រដ្ឋមន្ត្រីក្រសួងព័ត៌មាន៖ចង់រិះគន់សេរីភាពសារពត៍មានកម្ពុជាសូមឲ្យក្រឡេកទៅមើលតំបន់ហ្កាហ្សា និងប្រទេសអ៊ុយក្រែន,
20-December-2024 / ផ្សេងៗ
ភ្នំពេញ៖ ក្នុងបំណងវាយបកការរិះគន់លើសេរីភាពសារពទត៍មាននៅកម្ពុជានៅព្រឹកថ្ងៃទី១៩ធ្នូលោក នេត្រ ភក្ត្រា រដ្ឋមន្ត្រីក្រសួងព័ត៌មានថាឲ្យគ្រប់មជ្ឈដ្ឋានជាពិសេសក្រុមប្រឆាំងក្រឡេកទៅមើលតំបន់ហ្កាហ្សា និងប្រទេសអ៊ុយក្រែន តើសេរីភាពការបញ្ចេញមតិ និងសេរីភាពសារព័ត៌មានមានកម្រិត យ៉ាងដូចម្តេច?។
លោករដ្ឋមន្ត្រីក្រសួងពត៍មានអះអាងថា «សេរីភាពសារព័ត៌មាន ជាកាតាលីករមួយដ៏ចាំបាច់សម្រាប់ការអភិវឌ្ឍសង្គមសេដ្ឋកិច្ចរបស់កម្ពុជា។ សេរីភាពនេះ ត្រូវបានធានាដោយរដ្ឋធម្មនុញ្ញ នៃព្រះរាជាណាចក្រកម្ពុជា ច្បាប់ស្តីពីរបបសារព័ត៌មាន កម្ពុជា និងលិខិតបទដ្ឋានគតិយុត្តជាធរមានផ្សេងទៀត។ ដូច្នេះក្នុងក្របខណ្ឌ នៃការលើកកម្ពស់តម្លៃសង្គមប្រជាធិបតេយ្យនៅកម្ពុជា ការវាស់វែងស្ថានភាពសេរីភាពសារព័ត៌មាន បច្ចុប្បន្ននៅកម្ពុជាមានសារៈសំខាន់ណាស់ ដើម្បីឆ្លុះបញ្ចាំងអំពីលំហសេរីភាព នៃប្រព័ន្ធផ្សព្វផ្សាយសិទ្ធិ នៃការទទួលព័ត៌មាន តួនាទីរបស់សារព័ត៌មានវិជ្ជាជីវៈក្នុងការផ្តល់ចំណេះដឹង និងព័ត៌មានពិត និងជឿទុកចិត្តបានសម្រាប់ជាប្រយោជន៍ដល់ប្រជាជន អ្នកដឹកនាំ និងសង្គមជាតិទាំងមូល ក្នុងការធ្វើសេចក្តីសម្រេចចិត្ត និងរួមគ្នាកម្លាំងដើម្បីធានាកំណើនសេដ្ឋកិច្ច និងការអភិវឌ្ឍប្រកបដោយចីរភាព»។
លោកនេត្រភក្ត្រាបានសម្រួលការវាយបករបស់លោក ថា «អ្វីដែលយើងឃើញ ជារួមស្ថានភាពសេរីភាពសារព័ត៌មាន កម្ពុជាយើងមិនល្អឥតខ្ចោះនោះទេ ប៉ុន្តែបើសិនជាយើងប្រៀបធៀបជាមួយបណ្តាប្រទេសនៅក្នុងតំបន់របស់យើង កម្ពុជា ក៏មិនមែនជាសិស្សអាក្រក់នោះទេ ពោលជាសិស្សល្អមួយនៅក្នុងក្របខណ្ឌសេរីភាព នៃការបញ្ចេញមតិ និងសេរីភាពសារព័ត៌មាន»។
សូមបញ្ជាក់ថានៅថ្ងៃទី១៩ ខែធ្នូ ឆ្នាំ២០២៤ក្រសួងព័ត៌មាន បានសហការជាមួយអង្គការយូណេស្កូ (UNESCO) បានរៀបចំសន្និសីទស្ដីពីការអភិវឌ្ឍប្រព័ន្ធផ្សព្វផ្សាយលើកទី២ ក្រោមប្រធានបទ «លើកកម្ពស់សេរីភាពក្នុងការបញ្ចេញមតិ ក្នុងយុគសម័យឌីជីថល»។សន្និសីទស្តីពីការអភិវឌ្ឍប្រព័ន្ធផ្សព្វផ្សាយលើកទី២នេះនឹងរៀបចំឡើងក្នុងគោលបំណងបង្កើតជាវេទិកាមួយសម្រាប់តួអង្គពាក់ព័ន្ធទាំងអស់ក្នុងប្រព័ន្ធផ្សព្វផ្សាយ ជជែកពិភាក្សា ផ្លាស់ប្តូរយោបល់ ចែករំលែក បទពិសោធន៍ និងការអនុវត្តល្អៗ ក៏ដូចជាលើកឡើងពីកាលានុវត្តភាព និងបញ្ហាប្រឈមដែលបាននិងកំពុង កើតមានឡើងក្នុងប្រព័ន្ធផ្សព្វផ្សាយក្នុងយុគសម័យឌីជីថលនេះ សំដៅរួមគ្នាស្វែងរកដំណោះស្រាយសបស្រម ដើម្បីបន្តលើកកម្ពស់ការអភិវឌ្ឍវិស័យព័ត៌មាន និងសោតទស្សន៍នៅកម្ពុជា។
ពិធីនេះធ្វើឡើងក្រោមអធិបតីភាពលោក នេត្រ ភក្ត្រា រដ្ឋមន្ត្រីក្រសួងព័ត៌មាន, លោក Sardar Almar តំណាងប្រចាំប្រទេសអង្គការយូណេស្កូ (UNESCO) និងតំណាស្ថានទូតស៊ុយអែត។ សន្និសីទនេះធ្វើឡើងរយៈពេល១ថ្ងៃពេញ ដោយមានកិច្ចពិភាក្សាក្រោមប្រធានបទសំខាន់ៗចំនួន៣ រួមមានទី១៖ ការគ្រប់គ្រងលំហព័ត៌មានប្រកបដោយប្រសិទ្ធភាព, ទី២៖ ការលើកកម្ពស់ និងពង្រឹងគុណភាពសារព័ត៌មាន និងទី៣៖ និរន្តរភាពប្រព័ន្ធផ្សព្វផ្សាយ និងបរិវិត្តកម្មឌីជីថល៖ បញ្ហាប្រឈម និងកាលានុវត្តភាពនៃភាពរីកចម្រើនផ្នែកបច្ចេកវិទ្យា។
យោងតាមរបាយការណ៍របស់អង្គការយូណេស្កូ វិស័យសារព័ត៌មានឯករាជ្យនៅទូទាំងពិភពលោក កំពុងស្ថិតនៅក្រោមការគំរាមកំហែង នៅក្នុងយុគសម័យឌីជីថលនេះ ដែលផ្សំឡើងដោយការកើនឡើងយ៉ាងខ្លាំងនៃការបង្ក្រាបលើប្រព័ន្ធផ្សព្វផ្សាយ ដោយអ្នកសារព័ត៌មានជាស្ត្រី ចំនួន៣០% បានរាយការណ៍ពីបទពិសោធន៍ក្នុងការដាក់ពិរុទ្ធខ្លួនឯង, ការរីករាលដាលនៃព័ត៌មានមិនពិតព័ត៌មានក្លែងបន្លំ និងពាក្យស្អប់តាមអ៊ីនធឺណិតកាន់តែធ្ងន់ធ្ងរ ដោយសារកង្វះ អក្ខរកម្មឌីជីថល និងប្រព័ន្ធផ្សព្វផ្សាយរួមជាមួយ និងការប្រើប្រាស់បច្ចេកវិទ្យាឌីជីថលដោយអសីលធម៌ រួមមានការប្រើប្រាស់បញ្ញាសិប្បនិមិត្តការបាត់បង់ជំនឿទុកចិត្តរបស់សាធារណជនទៅលើប្រព័ន្ធផ្សព្វផ្សាយ និងព័ត៌មាន និងការធ្លាក់ចុះនៃនិរន្តភាពរបស់វិស័យសារព័ត៌មាន។
លោកនេត្រ ភក្ត្រាបានឲ្យដឹងថា៖តាមរបាយការណ៍ស្ទង់មតិរបស់ក្រសួងព័ត៌មាន ដែលបានជួបសម្ភាសជាមួយអ្នកសារព័ត៌មាន៣៤១នាក់ តាមបណ្ដារាជធានី-ខេត្តទាំង២៥ ទូទាំងប្រទេស បានបញ្ជាក់ថា ៧៩,៨% បានលើកឡើងថា សេរីភាពសារព័ត៌មាន នៅកម្ពុជាមានភាពល្អប្រសើរ។ «នេះជាចំណុចមួយដែលយើងត្រូវមើលព្រៃទាំងមូល ក៏ប៉ុន្តែយើងមិនត្រូវមើលព្រៃតែ១ដើម នៅក្នុងក្របខណ្ឌសេរីភាពសារព័ត៌មាននោះទេ»។
លោករដ្ឋមន្ត្រីក្រសួងព័ត៌មាន បានស្នើសុំឱ្យអង្គការ មិនមែនរដ្ឋាភិបាលខ្លះដែលធ្វើកិច្ចការងារលើផ្នែកសេរីភាពសារព័ត៌មាន សូមឱ្យយកសុភវិនិច្ឆ័យដាក់នៅ ក្នុងក្របខណ្ឌ នៃការវាយតម្លៃ ហើយកុំគិតថាឱ្យតែប៉ះអ្នកសារព័ត៌មាន សុទ្ធតែសេរិភាពនៃការបញ្ចេញមតិ។ ត្រង់ចំណុចនេះយើងអាចចោទជាសំណួរថា បើគាត់ទៅកំហែងទារប្រាក់ ទៅកំហែងហែកកេរ្តិ៍ ដើម្បីបានប្រាក់ តើនេះជាសេរីភាពនៃការបញ្ចេញមតិ ឬទេ? ឬជាបទល្មើសព្រហ្មទណ្ឌ ហើយនេះជាចំណុចមួយដែលឈរនៅលើមូលដ្ឋាន នៃសូចលនាករត្រឹមត្រូវទៅលើការវាយតម្លៃ ទើបធ្វើឱ្យការវាយតម្លៃរួមនៃរបាយការណ៍របស់ខ្លួនត្រឹមត្រូវ។
សហព័ន្ធអ្នកកាសែតអន្តរជាតិ (IFJ) បាននិយាយនៅថ្ងៃអង្គារ ទី១០ ខែធ្នូថា ក្នុងឆ្នាំ២០២៤ មានអ្នកកាសែត សរុប១០៤នាក់ ត្រូវបានសម្លាប់ នៅជុំវិញពិភពលោក ក្នុងចំណោមនោះ ជាងពាក់កណ្តាល គឺនៅតំបន់ហ្កាហ្សា។ IFJ បានប្រាប់ថា តួលេខឆ្នាំ២០២៤នេះ គឺថយចុះពីតួលេខឆ្នាំ២០២៣ ដែលមានអ្នកកាសែតស្លាប់ ១២៩នាក់ ប៉ុន្តែវានៅតែជាឆ្នាំ ដ៏អាក្រក់បំផុតមួយ ក្នុងកំណត់ត្រា។ ក្នុងចំណោមនោះ អ្នកកាសែតប៉ាឡេស្ទីន៥៥នាក់ ត្រូវបានសម្លាប់ក្នុងឆ្នាំ២០២៤ ចំពោះមុខ សង្គ្រាមរបស់អ៉ីស្រាអែល ប្រឆាំងក្រុមហាម៉ាស នៅហ្កាហ្សា។នៅអឺរ៉ុប សង្គ្រាមអ៊ុយក្រែន បានបន្តសម្លាប់អ្នកកាសែត៤នាក់ទៀត ក្នុងឆ្នាំនេះ។
