ដំណោះស្រាយពេលស្រូវថោក!ក្រសួងកសិកម្មដាក់ទុនឱ្យសហគមន៍ខ្ចី ក្នុងរង្វង់៥លានដុល្លារ ដោយមិនចាំបាច់ឱ្យកសិករសមាជិកពិបាកជាប់បំណុលគេ ?!
14-January-2025 / សេដ្ឋកិច្ច
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជាតាមរយៈបណ្តាញសង្គមផ្លូវវ នារសៀលថ្ងៃទី ១៤ ខែមករា ឆ្នាំ២០២៥បានឲ្យដឹង ថា “ ស្របពេលស្រូវអូអឹមរបស់វៀតណាមកំពុងធ្លាក់ថ្លៃ បងប្អូនកសិករមកពីសង្កាត់អូរកន្ទរ និងសង្កាត់ស្រយ៉ូវ ក្រុងស្ទឹងសែន ខេត្តកំពង់ធំ ស្ម័គ្រចិត្តរួមគ្នាជាមួយឃុំកំពង់គោ ស្រុកកំពង់ស្វាយ ដើម្បីក្លាយជាសហគមន៍កសិកម្មទំនើបខ្នាតធំ ផលិតស្រូវសែនក្រអូបរបស់កម្ពុជាលើផ្ទៃដី៥០០០ហិកតា ក្នុងតម្លៃកុងត្រាទុកជាមុនចាប់ពី១៣០០៛/គីឡូក្រាមឡើងទៅ!”។
ទាក់ទងនិងសហគមន៍កសិករនេះសម្តេចមហាបវរធិបតី បានបន្តថា “ក្រសួងកសិកម្មនឹងដាក់ទុនឱ្យសហគមន៍ខ្ចី ក្នុងរង្វង់៥លានដុល្លារ ដោយមិនចាំបាច់ឱ្យកសិករសមាជិកពិបាកជាប់បំណុលគេ ឬត្រូវដាក់ទុនដោយខ្លួនឯងឡើយ! នេះគឺជាដំណោះស្រាយបន្ទាន់ ដែលក្រសួងកសិកម្មព្យាយាមផ្តល់ជូនពុកម៉ែបងប្អូនកសិករយើង ដែលធ្លាប់តែដាំពូជស្រូវរបស់ប្រទេសវៀតណាម ហើយកំពុងពិបាករកទីផ្សារ និងមិនទទួលបានតម្លៃល្អ”។
ក្រៅពីការឲ្យខ្ចីលុយសម្តេចបវរធិបតី បានផ្តល់អនុសាសន៍ថា “បើអាណិតកសិករយើង ហើយពិតជាចង់ជួយដោះស្រាយបញ្ហាជូនពួកគាត់មែន សូមជួយផ្សព្វផ្សាយឱ្យកសិករយើងងាកមករួមគ្នាជាសហគមន៍ និងដាំពូជអង្ករក្រអូបរបស់ខ្មែរ ជាជាងការនៅតែបន្តដាំពូជរបស់គេ ដែលពិបាកទាំងទីផ្សារ ពិបាកទាំងការអន្តរាគមន៍ជួយពេលមានបញ្ហា។ ល្មមដល់ពេលដែលខ្មែរយើងត្រូវចេះរួមគ្នា ទទួលស្គាល់ឫសគល់ នៃបញ្ហា ចាប់យកទីផ្សារមកទុកក្នុងកណ្តាប់ដៃរបស់យើង ហើយរៀនម្ចាស់ការលើជោគវាសនារបស់ខ្លួនដោយខ្លួនឯងហើយ!”។
ដូចគ្នានេះដែរកាលពីថ្ងៃទី ១៣ខែមករា ឆ្នាំ ២០២៥លោករដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានជំរុញឲ្យប្រជាកសិករងាកមកធ្វើស្រូវសែនក្រអូបដែលមានតម្រូវការក្នុងស្រុក និងនាំចេញ ដើម្បីលក់បានតម្លៃខ្ពស់ ខណៈកសិករត្អូញត្អែរពីតម្លៃស្រូវចុះថោកប្រភេទស្រូវ OM ដែលកំពុងតែជួបបញ្ហាស្រូវធ្លាក់ថ្លៃ។
នៅក្នុងអំឡុងពេលជួបសំណេះសំណាលជាមួយសមាជិកសហគមន៍កសិករព្រៃវិហារ ស្ថិតនៅស្រុកគងពិសី ខេត្តកំពងស្ពឺ លោករដ្ឋមន្ត្រី បានបន្តថា ប្រជាកសិករដែលធ្វើស្រូវវស្សាមិនសូវជាជួបបញ្ហាច្រើន ដូចកសិករដែលធ្វើស្រូវប្រាំងឡើយ ដោយសារតែពួកគាត់បាននាំគ្នាសម្រុកធ្វើច្រើន ដើម្បីចង់ចំណេញខ្លាំង ស្របពេលដែលឆ្នាំនេះ ស្ថិតិធ្វើស្រូវប្រាំងមានជាង ៧០ម៉ឺនហិកតា និងរំពឹងប្រមូលទិន្នផលបានជិត ៥លានតោន ដែលភាគច្រើនសុទ្ធតែជាប្រភេទស្រូវ OM។ គេមិនដឹងថាតើហេតុអីលោករដ្ឋមន្ត្រីបន្ទោសកសិករដែលខំបង្កបង្កើនផលចឹងនោះឡើយ?។តែយ៉ាងណាជាដំណោះស្រាយរឿងស្រូវថោកនេះលោករដ្ឋមន្ត្រី បានគូសបញ្ជាក់ថា ក្រសួងកសិកម្មកំពុងជជែកជាមួយរោងម៉ាស៊ីនកិនស្រូវក្នុងស្រុក ដើម្បីសិក្សាពីតម្រូវការ និងលទ្ធភាពទិញចូលរបស់រោងម៉ាស៊ីនទាំងនោះ ដើម្បីប្រមូលទិញស្រូវពីប្រជាកសិករ ដែលកំពុងជួបបញ្ហាធ្លាក់ថ្លៃ។
លោករដ្ឋមន្ត្រី ឌិត ទីណា បានបន្ថែមថា ក្រសួង ក៏កំពុងចុះសិក្សាពីបរិមាណប្រមូលផលរបស់ប្រជាកសិករ ក្នុង១ថ្ងៃៗផងដែរ ដើម្បីជួយស្វែងរកទីផ្សារថ្មីៗបន្ថែមទៀត ដើម្បីឱ្យប្រជាពលរដ្ឋមានច្រកកាន់តែច្រើនក្នុងការលក់ ជាជាងពឹងផ្អែកតែលើឈ្មួញវៀតណាម ព្រោះអាចឱ្យពួកគេកំណត់តម្លៃស្រេចតែចិត្ត។ កត្តាដែលធ្វើឱ្យតម្លៃស្រូវ OM បច្ចុប្បន្នមានការធ្លាក់ចុះ គឺដោយសារឈ្មួញវៀតណាម ផ្អាកចុះមកប្រមូលទិញស្រូវនៅកម្ពុជា ដោយសារវៀតណាម នៅសល់ស្តុកអង្ករច្រើន។
បើយោងតាមតារាងតម្លៃស្រូវបង្ហាញដោយសហព័ព្ធស្រូវអង្ករកម្ពុជា នៅថ្ងៃទី ៩ខែមករា ឆ្នាំ ២០២៥នេះ បានឲ្យដឹងថា តម្លៃស្រូវ OM ថ្លៃ ៧៧០-៨២០រៀល, ស្រូវអ៊ីអ៊ែ ថ្លៃ ៧៦០-៨០០រៀល និងស្រូវស្រង៉ែ ថ្លៃ ៩៥០រៀល ក្នុងមួយគីឡូក្រាម។ តម្លៃនេះ គឺទាបជាងតម្លៃស្រូវ កាលពីអំឡុងពេលដូចគ្នាកាលពីឆ្នាំ ២០២៤។ចំណែកតម្លៃស្រូវកាលពីថ្ងៃទី ៨ខែមករា ឆ្នាំ ២០២៤វិញ ពោលគឺស្រូវ OM ថ្លៃ ១៣៧០-១៤១០រៀល, ស្រូវអ៊ីអ៊ែ ថ្លៃ ១៤០០-១៤១០រៀល និងស្រូវស្រង៉ែ ថ្លៃ ១៣១០-១៣២០រៀល ក្នុងមួយគីឡូក្រាម។
សូមជម្រាបថា ដោយសារតែខ្មែរយើងគ្មានទីផ្សារក្រៅពីវៀតណាមចឹងនៅពេលតម្លៃស្រូវ-អង្កររបស់វៀតណាម ធ្លាក់ចុះ ដែលកំពុងបង្កការព្រួយបារម្ភដល់ប្រជាកសិករ និងពាណិជ្ជករវៀតណាម ដែលនឹងអាចប្រឈមការខាតបង់ ខណៈរដូវប្រមូលផលស្រូវក្នុងប្រទេសនេះ នឹងកើនឡើងដល់កំពូលចាប់ពីចុងខែមករានេះ។ការធ្លាក់ចុះយ៉ាងខ្លាំងនៃតម្លៃនាំចេញអង្កររបស់វៀតណាម គឺបណ្តាលមកពីកត្តាជាច្រើន រួមទាំងប្រទេសនាំចូលអង្ករធំៗពីវៀណាម ដែលទទួលយកគោលនយោបាយកាត់បន្ថយការនាំចូល និងរង់ចាំទិញអង្ករក្នុងតម្លៃទាប, ការប្រកួតប្រជែងក្នុងទីផ្សារពីប្រទេសនាំចេញអង្ករធំៗ ពិសេសពីឥណ្ឌា និងប្រទេសខ្លះទៀត ក៏បានប្រកាសអំពីផែនការបញ្ឈប់ការនាំចូលអង្ករនៅឆ្នាំ ២០២៥ តែម្តង។
ក្នុងពេលខាងមុខនេះ ដោយសារដំណាំស្រូវក្នុងរដូវរងារ-និទាឃរដូវ ឆ្នាំ ២០២៤-២០២៥ របស់វៀតណាម បានឈានដល់ការប្រមូលផលខ្ពស់បំផុត តម្លៃស្រូវត្រូវបានគេរំពឹងថា នឹងប្រឈមមុខនឹងសម្ពាធធ្លាក់ចុះបន្ថែមទៀត។ក្រៅពីការនាំចេញអង្ករ ប្រទេសកម្ពុជាបានត្រឹមជាង៦០ម៉ឺនតោនពោលគឺមិនអាចសម្រេចបានក្នុងផែនការ១លានតោនកម្ពុជានៅប្រឈម ផងដែរដោយសាររោងម៉ាស៊ីនកិនស្រូវនៅក្នុងស្រុកមិនទាន់មានទុនបង្វិលទិញស្រូវគ្រប់គ្រាន់សម្រាប់កែច្នៃនាំចេញ, កង្វះឃ្លាំងស្តុកសម្រាប់សង្ងួតស្រូវ និងសមត្ថភាពរោងម៉ាស៊ីនកិនស្រូវ ក្នុងស្រុក ក៏នៅមានកម្រិតនៅឡើយ។កម្ពុជានៅមិនទាន់បង្កើនការនាចេញអង្គរបានតាមប្រទេសមួយចំនួនដែលជាទីផ្សារកម្ពុជាផងដែរមិនដឹងថាតើមានមូលហេតុអី?។មកពីគុណភាពអង្ករយើង?។
យោងតាមទិន្នន័យបង្ហាញដោយសហព័ន្ធស្រូវអង្ករកម្ពុជា បានឲ្យដឹងដឹងថា ប្រទេសកម្ពុជា បាននាំចេញស្រូវរហូតដល់ ៥,១៨លានតោន នៅក្នុងឆ្នាំ ២០២៤ កើនឡើង ១៨,២% ពីចំនួន ៤,៣៨លានតោន នៅក្នុងឆ្នាំ ២០២៣។ ទន្ទឹមនឹងនេះ តម្លៃប៉ាន់ស្មាននៃការនាំចេញស្រូវ នៅក្នុងឆ្នាំ ២០២៤ មានប្រមាណ ១,៤៩ពាន់លានដុល្លារ កើនឡើង ១២,៨% ពីចំនួន ១,៣២ពាន់លានដុល្លារ នៅឆ្នាំ ២០២៣។ ស្រូវដែលកម្ពុជា នាំចេញភាគច្រើនលើសលុប ត្រូវបានហូរទៅកាន់ប្រទេសវៀតណាម។បើតាមសេចក្តីរាយការណ៍ប្រទេសថៃនាំចេញអង្ករបាន១១លានតោនអង្គរក្នុងពេលខ្មែរសម្រេចមិនបាន១លានតោនផង។
