កម្ពុជាចង់បានការផ្តល់ប្រពន្ធ័អនុគ្រោះពន្ធអាមេរិកថាសភាកំពុងពិនិត្យមើលហើយ!
13-July-2022 / សេដ្ឋកិច្ច
ភ្នំពេញៈ លោកដានៀលក្រេថឹនប្រិង្ខ( Daniel J. Kritenbrinkឧបការីរដ្ឋមន្ត្រីក្រសួងការបរទេសសហរដ្ឋអាមេរិក ទទួលបន្ទុកកិច្ចការអាស៊ីបូព៌ា និងប៉ាស៊ីហ្វិកបានថ្លែងក្នុងសន្និសីទសារព័ត៌មានមួយ នៅថ្ងៃទី១៣ ខែកក្កដា ឆ្នាំ២០២២ ថា ប្រព័ន្ធអនុគ្រោះពន្ធទូទៅ(GSP) របស់សហរដ្ឋអាមេរិកសម្រាប់កម្ពុជា នៅតែស្ថិតក្រោមការពិនិត្យមើលឡើងវិញនៅឡើយដោយសភាអាមេរិក។ «ខ្ញុំសូមបញ្ជាក់ទៅកាន់មិត្តកម្ពុជាថា GSP នៅតែស្ថិតក្រោមការពិនិត្យមើលឡើងវិញដោយសភាអាមេរិកនៅឡើយទេ»។
លោកឧបការីរដ្ឋមន្ត្រីក្រសួងការបរទេសសហរដ្ឋអាមេរិក បានលើកឡើងដូចនេះក្រោយពេលជួបលោកប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេសកម្ពុជាកាលពិថ្ងៃទី១២កក្កដានិងស្របពេលដែលសុពលភាពប្រព័ន្ធអនុគ្រោះពន្ធ GSP របស់សហរដ្ឋអាមេរិកសម្រាប់កម្ពុជា មិនទាន់បានផ្ដល់សាជាថ្មីនៅឡើយ ចាប់តាំងពីបានផុតសុពលភាពកាលពីឆ្នាំ២០២០។ សេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជា ថ្ងៃទី១២ ខែកក្កដា ឆ្នាំ២០២២ បានបញ្ជាក់ថា កម្ពុជាចង់ឃើញអាមេរិកបន្តផ្តល់ GSP ដល់កម្ពុជាឡើងវិញ ដើម្បីជាប្រយោជន៍នៃទំនាក់ទំនងផ្នែកសេដ្ឋកិច្ច។ខណៈលោកឧបនាយករដ្ឋមន្ត្រីប្រាក់ សុខុន បានបង្ហាញក្តីសង្ឃឹមម្តងរួចមក កាលពីជាង២ខែមុនថា កម្ពុជានឹងបន្តទទួលបាន ប្រព័ន្ធអនុគ្រោះពន្ធនេះទៀត។
ការបង្ហាញក្តីសង្ឃឹមលោក ឧបនាយករដ្ឋមន្ត្រីខ្មែរនេះ បានធ្វើឡើងក្នុងជំនួបជាមួយលោក អេនតូនី ប្លីងខេន រដ្ឋមន្ត្រីការបរទេសសហរដ្ឋអាមេរិក នៅរដ្ឋធានីវ៉ាស៊ីនតោន កាលពីថ្ងៃ១៣ ឧសភា ក្នុងឱកាសចូលរួម កិច្ចប្រជុំកំពូលអាស៊ាន-អាមេរិក។ការរំលឹកឡើងវិញ របស់ប្រមុខការទូតខ្មែរនេះ ជាលើកទី២ហើយ ក្រោយពីកម្ពុជា បានផុតសុពលភាព កាលពីឆ្នាំ២០២០។GSP របស់សហរដ្ឋអាមេរិក បានផ្តល់លទ្ធភាពឱ្យកម្ពុជានាំទំនិញជាង ៥ ០០០មុខ ចេញទៅកាន់ទីផ្សារអាមេរិកដោយមិនបង់ពន្ធគយ។ ប៉ុន្តែប្រព័ន្ធអនុគ្រោះពន្ធនេះបានផុតសុពលភាពកាលពីឆ្នាំ២០២០ ហើយមិនទាន់បានផ្តល់សុពលភាពឡើងវិញទេចាប់តាំងពីឆ្នាំ២០២១មក។
ទោះជាមិនមានការផ្តល់ភាពអនុគ្រោះពន្ធក៏ដោយតែ បើយោងតាមស្ថិតិជញ្ជីងពាណិជ្ជកម្មទំនិញជាមួយប្រទេសសំខាន់ៗ ចាប់ពីខែមករា ដល់ខែមិថុនា ឆ្នាំ២០២២ របស់អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា រយៈពេល៦ខែ ឆ្នាំ២០២២ កម្ពុជានាំចេញទៅអាមេរិក សម្រេចបានក្នុងទំហំទឹកប្រាក់ចំនួនជិត ៥ពាន់លានដុល្លារ (4 648$)។ ចំនួននេះកើនឡើងចំនួន ៥៤ភាគរយ ធៀបរយៈពេលដូចគ្នាកាលពីឆ្នាំ២០២១ ដែលទំហំនាំចេញទំនិញគិតជាទឹកប្រាក់មានចំនួន ៣ ០១៩លានដុល្លារ។
លោក Daniel J. Kritenbrink ឧបការីរដ្ឋមន្ត្រីក្រសួងការបរទេសសហរដ្ឋអាមេរិក បានធ្វើដំណើរទស្សនកិច្ចមកកម្ពុជា និងជប៉ុន រយៈពេល ៥ថ្ងៃពីថ្ងៃទី១១ ដល់ថ្ងៃទី១៥ ខែកក្កដា ឆ្នាំ២០២២ ដើម្បីជួបពិភាក្សាគ្នាលើទំនាក់ទំនងទ្វេភាគីក្នុងនាមកម្ពុជាជាប្រធានអាស៊ាន និងពិភាក្សាជាមួយភាគីជប៉ុនផងដែរ។ពាក់ព័ន្ធនឹងដំណើរទស្សនកិច្ចនៅកម្ពុជា និងជប៉ុន របស់លោក Daniel J. Kritenbrink បានធ្វើឡើងចាប់ ។ ដំណើរទស្សនកិច្ចនេះ បានធ្វើឡើងមុនពេលដែលរដ្ឋមន្ត្រីក្រសួងការបរទេសសហរដ្ឋអាមេរិក គ្រោងនឹងមកទស្សនកិច្ចនៅកម្ពុជាក្នុងអំឡុងខែសីហា ឆ្នាំ២០២២.។
សូមបញ្ជាក់ថា GSP ជាប្រភេទប្រព័ន្ធអនុគ្រោះពន្ធ អនុញ្ញាតឲ្យមានការនាំចូលទំនិញ ដោយមិនបង់ពន្ធទៅកាន់អាមេរិក ។ កម្ពុជាទទួលបានប្រព័ន្ធអនុគ្រោះពន្ធ GSP ពីអាមេរិកតាំងឆ្នាំ១៩៩៧ ហើយអាច ឲ្យកម្ពុជានាំទំនិញ និងផលិតផលរាប់ពាន់មុខ ទៅកាន់ទីផ្សារអាមេរិក។លោក Daniel J. Kritenbrink ឧបការីរដ្ឋមន្ត្រីក្រសួងការបរទេសសហរដ្ឋអាមេរិក សម្រាប់កិច្ចការតំបន់អាស៊ីបូព៌ា និងប៉ាស៊ីហ្វិក ធ្លាប់បានធ្វើដំណើរមកប្រទេសកម្ពុជា និងឡាវ កាលពីពីថ្ងៃទី ១ ដល់ថ្ងៃទី ៧ ខែឧសភា ឆ្នាំ២០២២ កន្លងទៅនេះ។ ទស្សនកិច្ច កាលនោះ ផ្តោតលើការប្តេជ្ញាចិត្តរបស់ សហរដ្ឋអាមេរិក ចំពោះប្រទេសក្មេងជាងគេ និងមានភាពរស់រវើកបំផុត នៅក្នុងតំបន់នេះ ដោយពង្រឹងបន្ថែម នូវមជ្ឈភាពអាស៊ាន ភាពជាដៃគូ រវាងសហរដ្ឋអាមេរិក និងតំបន់ទន្លេមេគង្គ ដើម្បីដោះស្រាយបញ្ហាប្រឈមឆ្លងដែន និងជំរុញឲ្យអនុតំបន់ទន្លេមេគង្គ មានវិបុលភាព ភាពបើកចំហ និងសន្តិសុខ ច្រើនថែមទៀត។
