អាមេរិកបារាំងបាត់សម្ពន្ធមិត្តទៀតមួយនៅទ្វីបអាហ្វ្រិកដោយសារុស្ស៊ី
18-March-2024 / ព័ត៌មានអន្តរជាតិ
ប្រទេសនីហ្សេ៖កាលពីថ្ងៃទី ១៦មីនា ប្រទេសនីហ្សេ(Niger) បានប្រកាសថា ខ្លួននឹងបញ្ចប់កិច្ចព្រមព្រៀងដែលអនុញ្ញាតឱ្យទាហានអាមេរិក និងបុគ្គលិកស៊ីវិលធ្វើប្រតិបត្តិការនៅក្នុងប្រទេសនេះចាប់តាំងពីឆ្នាំ ២០១២ ។នីហ្សេគឺជាដៃគូដ៏សំខាន់ក្នុងប្រតិបត្តិការប្រឆាំងភេរវកម្មរបស់សហរដ្ឋអាមេរិកនៅក្នុងតំបន់អស់រយៈពេលជិតមួយទសវត្សរ៍មកហើយ។ ការប្រកាសនេះបានធ្វើឡើងប៉ុន្មានថ្ងៃបន្ទាប់ពីមានជំនួបតានតឹងរវាងរដ្ឋាភិបាលយោធានីហ្សេ និងមន្ត្រីការទូត និងយោធាអាមេរិក។ រដ្ឋាភិបាលយោធានីហ្សេ បានឡើងកាន់អំណាចបន្ទាប់ពីរដ្ឋប្រហារទម្លាក់រដ្ឋាភិបាលស៊ីវីលនៅខែកក្កដា ឆ្នាំ២០២៣។
នៅក្នុងកិច្ចប្រជុំនោះ គណៈប្រតិភូអាមេរិកបានសម្តែងការព្រួយបារម្ភអំពីវត្តមានយោធាដែលកំពុងកើនឡើងរបស់រុស្ស៊ីនៅក្នុងប្រទេសនីហ្សេ អំពីអនាគតនៃមូលដ្ឋានទ័ពអាកាសលេខ ១០១ ក្នុងរដ្ឋធានីនីហ្សេ និងលទ្ធភាពដែលអាកាសយានដ្ឋាននេះនឹងត្រូវផ្ទេរសម្រាប់ប្រទេសរុស្ស៊ី នេះបើតាម CNN ដកស្រង់សម្តីមន្ត្រីបាននិយាយ។លោកវរសេនីយ៍ឯក Amadou Abdramane – អ្នកនាំពាក្យកងទ័ពនីហ្សេបានប្រកាសនៅថ្ងៃទី ១៦ ខែមីនា ថា“ក្នុងការជ្រើសរើសដៃគូការទូត យោធា និងជាដៃគូយុទ្ធសាស្ត្រ រដ្ឋាភិបាលនីហ្សេមានការសោកស្តាយដែលគណៈប្រតិភូអាមេរិកបដិសេធប្រជាជននីហ្សេនូវសិទ្ធិអធិបតេយ្យភាពក្នុងការជ្រើសរើសដៃគូ និងប្រភេទនៃភាពជាដៃគូដែលពិតជាជួយយើងប្រយុទ្ធប្រឆាំងនឹងអំពើភេរវកម្ម ទោះបីជាសហរដ្ឋអាមេរិកបានសម្រេចចិត្តជាឯកតោភាគីដើម្បីបញ្ឈប់ក៏ដោយ។
កិច្ចសហប្រតិបត្តិការយោធាកាន់តែជិតស្និទ្ធរវាងរុស្ស៊ី និងនីហ្សេ គឺជាមូលហេតុធំបំផុតនៃជម្លោះរវាងសហរដ្ឋអាមេរិក និងរដ្ឋាភិបាលយោធានីហ្សេ។ ក្រសួងការពារជាតិរុស្ស៊ីបាននិយាយនៅពេលនោះថា កាលពីខែមករាកន្លងទៅ រុស្ស៊ី និងនីហ្សេ បានយល់ព្រមបង្កើនកិច្ចសហប្រតិបត្តិការយោធា។តាមពន្យល់របស់អ្នកនាំពាក្យរបបយោធានីហ្សេបញ្ជាក់ថា៖ កិច្ចព្រមព្រៀងស្តីពីសហប្រតិបត្តិការយោធាដែលនីហ្សេ និងអាមេរិក បានចុះហត្ថលេខា តាំងពីឆ្នាំ ២០១២ មានលក្ខណៈលំអៀង មិនយុត្តិធម៌ ហើយនិងមិនឆ្លើយតបទៅនឹងការទន្ទឹងចង់បានរបស់ប្រជាជននីហ្សេ។ ទៅតាមកិច្ចព្រមព្រៀងយោធាជាមួយនីហ្សេ ឆ្នាំ ២០១២ អាមេរិកមានទ័ពរបស់ខ្លួន នៅនីហ្សេ ប្រមាណ ១០០០នាក់ដែលប្រចាំការនៅមូលដ្ឋានទ័ពអាកាសដ្រូន។
មូលដ្ឋានទ័ពអាកាសដែលអាមេរិកបានចំណាយលុយ១០០លានដុល្លារសាងសង់ នៅវាលខ្សាច់ Agadez សម្រាប់ទុកប្រយុទ្ធប្រឆាំងនឹងក្រុមភេរវនិយម។ ធ្លាប់ចាប់ដៃសហការជាមួយប្រទេសនៅតំបន់អាហ្វ្រិកខាងលិច និងបារាំង ទាហានអាមេរិកមានបេសកកម្មចូលរួមបណ្តុះបណ្តាលទាហានអាហ្វ្រិក និងប្រយុទ្ធប្រឆាំងនឹងក្រុមជីហាតជ្រុលនិយម ក្រុមអាល់កៃដា នៅតំបន់សាហ៊ែល។ ប៉ុន្តែ អាមេរិកបានសម្រេចកាត់បន្ថយសកម្មភាពយោធារបស់ខ្លួននៅនីហ្សេ ចាប់តាំងពីពួកយោធាធ្វើរដ្ឋប្រហារ និងចាប់ឃុំប្រធានាធិបតី លោកបាហ្សូម។
សូមបញ្ជាក់ថា ផ្ទុយពីបារាំងដែលប្រកាន់ជំហរតឹងរ៉ឹង បរិហាររដ្ឋប្រហាររបស់មេដឹកនាំយោធានីហ្សេ អាមេរិកដែលធ្លាប់មានទំនាក់ទំនងល្អជាមួយយោធានីហ្សេ នៅតែបង្ហាញសុទិដ្ឋិនិយម ដោយប្រកាសបន្តរក្សាវត្តមានទ័ពរបស់ខ្លួននៅនីហ្សេ ក្នុងក្តីសង្ឃឹមទាមទារឲ្យពួកយោធាដោះលែងប្រធានាធិបតីស្របច្បាប់ និងរៀបចំការបោះឆ្នោត។ ប៉ុន្តែ ក្តីសង្ឃឹមរបស់អាមេរិកកាន់តែរួញតូច បន្ទាប់ពីអាមេរិកសង្កេតឃើញថា នីហ្សេក្រោមការដឹកនាំរបស់របបសឹកមិនផ្លាស់ប្តូរជំហរ។ ផ្ទុយទៅវិញ កាន់តែដើរចាកឆ្ងាយពីលោកខាងលិច និងងាកបែរទៅរករុស្ស៊ី និងអ៊ីរ៉ង់ ដែលធ្វើឲ្យអាមេរិកមិនសប្បាយចិត្ត។
តាមអ្នកនាំពាក្យ នៅក្នុងជំនួបនៅទីក្រុងនីអាមេនៅសប្តាហ៍នេះ អាមេរិកបានចោទប្រកាន់នីហ្សេថា បានចុះកិច្ចព្រមព្រៀងសម្ងាត់ជាមួយរុស្ស៊ីនៅក្នុងវិស័យកងទ័ព ហើយនិងការធ្វើអាជីវកម្មអ៊ុយរ៉ានីញ៉ូមជាមួយអ៊ីរ៉ង់។ ភាគីអាមេរិកទំនងនិយាយយោងដល់ទស្សនកិច្ចរបស់ប្រមុខរដ្ឋាភិបាលនីហ្សេ នៅអ៊ីរ៉ង់ តួកគី និងនៅរុស្ស៊ី នៅដើមឆ្នាំនេះ។
