល់ ត្រាំ (Donald Trump) និយាយថា លោកកំពុងតែស្នើឱ្យមានការដំឡើងពន្ធ ៥០% លើទំនិញទាំងអស់ដែលនាំចូលពីសហភាពអឺរ៉ុប ដោយគិតចាប់ពីថ្ងៃទី១ ខែមិថុនា ដោយលោកនិយាយថា កិច្ចចរចាស្វែងរកដំណោះស្រាយពាណិជ្ជកម្មជាមួយអឺរ៉ុប មិនដំណើរការឡើយ ។
លោកត្រាំ (Trump) រៀបរាប់ទៀតថា «សហភាពអ៊ឺរ៉ុប បានចងក្រងប្រព័ន្ធនិងច្បាប់ពាណិជ្ជកម្មដើម្បីតែស្រូបទាញផលប្រយោជន៍ពីសហរដ្ឋអាម៉េរិកតែប៉ុណ្ណោះ ខណៈកិច្ចពិភាក្សាស្វែងរកដំណោះស្រាយពាណិជ្ជកម្មឯណោះវិញ គឺត្រូវបរាជ័យដោយមិនមានវឌ្ឍនភាពអ្វីទាល់តែសោះ» ។មេដឹកនាំសហរដ្ឋអាម៉េរិករូបនេះ លើកឡើងបន្ថែមក្នុងសន្និសីទកាសែតថា វាអយុត្តិធម៌ណាស់សម្រាប់ក្រុមហ៊ុនរបស់អាម៉េរិក ខណៈឱនភាពពាណិជ្ជកម្មមានតម្លៃច្រើនជាង ២៥០លានដុល្លារក្នុងមួយឆ្នាំ ដែលជាចំនួនពិបាកនឹងទទួលយកខ្លាំងណាស់ ។
ការប្រកាសដំឡើងពន្ធ ៥០% សម្រាប់ទំនិញអឺរ៉ុបនាំចូលទឹកដីអាមេរិក របស់លោកប្រធានាធិបតីអាមេរិក ធ្វើឡើងក្នុងសន្និសីទសារព័ត៌មាននៅសេតវិមាន កាលពីថ្ងៃសុក្រ ទី២៣ ឧសភា ម្សិលមិញ ប៉ុន្មានម៉ោងក្រោយពីបានបង្ហោះសារ នៅលើបណ្តាញសង្គម Truth Social របស់លោក។ អត្រាពន្ធ ៥០% លើសហភាពអឺរ៉ុបនឹងចូលជាធរមាន នៅថ្ងៃអាទិត្យទី ១ មិថុនា ខាងមុខ។ លោកប្រធានាធិបតីអាមេរិករូបនេះបានបន្តទៀតថា ប្រសិនជាក្រុមហ៊ុនអឺរ៉ុបសាងសង់រោងចក្រលើទឹកដីអាមេរិក អាមេរិកនឹងមិនយកពន្ធឡើយ។ ហើយអំឡុងពេលកំពុងសាងសង់រោងចក្រ លោកនឹងអាចពន្យាពេល ឬ ផ្អាកការយកពន្ធលើក្រុមហ៊ុននោះ។ លោកដូណាល់ ត្រាំ ក៏បានអះអាងថា អាមេរិកបានចុះកិច្ចព្រមព្រៀងពាណិជ្ជកម្មជាមួយនឹង អង់គ្លេសនិងចិនរួចរាល់ហើយ។ ក្រោយពីការប្រកាសរបស់ប្រធានាធិបតីអាមេរិករូបនេះ តម្លៃភាគហ៊ុននៅផ្សារមូលប័ត្រនៅអាមេរិក និងជាពិសេសនៅអឺរ៉ុប បានធ្លាក់ដាំក្បាលចុះ។
ឆ្លើយតបនឹងការគំរាមដំឡើងពន្ធ ៥០% លើទំនិញអឺរ៉ុប របស់លោកដូណាល់ ត្រាំ សហភាពអឺរ៉ុបនឹងធ្វើការជាមួយនឹងអ្នកតំណាងពាណិជ្ជកម្មអាមេរិក ដើម្បីទទួលបានកិច្ចព្រមព្រៀងពាណិជ្ជកម្មមួយដោយឈរលើស្មារតីគោរពគ្នាទៅវិញទៅមក មិនមែនមកគំរាមកំហែងឡើយ។ កិច្ចព្រមព្រៀងនេះទៀតសោត នឹងធ្វើឡើងដាច់ដោយឡែកពីគ្នាសម្រាប់ប្រទេសអឺរ៉ុបទាំង ២៧ប្រទេស។ សហភាពអឺរ៉ុបបានត្រៀមខ្លួនរួចជាស្រេច ដើម្បីការពារផលប្រយោជន៍របស់ខ្លួន។ នេះបើតាមការបញ្ជាក់របស់គណៈកម្មការអឺរ៉ុប។ សូមបញ្ចាក់ថាកាលពីដើមខែឧសភានេះ អឺរ៉ុបក៏បានគំរាមដំឡើងពន្ធលើរថយន្តនិងយន្តហោះរបស់អាមេរិក នាំចូលទឹកដីអឺរ៉ុប ដែលមានទំហំទឹកប្រាក់រហូតដល់ ៩៥ពាន់លានដុល្លារ បើសិនការចរចាពន្ធគយរវាងអឺរ៉ុបនិងអាមេរិកទទួលបរាជ័យ។សូមរំឭកថា នៅប៉ុន្មានខែចុងក្រោយនេះ សហភាពអឺរ៉ុបក៏ធ្លាប់បានរងគ្រោះ ដោយសារការដំឡើងពន្ធរបស់រដ្ឋបាលលោកដូណាល់ ត្រាំ ក្នុងនោះ ២៥% លើដែក អាលុយមីញ៉ូម និងរថយន្ត ព្រមទាំង ២០% លើទំនិញផ្សេងទៀត នាំចូលទៅអាមេរិក។ ក្រោយមក លោកដូណាល់ ត្រាំ បានប្រកាសផ្អាកការអនុវត្តពន្ធគយបដិការរយៈពេល៩០ថ្ងៃ។
ជុំវិញការលើកឡើងរបស់លោកត្រាំស្តីពីការតម្លើងពន្ធនាចូលអាមេរិក បានធ្វើឱ្យសន្ទស្សន៍ទីផ្សារភាគហ៊ុនសំខាន់ៗចំនួន៣របស់អឺរ៉ុប បានដាំក្បាលចុះយ៉ាងខ្លាំង ក្នុងនោះរួមមាន សន្ទស្សន៍ DAX របស់អាឡឺម៉ង់ ធ្លាក់ចុះ ២.៦% ខណៈ សន្ទស្សន៍ CAC របស់បារាំង ធ្លាក់ ២.៨% ហើយសន្ទស្សន៍ FTSE របស់ទីក្រុងឡុងដ៍ ចក្រភពអង់គ្លេស បានធ្លាក់ចុះ ១.៣%។ ក្នុងពេលដំណាលគ្នា អនាគតភាគហ៊ុនរបស់អាម៉េរិក ក៏បានធ្លាក់ចុះផងដែរ ដោយសន្ទស្សន៍ DOW ធ្លាក់ចុះ ១.៧% ឬស្មើនឹង ៦០០ ពិន្ទុ ។ករណីយ៍នេះ អ្នកនាំពាក្យរបស់គណៈកម្មការអឺរ៉ុប បានបដិសេធមិនទាន់ធ្វើការអត្ថាធិប្បាយភ្លាមៗណាមួយនៅឡើយទេ ៕
