ប្រទេសលោកខាងលិចមិនទទួលស្គាល់ការបោះឆ្នោតសមរង្ស៊ីទារឲ្យមានការចរចារតែលោសុខឥសាន្តថាគ្មានការចរចារអ្វីឡើយ!
ភ្នំពេញ៖ទោះជាមានសហគមន៍ប្រទេសលោកខាងលិចមួយចំនួនថ្កោលទោស ចំពោះការបោះឆ្នោតនេះ ហើយលោក សម រង្ស៊ី ប្រធានចលនាសង្គ្រោះជាតិ ទាមទារឲ្យមានការបើកការចរចានយោបាយក៏ដោយមិនបានធ្វើគណបក្សប្រជាជនដែលនឹងត្រូវបន្តដឹកនាំរាជរាដ្ឋាភិបាលអាណត្តិទី៦នៃរដ្ឋសភាខ្លាចញញើតឡើយ។នេះបើតាមលោក សុខ ឥសាន អ្នកនាំពាក្យគណបក្សប្រជាជនកម្ពុជាដែល ប្រតិកម្មតបវិញថាគ្មានការចរចា នយោបាយអ្វីឡើយ! ។
គណៈកម្មាធិការជាតិរៀបចំការបោះ ឆ្នោត (គ.ជ.ប) បានឲ្យដឹងជាបឋមថា ប្រជាពលរដ្ឋបានអញ្ជើញ ទៅបោះឆ្នោត ចំនួន៨២, ៨៩%។បន្ទាប់ពីការស្រង់លទ្ធផលបឋម នៅគ្រប់ការិយាល័យទាំង២២.៩៦៧ បង្ហាញថាគណបក្សប្រជាជនកម្ពុជាទទួលបានសំឡេងគាំទ្រយ៉ាងច្រើនលើសលប់។
ក្រៅពីចិនរុស្ស៊ីឥណ្ឌានិងប្រទេសអាស៊ានមួយចំនួនដូចជាវៀតណាមឡាវជាដើមដែលគាំទ្រការបោះឆ្នោតកាលពីថ្ងៃទី២៩កក្កដាប្រទេសដែលចាត់ទុកថាការបោះឆ្នោត មិនមាន ប្រជាធិតេយ្យមានដូចជា, ប្រទេសកាណាដា ,សហរដ្ឋអាមេរិក,អូស្ដ្រាលី ,សហភាពអឺរ៉ុបបារាំងអង់គ្លេសជាដើម។លោក សម រង្ស៊ី ប្រធានចលនាសង្គ្រោះជាតិនៅក្នុងកម្មវិធី Hello VOA កាលពីថ្ងៃទី១ សីហា បានចាត់ទុកថា ការបោះឆ្នោតជាតិកាលពីថ្ងៃទី២៩ ខែកក្កដា ជាការបោះឆ្នោតក្លែងក្លាយ និងបានចោទប្រកាន់ថា តួលេខអ្នកចេញមកបោះឆ្នោត ត្រូវបានបំប៉ោងខុសការពិត។
លោក សម រង្ស៊ី បានថ្លែងថាបើមានការចរចា ដើម្បីរកដំណោះស្រាយ នយោបាយ លើកនេះត្រូវតែមានការចូលរួម ពីសហគមន៍អន្តរជាតិ។លោក ធន សារ៉ាយ ប្រធានសមាគមអាដហុក (ADHOC)កាល ពីថ្ងៃទី៣ ខែសីហា បានសម្ដែងនូវការកោតសរសើរ ចំពោះ ប្រជាពលរដ្ឋជាម្ចាស់ឆ្នោត ពីគ្រប់និន្នាការ នយោបាយ ដែលហ៊ានបង្ហាញឆន្ទៈ នយោបាយរបស់ខ្លួន ដោយមិនខ្លាចពីការ គំរាមកំហែង និងគ្មានការ ភ័យខ្លាច ។
ទោះជាយ៉ាងណាលោកធនសារ៉ាយបញ្ជាក់ថា “កត្តាកំណត់នៃការវិនិច្ឆ័យ នៃការបោះឆ្នោតមួយដែលប្រព្រឹត្តទៅ ដោយសេរី ត្រឹមត្រូវ និងយុត្តធម៌ មិនមែនឋិតនៅ លើចំនួនភាគរយ នៃអ្នកដែលបានទៅបោះឆ្នោតនោះទេ គឺឋិតលើភាពសេរី នៃការចូលរួមប្រកួត នៃគូប្រកួតទាំងអស់ និងការចូលរួម របស់អ្នកបោះឆ្នោត ដោយមិនមានការភ័យខ្លាច នៅមានកត្តាអមដទៃទៀតជាច្រើន ដែលខ្ញុំសុំមិនយកមករៀបរាប់ ឲ្យអស់នៅក្នុង ពេលនេះទេ” ។
ប្រធានអាដហុកគូសបញ្ជាក់ថា “លទ្ធផលនៃការបោះឆ្នោតនេះ ក៏បានបង្ហាញយ៉ាច្បាស់ដែរថា ក្នុងចំណោមគណបក្សទាំង ១៩ ដែលចូលរួមប្រកួតក្នុងការបោះឆ្នោតកន្លងមកនេះពុំមានគណបក្សណាមួយទទួលបាន អាសនៈ ក្នុងសភានោះទេ ដូច្នេះមានន័យថា មានតែអតីត បក្សប្រឆាំងតែមួយគត់ ដែលជាគូប្រកួតជាមួយ បក្សកាន់អំណាចបាន និងដែលអាចឲ្យការ បោះ ឆ្នោតមួយ បង្ហាញពីឆន្ទៈពិតប្រាកដរបស់ ប្រជាជនទូទាំងប្រទេសបាន” ។
លោកបន្ថែមថា តាមការយល់ដឹងរបស់លោក នៅក្នុងពិភពលោក នាពេលបច្ចុប្បន្ននេះលោកពុំទាន់ឃើញប្រទេសណាមួយ ដែលប្រកាន់គោលការលទ្ធិប្រជាធិបតេយ្យ សេរីពហុបក្ស និងការបោះឆ្នោតដោយសេរី និងយុត្តធម៌ មានគណបក្សតែមួយ ក្ដោបក្ដាប់អំណាច ក្ដោបក្ដាប់អាសនៈ សភា ១០០% ដូចប្រទេសកម្ពុជានាពេលនេះទេ ។
លោកធនសារ៉ាយបានផ្តល់ជាអនុសាសន៍ថា ដើម្បីបញ្ចៀសនូវការខាតបង់ ផលប្រយោជន៍ជាតិ ពីការដាក់ទណ្ឌកម្ម នយោបាយ និងសេដ្ឋកិច្ចដ៏ច្រើន ដែលអាចនឹងកើតមាននា ពេលអនាគតមានតែអ្នក ដឹកនាំ នយោបាយទាំងពីរបក្ស ជាពិសេសពីបក្ស កាន់អំណាច គួរបន្ថយការប្រឈមមុខដាក់គ្នា ហើយខិតខំស្វែងរកដំណោះស្រាយ នយោបាយ ដើម្បីធ្វើឲ្យប្រសើរឡើងនូវ លទ្ធិប្រជាធិប តេយ្យ និងសិទ្ធិមនុស្ស ។
សម្រាប់ លោក សុខ ឥសាន អ្នកនាំពាក្យគណបក្សប្រជាជនកម្ពុជាវិញ បានលើកឡើងថានៅពេលដែលចាញ់ហៅមិនឮ ក្នុងឧបាយកលរបស់ខ្លួនទណ្ឌិត សម រង្ស៊ី បែរជាមកដាក់លក្ខណ្ឌឲ្យអ្នកឈ្នះ ធ្វើតាមខ្លួនទៅវិញ ទើបអាចមានរបស់ហៅថា ការចរចានយោបាយនោះ ។
លោកសុខឥសាននៅថ្ងៃទី៤សីហានេះបានលើកឡើងតាមរយៈបណ្ដាញសង្គមតេលេក្រាម ថា "សួរថាអ្នកណាចង់ចរចា ? ក្នុងខណៈដែលដំណើរការ លទ្ធិប្រជាធិបតេយ្យនៅកម្ពុជា បាននិងកំពុងរីកចម្រើន និងមានសក្តានុពល នោះ មានតែពង្រឹងថែមនិងធានាការអនុវត្តច្បាប់ ឲ្យមានប្រសិទ្ធភាព ។ ដូច្នេះគ្មានទេ ការសម្របសម្រួលនយោបាយ ដើម្បីឲ្យអ្នកប្រព្រឹត្តល្មើសច្បាប់បានរួចខ្លួននោះ ។រាល់ឧបាយកលនិងចេតនាចង់ឲ្យ មានដំណោះស្រាយនយោបាយ នៅក្នុងកម្ពុជាគឺជាការចង់បំផ្លាញ លទ្ធិប្រជាធិបតេយ្យ និងនីតិរដ្ឋ និងចង់ដាក់ជំនួសដោយវប្បធម៌នីទណ្ឌភាព នៅកម្ពុជាតែប៉ុណ្ណោះ ដែលមិនអាចនឹងកើតមានឡើងជាដាច់ខាត សូមមជ្ឈដ្ឋានប្រឆាំងទាំងឡាយ កុំស្រមើស្រមៃឲ្យសោះ ។
លោកបានលើកឡើងបន្ថែមថា គឺទណ្ឌិតសម រង្សី និងក្រុមឧទ្ទាមក្រៅច្បាប់ទេ ដែលបានបំផ្លាញម្តង ហើយម្តងទៀតនូវវប្បធម៌សន្ទនា ដែលធ្វើឲ្យមានការបិទផ្លូវចរចា នយោបាយនៅកម្ពុជានោះ តាមរយៈអំពើល្មើសច្បាប់ធ្ងន់ធ្ងរ មិនអាចអត់ឱនឲ្យបាន ។
អ្នកនាំពាក្យគណបក្សប្រជាជនកម្ពុជា បានលើកឡើងបន្តថាបណ្តាលទ្ធផលទាំងនោះ រួមមាន៖ បានខ្ទាតចេញពីប្រទេសទៅរស់នៅ និរទេសឯនាយសមុទ្រយ៉ាងកណ្តោចកណ្តែង ,បាត់ជំនឿទាំងស្រុងពីប្រជាជនកម្ពុជា មួយចំនួនដែលធ្លាប់គាំទ្រពីមុន , ទទួលបរាជ័យ ទាំងស្រុងចំពោះចេតនា ចង់បំផ្លាញការបោះឆ្នោតនាថ្ងៃទី ២៩ ខែ កក្កដា ២០១៨ ,ជីវិតនយោបាយ ត្រូវងាប់តៃហោងជាស្ថាពរ ទោះបី ខិតខំស្រែកដង្ហោយរកការសង្គ្រោះយ៉ាងណា ក៏ឥតបានការ ដែរ ។
