សម្តេចក្រឡាហោម៖លោក ស្វាយ សំអ៊ាង អភិបាលខេត្តមណ្ឌលគិរីមិនបង្ក្រាបបទល្មើសព្រៃឈើ..អាចជ្រុះដំណែង?!
24-September-2018 / ព័ត៌មានជាតិ
ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានស្តីបន្ទោសចំៗ លោក ស្វាយ សំអ៊ាង អភិបាលខេត្តមណ្ឌលគិរី រឿងបណ្តែតបណ្តោយឲ្យក្រុមឈ្មួញឧក្រិដ្ឋជនប្រព្រឹត្តបទល្មើសព្រៃឈើ នាំចេញទៅលក់នៅប្រទេសជិតខាង ។
ប្រសាសន៍សម្តេចក្រឡាហោម ស ខង បានធ្វើឡើង នៅក្នុងកិច្ចប្រជុំបូកសរុបសកម្មភាពការងារ និងលទ្ធផលនៃការបោះឆ្នោត ជ្រើសតាំងតំណាងរាស្ត្រ នីតិកាលទី៦ និងទិសដៅភារកិច្ចអនុវត្តបន្ត កាលពីថ្ងៃអាទិត្យ ទី២៣ ខែកញ្ញា ឆ្នាំ២០១៨ នៅសាលមហោស្រពស្ទឹងសង្កែ ខេត្តបាត់ដំបង។សម្តេចក្រឡាហោម ស ខេង បានឲ្យដឹងថា បទល្មើសព្រៃឈើ នៅតែបន្តកើតមាន នៅក្នុងទឹកដីខេត្តមណ្ឌលគិរី។ សកម្មភាពកាប់ឈើ ត្រូវបានក្រសួងបរិស្ថាន ថតរូបភាពពីលើអាកាស បន្ថែមលើសេចក្តីរាយការណ៍។
សម្តេចក្រឡាហោម ស ខេង បានបញ្ជាក់ថា បើសិនលោក ស្វាយ សំអ៊ាង អភិបាលខេត្តមណ្ឌលគិរី នៅមិនបង្ក្រាបបទល្មើសព្រៃឈើនោះទេ ប្រាកដជាមានបញ្ហាជាក់ជាមិនខាន។បើតាម
ក្រុមឈ្មួញ ដែលធ្លាប់រកស៊ីឈើ ក្នុងខេត្តមណ្ឌលគិរី និយាយថា ការជួញដូរ និងដឹកជញ្ជូនឈើ យកទៅលក់នៅប្រទេស វៀតណាម ពួកគេត្រូវរត់ការបើកផ្លូវជាមុនសិន ទើបអាចដឹកឈើទាំងនោះ ឆ្លងដែនបានមិនមែនទៅស្រួលៗទេ។ ពួកគេថា មានមន្ត្រីជាច្រើន ដែលតម្រូវឲ្យពួកគេ រត់ការបង់ផ្លូវ រួមមាន៖ នគរបាលការពារព្រំដែន, នគរបាលសេដ្ឋកិច្ចខេត្ត, នគរបាលសេដ្ឋកិច្ចក្រសួង, នគរបាលប៉ុស្តិ៍រដ្ឋបាល, នគរបាលវរៈព្រំដែន, មន្ត្រីយោធា (យោធាខេត្តយោធាព្រំដែន យោធាវរៈ យោធាស៊ើបការណ៍ យោធាអគ្គ) មន្ត្រីបរិស្ថាន (មន្ត្រីបរិស្ថានខេត្ត មន្ត្រីបរិស្ថានឧទ្យានុរក្ស មន្ត្រីបរិស្ថានស្រុក មន្ត្រីបរិស្ថានដែនជម្រក) មន្ត្រីមេព្រៃ (មន្ត្រីមេព្រៃ ខណ្ឌរដ្ឋបាលព្រៃឈើ មន្ត្រីមេព្រៃផ្នែករដ្ឋបាលព្រៃឈើ មន្ត្រីមេព្រៃសង្កាត់រដ្ឋព្រៃឈើ) មន្ត្រីសាលាស្រុក សហគមន៍ គយ កាសែត-ទូរទស្សន៍ មួយចំនួន…។
ប្រជាពលរដ្ឋរស់នៅខេត្តមណ្ឌលគិរី បានអះអាងថា តំបន់អូរហ៊ុចនៅស្រុកអូររាំង និងតំបន់ ស្រុកកែវសីមា ខេត្តមណ្ឌលគិរី នៅតែជាចំណុចដ៏រសើបបំផុត សម្រាប់ការជួញដូរឈើ ចេញទៅក្រៅប្រទេស។ តំបន់ នោះ មានទីតាំង មានព្រំប្រទល់ជាប់ព្រំដែនប្រទេសវៀតណាមដែលកាលពីពេលកន្លងមក បានកើតករណីជួញដូរបទល្មើសឈើប្រណិតជាច្រើនករណី រហូតដល់ជាប់ពាក់ព័ន្ធជាមួយមន្ត្រីតូចធំ នៅក្នុងខេត្តមណ្ឌលគិរី ដូចសម្លកំពឹសតែមិនទាន់ឃើញអ្នកណាមានទោសឡើយ។ អូរហ៊ុច និងអូរលែ កន្លែងកកើតបទល្មើសព្រៃឈើ រហូតដល់ក្រុមអ្នកពាក់ព័ន្ធបទល្មើសព្រៃឈើ ហ៊ានសម្លាប់មន្ត្រីអាវុធហត្ថលើផ្ទៃប្រទេស និងមន្ត្រីបរិស្ថានឲ្យបាត់បង់ជីវិតចំនួន ២នាក់កាលពីពេលថ្មីៗកន្លងទៅនេះ។
បច្ចុប្បន្នខែវស្សា ក្រុមឈ្មួញបានប្រើរូបភាព របៀបក្រពើបណ្តែតទឹក ( ឈើដាក់បណ្តែត ក្រោមទូក ) ពេលខ្លះ ឈ្មួញ យកឈើទម្លាក់ចូលក្នុងអូរ ហើយចងជាមួយប្ញស្សី ធ្វើជាក្បូន ដោយមានទូករបស់ឈ្មួញវៀតណាម ចាំសណ្តោងឆ្លងទៅប្រទេសវៀតណាម ដោយរលូន ។
ប្រភពឲ្យដឹងថា បទឈ្មើសព្រៃឈើ ដែលគេកំពុងលួចធ្វើសកម្មភាពទាំងនោះ រួមមាន នៅចំណុច បាយហន ចំណុចថ្មបីដុំ ចំណុចអូរកិល ចំណុចក្បាលអូរកិល និងអន្លួងស្រួយ។ ទីតាំងទាំង ៥ ចំណុចខាងលើ គ្រប់គ្រងដោយលោក យ៉ាត សុជា ដែលជាមនុស្សជំនិត របស់លោក ឡេង សុភាន់ មេបញ្ជាការវរៈ៦២១។
អ្នកពាក់ព័ន្ធករណីជួញដូរឈើឆ្លងដែន នៅខេត្តមណ្ឌលគិរី ទៅក្រៅប្រទេស នៅចំណុចខាងលើនេះ ត្រូវបានឲ្យ ដឹងថា ជាប់ពាក់ព័ន្ធ និងមេវរៈការពារព្រំដែនគោកលេខ ៦២១ ឈ្មោះ ឡេង សោភ័ណ- លោក សា ផល្លា និងលោក យ៉ាត សុខជា ដែលសុទ្ធសឹងជាមន្ដ្រីនគបាលឈរជើងនៅទីនោះ។នេះមិននិយាយពីច្រកណាំលៀរបស់លោកសំរឹទ្ធណយនិងច្រកដាក់ដាំនោះផង។
ប្រភពព័ត៌មានពីប្រជាពលរដ្ឋ បានបន្តថា បច្ចុប្បន្ន ឈ្មួញឈើទាំងនោះ មានក្បូនចំនួន ៥០ និងទូកចំនួន ១០ ហើយក្នុងទូក ១ គ្រឿង អូសបាន ៣ ក្បូន។
ដោយឡែក ខាងលោក ឌិន ប៊ុនធឿន នាយកដែនជម្រកសត្វព្រៃកែវសីមា បានទទួលស្គាល់ថា ពិតជាមានករណីជនល្មើស លួចប្រព្រឹត្តបទល្មើសព្រៃឈើ នៅចំណុចខ្សែក្រវ៉ាត់ព្រំដែនកម្ពុជា-វៀតណាម ពិតប្រាកដមែន។លោកបន្តថា តំបន់ព្រំដែន គឺពិបាកក្នុងការធ្វើការបង្ក្រាបបទល្មើសព្រៃឈើខ្លាំងណាស់ ព្រោះនៅជិតព្រំដែនប្រទេសទាំងពីរកម្ពុជា-វៀតណាម ។
ប្រជាសហគមន៍ការពារព្រៃឈើ ក្នុងស្រុកកោះញែក ស្រុកអូររាំង ស្រុកកែវសីមា និងស្រុកពេជ្រាដា ខេត្តមណ្ឌលគិរី បានអំពាវនាវឲ្យថ្នាក់ដឹកនាំក្រសួងកសិកម្ម ចាត់វិធានការទប់ស្កាត់អំពើពុករលួយ និងទង្វើមិនប្រក្រតីរបស់លោក សុង ឃាង ប្រធានមន្ទីរកសិកម្ម ខេត្តមណ្ឌលគិរី និងលោក អ៊ុ វណ្ណសុភគ៌ នាយខណ្ឌរដ្ឋបាលព្រៃឈើ ខេត្តមណ្ឌលគិរី ព្រោះសកម្មភាពកាប់ឈើ អារច្រៀកឈើ កែច្នៃឈើ និងដឹកជញ្ជូនឈើចេញទៅប្រទេសវៀតណាមយ៉ាងពេញបន្ទុក វាមិនអាចគ្មានការឃុបឃិតបើកដៃពីសំណាក់លោក សុង ឃាង ប្រធានមន្ទីរកសិកម្មខេត្តមណ្ឌលគិរី និងលោក អ៊ុ វណ្ណសុភគ៌ នាយខណ្ឌរដ្ឋបាលព្រៃឈើខេត្តមណ្ឌលគិរី ដែលគិតតែពីរឿងផលប្រយោជន៍ផ្ទាល់ខ្លួនន៉ឡើយ។
ប្រភពពីមន្ត្រីក្នុងមន្ទីរកសិកម្ម ខេត្តមណ្ឌលគិរី បានឲ្យដឹងថា ឈ្មួញឈើឈ្មោះ យាយម៉ាប់ អាចបើកសិប្បកម្មកែច្នៃឈើខុសច្បាប់ជាច្រើនកន្លែងនៅក្នុងតំបន់ដែនជម្រកសត្វព្រៃភ្នំព្រេច ស្រុកកោះញែក គឺដោយសារមានការឃុបឃិតបើកដៃពីសំណាក់លោក អ៊ុ វណ្ណសុភគ៌ នាយខណ្ឌរដ្ឋបាលព្រៃឈើខេត្តមណ្ឌលគិរី។
នៅក្នុងទឹកដីឃុំពូជ្រៃ ស្រុកពេជ្រាដា ខេត្តមណ្ឌលគិរី ក៏មានរោងសិប្បកម្មកែច្នៃឈើជាច្រើនកន្លែងរបស់ឈ្មួញឈ្មោះ យាយម៉ាប់ ផងដែរព្រោះឈ្មួញម្នាក់នេះជាប្រភពចំណូលដ៏សំខាន់របស់លោក អ៊ុ វណ្ណសុភគ៌ និងលោក សុង ឃាង ជាច្រើនឆ្នាំកន្លងមកហើយ។លោក ស្វាយ សំអ៊ាង អភិបាលខេត្តមណ្ឌលគិរី មិនអាចសុំការបកស្រាយបានទេ នៅព្រឹកថ្ងៃទី២៤ ខែកញ្ញា ឆ្នាំ២០១៨នេះ ដោយទូរស័ព្ទរបស់លោក មិនអាចទាក់ទងបាន។
