រដ្ឋលេខាធិកាក្រសួងការងារចង់រុញរឿងបាតុកម្មកស៊ីណូណាហ្កាចូលតុលាការកម្មករថានឹងបាតុកម្មរហូតចប់
28-December-2021 / ព័ត៌មានជាតិ
ភ្នំពេញៈ លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានឱ្យដឹងថា ក្រសួងនឹងបន្តសម្របសម្រួលវិវាទរបស់បុគ្គលិក និងក្រុមហ៊ុនណាហ្គាវើលដ៍បន្តទៀត ប៉ុន្តែបើក្នុងករណីមិនមានការចុះសម្រុងគ្នាភាគីទាំង ២ អាចបន្តដោះស្រាយតាមផ្លូវតុលាការ។
គិតត្រឹមថ្ងៃទី ២៨ ធ្នូ គឺជាថ្ងៃទី ១១ ហើយ ដែលអតីតបុគ្គលិកក្រុមហ៊ុនណាហ្គាវើលដ៍បានប្រមូលផ្តុំគ្នាធ្វើកូដកម្មអហិង្សានៅមុខអគារណាហ្គាទី ១ ដើម្បីទាមទារឱ្យបុគ្គលិក ៣៦៥ នាក់ ចូលធ្វើការវិញ និងបញ្ឈប់ការរើសអើងសហជីព បន្ទាប់ពីពួកគេត្រូវបានបញ្ឈប់ពីការងារកាលពីអំឡុងឆ្នាំ ២០២០ ដោយមូលហេតុវិបត្តិកូវីដ ១៩។
លោក ហេង សួរ បានប្រាប់សែតថា៖ «ក្នុងករណីមិនសះជាគឺភាគីទាំង ២ ត្រូវប្តឹងទៅតុលាការដែលជានីតិវិធីចុងក្រោយ។ អ្វីដែលនៅក្នុងដែនច្បាប់ការងារ គឺក្រសួងនឹងបន្តបំពេញ។ អ្វីដែលលើសពីដែននៃច្បាប់ស្តីពីការងារគឺអ្នកធ្វើ ឬអ្នកបំពេញនីតិវិធីបន្ទាប់គឺត្រូវបំពេញកាតព្វកិច្ចនោះ»។កាលពីថ្ងៃទី ២៣ ខែធ្នូ ឆ្នាំ ២០២១ ក្រសួងការងារបានបន្តជួបសម្របសម្រួលដោះស្រាយករណីវិវាទការងារនៅក្រុមហ៊ុន ណាហ្គាវើលដ៍ លីមីធីត ដោយមានលោកស្រី ឈឹម ស៊ីថរ និង លោកមេធាវី ហម ស៊ុនរិទ្ធិ ជាតំណាងភាគីកម្មករនិយោជិត និងលោក Mike Ngai ជាតំណាងភាគីក្រុមហ៊ុន។
សេចក្តីប្រកាសព័ត៌មានរបស់ក្រសួងការងារចេញផ្សាយកាលពីថ្ងៃ ២៣ ធ្នូបានឲ្យដឹងថ៖ភាគីទាំង ២ នៅតែមិនទាន់ព្រមព្រៀងក្នុងការបញ្ចប់ករណីវិវាទនៅឡើយ ដោយតំណាងក្រុមហ៊ុន នឹងពិចារណាលើរូបមន្តក្នុងការគណនាប្រាក់បំណាច់បញ្ចប់កិច្ចសន្យាការងារជូនកម្មករនិយោជិតចំនួន ៨៥ នាក់ ដែលបានឯកភាពទទួលយកការទូទាត់ប្រាក់បំណាច់បញ្ចប់កិច្ចសន្យាការងារ ស្របតាមច្បាប់ ក្រោមការសម្របសម្រួលរបស់ក្រសួង ប៉ុន្តែក្រុមហ៊ុនមិនព្រមទទួលយកកម្មករនិយោជិតដែលកំពុងតវ៉ាផ្សេងទៀតឱ្យចូលធ្វើការវិញទេ។
តំណាងកម្មករនិយោជិត ទាមទារឱ្យដោះស្រាយជាកញ្ចប់ ដោយតម្រូវឱ្យក្រុមហ៊ុន ទទួលយកកម្មករនិយោជិតដែលកំពុងតវ៉ាឱ្យចូលធ្វើការជាមុន ទើបកម្មករនិយោជិតចំនួន ៨៥ នាក់ផ្សេងទៀត ព្រមទទួលយកការទូទាត់ប្រាក់បំណាច់បញ្ចប់កិច្ចសន្យាការងារស្របតាមច្បាប់។ អ្នកស្រី ឈឹម សុខន លេខាសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ថ្លែងនៅថ្ងៃទី ២៧ ធ្នូថា ក្នុងករណីដែលការដោះស្រាយនៅក្នុងដំណាក់កាលអាជ្ញាកណ្តាលត្រូវបានបញ្ចប់បុគ្គលិកទាំងអស់នឹងជ្រើសរើសយកការធ្វើកូដកម្មអហិង្សា ដើម្បីទាមទារដំណោះស្រាយ។ អ្នកស្រីបន្តថាការដែលជ្រើសរើសយកការធ្វើកូដកម្មនេះ ដោយរំពឹងថា ស្ថាប័នពាក់ព័ន្ធ ជាពិសេសក្រុមហ៊ុននឹងព្រមទទួលយកពួកគេឱ្យចូលធ្វើការវិញ និងបញ្ឈប់ការរើសអើងសហជីពតទៅទៀត ហើយការទទួលបុគ្គលិកឱ្យចូលធ្វើការវិញ ក៏អាចបង្ហាញថា ក្រុមហ៊ុនបានគោរពទៅតាមច្បាប់ផងដែរ។
អ្នកស្រី ឈឹម សុខន ៖ «ខាងសហជីពខ្ញុំជ្រើសរើសយកការធ្វើកូដកម្មអហិង្សារហូតដល់មានដំណោះស្រាយតែម្តង។ យើងឃើញថា ការបញ្ឈប់ពួកយើងនេះ គឺមានលក្ខណៈមិនប្រក្រតី ដោយសារក្នុងចំណោម ៣៦៥ នាក់ គឺភាគច្រើន ជាសមាជិកសហជីព សកម្មជន និងថ្នាក់ដឹកនាំសហជីព។ យើងមើលឃើញថា ក្រុមហ៊ុនហ្នឹង គឺមានបំណងចង់រំលាយសហជីព»។កិច្ចចរចានេះ ធ្វើឡើងក្រោមការសម្របសម្រួលពីលោក ទេស រុក្ខាផល អគ្គលេខាធិការនៃអគ្គលេខាធិការដ្ឋានគណៈកម្មការសម្រាប់ដោះស្រាយបញ្ហាកូដកម្ម និងបាតុកម្ម នៅតាមគ្រប់មុខសញ្ញារបស់ក្រសួងការងារ និងបណ្តុះបណ្តាលវិជ្ជាជីវៈនៅឯទីស្តីការក្រសួងការងារ។ យ៉ាងណាក្តី ក្រសួងការងារបញ្ជាក់ថា ក្រសួងនឹងបន្តព្យាយាមធ្វើការសម្របសម្រួលដោះស្រាយករណីនេះបន្តទៀត ទៅតាមនីតិវិធីត្រឹមត្រូវនៃច្បាប់ នៅទីស្តីការក្រសួងការងារ។
លោក មឿន តុលា នាយកប្រតិបត្តិ មជ្ឈមណ្ឌលសម្ព័ន្ធភាពការងារ និងសិទ្ធិមនុស្សថ្លែងថា ភាគីក្រុមហ៊ុន គួរតែឆាប់បញ្ចប់វិវាទនេះ ដោយការទទួលយកបុគ្គលិកត្រឡប់មកវិញ ជាជាងបន្តជ្រើសរើសបុគ្គលិកថ្មី ដែលគ្មានបទពិសោធ។ លោក តុលា ក៏សង្ឃឹមដែរថា ស្ថាប័នពាក់ព័ន្ធនឹងពន្លឿនដោះស្រាយបញ្ហាដែលបុគ្គលិកក្រុមហ៊ុននេះ ទាមទារឱ្យបានឆាប់រហ័សចៀសវាងមានការបន្តការតវ៉ាបន្តទៀត ខណៈបុគ្គលិកប្រមូលផ្តុំគ្នាតវ៉ា គឺដើម្បីតែក្រពះតែប៉ុណ្ណោះ។សូមបញ្ជាក់ថាគេឃើញលោកឃួងស្រេងអភិបាលរជធនីភ្នំពេញបានដឹកនាំកម្លាំងទៅព្រមានអតីតបុគ្គលឹគក្រុមហ៊ុនកស៊ីណូណាហ្កាឲ្យបញ្ឈប់ការធ្វើបតុកម្មផងដែរដោយចាត់ទុកថាបាតុករយកទីសាធារណៈបង្កការរំខាន។
